រដ្ឋបាលខណ្ឌ៧មករា រាជធានីភ្នំពេញ ផ្អាកការងាររបស់មន្ត្រីសមត្ថកិច្ចម្នាក់រយៈពេល ៦ខែដោយមិនទទួលបានប្រាក់បៀវត្សរ៍ ក្រោយពីមន្ត្រីរូបនេះប្រើអំពើហិង្សាលើបុរសអ្នករើសអេតចាយម្នាក់។
ក្នុងសេចក្តីប្រកាសព័ត៌មានរបស់រដ្ឋបាលខណ្ឌ៧មករា ចុះថ្ងៃទី៤ ខែវិច្ឆិកា កន្លងទៅនេះ ឲ្យដឹងថា បុរសឈ្មោះ ឆាំ ឆាន ដែលជាមន្ត្រីនៅខណ្ឌ៧មករា រាជធានីភ្នំពេញ ត្រូវបានដកបញ្ឈរជើងដោយមិនទទួលប្រាក់បៀវត្សរ៍ក្នុងរយៈពេល ៦ខែ។
បើតាមរដ្ឋបាលខណ្ឌ៧មករា បានព្យាយាមរៀបរាប់ថា ក្រុមការងាររបស់ខ្លួនចំនួន ៤នាក់បានចុះទៅរៀបចំសណ្ដាប់ធ្នាប់លើផ្លូវ១៦៤ ក្នុងសង្កាត់វាលវង់ ខណ្ឌ៧មករា កាលពីរសៀលថ្ងៃទី៣ ខែវិច្ឆិកា ឆ្នាំ២០២២។ ប្រភពដដែលឲ្យដឹងថា ការចុះរៀបចំសណ្ដាប់ធ្នាប់នេះ បន្ទាប់ពីមានការចតយានជំនិះរទេះអេតចាយ និងរទេះលក់ទំនិញផ្សេងៗលើទ្រូងថ្នល់ ខណៈពេលចុះនោះ ក្រុមការងាររបស់ខ្លួនបានណែនាំឲ្យម្ចាស់យានជំនិះទាំងឡាយយកយានជំនិះ និងរទេះផ្សេងៗរបស់ពួកគេចេញពីលើទ្រូងថ្នល់នៃកំណាត់ផ្លូវលេខ១៦៤ នេះ ដើម្បីសម្រួលឲ្យចរាចរណ៍ឲ្យមានភាពល្អប្រសើរ។
បើតាមរដ្ឋបាលខណ្ឌ៧មករា បកស្រាយក្នុងសេចក្ដីប្រកាសរបស់ខ្លួនថា មុនពេលឈានទៅប្រើអំពើហិង្សា មន្ត្រីរបស់ខ្លួនបានព្យាយាមយករទេះបុរសរើសអេតចាយចេញពីទ្រូងថ្នល់ និងនាំបុរសជាម្ចាស់រទេះអេតចាយទៅអប់រំ ប៉ុន្តែបុរសជាម្ចាស់រទេះអេតចាយមិនព្រមយករទេះអេតចាយរបស់ខ្លួនចេញពីទ្រូងថ្នល់នោះទេ ហើយថែមទាំងជេរប្រមាថក្រុមការងាររដ្ឋបាលខណ្ឌ៧មករា ទើបបានជាមានការប្រតាយប្រតប់គ្នាបែបនេះ។
ក្រោយកើតហេតុ រដ្ឋបាលខណ្ឌបានសម្របសម្រួលឲ្យមានការជួបជាមួយម្ចាស់រទេះអេតចាយ និងមន្ត្រីរបស់ខ្លួន ដោយឲ្យសុំទោសបុរសជាម្ចាស់រទេះអេតចាយ និងកុំឲ្យមានការប្ដឹងផ្ដល់ ខណៈមន្ត្រីរបស់ខ្លួនដែលបានប្រើប្រាស់អំពើហិង្សានោះ រដ្ឋបាលខណ្ឌបានពិន័យរដ្ឋបាលដោយផ្អាកការងារឈ្មោះ ឆាំ ឆាន រយៈពេល ៦ខែមិនឲ្យទទួលប្រាក់ខែ។
ការផ្អាកការងារបុរសឈ្មោះ ឆាំ ឆាន ដែលមានតួនាទីជាមន្ត្រីរដ្ឋបាលខណ្ឌ៧មករា ធ្វើឡើងក្រោយពេលអ្នកប្រើប្រាស់បណ្ដាញសង្គមមួយចំនួនបាននាំគ្នារិះគន់លើអាជ្ញាធរដែលប្រើហិង្សាលើបុរសជាអ្នករើសអេតចាយ។
ក្រៅពីរិះគន់ហើយ ពួកគេក៏ជំរុញឲ្យចាត់វិធានការច្បាប់ទៅលើជនដែលប្រើប្រាស់អំពើហិង្សាផងដែរ ដើម្បីកុំឲ្យករណីនេះកើតមានឡើងបន្តទៀត ខណៈពួកគេក៏ជាមន្ត្រីអនុវត្តច្បាប់នោះ៕