សកម្មជនគណបក្សប្រឆាំងរិះគន់ថា សម្បត្តិធម្មជាតិរបស់ខ្មែរមានច្រើនអនេក ប៉ុន្តែកម្ពុជានៅតែជាប្រទេសក្រីក្រ គ្មានការអភិវឌ្ឍ មិនអាចទទួលផលប្រយោជន៍ពីសម្បត្តិធម្មជាតិរបស់ខ្លួនបាន។
សកម្មជនគណបក្សសង្គ្រោះជាតិ លោក ហ៊ុន កុសល បានសរសេរលើគណនីហ្វេសប៊ុករបស់ខ្លួននៅថ្ងៃទី១៨ វិច្ឆិកា នេះថា កម្ពុជាជាប្រទេសដែលអំណោយផលពីធម្មជាតិ មិនគួររងគ្រោះដោយសារគ្រោះធម្មជាតិនោះឡើយ ខណៈសម្បត្តិធម្មជាតិនានាក៏មានច្រើនសម្បូរបែប ប៉ុន្តែកម្ពុជានៅតែជាប្រទេសក្រីក្រ គ្មានការអភិវឌ្ឍ ស្របពេលដែលធនធានមនុស្សដែលជាអម្បូរមានកម្រិតខ្ពស់ផ្នែកបញ្ញាស្មារតី បែរជាគ្មានទីកន្លែងសម្រាប់បញ្ចេញសមត្ថភាពរបស់ខ្លួនទៅវិញ។
លោក ហ៊ុន កុសល លើកឡើងថា កម្ពុជាមានព្រៃឈើច្រើនរាប់មិនអស់ ប៉ុន្តែពលរដ្ឋខ្មែរត្រូវរងគ្រោះជាប់គុកដោយសារព្រៃឈើរបស់ខ្លួន។ លោកថា កម្ពុជាមានបឹងទន្លេសាប ប៉ុន្តែកម្ពុជាគ្មានត្រីគ្រប់គ្រាន់សម្រាប់ចិញ្ចឹមពលរដ្ឋរបស់ខ្លួន ហើយបែរជានាំចូលត្រីពីប្រទេសជិតខាងដែលគ្មានជង្រុកត្រីដូចខ្លួនទៅវិញ។
លោកថា កម្ពុជាមានដីកសិកម្មរាប់លានហិកតារ ប៉ុន្តែគ្មានទឹកគ្រប់គ្រាន់សម្រាប់ជួយវិស័យកសិកម្មរបស់ខ្លួនឱ្យរីកចម្រើនទៅមុខ ខណៈកម្ពុជាមានទន្លេមេគង្គដ៏សែនវែង និងមានបឹងទន្លេសាបទំហំ ៣ពាន់គីឡូម៉ែត្រក្រឡានៅរដូវប្រាំង និងមានទំហំ ១ម៉ឺនគីឡូម៉ែត្រក្រឡានៅរដូវវស្សា នៅតែគ្មានអ្នកណាអាចគ្រប់គ្រងទឹកយកមកប្រើប្រាស់បាន ស្របពេលដែលវិស័យកសិកម្មដែលតែងបណ្តាលឲ្យប្រទេសទាំងមូលជួបគ្រោះទឹកជំនន់នៅរដូវវស្សា និងជួបគ្រោះរាំងស្ងួតនៅរដូវប្រាំងរហូតមក។
កាលពីថ្ងៃទី២៣ ខែកុម្ភៈ ឆ្នាំ២០២២ បុរសខ្លាំងចិត្តឆៅឧស្សាហ៍ប្រើកណ្ដាប់ដៃដែក លោក ហ៊ុន សែន បានគំរាមថា លោកប្រើពេលត្រឹមតែ ២៤ម៉ោងប៉ុណ្ណោះក្នុងការដករដ្ឋមន្ត្រីណាដែលធ្វើការមិនកើត។
យ៉ាងណាក៏ដោយ ក្រុមអ្នកសង្កេតការណ៍រិះគន់ថា ការអះអាងរបស់លោក ហ៊ុន សែន គ្រាន់តែជាការភូតកុហកប៉ុណ្ណោះ។ ជាក់ស្តែង រដ្ឋមន្ត្រីដែលអសមត្ថភាពជាច្រើន ដូចជារដ្ឋមន្ត្រីក្រសួងបរិស្ថាន លោក សាយ សំអាល់ មិនអាចទប់ស្កាត់បទល្មើសព្រៃឈើបានទេ ចំណែករដ្ឋមន្ត្រីក្រសួងមហាផ្ទៃ លោក ស ខេង ក៏មិនអាចទប់ស្កាត់ការជួញដូរមនុស្ស ការលាងលុយកខ្វក់ និងបញ្ហាអសន្តិសុខសង្គមជាច្រើនទៀតដែរ។ ដោយឡែករដ្ឋមន្ត្រីក្រសួងការពារជាតិ លោក ទៀ បាញ់ ក៏បានធ្វើឲ្យបាត់ប្រេងជិត ៣០ម៉ឺនបារ៉ែលថែមទៀត ប៉ុន្តែរដ្ឋមន្ត្រីទាំងនោះនៅតែអាចកាន់តំណែងរបស់ខ្លួនបានដដែល។
ប្រភពដដែលលើកឡើងថា ប្រព័ន្ធរដ្ឋបាលដែលគ្រប់គ្រងដោយបក្សកាន់អំណាចសព្វថ្ងៃនេះ ត្រូវគេមើលឃើញថា ឧក្រិដ្ឋជនដែលបំផ្លាញព្រៃឈើ បំផ្លាញធនធានរ៉ែ និងបំផ្លាញធនធានធម្មជាតិផ្សេងៗតែងរួចផុតពីទោសទណ្ឌតាមផ្លូវច្បាប់ជានិច្ច។ ជាងនេះទៀត ពួកគេតែងត្រូវបានលើកតម្កើងទៅជាមន្ត្រីជាន់ខ្ពស់របស់កម្ពុជាថែមទៀត ដូចជាឧកញ៉ា លីម ប៊ុណ្ណា ហៅឧកញ៉ា ខ្នា ដែលល្បីខាងរកស៊ីឈើខុសច្បាប់ ត្រូវបានតែងតាំងជាជំនួយការរបស់លោក ហ៊ុន សែន ក្នុងឋានៈជាប្រធានគណបក្សប្រជាជនកម្ពុជាកាលពីពេលថ្មីៗនេះ។
ជាងនេះទៀត នាយករងការិយាល័យបំភ័ន្តអក្ខរៈនៃកងរាជអាវុធហត្ថលើផ្ទៃប្រទេស លោក ចាប សារ៉ន ដែលជាឈ្មួញរកស៊ីឈើខុសច្បាប់កក្រើកតំបន់ព្រៃឡង់ ក៏ត្រូវបានដំឡើងឋានន្តរស័ក្ដិពីវរសេនីយ៍ឯកទៅជាឧត្តមសេនីយ៍ត្រីផងដែរ។
ទាក់ទិននឹងបញ្ហានេះ ប្រធានមជ្ឈមណ្ឌលកម្ពុជាដើម្បីប្រព័ន្ធផ្សាយឯករាជ្យ (CCIM) លោក ប៉ា ងួនទៀង ធ្លាប់បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីពេលកន្លងទៅថា ក្រសួងទាំង ២៧ របស់កម្ពុជាដែលកំពុងដឹកនាំដោយរដ្ឋមន្ត្រី និងគ្រប់គ្រងដោយមេដឹកនាំបក្សកាន់អំណាច លោក ហ៊ុន សែន សព្វថ្ងៃនេះ មិនត្រឹមតែមិនដឹកនាំឱ្យមានភាពរីកចម្រើនសម្រាប់សង្គមជាតិទេ ប៉ុន្តែបែរជាធ្វើឱ្យអន់ថយ និងបង្កើតឱ្យមានបទល្មើសខុសច្បាប់ស្ទើរតែគ្រប់ក្រសួងទាំងអស់ទៅវិញ ដែលជាកត្តារាំងស្ទះដល់ការរីកចម្រើនរបស់កម្ពុជាយ៉ាងធ្ងន់ធ្ងរ៕