ប្រធានសមាគមការពារសិទ្ធិមនុស្សអាដហុក លោក នី សុខា លើកឡើងថា ពួកគាត់ទាំង ៥រូបនឹងទទួលបានយុត្តិធម៌ បើតុលាការកំពូលឈរទៅលើឯករាជភាពក្នុងការសម្រេចសេចក្ដីដោយមិនពាក់ព័ន្ធរឿងនយោបាយ ខណៈតុលាការនឹងសម្រេចប្រកាសសាលដីកានៅថ្ងៃទី១៨ ខែវិច្ឆិកា ឆ្នាំ២០២២ ខាងមុខនេះ។
តុលាការកំពូល នៅថ្ងៃសុក្រ ទី៤ វិច្ឆិកា នេះ បានបើកសវនាការជំនុំជម្រះបណ្ដឹងសាទុក្ខមន្ត្រីជាន់ខ្ពស់ និងអតីតមន្ត្រីសមាគមការពារសិទ្ធិមនុស្សអាដហុក ៥រូប បន្ទាប់ពីសាលាឧទ្ធរណ៍រាជធានីភ្នំពេញកាលពីខែឧសភា ឆ្នាំ២០២២ កន្លងទៅ បានតម្កល់សាលក្រមសាលាដំបូងរាជធានីភ្នំពេញដែលបានកាត់ទោសឲ្យពួកគាត់ជាប់ពន្ធនាគារម្នាក់ៗ ៥ឆ្នាំទុកជាបានការដដែល។
ប្រធានសមាគមការពារសិទ្ធិមនុស្សអាដហុក លោក នី សុខា បានប្រាប់ក្រុមអ្នកសារព័ត៌មាននៅមុខតុលាការកំពូល បន្ទាប់ពីបញ្ចប់សវនាការថា បើតាមអង្គហេតុ ភស្តុតាង និងសារណាដែលក្រុមមេធាវីការពារក្ដីបានដាក់ទៅតុលាការនោះ លោកយល់ថាពួកគាត់នឹងទទួលបានយុត្តិធម៌ ប្រសិនបើតុលាការមានជំហរឯករាជ្យក្នុងការសម្រេចសេចក្ដី និងមានសុភវិនិច្ឆ័យដោយសម្រេចក្ដីមិនមានអគតិទាំង ៤ នោះ។
លោកបន្តទៀតថា ប៉ុន្តែប្រសិនបើតុលាការសម្រេចសេចក្ដីក្រោមសម្ពាធនយោបាយវិញ លោកថាយុត្តិធម៌សម្រាប់ពួកគាត់នឹងពិបាកទទួលបានណាស់។
លោក នី សុខា ស្នើទៅតុលាការកំពូលឲ្យទម្លាក់ចោលរាល់បទចោទប្រកាន់មកលើពួកគាត់ទាំង ៥រូប ដើម្បីផ្ដល់យុត្តិធម៌ដល់ពួកគាត់ និងបង្ហាញការផ្ដល់យុត្តិធម៌សម្រាប់សង្គមទាំងមូល ព្រមទាំងអ្នកធ្វើការងារសង្គមផ្សេងទៀតផងដែរ។
ប្រធានសមាគមការពារសិទ្ធិមនុស្សអាដហុករូបនេះថា តុលាការជាន់ទាបបានចោទប្រកាន់លើពួកគាត់ទាំង ៥រូបដោយបំភ្លៃអង្គហេតុ និងខុសពីការពិត។
លោកថា ការបំភ្លៃអង្គហេតុ គឺក្នុងលិខិតអញ្ជើញ និងដីការបស់តំណាងអយ្យការសាលាដំបូងរាជធានីភ្នំពេញកោះហៅកញ្ញា ខុម ចាន់តារាទី ហៅស្រីមុំ ក្នុងនាមជាជនសង្ស័យតាមបណ្ដឹងរបស់អ្នកស្រី ធី សុវណ្ណថា ដោយប្ដឹងកញ្ញា ស្រីមុំ ពីបទបរិហារកេរ្តិ៍ ប៉ុន្តែនៅពេលដំណើរក្ដី បែរជាតុលាការប្ដូរមកដាក់កញ្ញាជាសាក្សីទៅវិញ ហើយឈានមកចោទប្រកាន់លើពួកគាត់។
លោក នី សុខា បន្តថា ចាប់តាំងពីដំណើរក្ដីសំណុំរឿងនេះ តុលាការជាន់ទាបមិនបានកោះហៅកញ្ញា ខុម ចាន់តារាទី ហៅស្រីមុំ និងអ្នកស្រី ទ្រី ឈួន មកឆ្លើយបំភ្លឺដើម្បីតតាំងក្ដីនៅតុលាការឡើយ បើទោះបីជាពួកគាត់ និងមេធាវីស្នើសុំម្ដងហើយម្ដងទៀត។
លោកចាត់ទុកការចោទប្រកាន់របស់តុលាការជាន់ទាបថាជារឿងអយុត្តិធម៌សម្រាប់ពួកគាត់ទាំង ៥រូប ដែលធ្វើការជួយសង្គមក្នុងវិស័យការពារសិទ្ធិក្នុងប្រទេសកម្ពុជា។
យ៉ាងណាក៏ដោយ សាលដីកាបណ្ដឹងសាទុក្ខសំណុំរឿង «សូកប៉ាន់សាក្សី និងសមគំនិតសូកប៉ាន់សាក្សី» ពាក់ព័ន្ធនឹងការផ្ដល់ប្រាក់ជាង ២០០ដុល្លារទៅឲ្យអ្នកនាង ខុម ចាន់តារាទី ហៅស្រីមុំ ក្នុងនាមជនរងគ្រោះដែលរត់មករកអង្គការអាដហុកឲ្យជួយនៅពេលនោះ លោក និល ណុន ប្រធានក្រុមប្រឹក្សាជំនុំជម្រះ នឹងសម្រេចប្រកាសនៅថ្ងៃទី១៨ ខែវិច្ឆិកា ឆ្នាំ២០២២ ខាងមុខនេះ។
បុគ្គលិក និងអតីតបុគ្គលិកសមាគមការពារសិទ្ធិមនុស្សអាដហុក ៥រូប ត្រូវបានសាលាដំបូងរាជធានីភ្នំពេញកាត់ទោសឱ្យជាប់ពន្ធនាគារម្នាក់ៗចំនួន ៥ឆ្នាំ ក្រោមបទចោទប្រកាន់ «សូកប៉ាន់សាក្សី និងសមគំនិតសូកប៉ាន់សាក្សី» ប៉ុន្តែទោស ៥ឆ្នាំនេះ តុលាការសម្រេចឱ្យអនុវត្តទោសក្នុងពន្ធនាគាររយៈពេល ១៤ខែ ហើយទោសដែលនៅសល់ត្រូវព្យួរ។
ពួកគេទាំងប្រាំនាក់នោះរួមមាន លោក នី សុខា លោក យី សុខសាន្ត និងលោកស្រី លឹម មុន្នី លោក ណៃ វ៉ង់ដា និងលោក នី ចរិយា។
អ្នកទាំងប្រាំនាក់នេះ ត្រូវបានចាប់ខ្លួន ហើយបញ្ជូនទៅឃុំខ្លួននៅពន្ធនាគារព្រៃសកាលពីថ្ងៃទី១ ខែឧសភា ឆ្នាំ២០១៦។ ពួកគេត្រូវបានដោះលែងឱ្យនៅក្រៅឃុំបណ្ដោះអាសន្នវិញកាលពីថ្ងៃទី២៩ ខែមិថុនា ឆ្នាំ២០១៧៕