អ្នកឃ្លាំមើលសង្គម ព្រមានថា ប្រសិនបើអំពើជួញដូរមនុស្សនៅកម្ពុជាមានមន្ត្រីធំៗក្នុងជួររដ្ឋាភិបាលជួយអន្តរាគមន៍ពីក្រោយខ្នង នោះកម្ពុជានឹងក្លាយជាសម្បុករបស់ឧក្រិដ្ឋជនដ៏សុខសាន្ត ហើយក៏មិនអាចដកខ្លួនរួចពីបញ្ជីតាមដានរបស់អន្តរជាតិដែរ។
ស្ថាបនិកអង្គការអភិវឌ្ឍន៍ផ្នត់គំនិត លោក សេក សុជាតិ បានប្រាប់សារព័ត៌មាន The Cambodia Daily នៅថ្ងៃទី២៤ វិច្ឆិកា នេះថា បើអំពើជួញដូរមនុស្សមិនជាប់ពាក់ព័ន្ធនឹងមន្ត្រីរដ្ឋាភិបាលជាន់ខ្ពស់ណាមួយនោះទេ ប៉ុន្តែអាជ្ញាធរនៅតែបង្ក្រាបមិនបាន មានន័យថា សមត្ថភាពរបស់សមត្ថកិច្ចពួកគេគួរតែលាលែងចេញពីតំណែង ឬត្រូវទទួលពិន័យណាមួយពីរដ្ឋាភិបាលដែលអសមត្ថភាពចំពោះតួនាទីរបស់ខ្លួន ក្នុងការលុបបំបាត់អំពើជួញដូរមនុស្សនេះ។
លោក សេក សុជាតិ ត្អូញត្អែរថា ប្រសិនបើគ្មានការប្ដេជ្ញាពីរដ្ឋាភិបាល និងក្រសួងពាក់ព័ន្ធដើម្បីលុបបំបាត់អំពើជួញដូរមនុស្សឱ្យអស់ពីកម្ពុជាដោយពិតប្រាកដទេ អំពើល្មើសទាំងនេះនឹងនៅតែបន្តរីករាលដាលបន្ថែមទៀត ព្រោះថាក្រុមឧក្រិដ្ឋជនដឹងយ៉ាងច្បាស់ពីសកម្មភាពរបស់ពួកគេ។ បើពួកគេធ្វើសកម្មភាពក្នុងកម្រិតតូច នឹងទទួលបានផលតិច ប៉ុន្តែបើពួកគេពង្រីកសកម្មភាពក្នុងកម្រិតធំ នឹងទទួលបានផលច្រើន។
ការអះអាងនេះ ធ្វើឡើងបន្ទាប់ពីក្រសួងមហាផ្ទៃ បានបង្ហាញរបាយការណ៍ស្ដីពីការជួយជនរងគ្រោះពីអំពើជួញដូរមនុស្ស ទាសភាព និងការរំលោភបំពានផ្លូវភេទកាលពីថ្ងៃពុធ ទី២៣ វិច្ឆិកា នេះ។
កាលពីថ្ងៃទី២៣ ខែវិច្ឆិកា ឆ្នាំ២០២២ អនុប្រធានអចិន្ត្រៃយ៍គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស អ្នកស្រី ជូ ប៊ុនអេង បានលើកឡើងក្នុងសិក្ខាសាលាស្ដីពីការចែករំលែកបទពិសោធន៍អំពីអ្នករស់រានមានជីវិតពីអំពើជួញដូរមនុស្សថា យ៉ាងហោចណាស់មានអ្នករស់រានមានជីវិតប្រមាណជាង ៤ពាន់នាក់ពីការជួញដូរមនុស្ស ទាសភាព និងការរំលោភបំពាន ទទួលបានជីវិតល្អប្រសើរឡើងវិញ ក្រោយពីការជួយសង្គ្រោះរបស់សមត្ថកិច្ច។
រដ្ឋលេខាធិការក្រសួងមហាផ្ទៃរូបនេះអះអាងថា អំពើជួញដូរមនុស្ស ទាសភាព និងការរំលោភបំពាននៅប្រទេសណាក៏មានដែរ ប៉ុន្តែរាជរដ្ឋាភិបាលកម្ពុជាដែលក្រោមការដឹកនាំរបស់លោកនាយករដ្ឋមន្ត្រី ហ៊ុន សែន បានប្ដេជ្ញាខ្ពស់ក្នុងការសហការជាមួយដៃគូពាក់ព័ន្ធទាំងអស់ ទាំងថ្នាក់ប្រទេស និងកម្រិតតំបន់ ដើម្បីលុបបំបាត់រាល់ទម្រង់នៃអំពើជួញដូរមនុស្ស និងអំពើកេងប្រវ័ញ្ចនានា។
យ៉ាងណាក៏ដោយ កាលពីថ្ងៃចន្ទ ទី២១ ខែវិច្ឆិកា ឆ្នាំ២០២២ រដ្ឋមន្ត្រីក្រសួងមហាផ្ទៃ លោក ស ខេង បានលើកឡើងក្នុងពិធីតែងតាំងអភិបាលថ្មីនៃខេត្តពោធិ៍សាត់ ថា នៅក្នុងឃុំថ្មដា ស្រុកវាលវែង ខេត្តពោធិ៍សាត់ ដែលជាតំបន់សេដ្ឋកិច្ចពិសេសថ្មដារបស់ឧកញ៉ា ទ្រី ភាព កំពុងតែក្លាយជាទីតាំងប្រតិបត្តិការឆបោកដ៏ល្បីឈ្មោះនៅពេលនេះ ក្នុងនោះបទល្មើសដែលមានការរៀបចំមួយចំនួន គឺមានប្រភពចេញពីខេត្តព្រះសីហនុ ហើយក៏បានចូលទៅក្នុងតំបន់សេដ្ឋកិច្ចពិសេសថ្មដានៅពេលនេះ។
រដ្ឋមន្ត្រីក្រសួងមហាផ្ទៃ លោក ស ខេង បានព្រមានទៅកាន់នគរបាលជាតិថា កុំបណ្ដោយឱ្យបទល្មើសទាំងនេះកាន់តែរីកធំឱ្យសោះ ព្រោះថាពួកឧក្រិដ្ឋជន និងមេខ្លោងនៃអំពើជួញដូរមនុស្ស បានយកកម្ពុជាជាកន្លែងសម្រាប់ប្រព្រឹត្តបទល្មើសយ៉ាងអនាធិបតេយ្យ ប៉ុន្តែបើគ្មានមន្ត្រីរដ្ឋាភិបាលជាប់ពាក់ព័ន្ធក្នុងករណីនេះទេ បញ្ហាទាំងនេះគឺងាយស្រួលដោះស្រាយបំផុត។
ក្រសួងការបរទេសអាមេរិក កាលពីថ្ងៃទី១៩ ខែកក្កដា ក៏បានបញ្ចេញរបាយការណ៍ប្រចាំឆ្នាំ២០២២ ស្ដីពីការជួញដូរមនុស្សរបស់ខ្លួនផងដែរដែលទម្លាក់កម្ពុជា វៀតណាម តំបន់ម៉ាកាវ និងប្រទេសផ្សេងទៀតពីបញ្ជីខ្មៅស្ថិតក្រោមការឃ្លាំមើលនៅកម្រិតពីរ (Tier 2 Watch List) ទៅកម្រិត៣ (Tier 3 Watch List) ដែលនៅតែធ្វើឲ្យកម្ពុជាស្ថិតនៅក្នុងបញ្ជីខ្មៅនៃការជួញដូរមនុស្សធ្ងន់ធ្ងរសព្វថ្ងៃនេះ។
ជុំវិញបញ្ហានេះ សារព័ត៌មាន The Australian បានចេញផ្សាយកាលពីពេលថ្មីៗនេះថា កម្ពុជាកំពុងរងនូវការសង្ស័យថាកំពុងប្រព្រឹត្តអំពើជួញដូរមនុស្សយ៉ាងធំដែលគ្រប់គ្រងដោយក្រុមឧក្រិដ្ឋជនលាងលុយជនជាតិចិន ដោយជាប់ពាក់ព័ន្ធយ៉ាងខ្លាំងជាមួយនឹងក្មួយប្រុសរបស់មេដឹកនាំផ្ដាច់ការកម្ពុជា លោក ហ៊ុន សែន គឺលោក ហ៊ុន តូ។
លើសពីនេះ សារព័ត៌មានអន្តរជាតិ អាល់ចាហ្ស៊ីរ៉ា (Aljazeera) ក៏បានរកឃើញដែរថា អំពើជួញដូរមនុស្សនេះ គឺមានជាប់ពាក់ព័ន្ធយ៉ាងខ្លាំងទៅនឹងថ្នាក់ដឹកនាំកំពូលៗនៅកម្ពុជា ដូចជាលោកនាយករដ្ឋមន្ត្រី ហ៊ុន សែន អ្នកស្រី ម៉ែន សំអន លោក ហ៊ីង ប៊ុនហៀង និងបុគ្គលមានតួនាទីខ្ពស់ៗក្នុងជួររដ្ឋាភិបាលមួយចំនួនទៀតផងដែរ៕