កាលពីថ្ងៃចន្ទនេះ សហរដ្ឋអាមេរិក និងប្រទេសកូរ៉េខាងត្បូង ចាប់ផ្តើមធ្វើសមយុទ្ធទ័ពជើងអាកាសរួមគ្នាដ៏ធំបំផុតមួយដែលមានរយៈពេល ៥ថ្ងៃ។
សមយុទ្ធនេះមានការចូលរួមពីយន្តហោះចម្បាំងនៃប្រទេសទាំងពីរដល់ទៅ ២៤០គ្រឿង ត្រូវបានកត់ត្រាថាជាលើកដំបូងចាប់ពីឧបទ្វីបកូរ៉េបញ្ចប់សង្គ្រាមនៅក្នុងឆ្នាំ១៩៥៣ ដែលសង្គ្រាមពេលនោះបាញរុញឲ្យមានប្រទេសពីរលើដែនដីតែមួយមកដល់សព្វថ្ងៃនេះ។
ប៉ុន្តែប្រទេសដែលកកើតថ្មី គឺប្រទេសកូរ៉េខាងជើង។ ប្រទេសនេះប្រកាន់របបកុម្មុយនីស្ត និងផ្ដាច់ការបំផុតនៅអាស៊ីខាងកើត។
សេចក្តីរាយការណ៍របស់ទីភ្នាក់ងារសារព័ត៌មាន Reuters បានឲ្យដឹងថា សមយុទ្ធទ័ពជើងអាកាសរួមគ្នានៃប្រទេសសម្ពន្ធមិត្តទាំងពីរ គឺសហរដ្ឋអាមេរិក និងកូរ៉េខាងត្បូង មានយន្តហោះចម្បាំងដល់ទៅ ២៤០គ្រឿង គឺហោះយ៉ាងងងឹតមេឃលើលំហសមុទ្រនៃប្រទេសកូរ៉េខាងត្បូង។
អ្នកសង្កេតការណ៍បានហៅសមយុទ្ធនេះ គឺដូចជាការវាយប្រហារជាក់ស្ដែងទៅលើប្រទេសមួយដែលគេចង់សំដៅទៅលើកូរ៉េខាងជើង។
សមយុទ្ធទ័ពជើងអាកាសដែលមានឈ្មោះថា Vigilant Storm ប្រព្រឹត្តទៅរហូតដល់ថ្ងៃសុក្រ ទី៤ ខែវិច្ឆិកា។ យន្តហោះចម្បាំងចំនួន ២៤០គ្រឿងដែលហោះធ្វើសមយុទ្ធ គឺវាហោះចេញទៅវាយប្រហារប្រហែល ១៦០០ជើង ក្នុងនោះអាមេរិកបញ្ចេញយន្តហោះ ១០០គ្រឿងដែលហោះចេញពីប្រទេសជប៉ុន។
យន្តហោះដែលចូលរួមធ្វើសមយុទ្ធនេះសុទ្ធតែជាយន្តហោះទំនើបៗបំផុត។ នេះបើតាមការបញ្ជាក់របស់កងទ័ពជើងអាកាសសហរដ្ឋអាមេរិក។ សមយុទ្ធនេះក៏មានការចូលរួមផងដែរពីយន្តហោះចម្បាំងបំបាំងកាយ F-35 របស់សហរដ្ឋអាមេរិក និងកូរ៉េខាងត្បូង រួមទាំងយន្តហោះចម្បាំងផ្សេងៗជាច្រើនទៀត។
ប្រទេសអូស្ត្រាលី ក៏បានបញ្ជូនយន្តហោះចាក់សាំងពីលើអាកាសឱ្យមកចូលរួមក្នុងសមយុទ្ធនេះផងដែរ។ សេចក្ដីថ្លែងការណ៍របស់កងទ័ពអាមេរិកបានបន្ថែមថា ចំនួននៃបេសកកម្មវាយប្រហារនៅក្នុងសមយុទ្ធលើកនេះ គឺមានចំនួនច្រើនបំផុតមិនធ្លាប់មានពីមុនមកចាប់តាំងពីការបិទបញ្ចប់សង្គ្រាមកូរ៉េនៅក្នុងឆ្នាំ១៩៥៣។
សហរដ្ឋអាមេរិក និងកូរ៉េខាងត្បូងបញ្ជាក់ថា ការធ្វើសមយុទ្ធនេះគឺជាការចាំបាច់ដើម្បីទប់ទល់នឹងការគំរាមកំហែងថ្មីៗពីកូរ៉េខាងជើង។ កាលពីសប្តាហ៍មុននេះ កូរ៉េខាងត្បូងទើបបានបញ្ចប់ការធ្វើសមយុទ្ធលើទីលានជាក់ស្តែងដែលមានរយៈពេល ១២ថ្ងៃ។ សមយុទ្ធរបស់កូរ៉េខាងត្បូងនេះរួមមានការធ្វើលំហាត់ជាក់ស្ដែងនូវការចុះចតលើទឹកផង និងលើដីគោកផង។
កូរ៉េខាងជើងបានថ្កោលទោសការធ្វើសមយុទ្ធទ័ពអាកាសរួមគ្នារវាងសហរដ្ឋអាមេរិក និងកូរ៉េខាងត្បូង ដោយបាននិយាយថា ការធ្វើសមយុទ្ធនេះគឺជាការហ្វឹកហាត់ដើម្បីត្រៀមចូលឈ្លានពានដែនដីកូរ៉េខាងជើង ដែលក្រុងព្យុងយ៉ាង ចាត់ទុកថាជាគោលនយោបាយប្រទូសរ៉ាយរបស់សហរដ្ឋអាមេរិក និងកូរ៉េខាងត្បូង។
កូរ៉េខាងជើង នៅថ្ងៃទី១ វិច្ឆិកា នេះ បានប្រាប់ទៅសហរដ្ឋអាមេរិក និងកូរ៉េខាងត្បូង ឲ្យបញ្ឈប់ការធ្វើសមយុទ្ធយោធាទ្រង់ទ្រាយធំនេះជាបន្ទាន់។ ក្រុងព្យុងយ៉ាង ព្រមានថា អាមេរិកត្រូវតែសងនូវតម្លៃសមរម្យមួយទៅឲ្យកូរ៉េខាងជើង ដោយចាត់ទុកថាជាទង្វើបង្កហេតុដែលនឹងជំរុញឱ្យមានការចាត់វិធានការឆ្លើយតបយ៉ាងម៉ឺងម៉ាត់ពីទីក្រុងព្យុងយ៉ាង។
នៅក្នុងសេចក្ដីថ្លែងការណ៍មួយចេញផ្សាយដោយប្រព័ន្ធផ្សព្វផ្សាយរដ្ឋកូរ៉េខាងជើង KCNA ក្រសួងការបរទេសកូរ៉េខាងជើង បានបញ្ជាក់ថា៖ «ស្ថានការណ៍នៅលើតំបន់ឧបទ្វីបកូរ៉េ និងតំបន់ជុំវិញ កំពុងឈានចូលដល់ដំណាក់កាលប្រឈមមុខដាក់គ្នាយ៉ាងធ្ងន់ធ្ងរ ដោយសារតែសកម្មភាពយោធាយ៉ាងគឃ្លើនរបស់អាមេរិក និងកូរ៉េខាងត្បូង»។ ក្រុងព្យុងយ៉ាង «ថាបើសហរដ្ឋអាមេរិកពិតជាចង់បញ្ចៀសស្ថានការណ៍អាក្រក់ដូចនេះ ពួកគេគួរតែបញ្ឈប់ការធ្វើសមយុទ្ធដែលបង្ករឿង បើពុំដូចនេះទេ ពួកគេនឹងត្រូវទទួលខុសត្រូវគ្រប់យ៉ាងខ្លាំងចំពោះផលវិបាកដែលអាចនឹងកើតឡើងមកលើកូរ៉េខាងជើង»។
ស្របពេលដែលសហរដ្ឋអាមេរិក និងកូរ៉េខាងត្បូងធ្វើសមយុទ្ធទ័ពជើងអាកាសដ៏សម្បើមនេះ ក្រុងវ៉ាស៊ីនតោន ប្រកាសមិនទទួលស្គាល់កូរ៉េខាងជើងជារដ្ឋអាវុធនុយក្លេអ៊ែរដាច់ខាត។ កូរ៉េខាងជើងត្រូវបានរាយការណ៍ថាមានក្បាលគ្រាប់នុយក្លេអ៊ែរពី ២៥ ទៅ ៣០គ្រាប់។
អ្នកនាំពាក្យក្រសួងការបរទេសអាមេរិក លោក Ned Price បានថ្លែងក្នុងសន្និសីទសារព័ត៌មានថា៖ «មិនមែនជាគោលនយោបាយរបស់អាមេរិកឲ្យកូរ៉េខាងជើងមានអាវុធនុយក្លេអ៊ែរនោះទេ»។ លោកបន្តថា កូរ៉េខាងជើងជារដ្ឋកុម្មុយនីស្តផ្ដាច់ការបំផុត។ ប៉ុន្តែលោក Ned Price បន្តថា អាមេរិកនៅតែបើកដៃចរចាជាមួយកូរ៉េខាងជើង ដោយគ្មានលក្ខខណ្ឌ។
បើតាមអ្នកនាំពាក្យសហរដ្ឋអាមេរិករូបនេះ កូរ៉េខាងជើងនៅតែបន្តត្រៀមរៀបចំការធ្វើតេស្ដអាវុធនុយក្លេអ៊ែរ។ បើកូរ៉េខាងជើង ធ្វើតេស្ដអាវុធនុយក្លេអ៊ែរ គឺជាលើកទី៧ ចាប់តាំងពីឆ្នាំ២០១៧ មក។
រយៈពេល ៦ខែចុងក្រោយនេះ កូរ៉េខាងជើងបានបាញ់មីស៊ីលគំរាមកូរ៉េខាងត្បូង និងជប៉ុន គឺមាន ២៨គ្រាប់ហើយ ក្នុងនោះមីស៊ីល ២គ្រាប់បានហោះរំលងប្រទេសជប៉ុន មុនវាធ្លាក់ទៅសមុទ្រជប៉ុន។
ទាំងអាមេរិក ជប៉ុន និងកូរ៉េខាងត្បូង បានថ្កោលទោសកូរ៉េខាងជើងជាខ្លាំងដោយបានស្នើទៅក្រុមប្រឹក្សាសន្តិសុខអង្គការសហប្រជាជាតិ ចេញសេចក្ដីថ្លែងការណ៍ថ្កោលទោសក្រុងព្យុងយ៉ាង តែមិនបានសម្រេចនោះទេ ដោយសារតែរុស្ស៊ី និងចិន បោះឆ្នោតជំទាស់៕