ក្រសួងការបរទេសកម្ពុជា អះអាងថា នៅក្នុងពិធីបិទបញ្ចប់ជាផ្លូវការនៃកិច្ចប្រជុំកំពូលអាស៊ាននៅថ្ងៃទី១៣ ខែវិច្ឆិកា ខាងមុខនេះ លោកនាយករដ្ឋមន្ត្រី ហ៊ុន សែន ដែលជាប្រធានអាស៊ានប្តូរវេនឆ្នាំ២០២២ នឹងប្រគល់ញញួរប្រធានអាស៊ានទៅឱ្យប្រធានាធិបតីនៃសាធារណរដ្ឋឥណ្ឌូនេស៊ី លោក ចូកូ វីដូដូ ដែលនឹងធ្វើជាប្រធានអាស៊ានប្តូរវេននៅឆ្នាំ២០២៣ ខាងមុខនេះ។
ក្រសួងការបរទេស និងសហប្រតិបត្តិការអន្តរជាតិកម្ពុជា បានចេញសេចក្តីប្រកាសព័ត៌មាននៅថ្ងៃទី៤ ខែវិច្ឆិកា ឆ្នាំ២០២២ នេះថា ពិធីប្រគល់ញញួរនេះនឹងធ្វើឡើងក្នុងពិធីបិទបញ្ចប់កិច្ចប្រជុំកំពូលអាស៊ានលើកទី៤០ និងលើកទី៤១ ដែលជាកិច្ចប្រជុំកំពូលពាក់ព័ន្ធក្នុងក្របខ័ណ្ឌអាស៊ាន និងកិច្ចសន្ទនាអាស៊ានជាសកលលើកទី២ នៅរាជធានីភ្នំពេញ ដែលនឹងធ្វើឡើងពីថ្ងៃទី១០ ដល់ថ្ងៃទី១៣ ខែវិច្ឆិកា ឆ្នាំ២០២២ ខាងមុខនេះ។
ប្រភពដដែលអះអាងថា ក្នុងឱកាសនៃកិច្ចប្រជុំកំពូលនេះ បុរសខ្លាំងលោក ហ៊ុន សែន រួមជាមួយប្រមុខរដ្ឋ និងរាជរដ្ឋាភិបាលអាស៊ានដទៃទៀត នឹងចូលរួមកម្មវិធីជំនួបដោយឡែកពីគ្នាជាមួយតំណាងនៃអន្តរសភាអាស៊ាន តំណាងនៃយុវជនអាស៊ាន និងតំណាងនៃក្រុមប្រឹក្សាអ្នកប្រឹក្សាធុរកិច្ចអាស៊ានផងដែរ។
មន្ត្រីជាន់ខ្ពស់នៃសមាគមការពារសិទ្ធិមនុស្សអាដហុក លោក ស៊ឹង សែនករុណា បានប្រាប់សារព័ត៌មាន The Cambodia Daily នៅថ្ងៃទី៤ វិច្ឆិកា នេះថា លោកកត់សម្គាល់ឃើញថា រយៈពេលជិតមួយឆ្នាំដែលកម្ពុជាបានទទួលតួនាទីជាប្រធានអាស៊ានសម្រាប់ឆ្នាំ២០២២ គឺបន្សល់ទុកនូវបញ្ហាជាច្រើនដែលកម្ពុជាមិនអាចដោះស្រាយបាន ក្នុងនោះវិបត្តិនៅភូមា ក៏មិនមានការថមថយ ប៉ុន្តែរឹតតែធ្ងន់ធ្ងរទៅវិញ ខណៈប្រធានអាស៊ានក៏មិនមានវិធានការណាមួយចូលទៅទប់ស្កាត់ ឬដោះស្រាយឱ្យមានប្រសិទ្ធភាពនៅឡើយ។
លោក ស៊ឹង សែនករុណា ត្អូញត្អែរថា ចំណែកកម្ពុជាខ្លួនឯងក៏មិនមានការថយចុះនូវការរំលោភសិទ្ធិមនុស្សដែរ ក្នុងនោះសកម្មជននយោបាយ សកម្មជនបរិស្ថាន និងសកម្មជនសិទ្ធិមនុស្ស ជាដើម ត្រូវរងនូវការធ្វើទុក្ខបុកម្នេញយ៉ាងធ្ងន់ធ្ងរ ដែលធ្វើឱ្យសេរីភាពនៃការបញ្ចេញមតិកាន់តែរួមតូចទៅៗរហូតរងនូវការរិះគន់ពីមជ្ឈដ្ឋានអន្តរជាតិជុំទិសក្នុងពេលបច្ចុប្បន្ននេះ។
មន្ត្រីជាន់ខ្ពស់សង្គមស៊ីវិលរូបនេះបញ្ជាក់ថា ចំពោះលទ្ធិប្រជាធិបតេយ្យនៅកម្ពុជា ក៏មិនមានការវិវឌ្ឍទៅរកភាពល្អប្រសើរដែរ បើទោះបីជាកម្ពុជារៀបចំឱ្យមានការបោះឆ្នោតនៅពេលខាងមុខក៏ដោយ ប៉ុន្តែសេរីភាពនយោបាយសម្រាប់មេដឹកនាំដែលមានឥទ្ធិពលនៅកម្ពុជា ក្នុងការដឹកនាំប្រជាពលរដ្ឋឆ្ពោះទៅរកការផ្លាស់ប្ដូរតាមរយៈសន្លឹកឆ្នោត នៅតែជាប់គាំងមិនអាចអនុវត្តបានដដែល ដែលធ្វើឱ្យប្រជាធិបតេយ្យនៅកម្ពុជាធ្លាក់ផ្លូវយ៉ាងខ្លាំងនៅពេលនេះ។
កាលពីថ្ងៃទី២៨ ខែតុលា ឆ្នាំ២០២១ ប្រមុខរដ្ឋាភិបាលកម្ពុជា លោក ហ៊ុន សែន ទទួលបានញញួរធ្វើជាប្រធានអាស៊ានសម្រាប់ឆ្នាំ២០២២ ពីប្រទេសប្រ៊ុយណេដារូសាឡឹម ដែលជាប្រធានអាស៊ានឆ្នាំ២០២១ កន្លងទៅ។
ក្រោយទទួលបានញញួរ មេដឹកនាំកម្ពុជា លោក ហ៊ុន សែន ចាប់ផ្តើមបំពេញតួនាទីជាប្រធានអាស៊ាននៅដើមខែមករា ឆ្នាំ២០២២ ដោយធ្វើដំណើរទស្សនកិច្ចទៅដោះស្រាយវិបត្តិនៅប្រទេសភូមា ជាលើកដំបូង ប៉ុន្តែត្រូវបរាជ័យយ៉ាងធ្ងន់ធ្ងរ។
ក្រុមអ្នកឃ្លាំមើលសង្គមរិះគន់ថា បន្ទាប់ពីកម្ពុជាធ្វើជាប្រធានអាស៊ានប្តូរវេនអស់រយៈពេលជិតមួយឆ្នាំមកនេះ កម្ពុជាមិនអាចបំពេញតួនាទីរបស់ខ្លួនបានល្អនោះទេ ក្នុងនោះវិបត្តិរំលោភសិទ្ធិមនុស្ស និងជាន់ឈ្លីលទ្ធិប្រជាធិបតេយ្យនៅកម្ពុជា នៅតែបន្តកើតមាន ខណៈសាមគ្គីភាពរបស់អាស៊ានក៏ត្រូវបានបែកបាក់ផងដែរ ដោយសារតែកម្ពុជាចូលខ្លួនទៅដោះស្រាយវិបត្តិនៅភូមា មិនបានអនុវត្តទៅតាមគោលការណ៍របស់អាស៊ាន ៥ចំណុចដែលបានដាក់ចេញកាលពីចុងឆ្នាំ២០២១ កន្លងទៅនោះ៕