អតីតមេដឹកនាំប្រឆាំង លោក សម រង្ស៊ី ដែលកំពុងនិរទេសនៅក្រៅប្រទេស រិះគន់ថា មហាក្សត្រណាដែលចេះតែធ្វើតាមបញ្ជាជនផ្ដាច់ការ គឺតែងតែដួលរលំជាមួយគ្នាជាមិនខាន។
អតីតមេដឹកនាំប្រឆាំង លោក សម រង្ស៊ី បានសរសេរលើទំព័រហ្វេសប៊ុករបស់លោកនៅថ្ងៃទី៣១ ខែតុលា ឆ្នាំ២០២២ នេះថា អ្វីដែលសម្តេចព្រះនរោត្តម សីហនុ បានលើកឡើងកាលពីជាង ១០ឆ្នាំមុនពីវាសនាព្រះមហាក្សត្រអ៊ីតាលី Victor Emmanuel ទី៣ និងវាសនាមហាក្សត្រខ្មែរសព្វថ្ងៃ គឺព្រះបាទនរោត្តម សីហមុនី ប្រហែលជាមិនខុសគ្នានោះទេ នៅពេលដែលជនផ្ដាច់ការ គឺបុរសខ្លាំងកម្ពុជា លោក ហ៊ុន សែន ធ្លាក់ពីតំណែងនៅថ្ងៃណាមួយ។
អតីតមេដឹកនាំប្រឆាំងរូបនេះលើកឡើងថា សម្តេចព្រះនរោត្តម សីហនុ តែងតែរំឭកថា ព្រះមហាក្សត្រណាដែលចេះតែធ្វើតាមបញ្ជាជនផ្ដាច់ការ នៅទីបញ្ចប់នឹងត្រូវធ្លាក់ពីរាជបល្ល័ង្គ នៅពេលដែលជនផ្ដាច់ការក៏ធ្លាក់ពីអំណាច។ ជាឧទាហរណ៍ជាក់ស្តែង គឺមហាក្សត្រចុងក្រោយរបស់ប្រទេសអ៊ីតាលី ឈ្មោះ Victor Emmanuel ទី៣ នោះតែម្តង។
ស្តេចអង្គនេះធ្វើតាមបញ្ជាជនផ្ដាច់ការអ៊ីតាលី ឈ្មោះ Benito Mussolini រហូតធ្វើឱ្យបាត់បង់រាជបល្ល័ង្គក្រោយពីពលរដ្ឋអ៊ីតាលី បានបោះឆ្នោតរំលាយរបបរាជានិយមក្នុងឆ្នាំ១៩៤៦ និងបានថ្កោលទោសទ្រង់យ៉ាងធ្ងន់ធ្ងរដែលព្រះអង្គគ្មានភាពក្លាហាន មិនចេះគិតពីទុក្ខវេទនារបស់រាស្ត្រ ហើយសម្ងំសុខតែម្នាក់ឯងនៅក្នុងរាជវាំង នៅពេលដែលជនផ្ដាច់ការ Benito Mussolini ធ្វើបាបប្រជារាស្ត្រអ៊ីតាលី អស់រយៈពេលរាប់សិបឆ្នាំកន្លងមកនោះ។
លោក សម រង្ស៊ី បញ្ជាក់ថា តាមអ្វីដែលសម្តេចព្រះនរោត្តម សីហនុ ធ្លាប់បានលើកឡើង គឺបញ្ជាក់បានថា វាសនាមហាក្សត្រខ្មែរសព្វថ្ងៃ គឺព្រះបាទ នរោត្តម សីហមុនី ប្រហែលជាមិនខុសពីវាសនាស្តេចអ៊ីតាលី Victor Emmanuel ទី៣ នោះទេ នៅពេលដែលបុរសខ្លាំងលោក ហ៊ុន សែន ធ្លាក់ពីតំណែងជានាយករដ្ឋមន្ត្រីនៅពេលខាងមុខនោះ។
ការលើកឡើងរបស់អតីតមេដឹកនាំប្រឆាំង លោក សម រង្ស៊ី បែបនេះ រងនូវការរិះគន់យ៉ាងធ្ងន់ធ្ងរពីមជ្ឈដ្ឋានទូទៅ ដែលគេចាត់ទុកថាជាការប្រមាថមើលងាយអង្គព្រះមហាក្សត្រខ្មែរដែលការពារដោយរដ្ឋធម្មនុញ្ញដែលជាច្បាប់កំពូលរបស់ប្រទេស។
អនុប្រធានវេទិកាពលរដ្ឋ លោក ម៉ែន ណាត បានប្រាប់សារព័ត៌មាន The Cambodia Daily នៅថ្ងៃទី៣១ តុលា នេះថា ការលើកឡើងរបស់អតីតមេដឹកនាំប្រឆាំង លោក សម រង្ស៊ី ចំពោះព្រះមហាក្សត្រខ្មែរបែបនេះ មិនមានផលចំណេញសម្រាប់នយោបាយជាតិទៅរកការផ្សះផ្សាផង និងធ្វើឱ្យគាត់កាន់តែអស់ឥទ្ធិពលនយោបាយការទូតដែលជាកត្តាសម្រាប់ជួយឱ្យគាត់អាចវិលទៅរកឆាកនយោបាយនៅកម្ពុជា ដែលជាមូលដ្ឋានគ្រឹះរឹងមាំរបស់គាត់ផងដែរ។
លោក ម៉ែន ណាត លើកឡើងថា តំណាងប្រទេសលោកសេរីនឹងមិនគាំទ្ររបៀបធ្វើនយោបាយរបស់លោក សម រង្ស៊ី បែបនេះទេ ព្រោះថាល្បែងនយោបាយរបស់គាត់ គឺបានរំលោភទៅលើប្រមុខរដ្ឋរបស់ខ្លួន ដែលបានការពារដោយច្បាប់កំពូលរបស់ប្រទេស ដែលជាហេតុធ្វើឱ្យលោក ហ៊ុន សែន មានលេសគ្រប់គ្រាន់ក្នុងការប្រើអំណាច និងវិធានការច្បាប់ដែលស្ថិតក្រោមបញ្ជារបស់គាត់លើអតីតមេដឹកនាំបក្សប្រឆាំងរូបនេះគ្រប់ពេលវេលា។
អនុប្រធានវេទិកាពលរដ្ឋរូបនេះបញ្ជាក់ថា បើលោក សម រង្ស៊ី នៅមានគំនិតថាខ្លួនឯងជាអ្នកប្រជាធិបតេយ្យដឹកនាំនយោបាយដើម្បីជាតិ ដើម្បីទឹកដីបន្តទៀតនោះ គាត់មិនគួរធ្វើសកម្មភាពនយោបាយដោយការរំលោភបំពានច្បាប់ និងរំលោភព្រះមហាក្សត្រខ្មែរដូចលោក ហ៊ុន សែន ដែលធ្លាប់ធ្វើទេ។ លោកបន្តថា លោក សម រង្ស៊ី គួរតែធ្វើជាគំរូល្អសម្រាប់ពលរដ្ឋ និងកែប្រែរបៀបដឹកនាំនយោបាយរបស់ខ្លួនឱ្យស្របតាមរដ្ឋធម្មនុញ្ញ ដែលជាច្បាប់កំពូលរបស់ជាតិ នោះទើបជារឿងត្រឹមត្រូវ។
មាត្រា៧ នៃរដ្ឋធម្មនុញ្ញកម្ពុជា បានចែងយ៉ាងច្បាស់ថា ព្រះមហាក្សត្រខ្មែរមិនអាចនរណារំលោភបំពានបានឡើយ។
ក្រុមអ្នកសង្កេតការណ៍រិះគន់ថា នៅសល់ពេលមិនដល់មួយឆ្នាំទៀតទេ ការបោះឆ្នោតជាតិឆ្នាំ២០២៣ នឹងឈានចូលមកដល់ ដូច្នេះទាំងលោក ហ៊ុន សែន និងលោក សម រង្ស៊ី កំពុងនាំគ្នាប្រើល្បិចនយោបាយទុច្ចរិតរៀងៗខ្លួន ដើម្បីទាក់ទាញការចាប់អារម្មណ៍ពីពលរដ្ឋ បើទោះបីជាទង្វើរបស់ពួកគេបានរំលោភបំពានលើច្បាប់ ឬអង្គព្រះមហាក្សត្រខ្មែរដែលការពារដោយរដ្ឋធម្មនុញ្ញក៏ដោយ៕