26.8 C
Phnom Penh

កូរ៉េ​ខាងជើង​បាញ់​មីស៊ីល​២​គ្រាប់​ភ្លាមៗ​ក្រោយ​ពី​អាមេរិក​ព្រមាន​ផ្ដួល​រំលំ​របប​ក្រុង​ព្យុងយ៉ាង

ដោយ ឌឹ ខេមបូឌា ដេលី

បទវិភាគ

ដំណើរ​ទៅ​រក​សង្គ្រាម​នៅ​លើ​ឧបទ្វីប​កូរ៉េ មើល​ទៅ​កាន់តែ​ផុយ​ស្រួយ​ហើយ គឺ​នៅ​ថ្ងៃ​សុក្រ ទី​២៨ ខែ​តុលា នេះ រដ្ឋ​កុម្មុយនីស្ត​ផ្ដាច់ការ​កូរ៉េ​ខាងជើង បាន​បន្ត​បាញ់​មីស៊ីល​ផ្លោង​ប៉ាលិស្ទីច​ចំនួន ២​គ្រាប់​ជា​ថ្មី​ទៀត។

សារព័ត៌មាន​របស់​កូរ៉េ​ខាងត្បូង យ៊ុនហាប់ បាន​ចុះ​ផ្សាយ​ដំណឹង​របស់​ខ្លួន​ថា កាល​ដែល​កូរ៉េ​ខាងជើង​បាញ់​គ្រាប់​មីស៊ីល​ផ្លោង ២​គ្រាប់​ចុងក្រោយ​នៅ​ថ្ងៃ​នេះ គឺជា​ការ​ប្រឆាំង​នឹង​សហរដ្ឋ​អាមេរិក​ដែល​ព្រមាន​ក្រុង​ព្យុងយ៉ាង ថា​បើ​ហ៊ាន​បាញ់​ក្បាល​គ្រាប់​នុយក្លេអ៊ែរ គឺជា​ពេលវេលា​ដែល​ត្រូវ​បិទ​បញ្ចប់​របប​ផ្ដាច់ការ​មួយ​នៅ​អាស៊ី​ខាងកើត។ នៅ​ពេល​អាមេរិក​ព្រមាន​ដូចនេះ គឺ​មិន​បាន​មួយ​ថ្ងៃ ស្រាប់​តែ​កូរ៉េ​ខាងជើង​បាញ់​មីស៊ីល ២​គ្រាប់​នេះ ដោយ​វា​ធ្លាក់​ទៅ​ក្នុង​សមុទ្រ​ខាងកើត​នៃ​ឧបទ្វីប​សមុទ្រ​ជប៉ុន។

កងទ័ព​កូរ៉េ​ខាងត្បូង បាន​ឱ្យ​ដឹង​ថា កូរ៉េ​ខាងជើង​នៅ​ថ្ងៃ​សុក្រ​នេះ បាន​បាញ់​មីស៊ីល​បាលិស្ទីច ២​គ្រាប់ ធ្លាក់​ចូល​សមុទ្រ​ជប៉ុន។ តែ​កងទ័ព​កូរ៉េ​ខាងត្បូង មិន​បាន​បញ្ជាក់​ថា តើ​មីស៊ីល​ទាំង ២​គ្រាប់​នេះ​បាញ់​បាន​ចម្ងាយ​ប៉ុន្មាន​នោះ​ទេ ដោយ​គ្រាន់តែ​បញ្ជាក់​ថា​វា​ជា​មីស៊ីល​ប៉ាលីស្ទិច​រយៈ​ចម្ងាយ​មធ្យម ហើយ​វា​បាន​ហោះ​ធ្លាក់​ទៅ​សមុទ្រ​ជប៉ុន។

ការ​ធ្វើ​តេស្ដ​មីស៊ីល​នេះ កើតមាន​ឡើង​តែ ៤​ថ្ងៃ​ប៉ុណ្ណោះ​បន្ទាប់ពី​កូរ៉េ​ខាងជើង និង​កូរ៉េ​ខាងត្បូង បាន​បាញ់​គ្រាប់​កាំភ្លើង​ធំ​ព្រមាន​គ្នា​ទៅវិញ​ទៅមក​នៅ​តំបន់​ឆ្នេរ​ភាគ​ខាងលិច ក្នុង​ស្ថានភាព​តានតឹង​នៅ​លើ​តំបន់​ឧបទ្វីប​កូរ៉េ​ឡើង​កម្ដៅ​កាន់តែ​ខ្លាំង។

សហរដ្ឋ​អាមេរិក ជប៉ុន និង​កូរ៉េ​ខាងត្បូង បាន​រួម​គ្នា​ព្រមាន​កូរ៉េ​ខាងជើង​ថា សម្ពន្ធមិត្ត​ទាំង ៣ នឹង​ធ្វើ​ការ​ឆ្លើយតប​ក្នុង​កម្រិត​ធ្ងន់​មិន​ធ្លាប់​មាន​ពី​មុន​មក ដែល​សំដៅ​ប៉ុនប៉ង​ផ្ដួល​រំលំ​របប​ផ្ដាច់ការ​នៅ​ព្យុងយ៉ាង ប្រសិនបើ​កូរ៉េ​ខាងជើង​ហ៊ាន​ធ្វើ​តេស្ដ​បំផ្ទុះ​គ្រាប់បែក​នុយក្លេអ៊ែរ។

ការ​ព្រមាន​នេះ ធ្វើឡើង​នៅ​ថ្ងៃ​ពុធ ទី​២៦ ខែ​តុលា នេះ ចំពោះ​មុខ​ការ​បន្ត​បង្ហាញ​ក្តី​បារម្ភ​ដែល​ថា កូរ៉េ​ខាងជើង​អាច​នឹង​បន្ត​ការ​ធ្វើ​តេស្ដ​អាវុធ​នុយក្លេអ៊ែរ​ឡើងវិញ​ជា​លើកដំបូង​ចាប់តាំងពី​ឆ្នាំ​២០១៧ មក។

ក្នុង​សន្និសីទ​សារព័ត៌មាន​រួម​គ្នា​នៅ​ទីក្រុង​តូក្យូ ដោយ​មាន​វត្តមាន​អនុរដ្ឋមន្ត្រី​ការបរទេស​ជប៉ុន លោក Takeo Mor អនុរដ្ឋមន្ត្រី​ការបរទេស​អាមេរិក អ្នកស្រី Wendy Sherma និង​អនុរដ្ឋមន្ត្រី​ការបរទេស​កូរ៉េ​ខាងត្បូង Cho Hyun-dong ពួកគាត់​បាន​និយាយ​ថា៖ «ពួក​យើង​បាន​ឯកភាព​គ្នា​ថា ការ​ឆ្លើយតប​ក្នុង​កម្រិត​ធ្ងន់​មិន​ធ្លាប់​មាន នឹង​ចាំបាច់ ប្រសិនបើ​កូរ៉េ​ខាងជើង​ពិត​ជា​សម្រេច​ធ្វើ​តេស្ដ​អាវុធ​នុយក្លេអ៊ែរ​ជា​លើក​ទី​៧ របស់​ខ្លួន​ជា​ថ្មី​ម្ដង​ទៀត»

ក្រសួង​ការពារ​ជាតិ​អាមេរិក បាន​ព្រមាន​ធ្ងន់ៗ​ថា ការ​បាញ់​គ្រាប់​នុយក្លេអ៊ែរ ទោះ​ជា​ក្នុង​កម្រិត​ធ្វើ​តេស្ដ ក៏​ជា​ការ​ប្រឆាំង​មក​លើ​សហរដ្ឋ​អាមេរិក និង​សម្ពន្ធមិត្ត ដែល​នឹង​នាំ​ឲ្យ​ក្រុង​ព្យុងយ៉ាង ឆ្ពោះ​ទៅ​រក​ទី​អវសាន​នៃ​របប​ដឹកនាំ​ផ្ដាច់ការ​របស់​ខ្លួន។

ទីក្រុង​ព្យុងយ៉ាង កំពុង​ត្រូវ​គេ​សង្ស័យ​ថា អាច​នឹង​ធ្វើ​តេស្ដ​បំផ្ទុះ​អាវុធ​នុយក្លេអ៊ែរ​លើក​ទី​៧ របស់​ខ្លួន​ក្នុង​ពេល​ឆាប់ៗ​ខាងមុខ ខណៈ​ការ​ធ្វើ​តេស្ដ​លើក​ទី​៦ បាន​ប្រព្រឹត្ត​ទៅ​កាលពី​ឆ្នាំ​២០១៧។ ចំពោះ​ការ​បាញ់​មីស៊ីល​ផ្លោង​វិញ បើ​តាម​ការ​អះអាង​របស់​ក្រសួង​ការពារ​ជាតិ​កូរ៉េ​ខាងត្បូង នៅ​ក្នុង​ឆ្នាំ​២០២២ នេះ កូរ៉េ​ខាងជើង​បាន​បាញ់​មីស៊ីល​ផ្លោង​ប៉ាលិស្ទីច ៥០​លើក​ហើយ។

ក្នុង​ស្ថានភាព​ដ៏​តានតឹង​នេះ កូរ៉េ​ខាងត្បូង​នៅ​ថ្ងៃ​សុក្រ​នេះ បាន​ឱ្យ​ដឹង​ថា នៅ​សប្តាហ៍​ក្រោយ កងទ័ព​អាកាស​កូរ៉េ​ខាងត្បូង និង​សហរដ្ឋ​អាមេរិក រួម​គ្នា​ធ្វើ​សមយុទ្ធ​ទ័ព​អាកាស​ទ្រង់ទ្រាយ​ធំ​មួយ​ដែល​មាន​យន្តហោះ​ចម្បាំង​ប្រហែល ២៤០​គ្រឿង។ សមយុទ្ធ​នេះ​ត្រូវ​គេ​មើល​ឃើញ​ថា ដើម្បី​ផ្ទៀងផ្ទាត់​សមត្ថភាព​ធ្វើ​ប្រតិបត្តិការ​ពេល​មាន​សង្គ្រាម​ដែល​សម្ពន្ធមិត្ត​ទាំង​ពីរ​ត្រូវ​បញ្ចេញ​កម្លាំង​ទប់ទល់​នឹង​កូរ៉េ​ខាងជើង។

សមយុទ្ធ​ទ័ព​អាកាស​នេះ​មាន​ឈ្មោះ​ថា Vigilant Storm នឹង​ចាប់ផ្តើម​នៅ​ថ្ងៃ​ចន្ទ​ចុង​ខែ​នេះ ហើយ​មាន​រយៈពេល ៥​ថ្ងៃ។ ក្នុង​ប្រតិបត្តិការ​សមយុទ្ធ​នេះ កូរ៉េ​ខាងត្បូង​នឹង​ចល័ត​យន្តហោះ​ចម្បាំង​របស់​ខ្លួន​សរុប​ប្រមាណ ១៤០​គ្រឿង។

យន្តហោះ​ចម្បាំង​ទាំងនោះ​រួម​មាន យន្តហោះ F-35A យន្តហោះ​ចម្បាំង KF-16 និង F-15K ព្រមទាំង​យន្តហោះ​ផ្ទុក​ប្រេងសាំង KC-330។ ចំណែក​សហរដ្ឋ​អាមេរិក​នឹង​ចល័ត​យន្តហោះ​ប្រហែល ១០០​គ្រឿង រួម​មាន F-35B EA-18 និង KC-135 ជាដើម។

នេះ​ជា​លើកដំបូង​ហើយ​ដែល​កូរ៉េ​ខាងត្បូង និង​សហរដ្ឋ​អាមេរិក ធ្វើ​សមយុទ្ធ​ទ័ព​អាកាស​រួម​គ្នា​ក្នុង​ទម្រង់​ដ៏​ធំ​បែប​នេះ​ចាប់តាំងពី​ឆ្នាំ​២០១៥ ដែល​សមយុទ្ធ​ដូចនេះ​មាន​ឈ្មោះ​ថា Vigilant ACE។

គេ​នៅ​ចាំ​បាន​ថា នៅ​ពេល​ដែល​រុស្ស៊ី​បាន​បើក​ប្រតិបត្តិការ​សឹក​នៅ​ថ្ងៃទី​២៤ ខែ​កុម្ភៈ វាយលុក​លើ​ទឹកដី​អ៊ុយក្រែន គឺ​កូរ៉េ​ខាងជើង​ក៏​ចាប់ផ្ដើម​បង្ក​បញ្ហា​នៅ​លើ​ឧបទ្វីប​កូរ៉េ​ដែរ។

ប្រទេស​កុម្មុយនីស្ត​មួយ​នេះ​បាន​បាញ់​គ្រាប់​មីស៊ីល​ជា​ញឹកញាប់ ដែល​មួយ​សប្ដាហ៍​ម្ដង ឬ​ពីរ​សប្ដាហ៍​ម្ដង ដោយ​បាញ់​ចូល​ទៅ​សមុទ្រ​លឿង ហើយ​ពេល​ខ្លះ​គ្រាប់​មីស៊ីល​នោះ​ក៏​ហោះ​រំលង​លើ​ប្រទេស​ជប៉ុន​ទៀត​ផង។

កូរ៉េ​ខាងជើង បាន​បាញ់​មីស៊ីល​ដូចនេះ ហើយ​ក៏​គំរាម​ថា បើ​ខ្លួន​គេ​នៅតែ​ទទួល​រង​ទណ្ឌកម្ម​ពី​ពួក​បស្ចិម​ប្រទេស គឺ​ក្រុង​ព្យុងយ៉ាង​មិន​ចុះ​ញ៉ម​នោះ​ទេ គឺ​ត្រូវតែ​ធ្វើការ​សងសឹក គឺ​ដូច​ករណី​នៃ​ការ​បាញ់​មីស៊ីល​ជា​ញឹកញាប់​ទម្លាក់​ទៅ​សមុទ្រ។ ជាមួយ​គ្នា​នេះ កូរ៉េ​ខាងជើង​បាន​ចេញ​មុខ​ទទួលស្គាល់​សង្គ្រាម​ដែល​រុស្ស៊ី​ឈ្លានពាន​អ៊ុយក្រែន គឺជា​សង្គ្រាម​ដែល​រុស្ស៊ី​ការពារ​សិទ្ធិ​របស់​ខ្លួន ព្រោះតែ​រុស្ស៊ី​ប្រឈមមុខ​នឹង​ក្រុម​ណាតូ​គំរាមកំហែង​សន្តិសុខ​របស់​រុស្ស៊ី។

មិន​តែប៉ុណ្ណោះ ប្រទេស​កុម្មុយនីស្ត​មួយ​នេះ​បាន​ស្រែក​គំរាម​អាមេរិក និង​ពួក​បស្ចិម​ប្រទេស​កុំ​ឲ្យ​ផ្ដល់​អាវុធ​ទៅ​ឲ្យ​ប្រទេស​អ៊ុយក្រែន​ទៀត​ផង ហើយ​ថា​ខ្លួន​គេ​ក៏​មាន​សិទ្ធិ​ផ្ដល់​អាវុធ​ទៅ​ឲ្យ​រុស្ស៊ី​ផង​ដែរ។

តែ​អ្នក​សង្កេតការណ៍​មើល​ឃើញ​ទៀត​ថា កូរ៉េ​ខាងជើង​ដែល​បង្ក​បញ្ហា​អសន្តិសុខ​នៅ​លើ​ឧបទ្វីប​ដូចនេះ គឺ​រដ្ឋ​ផ្ដាច់ការ​មួយ​នេះ​ក៏​ចង់​ទាញ​អាមេរិក និង​ពួក​បស្ចិម​ប្រទេស​ឲ្យ​ងាក​ចេញពី​សង្គ្រាម​នៅ​លើ​ទឹកដី​អ៊ុយក្រែន​ផង​ដែរ។ ទំនង​ដូចនេះ​ហើយ​បាន​ជា​ជប៉ុន​ក្ដី ឬ​កូរ៉េ​ខាងត្បូង​ក្ដី ជាពិសេស​គឺ​អាមេរិក ព្យាយាម​អត់ធ្មត់ ដោយសារតែ​មហាអំណាច​មួយ​នេះ​កំពុងតែ​ជាប់​ដៃ​ក្នុង​ការ​ផ្ដល់​អាវុធ​យ៉ាង​ច្រើន​ទៅ​ឲ្យ​អ៊ុយក្រែន៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស