ពលរដ្ឋដែលរស់នៅជាប់បឹងតាមោក ក្នុងរាជធានីភ្នំពេញ នាំគ្នាធ្វើពិធីដាក់បណ្ដាសាទៅលើបុគ្គលណាដែលមានបំណងចង់ប្លន់ដីរបស់ពួកគេ ខណៈការចាក់លុបដីបឹងដែលពួកគេអាស្រ័យផល កំពុងបន្តយ៉ាងសកម្មទាំងជម្លោះដីធ្លីនេះមិនទាន់ត្រូវបានដោះស្រាយនៅឡើយ។
យោងតាមហ្វេសប៊ុកឈ្មោះ Davy Sea បានសរសេរនៅថ្ងៃពុធ ទី៩ វិច្ឆិកា នេះថា សហគមន៍សំរោងត្បូង នៅសង្កាត់សំរោង ក្នុងខណ្ឌព្រែកព្នៅ រាជធានីភ្នំពេញ បាននាំគ្នាធ្វើពិធីដាក់បណ្ដាសាដល់ពួកក្រុមណាដែលមានបំណងចង់ប្លន់ដីរបស់ពលរដ្ឋ ទោះក្នុងរូបភាពណាក៏ដោយ។
ពិធីដាក់បណ្ដាសានោះ ពួកគេបានបន់ស្រន់ដោយឲ្យបុគ្គលដែលប្លន់ដីរបស់ប្រជាពលរដ្ឋជាង ២០០គ្រួសារថា «បើពួកគេជិះទូកឲ្យលិចទូក ហើយបើជិះយន្តហោះឲ្យធ្លាក់យន្តហោះ និងជិះឡានឲ្យក្រឡាប់ឡាន ព្រមទាំងឲ្យស្លាប់ដោយកុំឲ្យសល់ ហើយបើនៅសល់មួយ សុំឲ្យឆ្កួតលីលាផងដែរ»។
ក្រៅពីធ្វើពិធីដាក់បណ្ដាសាហើយ ពលរដ្ឋដែលកំពុងប្រឈមនឹងការបណ្ដេញចេញពីលំនៅឋាននេះ ក៏បាននាំគ្នាបោះតង់នៅលើដីដែលពួកគេកំពុងអាស្រ័យផលផងដែរ ខណៈអាជ្ញាធរ និងក្រុមហ៊ុនឯកជនដែលទទួលបានសិទ្ធិអភិវឌ្ឍន៍ពីលោក ហ៊ុន សែន កំពុងធ្វើសកម្មភាពចាក់ដីលុបបឹងតាមោក។
ទាក់ទិនរឿងវិវាទដីធ្លីនៅបឹងតាមោក នេះ កាលពីថ្ងៃទី៣ ខែវិច្ឆិកា ឆ្នាំ២០២២ តំណាងពលរដ្ឋប្រមាណ ៣០នាក់ បាននាំគ្នាដាក់ញត្តិនៅស្ថានទូតសហរដ្ឋអាមេរិកប្រចាំនៅកម្ពុជា ដើម្បីសុំឲ្យស្ថានទូតមួយនេះជំរុញទៅរដ្ឋាភិបាលកម្ពុជា ដោះស្រាយបញ្ចប់ជម្លោះដីធ្លីជូនពួកគេឲ្យមានតម្លាភាព និងយុត្តិធម៌។
ការដាក់ញត្តិរកកិច្ចអន្តរាគមន៍ពីស្ថានទូតអាមេរិកនេះ ក្រោយពីអ្នកមានជម្លោះដីធ្លីនៅបឹងតាមោក ត្រូវបានអាជ្ញាធរធ្វើទុក្ខបុកម្នេញ ក្នុងនោះពលរដ្ឋបានរងការប្រើអំពើហិង្សា ហើយតំណាងពលរដ្ឋចំនួន ៧នាក់កំពុងជាប់បណ្ដឹងនៅតុលាការ ព្រមទាំងមានការគំរាមកំហែងឲ្យពលរដ្ឋដោះដូរទៅទីតាំងថ្មីទាំងបង្ខំ ខណៈពលរដ្ឋដែលកំពុងរស់នៅបច្ចុប្បន្ន ទាមទារឲ្យរដ្ឋាភិបាលធ្វើការអភិវឌ្ឍនៅនឹងកន្លែង។
អភិបាលរងរាជធានីភ្នំពេញ លោក កើត ឆែ ធ្លាប់ប្រាប់សារព័ត៌មានក្នុងស្រុកកន្លងមកថា អាជ្ញាធរមិនអាចឱ្យពលរដ្ឋអភិវឌ្ឍនៅនឹងកន្លែងបានឡើយ ដោយសារពលរដ្ឋទាំងនោះរស់នៅលើចំណីផ្លូវលេខ១៥១ ដោយខុសច្បាប់ ដែលផ្លូវនេះ រដ្ឋាភិបាលគ្រោងពង្រីកឱ្យបាន ៥០ម៉ែត្រ។ លោកថា ពលរដ្ឋទាំងនេះត្រូវតែដោះដូរទៅទីតាំងថ្មី ស្ថិតក្នុងសង្កាត់សំរោង ដូចគ្នា។
បឹងតាមោក ឬបឹងកប់ស្រូវ មានផ្ទៃដីសរុប ៣២៣៩ហិកតារ ជាអាងស្ដុកទឹកកខ្វក់ និងរំដោះទឹកចេញពីរាជធានីភ្នំពេញ។ បឹងធម្មជាតិមួយនេះ ត្រូវបានរដ្ឋាភិបាលចេញអនុក្រឹត្យកាលពីដើមខែកុម្ភៈ ឆ្នាំ២០១៦ ដោយកំណត់យកបឹងធម្មជាតិមួយនេះជាសម្បត្តិសាធារណៈរបស់រដ្ឋ។
ទោះជាយ៉ាងណា ចាប់ពីឆ្នាំ២០១៨ ដល់ចុងឆ្នាំ២០២២ ផ្ទៃបឹងតាមោកនេះត្រូវបានលោក ហ៊ុន សែន កាត់អស់ជាង ២ពាន់ហិកតារហើយ។ ផ្ទៃដីបឹងតាមោកជាង ២ពាន់ហិកតារដែលលោក ហ៊ុន សែន បានកាត់នោះ ក៏មានការប្រគល់ទៅឲ្យកូនស្រីរបស់លោក គឺអ្នកស្រី ហ៊ុន ម៉ាណា ប្អូនស្រីរបស់លោក កូនរបស់លោក ជា សុផារ៉ា រដ្ឋមន្ត្រីក្រសួងរៀបចំដែនដី តារាចម្រៀង ឧកញ៉ា ឈ្មួញមានលុយ និងមន្ត្រីមានអំណាចជាច្រើនរូបទៀតធ្វើជាកម្មសិទ្ធិផងដែរ៕