នៅមុនជំនួបកំពូលនៃមេដឹកនាំប្រទេសសេដ្ឋកិច្ចជឿនលឿន G-20 ដែលនឹងប្រព្រឹត្តទៅនៅពាក់កណ្ដាលខែវិច្ឆិកា ខែក្រោយនេះ ប្រធានាធិបតីឥណ្ឌូនេស៊ី សង្ឃឹមថាតាមរយៈវេទិកានេះ អាចរុញឲ្យមេដឹកនាំនៃបណ្ដាប្រទេស G-20 ជួយសម្របសម្រួលឲ្យមានជំនួបរវាងប្រធានាធិបតីរុស្ស៊ី វ៉្លាឌីមៀរ ពូទីន និងសមភាគីអ៊ុយក្រែន វ៉ូឡូឌីមៀ ហ្សេឡេនស្គី (Volodymyr Zelenskyy) ឬយ៉ាងហោចណាស់ក៏មានជំនួបរវាងលោក ចូ បៃដិន និងលោក ពូទីន ដែរ។
បើតាមបណ្ដាញផ្សាយព័ត៌មាន Aljazeera ឲ្យដឹងថា ក្ដីសង្ឃឹមរបស់ប្រធានាធិបតីឥណ្ឌូនេស៊ី ដូចនេះ ក្រោយពេលលោកទទួលដំណឹងថា ទាំងលោក ពូទីន និងលោក ហ្សេឡេនស្គី ចង់មកចូលរួមកិច្ចប្រជុំនេះដោយផ្ទាល់។
ប៉ុន្តែបើនិយាយអំពីប្រធានាធិបតីចិនវិញ លោក ស៊ី ជីនពីង គឺប្រាកដណាស់លោកនឹងមានវត្តមាន ហើយបើលោក ស៊ី មានវត្តមាន គឺលោក ពូទីន អាចនឹងមានវត្តមានដែរ ព្រោះមេដឹកនាំប្រទេសមហាអំណាចពីរនេះតែងតែស្វែងរកការជួបគ្នាក្នុងវេទិកាបែបនេះ ប្រយោជន៍ដើម្បីឲ្យពួកគេបានបន្តពង្រីកចំណងមិត្តភាពទ្វេភាគីនឹងគ្នាថែមទៀត សំដៅធ្វើឲ្យមានតុល្យភាពជាមួយសហរដ្ឋអាមេរិក និងក្រុមបស្ចិមប្រទេស។
លោក Joko Widodo ប្រធានាធិបតីឥណ្ឌូនេស៊ី បានឲ្យដឹងថា បើតាមក្រសួងការបរទេសរុស្ស៊ី បានបញ្ជាក់ប្រាប់លោកថា មេដឹកនាំចិន និងរុស្ស៊ី នឹងមកចូលរួមកិច្ចប្រជុំកំពូលនេះ។ ប្រទេសឥណ្ឌូនេស៊ី នៅឆ្នាំ២០២២ នេះ គឺជាម្ចាស់ផ្ទះ ឬគេហៅថាប្រធានរៀបចំកិច្ចប្រជុំ G-20។
វេទិកានៃជំនួបកំពូល G-20 នឹងប្រព្រឹត្តទៅលើកោះបាលី រយៈពេល ២ថ្ងៃ ពីថ្ងៃទី១៥ ដល់ទី១៦ ខែវិច្ឆិកា។
ប្រទេសសេដ្ឋកិច្ចជឿនលឿនដែលមាន ២០ប្រទេស ហៅថា G-20 គឺមាន៖
- Argentina
- Australia
- Brazil
- Canada
- China
- France
- Germany
- India
- Indonesia
- Italy
- Japan
- Republic of Korea
- Mexico
- Russia
- Saudi Arabia
- South Africa
- Turkey
- the United Kingdom
- the United States
- និងសហភាពអឺរ៉ុប។
បើតាមចំនួននេះ គឺពុំមានប្រទេសអ៊ុយក្រែន នោះទេ។ ប្រទេសអ៊ុយក្រែន និងប្រទេសមួយចំនួនទៀត ត្រូវបានគេហៅថាជាប្រទេសសង្កេតការណ៍។ ប្រទេសទាំងនោះត្រូវបានស្នើឲ្យមកចូលរួមប្រជុំអាស្រ័យលើប្រទេសម្ចាស់ផ្ទះ។
សម្រាប់ប្រទេសអ៊ុយក្រែន ត្រូវបានឥណ្ឌូនេស៊ី ស្នើអញ្ជើញលោក ហ្សេឡេនស្គី មកចូលរួមប្រជុំក្នុងឋានៈជាអ្នកសង្កេតការណ៍។ ប៉ុន្តែបើតាម Aljazeera ឲ្យដឹងថា ប្រធានាធិបតីឥណ្ឌូនេស៊ី នឹងស្នើឲ្យលោក ហ្សេឡេនស្គី ឡើងថ្លែងអំពីស្ថានភាពសេដ្ឋកិច្ចរបស់ប្រទេសលោកនាពេលបច្ចុប្បន្ននេះ ដែលកំពុងជួបនូវវិនាសកម្មដ៏ធ្ងន់ធ្ងរដោយសារតែរុស្ស៊ីលើកទ័ពឈ្លានពាន។
រដ្ឋមន្ត្រីនៃប្រទេសឥណ្ឌូនេស៊ី ដែលទទួលបន្ទុករៀបចំវេទិកានេះ គឺលោក Luhut Pandjaitan បាននិយាយថា តាមរយៈវេទិកានេះ ឥណ្ឌូនេស៊ីចង់ធ្វើជាស្ពានផ្សារភ្ជាប់រវាងរុស្ស៊ី និងអ៊ុយក្រែន ហើយអាចឈានដល់ការចរចាដើម្បីបន្ថយកំដៅសង្គ្រាមនៅលើទឹកដីអ៊ុយក្រែន។
លោករដ្ឋមន្ត្រីរូបនេះអះអាងថា លោកប្រធានាធិបតី Joko Widodo ចង់ធ្វើជាអ្នកសម្របសម្រួលសំដៅឲ្យមានការចរចាសន្តិភាព ធ្វើឡើងដោយផ្ទាល់រវាងលោក ពូទីន និងលោក ហ្សេឡេនស្គី។
លោកសង្ឃឹមថា វេទិកា G-20 អាចនឹងក្លាយជាបរិយាកាសសន្តិភាពដើម្បីប្រទេសអ៊ុយក្រែន។ តែយ៉ាងណាក៏ដោយ រដ្ឋមន្ត្រីនៃប្រទេសឥណ្ឌូនេស៊ី ដែលទទួលបន្ទុករៀបចំវេទិកា G-20 រូបនេះ មិនបានបញ្ជាក់ថា លោក ហ្សេឡេនស្គី ប្រាកដជាមានវត្តមានផ្ទាល់ ឬយ៉ាងណានោះទេ ហើយសូម្បីលោក ចូ បៃដិន ក៏មិនប្រាកដថានឹងមកចូលរួមប្រជុំដោយផ្ទាល់ ឬយ៉ាងណានោះដែរ ខណៈលោក បៃដិន មិនចង់មានជំនួបអ្វីជាមួយនឹងលោក ពូទីន ផងនោះ។
គេរំពឹងថា លោក ហ្សេឡេនស្គី អាចធ្វើសេចក្ដីថ្លែងការណ៍តាមរយៈវីដេអូ Online ដែលផ្សាយចេញពីទីក្រុងគៀវ។ ទាំងលោក បៃដិន និងលោក ហ្សេឡេនស៊ី បានហៅលោក ពូទីន ថាជាឧក្រិដ្ឋជនសង្គ្រាម។
អ្នកសង្កេតការណ៍មើលឃើញថា ជំនួបលោក បៃដិន និងលោក ពូទីន បើជួបគ្នាគឺជារឿងដ៏កម្របំផុត ប៉ុន្តែក្នុងជំនួបនោះពិតណាស់ភាពតានតឹងនឹងផ្ទុះឡើង។
គេអាចគិតថា លោក បៃដិន នឹងដាក់លក្ខខណ្ឌឲ្យលោក ពូទីន ដកទ័ពរុស្ស៊ីចេញពីទឹកដីអ៊ុយក្រែន ហើយទទួលខុសត្រូវចំពោះវិនាសកម្មលើទឹកដីដែលរុស្ស៊ីឈ្លានពាន។ លោក បៃដិន អាចប្រាប់លោក ពូទីន ថា បើចាញ់សង្គ្រាមលើទឹកដីអ៊ុយក្រែន គឺមិនត្រូវបង្កសង្គ្រាមនុយក្លេអ៊ែរនោះទេ។
បើដូចនេះ លោក ពូទីន អាចងើបដើរចេញពីតុប្រជុំភ្លាម។ ដូច្នេះហើយបានជាក្រុមមន្ត្រីសេតវិមានប្រាប់ទៅមន្ត្រីឥណ្ឌូនេស៊ី ថា មិនត្រូវព្យាយាមឲ្យលោក ពូទីន មកជួបនឹងលោក បៃដិន នោះទេ លើកលែងតែលោក បៃដិន ចង់ឲ្យលោក ពូទីន ជួប ដើម្បីប្រាប់ទៅលោក ពូទីន ឱ្យដោះលែងពលរដ្ឋអាមេរិកាំងម្នាក់ គឺលោក Brittney Griner ដែលជាកីឡាករជើងឯកបាល់បោះអាមេរិក។
លោក Griner ត្រូវបានអាជ្ញាធររុស្ស៊ីចាប់ខ្លួនដោយចោទថា បុរសនេះជួញដូរសារធាតុញៀន ប្រេងរំអិល កញ្ឆា។ លោកត្រូវបានតុលាការរុស្ស៊ីកាត់ទោសឲ្យមានទោស ៩ឆ្នាំ។ រដ្ឋការលោក បៃដិន ច្រានចោលចំពោះសាលក្រមនេះ ដោយចាត់ទុកថាជាបទល្មើសសងសឹករបស់ក្រុងមូស្គូ។
ការចរចាដើម្បីបញ្ចប់សង្គ្រាមដោយផ្ដល់ឲ្យរុស្ស៊ីរួចខ្លួនករណីឈ្លានពានអ៊ុយក្រែន គឺទំនងមិនអាចទៅរួចនោះទេ ទោះបីមានជំនួបរវាងលោក បៃដិន និងលោក ពូទីន ឬរវាងលោក ពូទីន និងលោក ហ្សេឡេនស្គី ក៏ដោយ ព្រោះស្ថានការណ៍សង្គ្រាមនៅពេលនេះ សញ្ញាដែលរុស្ស៊ីចាញ់សង្គ្រាមលើទឹកដីអ៊ុយក្រែន មាននៅចំពោះមុខលោក ពូទីន រួចទៅហើយនោះ៕