កិច្ចប្រជុំកំពូលរបស់មេដឹកនាំប្រទេសសេដ្ឋកិច្ចជឿនលឿន G-20 បានបិទបញ្ចប់នៅថ្ងៃពុធនេះ ដោយការចេញសេចក្ដីថ្លែងការណ៍ថ្កោលទោសរុស្ស៊ី វាយប្រហារដោយគ្រាប់មីស៊ីលទៅលើប្រទេសអ៊ុយក្រែន កាលពីយប់ទៀបភ្លឺ ដែលយ៉ាងតិចមីស៊ីលជាង ៩០គ្រាប់បានធ្លាក់នៅទូទាំងប្រទេសអ៊ុយក្រែន ហើយយ៉ាងហោចមួយគ្រាប់បានធ្លាក់ចូលទឹកដីប៉ូឡូញ បណ្ដាលឱ្យមនុស្ស ២នាក់ស្លាប់។
នៅក្នុងការបិទបញ្ចប់ជំនួបកំពូលនៃប្រទេស G-20 ប្រធានាធិបតីឥណ្ឌូនេស៊ី បានផ្ទេរសិទ្ធិជាប្រធានវេនប្រចាំឆ្នាំ២០២៣ ឱ្យទៅនាយករដ្ឋមន្ត្រីនៃប្រទេសឥណ្ឌា។ សេចក្ដីថ្លែងការណ៍បានសម្ដែងការព្រួយបារម្ភអំពីប្រតិកម្មរបស់ប្រទេសប៉ូឡូញ ដែលគិតថាសង្គ្រាមកំពុងរអិលធ្លាក់ចូលទៅប្រទេសប៉ូឡូញ ដែលជាសមាជិកណាតូ។
ប្រធានាធិបតីឥណ្ឌូនេស៊ី លោក ចូកូ វិដូដូ បានប្រាប់ក្រុមអ្នកសារព័ត៌មានថា សេចក្ដីថ្លែងការណ៍រួមរបស់មេដឹកនាំ G-20 ដែលពុំមានតំណាងរុស្ស៊ី បានថ្កោលទោសរុស្ស៊ី ហើយបានទាមទារឲ្យបញ្ចប់សង្គ្រាមនៅលើទឹកដីអ៊ុយក្រែនជាបន្ទាន់។
បើតាមលោក ចូកូ វិដូដូ របៀបវារៈអំពីសង្គ្រាមរុស្ស៊ី និងអ៊ុយក្រែន បានពិភាក្សាគ្នាយ៉ាងតឹងតែង ហើយទីបំផុត ទើបសម្រេចថាត្រូវមានសេចក្ដីថ្លែងការណ៍រួមដែលគ្រប់ភាគីទាំងអស់សុំកាត់បន្ថយឲ្យខ្លាំងបំផុតនៃស្ថានភាពសង្គ្រាម ហើយឈានទៅរកការបិទបញ្ចប់ទាំងស្រុង។ លោកឱ្យដឹងថា គ្រាប់មីស៊ីលធ្លាក់ចូលទឹកដីអ៊ុយក្រែន គឺជារឿងសោកស្ដាយដែលមិនត្រូវឲ្យមានជាលើកទី២ នោះទេ។
ជាមួយគ្នានេះ ប្រធានាធិបតីបារាំង លោក Emmanuel Macron បានថ្លែងថា ឧបទ្ទវហេតុនេះគេមិនត្រូវប្រញាប់សន្និដ្ឋានថា វាធ្លាក់មកពីណានោះទេ។ លោកថា គេត្រូវប្រុងប្រយ័ត្នរឿងនេះ។ តែជាមួយគ្នានេះ សេចក្ដីថ្លែងការណ៍របស់ក្រុមមេដឹកនាំប្រទេស G-20 បានទាមទារថា ការគំរាមបង្កសង្គ្រាមនុយក្លេអ៊ែរ ត្រូវតែបញ្ឈប់ជាបន្ទាន់ ហើយត្រូវបើកឲ្យមានការដឹកគ្រាប់ធញ្ញជាតិឡើងវិញចេញពីកំពង់ផែនៅសមុទ្រខ្មៅ។
បើតាមសារព័ត៌មាន Business Insider ក្រោយពីទទួលដំណឹងថាមានគ្រប់មីស៊ីលមួយគ្រាប់ផលិតនៅរុស្ស៊ី បានធ្លាក់ចូលព្រំដែននៃប្រទេសប៉ូឡូញ សមាជិករបស់អង្គការណាតូ លោកប្រធានាធិបតីអាមេរិក ចូ បៃដិន បានកោះប្រជុំ G-7 នៃមេដឹកនាំណាតូ តែលើកលែងប្រទេសជប៉ុន ដោយពិភាក្សាគ្នាជាបន្ទាន់ ដើម្បីឆ្លើយតបមីស៊ីលមួយគ្រាប់ដែលបានបាញ់ធ្លាក់ចូលទឹកដីប៉ូឡូញ ដែលជាសមាជិកណាតូ។
ក្រុមមេដឹកនាំ G-7 ដាក់ការព្រួយបារម្ភ តែព្រមានរុស្ស៊ី កុំឲ្យមានចេតនាបាញ់មកលើសមាជិកណាតូឲ្យសោះ ទោះជាមួយគ្រាប់មីស៊ីលនេះត្រូវចាត់ទុកថាមិនដឹងបាញ់ចេញពីភាគីណាក៏ដោយនោះ។
លោកប្រធានាធិបតីតួកគី Recep Tayyip Erdogan បានស្នើសុំនូវភាពអត់ធ្មត់ឲ្យបានខ្ពស់បំផុត។ លោកសន្យាថានឹងប្រាប់ទៅរុស្ស៊ី កុំឲ្យមានឧបទ្ទវហេតុនេះកើតឡើងទៀត។
រុស្ស៊ីបានបាញ់មីស៊ីលប្រហែលជាង ៩០គ្រាប់ ដោយបាញ់មកលើប្រទេសអ៊ុយក្រែន។ នេះបើតាមប្រធានាធិបតីអ៊ុយក្រែន លោក ហ្សេឡេនស្គី ដែលបានថ្លែងប្រាប់ទៅក្រុមមេដឹកនាំ G-20 និងក្រុមមេដឹកនាំណាតូ។
លោក ហ្សេឡេនស្គី បានស្នើឱ្យមានការចាត់ការប្រឆាំងនឹងរុស្ស៊ី។ តែយ៉ាងណាក៏ដោយ រដ្ឋាភិបាលប៉ូឡូញ បានសម្រេចបញ្ចេញសញ្ញាអាសន្នព្រមានទុកជាមុនថា ប៉ូឡូញនឹងបាញ់តបត បើមីស៊ីលនោះពិតជារកឃើញថាបានបាញ់ចេញពីកងទ័ពរុស្ស៊ី ទោះជាបាញ់ចេញពីប្រទេសណាក៏ដោយ។
ក្នុងស្ថានភាពនេះ យន្តហោះចម្បាំងរបស់កងកម្លាំងអាកាសប៉ូឡូញ ត្រូវគេរាយការណ៍ថាបានត្រៀមរួចជាស្រេចនៅក្នុងលទ្ធភាពវាយលុកតបតទៅវិញ បើសិនជាមានសញ្ញាភ្លើងបៃតងបញ្ជាឱ្យធ្វើការតបតដាក់ទៅលើរុស្ស៊ីវិញនោះ។
ការត្រៀមវាយប្រហារនេះ គឺនៅបន្ទាប់ពីមានសេចក្ដីរាយការណ៍មកថាគ្រាប់មីស៊ីលមួយគ្រាប់បានធ្លាក់ចំតំបន់កសិដ្ឋានមួយក្នុងទីក្រុង Przewodów ខាងក្នុងទឹកដីប៉ូឡូញ កាលពីថ្ងៃទី១៥ ខែវិច្ឆិកា គឺជាគ្រាប់មីស៊ីលរបស់រុស្ស៊ី។ ក្នុងហេតុការណ៍នេះ មនុស្សពីរនាក់បានស្លាប់ ដែលពួកគេរស់នៅក្នុងតំបន់កសិដ្ឋាននេះ។ ប្រទេសប៉ូឡូញ គឺជាសមាជិករបស់អង្គការណាតូ។
មាត្រា៥ នៃធម្មនុញ្ញអង្គការណាតូ ចែងថា ការវាយប្រហារណាមួយទៅលើសមាជិកអង្គការណាតូ គឺជាការវាយប្រហារទៅលើអង្គការណាតូទាំងមូល។
ការចោទប្រកាន់មកលើរុស្ស៊ី ខណៈសកម្មភាពរបស់កងទ័ពរុស្ស៊ី ធ្វើការបាញ់ស្រោចគ្រាប់មីស៊ីលជាង ៩០គ្រាប់ទៅលើបណ្តាទីក្រុងអ៊ុយក្រែន ជាពិសេសលើទីតាំងនៃមជ្ឈមណ្ឌលថាមពលអគ្គិសនីដែលជាការវាយប្រហារប៉ុនប៉ងផ្តាច់ភ្លើង និងទឹកក្នុងរដូវរងានាពេលនេះ។
យោងតាមអាជ្ញាធរអ៊ុយក្រែន ឲ្យដឹងថា ក្នុងចំណោមមីស៊ីលជាង ៩០គ្រាប់របស់រុស្ស៊ីនោះ គឺប្រមាណជាង ៧០គ្រាប់ត្រូវបានប្រព័ន្ធការពារដែនអាកាសអ៊ុយក្រែនបាញ់ទម្លាក់។ ការបាញ់ប្រហារដោយគ្រាប់មីស៊ីលរបស់រុស្ស៊ីនោះ បានផ្ដោតខ្លាំងទៅលើរដ្ឋធានីគៀវ ហើយចំពោះក្រុង Lviv ដែលស្ថិតនៅភាគខាងលិចក្បែរព្រំដែនប៉ូឡូញ ក៏រងការវាយប្រហារធ្ងន់ធ្ងរដែរ។
ហេតុការណ៍នេះ បានបង្ខំឱ្យប៉ូឡូញត្រូវកោះប្រជុំក្រុមប្រឹក្សាសន្តិសុខ និងការពារជាតិ។ ចំណែករដ្ឋមន្ត្រីការពារជាតិនៃក្រុមណាតូ នឹងជួបប្រជុំគ្នាដើម្បីសិក្សាហេតុការណ៍នេះ ដោយសម្រេចយកមាត្រា៤ នៃធម្មនុញ្ញរបស់ណាតូ មកធ្វើការពិភាក្សា ដែលមាត្រានេះកំណត់ឲ្យមានការសិក្សាឲ្យបានហ្មត់ចត់មុននឹងអនុវត្តតាមមាត្រា៥។
ប្រធានការិយាល័យសន្តិសុខជាតិរបស់ប្រទេសប៉ូឡូញ លោក Jacek Siewiera បាននិយាយថា ប៉ូឡូញត្រូវរង់ចាំការពន្យល់លម្អិតអំពីស្ថានភាពនេះក្រោយពីមានការស៊ើបអង្កេតហ្មត់ចត់ហើយនោះ៕