អ្នកឃ្លាំមើលសង្គមអះអាងថា កម្ពុជានឹងខាតប្រយោជន៍ជាតិកាន់តែធំ បើនៅតែបន្តដឹកនាំនយោបាយដែលឃ្លាតចាកពីបំណងប្រទេសលោកសេរី ដែលតែងជំរុញឱ្យកម្ពុជាងាកទៅរកឯកភាពនយោបាយផ្ទៃក្នុងជាតិ ជាពិសេសបើកលំហសេរីភាពដើម្បីឱ្យលោក កឹម សុខា អាចចូលរួមការបោះឆ្នោតជាតិក្នុងឆ្នាំ២០២៣ ខាងមុខនេះ។
ស្ថាបនិកអង្គការអភិវឌ្ឍន៍ផ្នត់គំនិត លោក សេក សុជាតិ បានប្រាប់សារព័ត៌មាន The Cambodia Daily នៅថ្ងៃទី៣១ តុលា នេះថា ជារឿយៗ ទាំងសហភាពអឺរ៉ុប និងសហរដ្ឋអាមេរិក តែងតែជំរុញឱ្យកម្ពុជាអនុវត្តនូវគោលការណ៍ប្រជាធិបតេយ្យ គោរពសិទ្ធិមនុស្សតាមរយៈនៃការបើកលំហសេរីភាពដល់អ្នកនយោបាយ សកម្មជនសិទ្ធិមនុស្ស និងសកម្មជនសង្គមនានា ដើម្បីឱ្យពួកគេអាចចូលរួមកិច្ចការសង្គមជាតិឡើងវិញ ដែលស្របទៅនឹងរដ្ឋធម្មនុញ្ញរបស់ខ្លួនផង និងស្របតាមស្មារតីដើមនៃកិច្ចព្រមព្រៀងសន្តិភាពទីក្រុងប៉ារីស ឆ្នាំ១៩៩១ ផងនោះ។
ស្ថាបនិកអង្គការអភិវឌ្ឍន៍ផ្នត់គំនិតរូបនេះបញ្ជាក់ថា បើកម្ពុជាអនុវត្តដូចអ្វីដែលសហគមន៍អឺរ៉ុបចង់បាន កម្ពុជាមិនត្រឹមតែអាចផ្សះផ្សានយោបាយផ្ទៃក្នុងជាតិរបស់ខ្លួនបានទេ ថែមទាំងទទួលបានអត្ថប្រយោជន៍ពីសហភាពអឺរ៉ុបជាច្រើនទៀត ដូចជាប្រព័ន្ធអនុគ្រោះពន្ធ EBA ហើយអាមេរិកក៏នឹងអាចផ្តល់ប្រព័ន្ធអនុគ្រោះ GSP ដល់កម្ពុជាវិញដែរ។
កាលពីថ្ងៃសៅរ៍ ចុងសប្តាហ៍កន្លងទៅនេះ មេដឹកនាំបក្សប្រឆាំង លោក កឹម សុខា បានជួបពិភាក្សាការងារជាមួយឯកអគ្គរដ្ឋទូតសហភាពអឺរ៉ុបប្រចាំកម្ពុជា អ្នកស្រី Carmen Moreno នៅឯស្ថានទូតរបស់សហភាពអឺរ៉ុប ប្រចាំទីក្រុងភ្នំពេញ។
ប្រធានគណបក្សសង្គ្រោះជាតិ លោក កឹម សុខា បានបញ្ជាក់ថា ក្នុងជំនួបរវាងលោក និងអ្នកស្រី Carmen Moreno គឺបានពិភាក្សាគ្នាអំពីស្ថានការណ៍នានានៅកម្ពុជា អំពីបញ្ហាសិទ្ធិមនុស្ស និងលទ្ធិប្រជាធិបតេយ្យ ក៏ដូចជាករណីដំណើរការសវនាការ និងសិទ្ធិសេរីភាពរបស់លោកនៅពេលនេះផងដែរ។
ប្រធានអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន បានប្រាប់ក្រុមសារព័ត៌មានក្នុងស្រុកថា សំណុំរឿងរបស់លោក កឹម សុខា ស្ថិតក្នុងបន្ទុករបស់តុលាការ មិនពាក់ព័ន្ធជាមួយនឹងរដ្ឋាភិបាលឡើយ។ លោកបន្តថា លោក ហ៊ុន សែន មានអំណាចអាចស្នើទៅព្រះមហាក្សត្រដើម្បីលើកលែងទោសជនណាមួយដែលកំពុងជាប់បណ្តឹងតាមផ្លូវតុលាការ លុះត្រាតែតុលាការធ្វើកិច្ចការរបស់ខ្លួនចប់សិន។
កាលពីថ្ងៃទី៣១ ខែមីនា ឆ្នាំ២០២២ តំណាងសហភាពអឺរ៉ុប បានថ្លែងក្នុងសម័យប្រជុំពេញអង្គលើកទី៤៩ នៃក្រុមប្រឹក្សាសិទ្ធិមនុស្សអង្គការសហប្រជាជាតិ នៅទីក្រុងហ្សឺណែវ ប្រទេសស្វីស ក្នុងកិច្ចប្រជុំអន្តរសកម្មលើកទី៥០ ស្ដីពីស្ថានការណ៍សិទ្ធិមនុស្សនៅកម្ពុជា ថា កម្ពុជាគួរតែត្រូវបានបើកលំហឱ្យមេដឹកនាំបក្សប្រឆាំង លោក កឹម សុខា អាចចូលរួមការបោះឆ្នោតជាតិឆ្នាំ២០២៣ ឡើងវិញ ដើម្បីធានាការបោះឆ្នោតមួយដែលប្រកបទៅដោយសេរី ត្រឹមត្រូវ និងយុត្តិធម៌។
គេនៅមិនទាន់អាចសន្និដ្ឋានបាននៅឡើយទេថា លោក កឹម សុខា នឹងត្រូវតុលាការក្រុងភ្នំពេញទម្លាក់ចោលបទចោទប្រកាន់ ដើម្បីបើកសិទ្ធិសេរីភាពឱ្យលោកអាចវិលចូលឆាកនយោបាយវិញនៅមុនការបោះឆ្នោតជាតិនាខែកក្កដា ឆ្នាំ២០២៣ ខាងមុខនេះ ខណៈមជ្ឈដ្ឋានខ្លះរិះគន់ថា ការបិទបញ្ចប់ការសួររបស់តុលាការលើសំណុំរឿងរបស់លោកកាលពីពេលថ្មីៗនេះ គ្រាន់តែជាវិធីដោះទាល់របស់លោក ហ៊ុន សែន ដើម្បីបន្ធូរស្ថានការណ៍នៅមុនកិច្ចប្រជុំកំពូលអាស៊ាន-អឺរ៉ុបនៅដើមខែវិច្ឆិកា ឆ្នាំ២០២២ នេះប៉ុណ្ណោះ៕