នៅលើពិភពលោក គេសង្កេតឃើញឧបទ្ទវហេតុធម្មជាតិតែងកើតមាន ដូចជា ផ្ទុះភ្នំភ្លើង ផ្ទុះរលកយក្សស៊ូណាមិ ការរញ្ជួយដីបណ្ដាលឲ្យរលំអគារខ្ពស់ៗ ការរងគ្រោះដោយខ្យល់ព្យុះ និងទឹកជំនន់ជន់លិចខ្លាំង ដោយវាកើតឡើងជារៀងរាល់ឆ្នាំ។
តែនៅពេលចុងក្រោយនេះ គឺកើតមានសឹងតែដំណាលគ្នាដែលគេហៅថាជាសោកនាដកម្មដ៏អាក្រក់បំផុត ករណីផ្អើលជាន់គ្នាក្នុងហ្វូងមនុស្សណែនតាន់តាប់ ស្លាប់មនុស្ស ១៥៤នាក់នៅក្រុងសេអ៊ូល ប្រទេសកូរ៉េខាងត្បូង ក្នុងពិធីមួយដែលគេហៅថា បុណ្យហ័រឡូវីន កាលពីយប់ថ្ងៃសៅរ៍ ទី២៩ ខែតុលា។
ចំណែកនៅប្រទេសឥណ្ឌា នៅរដ្ឋគូចារ៉ាត់ ករណីបាក់ស្ពានមួយបានបណ្តាលឲ្យស្លាប់មនុស្សចំនួន ១៣២នាក់។ ឧបទ្ទវហេតុនេះ កើតឡើងកាលពីយប់ថ្ងៃអាទិត្យ ទី៣០ ខែតុលា។ ករណីគ្រោះថ្នាក់នេះ បានកើតឡើងក្នុងពេលដែលពលរដ្ឋឥណ្ឌា ប្រារព្ធពិធីបុណ្យទីវ៉ាលី ដែលជាបុណ្យដ៏សំខាន់មួយនៃសាសនាហិណ្ឌូ។
នៅក្នុងប្រទេសកូរ៉េខាងត្បូង ក្រុមអ្នកសង្គ្រោះបានឲ្យដឹងថា ក្នុងចំណោមអ្នកស្លាប់បាត់បង់ជីវិតភាគច្រើនជាយុវជនក្មេងៗ ដែលមានវ័យប្រមាណជាង ២០ឆ្នាំ។ អ្នកស្លាប់ក៏មានជនបរទេសដែរ។
តួលេខចុងក្រោយពីអាជ្ញាធរកូរ៉េខាងត្បូង បានបង្ហាញថា មនុស្សស្លាប់កើនដល់ទៅ ១៥៤នាក់ និង ៨២នាក់រងរបួស ក្នុងនោះ ១៩នាក់របួសធ្ងន់។ ក្នុងចំណោមអ្នកបាត់បង់ជីវិត ក៏មានជនបរទេសដែរ រួមមាន៖
- ជនជាតិចិន ៤នាក់
- អ៊ីរ៉ង់ ៤នាក់
- រុស្ស៊ី ៣នាក់
- អាមេរិក ១នាក់
- បារាំង ១នាក់
- អូស្ត្រាលី ១នាក់
- វៀតណាម ១នាក់
- អ៊ូបេគីស្ថាន ១នាក់
- ន័រវែស ១នាក់
- កាហ្សាក់ស្ថាន ១នាក់
- ស្រីលង្កា ១នាក់
- ថៃ ១នាក់
- និងអូស្ត្រាលី ១នាក់
ហើយជនបរទេសចុងក្រោយម្នាក់នៅមិនទាន់ដឹងអត្តសញ្ញាណជាជាតិសាសន៍អ្វីនោះទេ។ នេះបើតាមការចេញផ្សាយដោយទីភ្នាក់ងារព័ត៌មាន AFP នៅថ្ងៃចន្ទ ទី៣១ ខែតុលា នេះ។
ក្រោយពីទទួលដំណឹងដ៏រន្ធត់នេះ ប្រធានាធិបតីកូរ៉េខាងត្បូង លោក យូន ស៊ុកយុល បានចុះទៅកាន់កន្លែងកើតហេតុដោយផ្ទាល់នៅសង្កាត់អ៊ីតៃវុន។ រីឯអភិបាលក្រុងសេអ៊ូល ដែលកំពុងបំពេញទស្សនកិច្ចនៅទ្វីបអឺរ៉ុប ក៏បានត្រឡប់ទៅកូរ៉េ វិញជាបន្ទាន់ដែរ។
ទន្ទឹមនឹងគ្នានេះ ប្រធានាធិបតីសហរដ្ឋអាមេរិក ចិន បារាំង នាយករដ្ឋមន្ត្រីជប៉ុន រួមទាំងនាយករដ្ឋមន្ត្រីនៃប្រទេសកម្ពុជា ហើយសម្តេចសង្ឃកាតូលិក បានថ្លែងសារចូលរួមរំលែកទុក្ខ និងសម្តែងក្តីសោកស្តាយចំពោះសោកនាដកម្មដ៏រន្ធត់នេះ។
រូបភាពវីដេអូដែលត្រូវមើលឃើញតាមបណ្ដាញសង្គម គឺនៅកន្លែងកើតហេតុមានមនុស្សកកកុញយ៉ាងសម្បើមណាស់ ហើយមានការរុញច្រានគ្នាទៀតផង។ បើតាមប្រភពរបស់សមត្ថកិច្ច មនុស្សអាចមានពី ១០ម៉ឺននាក់។
ចំពោះការផ្អើលរត់ជាន់គ្នា គឺគេនៅរង់ចាំការស៊ើបអង្កេតផ្លូវការរបស់ប៉ូលិស និងចាំការពន្យល់បកស្រាយហេតុផលច្បាស់លាស់ពីសមត្ថកិច្ចនៅក្រុងសេអ៊ូល។ មូលហេតុនៃការផ្អើលជាន់គ្នានេះ រហូតដល់មានមនុស្សស្លាប់ គឺព្រោះតែភាពស្លន់ស្លោបាត់បង់សណ្ដាប់ធ្នាប់ ហើយការត្រួតពិនិត្យរបស់សមត្ថកិច្ចមានភាពធ្វេសប្រហែស។
ដោយឡែកនៅប្រទេសឥណ្ឌា វិញ គឺខុសគ្នាមិនដល់មួយថ្ងៃនោះទេ ហេតុការណ៍មួយបានកើតឡើងដោយស្ពានមួយជាប្រភេទស្ពានយោលឆ្លងកាត់ទន្លេ Machchu ក្នុងក្រុង Morbi រដ្ឋគូចារ៉ាត់ បានបាក់ចូលទៅក្នុងទឹកកាលពីយប់ថ្ងៃអាទិត្យ ទី៣០ តុលា។
ស្ពានដ៏ចំណាស់ដែលមានប្រវែង ២៣០ម៉ែត្រនេះ ត្រូវបានសាងសង់កាលពីជំនាន់អាណានិគមអង់គ្លេស ហើយទើបតែត្រូវបានគេបើកឲ្យអ្នកដំណើរឆ្លងកាត់វិញកាលពីសប្តាហ៍មុន បន្ទាប់ពីជួសជុលអស់រយៈពេល ៦ខែ។
ក្នុងពិធីបុណ្យប្រពៃណីសាសនាហិណ្ឌូ ដែលគេហៅថាបុណ្យទីវ៉ាលី ស្ពាននេះបានក្លាយជាកន្លែងកម្សាន្តរបស់មនុស្ស។ ប្រជាជនប្រមាណជាង ៤០០នាក់ក្នុងក្រុង Morbi នាំគ្នាដើរឆ្លងកាត់យ៉ាងសប្បាយ។ ពួកគាត់ទាំងប្រុសទាំងស្រីបានឈរថតទុកជាអនុស្សាវរីយ៍ ដោយចាត់ទុកថាជារឿងដ៏អស្ចារ្យដែលស្ពានយោលនេះបាននាំអារម្មណ៍ពួកគេរំភើបក្រៃលែង។
វីដេអូដែលគេថតបានឃើញលើស្ពាននោះ មនុស្សពេញណែន។ មិនយូរប៉ុន្មាន ស្រាប់តែស្ពាននោះក្រឡាប់បាក់ធ្លាក់មនុស្សចូលក្នុងទឹកទន្លេនោះតែម្ដង។ ភាពស្លន់ស្លោកើតមួយរំពេច ខណៈមនុស្សធ្លាក់ទឹកសឹងទាំងអស់។ តែខ្លះទៀតព្យាយាមតោងស្ពាននោះយ៉ាងជាប់។
អាជ្ញាធរឥណ្ឌាក្នុងតំបន់នោះបានឲ្យដឹងថា មនុស្សជាង ៤០០នាក់ដែលនៅលើស្ពាន បាននាំឲ្យស្ពាននោះមិនអាចទ្រាំនឹងទម្ងន់របស់មនុស្សទាំងនោះបាននោះទេ។ នេះបើតាមទីភ្នាក់ងារសារព័ត៌មាន Reuters ដែលបានស្រង់ប្រភពរបស់អាជ្ញាធរក្នុងស្រុកនោះ។
នៅពេលនោះ នាយករដ្ឋមន្ត្រីឥណ្ឌា លោក ណារិន្ទ្រ ម៉ូឌី ក៏មានវត្តមាននៅក្នុងរដ្ឋគូចារ៉ាត់ នេះដែរ។ គូចារ៉ាត់ គឺជាស្រុកកំណើតរបស់លោក។ អាជ្ញាធររដ្ឋគូចារ៉ាត់ បានបង្កើតគណៈកម្មាធិការពិសេសមួយដើម្បីបើកការស៊ើបអង្កេតស្វែងរកមូលហេតុដែលបណ្តាលឲ្យបាក់ស្ពាននេះ។
ឧបទ្ទវហេតុទាំងពីរនេះ មួយកើតនៅប្រទេសកូរ៉េខាងត្បូង និងមានមួយទៀតកើតនៅឥណ្ឌា វាមិនមែនជាគ្រោះថ្នាក់ដោយកម្លាំងធម្មជាតិអ្វីនោះទេ គឺជាករណីកើតឡើងដោយសារមនុស្ស។ សោកនាដកម្មនេះត្រូវបានកត់ត្រាទុកថាជារឿងហេតុដ៏អាក្រក់មួយនៅចុងខែតុលា ឆ្នាំ២០២២ នេះ៕