32 C
Phnom Penh

សង្គម​ស៊ីវិល​អំពាវនាវ​ឱ្យ​ពលរដ្ឋ​ទៅ​ចុះឈ្មោះ​និង​ពិនិត្យ​ឈ្មោះ​បោះឆ្នោត​ឱ្យ​បាន​គ្រប់ៗ​គ្នា

ដោយ ឌឹ ខេមបូឌា ដេលី

បទវិភាគ

សង្គម​ស៊ីវិល អំពាវនាវ​ឲ្យ​ប្រជាពលរដ្ឋ​ទៅ​ចុះឈ្មោះ និង​ពិនិត្យ​ឈ្មោះ​ក្នុង​បញ្ជី​បោះឆ្នោត​ឲ្យ​បាន​គ្រប់ៗ​គ្នា ខណៈ​មាន​ការ​ព្រួយបារម្ភ​ថា ពលរដ្ឋ​នឿយណាយ​នឹង​ស្ថានភាព​នយោបាយ​របស់​កម្ពុជា មិន​នាំគ្នា​ទៅ​ពិនិត្យ​ឈ្មោះ និង​ចុះឈ្មោះ​បោះឆ្នោត ស្រប​ពេល​រដ្ឋាភិបាល​ក៏​មិនទាន់​បាន​បង្ក​ភាព​ងាយស្រួល​សម្រាប់​ពលរដ្ឋ​ចំណាកស្រុក​ផង​ដែរ។

អ្នក​នាំពាក្យ​សមាគម​ការពារ​សិទ្ធិមនុស្ស​អាដហុក លោក ស៊ឹង សែនករុណា បាន​ប្រាប់​សារព័ត៌មាន The Cambodia Daily នៅ​ថ្ងៃទី​២៣ វិច្ឆិកា នេះ​ថា ពិតមែន​តែ គ.ជ.ប បង្ហាញ​ទិន្នន័យ​អំពី​អ្នក​ទៅ​ចុះឈ្មោះ​បោះឆ្នោត​ថ្មីៗ​គួរ​ឲ្យ​កត់សម្គាល់ ប៉ុន្តែ​គេ​ក៏​មិន​អាច​ដឹង​ដែរ​ថា​មាន​ប្រជាពលរដ្ឋ​ប៉ុន្មាន​នាក់​ដែល​ធុញថប់​នឹង​វិបត្តិ​នយោបាយ​នៅ​កម្ពុជា ហើយ​មិន​ទៅ​ពិនិត្យ និង​ចុះឈ្មោះ​បោះឆ្នោត។ ជាង​នេះ​ទៀត រដ្ឋាភិបាល​ក៏​មិន​ទាន់​បាន​បង្ក​ភាព​ងាយស្រួល​សម្រាប់​ពលរដ្ឋ​ចំណាកស្រុក​ដែល​មាន​បំណង​ទៅ​ចុះឈ្មោះ​បោះឆ្នោត ឬ​ពិនិត្យ​ឈ្មោះ​របស់​ពួកគេ​ក្នុង​បញ្ជី​បោះឆ្នោត​នោះ​ដែរ។

លោក ស៊ឹង សែនករុណា ជំរុញ​ឲ្យ​គណៈកម្មាធិការ​ជាតិ​រៀបចំ​ការ​បោះឆ្នោត​ផ្សព្វផ្សាយ​ឲ្យ​កាន់តែ​ទូលំទូលាយ​ដល់​ប្រជាពលរដ្ឋ អំពី​សារសំខាន់​នៃ​ការ​បោះឆ្នោត​ក្នុង​នាម​ខ្លួន​ជា​ម្ចាស់​ប្រទេស ដើម្បី​ជ្រើសរើស​អ្នក​ដឹកនាំ។ ជាង​នេះ​ទៀត គ.ជ.ប ក៏​ត្រូវ​បង្ក​លក្ខណៈ​ងាយស្រួល​សម្រាប់​ប្រជាពលរដ្ឋ​គ្រប់​និន្នាការ​នយោបាយ​ផង​ដែរ ដើម្បី​ធានា​នូវ​តម្លាភាព​ក្នុង​នាម​ខ្លួន​ជា​ស្ថាប័ន​ឯករាជ្យ​ដែល​ត្រូវ​ការពារ​នូវ​ការ​ឆន្ទៈ​របស់​ប្រជាពលរដ្ឋ ក្នុង​ការ​ជ្រើសរើស​មេដឹកនាំ​ប្រកប​ដោយ​សេរី ត្រឹមត្រូវ និង​យុត្តិធម៌។

មន្ត្រី​ជាន់ខ្ពស់​សង្គម​ស៊ីវិល​រូប​នេះ អំពាវនាវ​ឲ្យ​ប្រជាពលរដ្ឋ​ទៅ​ចុះឈ្មោះ និង​ពិនិត្យ​ឈ្មោះ​ក្នុង​បញ្ជី​បោះឆ្នោត​ឲ្យ​បាន​គ្រប់ៗ​គ្នា ព្រោះ​ថា​ការ​បោះបង់​កាតព្វកិច្ច​របស់​ខ្លួន​ក្នុង​ការ​សម្ដែង​ឆន្ទៈ​ជ្រើសរើស​មេដឹកនាំ​តាមរយៈ​សន្លឹកឆ្នោត គឺ​ធ្វើ​ឲ្យ​ពួកគាត់​បាត់បង់​ឱកាស​យ៉ាង​ធំធេង​សម្រាប់​ជ្រើសរើស​មេដឹកនាំ​ដែល​ខ្លួន​ពេញចិត្ត។

កាលពី​ថ្ងៃទី​២០ ខែ​តុលា ឆ្នាំ​២០២២ គណៈកម្មាធិការ​ជាតិ​រៀបចំ​ការ​បោះឆ្នោត ដែល​ហៅ​កាត់​ថា គ.ជ.ប បាន​ចេញ​សេចក្តី​ប្រកាស​ព័ត៌មាន​ឱ្យ​ប្រជាពលរដ្ឋ​ទៅ​ពិនិត្យ​បញ្ជី​ឈ្មោះ និង​ចុះឈ្មោះ​បោះឆ្នោត​សម្រាប់​អាណត្តិ​ទី​៧ នៅ​ខែ​កក្កដា ឆ្នាំ​២០២៣ ខាងមុខ​នេះ ដែល​ត្រូវ​ដំណើរការ​រយៈពេល ៥០​ថ្ងៃ ដោយ​គិត​ចាប់ពី​ថ្ងៃទី​២០ ខែ​តុលា រហូត​ដល់​ថ្ងៃទី​៨ ខែ​ធ្នូ ឆ្នាំ​២០២២ ខាងមុខ ខណៈ​ដំណើរការ​នេះ​នៅ​សល់​រយៈពេល​តែ ២​សប្តាហ៍​ទៀត​ប៉ុណ្ណោះ។

ជុំវិញ​ដំណើរការ​នេះ គណៈកម្មាធិការ​ជាតិ​រៀបចំ​ការ​បោះឆ្នោត ធ្លាប់​បាន​បញ្ជាក់​ថា ចាប់ពី​ថ្ងៃទី​២៩ ខែ​វិច្ឆិកា ដល់​ថ្ងៃទី​៨ ខែ​ធ្នូ ឆ្នាំ​២០២២ ដែល​មាន​រយៈពេល ១០​ថ្ងៃ ការិយាល័យ​ចុះឈ្មោះ​បោះឆ្នោត​នឹង​ត្រូវ​បើក​បម្រើការ​នៅ​តាម​សាលាឃុំ-សង្កាត់​ដូច​ដើម​វិញ ដូច្នេះ​អំឡុង​ពេលនេះ គឺ​នៅ​មុន​ថ្ងៃទី​២៩ ខែ​វិច្ឆិកា ការិយាល័យ​ចុះឈ្មោះ​បោះឆ្នោត​នឹង​ត្រូវ​ចល័ត​នៅ​តាម​ភូមិ​មួយ​ចំនួន​ក្នុង​ឃុំ និង​សង្កាត់​នីមួយៗ​នៅឡើយ។

ផ្អែក​តាម​របាយការណ៍​របស់​គណៈកម្មាធិការ​ជាតិ​រៀបចំ​ការ​បោះឆ្នោត ស្ដីពី​ចំនួន​ប្រជាពលរដ្ឋ​ដែល​បាន​ទៅ​ចុះឈ្មោះ​បោះឆ្នោត​ដោយ​គិត​ចាប់តាំងពី​ថ្ងៃទី​២១ ខែ​តុលា រហូត​ដល់​ថ្ងៃទី​២២ ខែ​វិច្ឆិកា ឆ្នាំ​២០២២ នេះ ពលរដ្ឋ​ដែល​បាន​ទៅ​ចុះឈ្មោះ​បោះឆ្នោត​ថ្មី​មាន​ចំនួន​ជាង ៥៤​ម៉ឺន​នាក់​ហើយ ខណៈ​ចំនួន​ឈ្មោះ​ដែល​ត្រូវ​លុប​ចេញពី​បញ្ជី​ឈ្មោះ​បោះឆ្នោត​ក៏​មាន​ចំនួន​រហូត​ដល់​ជាង ១៩​ម៉ឺន​នាក់​ផង​ដែរ។

ទាក់ទិន​នឹង​បញ្ហា​នេះ កាលពី​ថ្ងៃទី​៣០ ខែ​កញ្ញា ឆ្នាំ​២០២២ គណៈកម្មាធិការ​ជាតិ​រៀបចំ​ការ​បោះឆ្នោត បាន​បង្ហាញ​របាយការណ៍​ស្ដីពី​ស្ថិតិ​ប្រជាពលរដ្ឋ​សម្រាប់​បម្រើ​ការ​ឱ្យ​ការ​ពិនិត្យ​ឈ្មោះ និង​ចុះឈ្មោះ​បោះឆ្នោត​ថា ចំនួន​ឈ្មោះ​ប្រជាពលរដ្ឋ​ដែល​មាន​ក្នុង​បញ្ជី​បោះឆ្នោត​សរុប​មាន​ចំនួន ៩​លាន ២​សែន ៥​ពាន់ ៦១៨​នាក់។

ជុំវិញ​ដំណើរការ​នៃ​ការ​បោះឆ្នោត​នេះ ប្រមុខ​រដ្ឋាភិបាល​កម្ពុជា លោក ហ៊ុន សែន បាន​ចេញ​អនុក្រឹត្យ​ស្ដីពី​ការ​កំណត់​កាលបរិច្ឆេទ​នៃ​ការ​បោះឆ្នោត​ជាតិ​អាណត្តិ​ទី​៧ កាលពី​ថ្ងៃទី​២៩ ខែ​មិថុនា ឆ្នាំ​២០២២ កន្លងទៅ ដែល​បាន​កំណត់​យក​ថ្ងៃ​អាទិត្យ ទី​២៣ ខែ​កក្កដា ឆ្នាំ​២០២៣ ជា​ថ្ងៃ​បោះឆ្នោត​ជ្រើសតាំង​តំណាងរាស្ត្រ​ទៅ​តាម​អាណត្តិ​របស់​ខ្លួន​ដែល​មាន​រយៈពេល ៥​ឆ្នាំ​ម្តង​ដូច​អាណត្តិ​មុនៗ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស