ចៅសង្កាត់រងទី២ នៃសង្កាត់អូរចារ ក្រុងបាត់ដំបង ខេត្តបាត់ដំបង ដែលមកពីគណបក្សភ្លើងទៀន អ្នកស្រី ស៊ិន ចាន់ពៅរ៉ូហ្សេត ព្រមានប្តឹងសមាជិកក្រុមប្រឹក្សាសង្កាត់អូរចារលេខរៀងទី៦ មកពីគណបក្សប្រជាជនកម្ពុជា អ្នកស្រី យាន រ៉ាស៊ីន ទៅសាលាដំបូងខេត្តបាត់ដំបង បន្ទាប់ពីមានជម្លោះដោយអំពើហិង្សាកាលពីពេលថ្មីៗនេះ។
អ្នកស្រី ស៊ិន ចាន់ពៅរ៉ូហ្សេត បានផ្សាយផ្ទាល់លើគណនីហ្វេសប៊ុករបស់ខ្លួនកាលពីថ្ងៃទី២៦ ខែតុលា ឆ្នាំ២០២២ នេះថា សមាជិកក្រុមប្រឹក្សាសង្កាត់អូរចារលេខរៀងទី៦ ដែលមកពីគណបក្សប្រជាជនកម្ពុជា អ្នកស្រី យាន រ៉ាស៊ីន បានប្រើអំពើហិង្សាមកលើខ្លួនដោយការច្របាច់ក និងប៉ុនប៉ងប្រើកៅអីវាយមកលើខ្លួន ដែលជាទង្វើបំពានលើច្បាប់យ៉ាងធ្ងន់ធ្ងរក្នុងនាមជាមន្ត្រីបម្រើសេវាសាធារណៈជូនពលរដ្ឋដូចគ្នា។
អ្នកស្រីទាមទារឱ្យក្រុមប្រឹក្សាសង្កាត់អូរចារ កោះប្រជុំជាបន្ទាន់ដើម្បីរកវិធីដោះស្រាយជុំវិញទំនាស់ដែលកើតឡើងដោយការប្រើអំពើហិង្សានេះ។
អ្នកស្រីអំពាវនាវឱ្យសមត្ថកិច្ចក្រុងបាត់ដំបង ចាត់វិធានការផ្លូវច្បាប់លើសមាជិកក្រុមប្រឹក្សាសង្កាត់អូរចាររូបនេះជាបន្ទាន់ ព្រោះថាអ្នកស្រី យាន រ៉ាស៊ីន បានប្រើអំពើហិង្សាទៅលើខ្លួនចំនួនពីរលើករួចមកហើយ។
អ្នកស្រី ស៊ិន ចាន់ពៅរ៉ូហ្សេត ជាសមាជិកមកពីគណបក្សភ្លើងទៀនដែលជាប់ឆ្នោតជាចៅសង្កាត់អូរចាររងទី២ ក្នុងក្រុងបាត់ដំបង ខេត្តបាត់ដំបង ក្រោយការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៥ កាលពីថ្ងៃទី៥ ខែមិថុនា ឆ្នាំ២០២២ កន្លងទៅនេះ ហើយចំណែកអ្នកស្រី យាន រ៉ាស៊ីន មកពីគណបក្សប្រជាជនកម្ពុជា ក៏បានជាប់ឆ្នោតជាសមាជិកក្រុមប្រឹក្សាសង្កាត់អូរចារលេខរៀងទី៦ ផងដែរ។
ស្ថាបនិកអង្គការអភិវឌ្ឍន៍ផ្នត់គំនិត លោក សេក សុជាតិ បានប្រាប់សារព័ត៌មាន The Cambodia Daily នៅថ្ងៃទី២៧ តុលា នេះថា ជម្លោះដែលកើតមានក្នុងចំណោមអ្នកតំណាងពលរដ្ឋបែបនេះ គឺជារូបភាពដ៏អាក្រក់មួយដែលបង្ហាញឱ្យឃើញថា ពួកគេមិនបានសហការគ្នាដើម្បីដោះស្រាយបញ្ហាជូនពលរដ្ឋទេ ប៉ុន្តែបែរជានាំគ្នាបង្កើតបញ្ហាបន្ថែមលើបញ្ហាដែលកើតមាននៅក្នុងសង្កាត់របស់ខ្លួនទៅវិញ។
លោក សេក សុជាតិ លើកឡើងថា ក្នុងនាមពួកគេជាមន្ត្រីដែលត្រូវបម្រើសេវាសាធារណៈជូនពលរដ្ឋនៅក្នុងសង្កាត់របស់ខ្លួន គួរប្រកួតប្រជែងគ្នាលើការអភិវឌ្ឍជូនពលរដ្ឋវិញ ទើបជារឿងត្រឹមត្រូវ។ លោកបន្តថា ពលរដ្ឋមានបញ្ហាច្រើនណាស់ដែលរង់ចាំពួកគេទៅដោះស្រាយ ប៉ុន្តែពួកគេបែរជាធ្វើឱ្យពលរដ្ឋដែលបោះឆ្នោតគាំទ្រខ្លួនខកចិត្តទៅវិញ។
ស្ថាបនិកអង្គការអភិវឌ្ឍន៍ផ្នត់គំនិតរូបនេះបញ្ជាក់ថា ការប្រើអំពើហិង្សាពីសំណាក់សមាជិកក្រុមប្រឹក្សាសង្កាត់អូរចារ ដែលមកពីគណបក្សប្រជាជនកម្ពុជាជាឧទាហរណ៍ជាក់ស្តែងមួយដែលបង្ហាញឱ្យឃើញថា ការបែកបាក់សាមគ្គី ការថយចុះនៃកម្លាំងផ្ទៃក្នុង គឺជាហេតុបណ្តាលឱ្យគូប្រជែងរបស់ខ្លួនហ៊ានធ្វើអ្វីៗគ្រប់បែបយ៉ាងរាប់ចាប់តាំងពីការមើលងាយ និងការប្រើអំពើហិង្សាដូចពេលនេះជាដើម។
កាលពីអាណត្តិទី៤ ឆ្នាំ២០១៧ អ្នកនាង ស៊ិន ចាន់ពៅរ៉ូហ្សេត បានជាប់ឆ្នោតជាចៅសង្កាត់អូរចារមកពីគណបក្សសង្គ្រោះជាតិ ប៉ុន្តែនៅពេលដែលគណបក្សភ្លើងទៀន សម្រេចដកខ្លួនចេញពីសម្ពន្ធភាពជាមួយគណបក្សសិទ្ធិមនុស្សរបស់លោក កឹម សុខា ទៅចូលរួមបោះឆ្នោតអាណត្តិទី៥ ឆ្នាំ២០២២ នេះ លទ្ធផលត្រូវប្រែក្រឡាស់ទាំងស្រុង ក្នុងនោះគណបក្សភ្លើងទៀន ទទួលបានសមាជិកតែ ៤រូបប៉ុណ្ណោះ គឺអ្នកស្រី ស៊ិន ចាន់ពៅរ៉ូហ្សេត ជាចៅសង្កាត់រងទី២ ដោយឡែក ៣នាក់ផ្សេងទៀតជាសមាជិកទាំងអស់ ប៉ុន្តែកាលពីឆ្នាំ២០១៧ អាណត្តិទី៤ គណបក្សសង្គ្រោះជាតិទទួលបានសមាជិករហូតដល់ទៅ ៧រូបក្នុងចំណោមសមាជិកសង្កាត់សរុបចំនួន ១១រូប ខណៈគណបក្សកាន់អំណាចទទួលបានតែសមាជិក ៤រូបប៉ុណ្ណោះ៕