ក្រុមសង្គមស៊ីវិលអះអាងថា រដ្ឋាភិបាលកម្ពុជាគ្មានចេតនាបើកលំហសេរីភាពសារព័ត៌មានឱ្យបានទូលំទូលាយតាមការទទូចរបស់សហគមន៍អន្តរជាតិ និងអង្គការសមាគមដែលធ្វើការលើកកម្ពស់វិស័យសារព័ត៌មាននោះឡើយ។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា បានប្រាប់សារព័ត៌មាន The Cambodia Daily នៅថ្ងៃទី១៥ វិច្ឆិកា នេះថា ទង្វើរបស់រដ្ឋាភិបាលចំពោះអ្នកសារព័ត៌មានបានបង្ហាញកាន់តែច្បាស់នូវការរើសអើងចំពោះអ្នកសារព័ត៌មាន ដែលផ្ទុយពីខ្លឹមសារដែលបានចែងក្នុងរដ្ឋធម្មនុញ្ញ និងការផ្តល់សច្ចាប័នរបស់ខ្លួនក្នុងការធានានូវការអនុវត្តសេរីភាពសារព័ត៌មាននៅកម្ពុជាឱ្យបានល្អប្រសើរ។
លោក ស៊ឹង សែនករុណា អំពាវនាវឱ្យរដ្ឋាភិបាលកម្ពុជាចៀសវាងនូវទង្វើទាំងឡាយណាដែលជាហេតុនាំឱ្យមានការរារាំងនូវការបើកលំហសេរីភាពសារព័ត៌មាន ក៏ដូចជាសេរីភាពបញ្ចេញមតិរបស់ប្រជាពលរដ្ឋ ដើម្បីបញ្ឈប់នូវការរិះគន់ពីមជ្ឈដ្ឋាននានាដែលតែងលើកឡើងពីការរឹតត្បិតសេរីភាពសារព័ត៌មានពីសំណាក់រដ្ឋាភិបាលនាពេលកន្លងមក។
លោកថា ជាក់ស្តែង ការហាមឃាត់អ្នកសារព័ត៌មាននៅពេលនេះ គឺជាតឹកតាងមួយដ៏ច្បាស់ដែលបញ្ជាក់ថា សេរីភាពសារព័ត៌មាននៅកម្ពុជារួមតូចចង្អៀត មិនអាចអនុវត្តទៅបានដូចមានចែងក្នុងរដ្ឋធម្មនុញ្ញនោះឡើយ។
ការអះអាងនេះ ធ្វើឡើងបន្ទាប់ពីអ្នកសារព័ត៌មានរបស់ វីអូអេ (VOA) និង វីអូឌី (VOD) ត្រូវបានហាមឃាត់មិនអនុញ្ញាតឱ្យចូលរួមក្នុងសន្និសីទសារព័ត៌មានក្នុងពេលបិទបញ្ចប់កិច្ចប្រជុំកំពូលអាស៊ានដោយគ្មានហេតុផល កាលពីចុងសប្តាហ៍កន្លងទៅនេះ។
កាលពីថ្ងៃទី១៤ ខែវិច្ឆិកា ឆ្នាំ២០២២ ស្ថាប័នសារព័ត៌មានចំនួន៣ រួមមានមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) សមាគមសម្ព័ន្ធអ្នកសារព័ត៌មាន (CamboJA) និងក្លឹបអ្នកសារព័ត៌មានបរទេសនៃកម្ពុជា (OPCC) បានចេញសេចក្តីថ្លែងការណ៍រួមគ្នាមួយ បន្ទាប់ពីអ្នកសារព័ត៌មាន វីអូអេ និង វីអូឌី ត្រូវបានហាមឃាត់មិនឱ្យចូលរួមក្នុងសន្និសីទសារព័ត៌មានរបស់លោក ហ៊ុន សែន ដោយគ្មានហេតុផល បើទោះបីជាពួកគេបានចុះឈ្មោះ និងទទួលការអនុញ្ញាតពីក្រសួងព័ត៌មានទៅហើយក្តី។
ស្ថាប័នសារព័ត៌មានខាងលើទាមទារឱ្យក្រសួងព័ត៌មាន បំភ្លឺមូលហេតុដែលអ្នកសារព័ត៌មាន វីអូអេ និង វីអូឌី ត្រូវបានបដិសេធមិនឱ្យចូលទៅក្នុងសន្និសីទសារព័ត៌មានរបស់ប្រមុខរដ្ឋាភិបាលកម្ពុជា ស្របពេលដែលអ្នកសារព័ត៌មានរាប់សិបនាក់ផ្សេងទៀតត្រូវបានអនុញ្ញាតឱ្យចូលទៅក្នុងសន្និសីទនោះ។
កាលពីថ្ងៃទី១៣ ខែវិច្ឆិកា ឆ្នាំ២០២២ បន្ទាប់ពីបិទបញ្ចប់កិច្ចប្រជុំកំពូលអាស៊ាន លោក ហ៊ុន សែន បានធ្វើសន្និសីទសារព័ត៌មានដើម្បីឆ្លើយសំណួររបស់អ្នកសារព័ត៌មានជុំវិញកិច្ចប្រជុំកំពូលនេះ ប៉ុន្តែអ្នកសារព័ត៌មាន វីអូអេ និង វីអូឌី មិនត្រូវបានអនុញ្ញាតឱ្យចូលរួមសួរសំណួរក្នុងសន្និសីទនេះឡើយ បើទោះបីជាពួកគេមានប័ណ្ណសារព័ត៌មានដែលចេញដោយក្រសួងព័ត៌មាន និងបានចុះឈ្មោះរួចរាល់ហើយក៏ដោយ ប៉ុន្តែអ្នកសារព័ត៌មានដទៃទៀតអាចចូលរួមក្នុងសន្និសីទនេះបានដូចធម្មតា។
ជុំវិញបញ្ហានេះ របាយការណ៍ឆ្នាំ២០២១ របស់អង្គការអ្នកកាសែតគ្មានព្រំដែន បានបង្ហាញថា បន្ទាប់ពីរដ្ឋាភិបាលកម្ពុជាប្រកាសរំលាយគណបក្សសង្គ្រោះជាតិ កាលពីចុងឆ្នាំ២០១៧ លោក ហ៊ុន សែន បានប្រើយុទ្ធនាការប្រឆាំងនឹងប្រព័ន្ធផ្សព្វផ្សាយឯករាជ្យទាំងអស់ ក្នុងនោះ រដ្ឋាភិបាលកម្ពុជាបានបិទស្ថានីយវិទ្យុចំនួន ៣២ស្ថានីយ បង្ខំឱ្យបិទទ្វារកាសែត ឌឹ ខេមបូឌា ដេលី និងការផ្លាស់ប្ដូរម្ចាស់កាសែតភ្នំពេញប៉ុស្តិ៍ ជាដើម។ ដោយឡែកនៅឆ្នាំ២០១៨ រដ្ឋាភិបាលបានបិទគេហទំព័រចំនួន ១៧គេហទំព័រថែមទៀត។
របាយការណ៍ដដែលអះអាងថា ជាលទ្ធផលនៃយុទ្ធនាការនេះ ពលរដ្ឋកម្ពុជាអាចទទួលបានព័ត៌មានតែពីស្ថាប័នដែលស្និទ្ធនឹងលោកនាយករដ្ឋមន្ត្រី ហ៊ុន សែន តែប៉ុណ្ណោះ។
ជាក់ស្តែង កូនស្រីរបស់លោក ហ៊ុន សែន គឺអ្នកស្រី ហ៊ុន ម៉ាណា ត្រូវគេរកឃើញថាជាប្រធានក្រុមហ៊ុនដ៏ធំសម្បើមមួយដែលកាន់កាប់កាសែត ទស្សនាវដី្ត ស្ថានីយវិទ្យុ បណ្ដាញទូរទស្សន៍ និងគេហទំព័រអ៊ីនធឺណិតនៅកម្ពុជាទាំងអស់ ដូចជាសារព័ត៌មាន Fresh News ជាដើម ដែលជាស្ថាប័នឃោសនាឱ្យរដ្ឋាភិបាលកម្ពុជា៕