30 C
Phnom Penh

សង្គម​ស៊ីវិល​៦៩​ស្ថាប័ន​ទាមទារ​ឱ្យ​ដោះលែង​កញ្ញា ឈឹម ស៊ីថរ ជាបន្ទាន់​និង​ឥត​លក្ខខណ្ឌ

ដោយ ឌឹ ខេមបូឌា ដេលី

បទវិភាគ

អង្គការ​សង្គម​ស៊ីវិល​ដែល​ធ្វើការ​លើក​កម្ពស់​សិទ្ធិ និង​សហជីព​ជិត ៧០​ស្ថាប័ន ទាមទារ​ឲ្យ​រដ្ឋាភិបាល​ដោះលែង​កញ្ញា ឈឹម ស៊ីថរ ចេញពី​ពន្ធនាគារ​ជាបន្ទាន់ និង​ឥត​លក្ខខណ្ឌ ដោយ​ចាត់ទុក​ការ​ដាក់​ទោស​ពលរដ្ឋ​ដោយសារ​ខកខាន​ក្នុង​ការ​អនុវត្ត​នូវ​លក្ខខណ្ឌ​ដែល​មិន​បាន​ប្រាប់​ឲ្យ​ដឹង​មុន គឺជា​ភាព​អយុត្តិធម៌​បំផុត និង​ល្មើស​ទៅ​នឹង​គោលការណ៍​ជា​មូលដ្ឋាន​នៃ​នីតិរដ្ឋ។

ការ​អំពាវនាវ​នេះ ធ្វើឡើង​បន្ទាប់ពី​សមត្ថកិច្ច​បាន​ចាប់ និង​បញ្ជូន​កញ្ញា ឈឹម ស៊ីថរ ទៅ​ឃុំ​ខ្លួន​នៅ​ពន្ធនាគារ​ព្រៃស រាជធានី​ភ្នំពេញ នៅ​រសៀល​ថ្ងៃទី​២៦ ខែ​វិច្ឆិកា ក្រោម​ហេតុផល​ថា កញ្ញា ស៊ីថរ ល្មើស​បម្រាម ឬ​គេចវេះ​ពី​ការ​ត្រួតពិនិត្យ​របស់​តុលាការ​ដោយ​ចេញ​ទៅ​ក្រៅ​ប្រទេស។

ក្នុង​សេចក្ដី​ថ្លែងការណ៍​របស់​អង្គការ​សង្គម​ស៊ីវិល​ចំនួន ៦៩​ស្ថាប័ន​ចេញ​ផ្សាយ​នៅ​ថ្ងៃទី​២៨ ខែ​វិច្ឆិកា នេះ បាន​ឱ្យ​ដឹង​ថា កញ្ញា ស៊ីថរ ត្រូវ​បាន​អាជ្ញាធរ​អន្តោប្រវេសន៍​អនុញ្ញាត​ឲ្យ​ចាកចេញ​ទៅ​ចូលរួម​កិច្ចប្រជុំ​សហជីព​អន្តរជាតិ​នៅ​ក្នុង​ប្រទេស​អូស្ត្រាលី ប៉ុន្តែ​បែរ​ជា​ត្រូវ​ចាប់​ខ្លួន​នៅ​ពេល​កញ្ញា​ត្រឡប់​ចូល​មក​ប្រទេស​ទៅវិញ។

សេចក្ដី​ថ្លែងការណ៍​ដដែល​ថា ប្រសិនបើ​អាជ្ញាធរ​ចង់​ឲ្យ​កញ្ញា ស៊ីថរ គោរព​នូវ​លក្ខខណ្ឌ​នៃ​ការ​ដោះលែង​ទាំងនោះ ពួកគេ​គួរតែ​ជូនដំណឹង​អំពី​លក្ខខណ្ឌ​ទាំងនោះ​ឲ្យ​សាមី​ខ្លួន និង​មេធាវី​របស់​សាមី​ខ្លួន​បាន​ដឹង។

ក្រុម​សង្គម​ស៊ីវិល​ចាត់ទុក​ការ​ដាក់​ទោស​ពលរដ្ឋ​ដោយសារ​ខកខាន​ក្នុង​ការ​អនុវត្ត​នូវ​លក្ខខណ្ឌ​ដែល​មិន​ដែល​បាន​ប្រាប់​ឲ្យ​ដឹង​មុន គឺជា​ភាព​អយុត្តិធម៌​បំផុត ហើយ​ល្មើស​ទៅ​នឹង​គោលការណ៍​ជា​មូលដ្ឋាន​នៃ​នីតិរដ្ឋ។

អគ្គលេខាធិការ​នៃ​សហជីព​ទ្រទ្រង់​សិទ្ធិ​ការងារ បុគ្គលិក កម្មករ​ខ្មែរ​នៃ​ក្រុមហ៊ុន​ណាហ្គា​វើលដ៍ (LRSU) អ្នកស្រី ឃ្លាំង សុបិន្ដ បាន​លើកឡើង​ក្នុង​សេចក្ដី​ថ្លែងការណ៍​ដោយ​អំពាវនាវ​ដល់​អាជ្ញាធរ​រដ្ឋ​បញ្ឈប់​ការ​លាប​ពណ៌ និង​ចាត់ទុក​ការ​ធ្វើ​កូដកម្ម​របស់​សហជីព​ណាហ្គា​វើលដ៍ ថា​ជា​ការ​តវ៉ា​ខុស​ច្បាប់។

អ្នកស្រី​បន្ត​ថា ការ​ធ្វើ​កូដកម្ម​របស់​សហជីព ធ្វើឡើង​ស្រប​តាម​ច្បាប់​របស់​កម្មករ​និយោជិត​ដែល​ត្រូវ​បាន​ក្រុមហ៊ុន​បរទេស​រំលោភ​បំពាន​លើ​សិទ្ធិ និង​ច្បាប់​ការងារ​របស់​ប្រទេស។ លើស​ពី​នេះ បញ្ហា​កូដកម្ម​របស់​សហជីព​ណាហ្គា​វើលដ៍ ត្រូវតែ​ធ្វើការ​ដោះស្រាយ​ដោយ​ផ្អែក​លើ​ច្បាប់​ការងារ ហើយ​អាជ្ញាធរ​ត្រូវតែ​ឈប់​ចាត់ទុក​សមាជិក​សហជីព​ជា​ឧក្រិដ្ឋជន​ខុស​ច្បាប់ ដោយ​គ្រាន់តែ​អ្នក​ទាំងនោះ​អនុវត្ត​នូវ​សិទ្ធិ និង​ការងារ​ស្រប​ច្បាប់ និង​មិន​អាត្មា​និយម​របស់​ពួកគេ ដើម្បី​ការងារ​សិទ្ធិ​ស្រប​ច្បាប់​របស់​អ្នក​ដទៃ។

អគ្គលេខាធិការ​នៃ​សហជីព​ទ្រទ្រង់​សិទ្ធិ​ការងារ​រូប​នេះ អំពាវនាវ​ដល់​អាជ្ញាធរ​រដ្ឋ​ដោះលែង​កញ្ញា ស៊ីថរ ឲ្យ​បាន​ឆាប់​រហ័ស និង​លើក​ចោល​បទ​ចោទប្រកាន់​ទាំងអស់​ចំពោះ​កញ្ញា ស៊ីថរ ក៏ដូចជា​មេដឹកនាំ និង​សមាជិក​សហជីព​ណាហ្គា​វើលដ៍​ដទៃ​ទៀត ។

ចំណែក​ប្រធាន​កម្មវិធី​ការងារ​នៃ​មជ្ឈមណ្ឌល​សម្ព័ន្ធភាព​ការងារ និង​សិទ្ធិមនុស្ស (សង់ត្រាល់) លោក ឃុន ថារ៉ូ លើកឡើង​ដែរ​ថា ប្រសិនបើ​តុលាការ​ឯករាជ្យ សុក្រឹត យុត្តិធម៌ កញ្ញា ស៊ីថរ គួរតែ​ត្រូវ​បាន​លើក​កម្ពស់ និង​ការពារ​ដោយ​ច្បាប់។

លោក​ចាត់ទុក​ការ​ចាប់​ខ្លួន​សកម្មជន​សិទ្ធិ​ការងារ​ដ៏​លេចធ្លោ​រូប​នេះ គឺជា​ការ​រំលោភ​សិទ្ធិមនុស្ស និង​សិទ្ធិ​ការងារ​យ៉ាង​ធ្ងន់ធ្ងរ ដោយ​ការ​ចោទប្រកាន់​របស់​តុលាការ​មិន​បាន​ផ្អែក​លើ​មូលដ្ឋាន​ច្បាប់។

អង្គការ សមាគម សហជីព សហគមន៍​ទាំង ៦៩​ស្ថាប័ន អំពាវនាវ​ដល់​រាជរដ្ឋាភិបាល​ឲ្យ​ឈប់​ភ័យ​ខ្លាច​នូវ​វត្តមាន​ភាព​ក្លាហាន និង​ភាព​រឹងមាំ​របស់​កញ្ញា ស៊ីថរ តទៅទៀត។ ពួកគេ​ទាមទារ​ទៅ​អាជ្ញាធរ​រដ្ឋ​ដោះលែង​កញ្ញា ស៊ីថរ ជាបន្ទាន់ និង​ដោយ​ឥត​លក្ខខណ្ឌ​ចេញពី​ពន្ធនាគារ និង​បញ្ឈប់​ការ​ប្រើប្រាស់​ប្រព័ន្ធ​តុលាការ​ដើម្បី​បំភិតបំភ័យ​ប្រធាន និង​សមាជិក​សហជីព​តទៅទៀត។

ពួកគេ​ក៏​បាន​ទាមទារ​ឲ្យ​អាជ្ញាធរ​រដ្ឋ​ត្រូវតែ​បញ្ឈប់​ការ​ធ្វើ​ទុក្ខបុកម្នេញ និង​បញ្ឈប់​ការ​ចាត់ទុក​កញ្ញា ស៊ីថរ សមាជិក​សហជីព​ណាហ្គា​វើលដ៍ ក៏ដូចជា​ប្រធាន​សហជីព​ក្នុង​រោងចក្រ​កាត់ដេរ សណ្ឋាគារ និង​ក្នុង​វិស័យ​សេដ្ឋកិច្ច​ក្រៅ​ប្រព័ន្ធ​ដទៃ​ទៀត​ថា​ជា​សត្រូវ​របស់​អាជ្ញាធរ។

កញ្ញា ឈឹម ស៊ីថរ ប្រធាន​សហជីព​ទ្រទ្រង់​សិទ្ធិ​ការងារ​បុគ្គលិក​កម្មករ​ខ្មែរ

អង្គការ សមាគម សហជីព សហគមន៍​ទាំង ៦៩​ស្ថាប័ន​ចេញ​សេចក្ដី​ថ្លែងការណ៍ ក្នុង​នោះ​មាន​មជ្ឈមណ្ឌល​សិទ្ធិមនុស្ស​កម្ពុជា (CCHR) សហព័ន្ធ​សហជីព​កម្មករ​ចំណី​អាហារ និង​សេវាកម្ម​កម្ពុជា (CFSWF) អង្គការ​ការពារ​សិទ្ធិមនុស្ស​លីកាដូ (LICADHO) សមាគម​ការពារ​សិទ្ធិមនុស្ស (ADHOC) មជ្ឈមណ្ឌល​សម្ព័ន្ធភាព​ការងារ និង​សិទ្ធិមនុស្ស (CENTRAL) និង​សហព័ន្ធ​សហជីព​កម្មករ​សំណង់ និង​ព្រៃឈើ​កម្ពុជា (BWTUC) ជាដើម។

កញ្ញា ស៊ីថរ ដែល​ទើប​តែ​ជាប់​ឆ្នោត​ក្លាយ​ជា​ប្រធាន​សហជីព​ទ្រទ្រង់​សិទ្ធិ​ការងារ​បុគ្គលិក​កម្មករ​ខ្មែរ​នៃ​ក្រុមហ៊ុន​ណាហ្គា​វើលដ៍ (LRSU) សម្រាប់​អាណត្តិ​ថ្មី ត្រូវ​បាន​អាជ្ញាធរ​ចាប់​ខ្លួន​នៅ​ក្នុង​អាកាសយានដ្ឋាន​អន្តរជាតិ​ភ្នំពេញ​កាលពី​ព្រឹក​ថ្ងៃ​សៅរ៍ ទី​២៦ ខែ​កញ្ញា ឆ្នាំ​២០២២ នៅ​ពេល​ដែល​កញ្ញា​ត្រឡប់​មកពី​ចូលរួម​កិច្ចប្រជុំ​សហព័ន្ធ​សហជីព​អន្តរជាតិ​នៅ​ក្នុង​ប្រទេស​អូស្ត្រាលី។

ប្រធាន​សហជីព​ទ្រទ្រង់​សិទ្ធិ​ការងារ​បុគ្គលិក​កម្មករ​ខ្មែរ​នៃ​ក្រុមហ៊ុន​ណាហ្គា​វើលដ៍ កញ្ញា ឈឹម ស៊ីថរ ត្រូវ​បាន​តុលាការ​ចោទប្រកាន់​ពី​បទ «ញុះញង់» តាម​បញ្ញត្តិ​មាត្រា​៤៩៤ និង​មាត្រា​៤៩៥ នៃ​ក្រម​ព្រហ្មទណ្ឌ កាលពី​ខែ​មករា ឆ្នាំ​២០២២ ក្រោយ​ពេល​សហជីព​កញ្ញា​ចាប់ផ្ដើម​ធ្វើ​កូដកម្ម​អហិង្សា​ទាមទារ​រក​ដំណោះស្រាយ​ការងារ​ពី​ភាគី​ក្រុមហ៊ុន​បនល្បែង​មួយ​នេះ។

កញ្ញា ឈឹម ស៊ីថរ ប្រធាន​សហជីព​ទ្រទ្រង់​សិទ្ធិ​ការងារ​បុគ្គលិក​កម្មករ​ខ្មែរ ត្រូវ​បាន​អាជ្ញាធរ​ចាប់​ខ្លួន​នៅ​រសៀល​ថ្ងៃ​ទី​៤ ខែ​មករា ឆ្នាំ​២០២២។ (រូបថត​ពី​ហ្វេសប៊ុក)

កញ្ញា ឈឹម ស៊ីថរ ត្រូវ​បាន​ចាប់​ខ្លួន​យ៉ាង​ហិង្សា​កាលពី​រសៀល​ថ្ងៃទី​៤ ខែ​មករា ឆ្នាំ​២០២២ អំឡុង​ពេល​ព្យាយាម​ចូលរួម​ធ្វើ​កូដកម្ម​ជាមួយ​កូដករ​ផ្សេង​ទៀត ហើយ​ត្រូវ​បាន​ជាប់​ឃុំ​បណ្ដោះអាសន្ន​ក្នុង​ពន្ធនាគារ​អស់​រយៈពេល ២​ខែ​ជាមួយ​នឹង​ថ្នាក់​ដឹកនាំ និង​សមាជិក​របស់​ខ្លួន​ចំនួន ១០​នាក់​ផ្សេង​ទៀត មុន​ពេល​មាន​ការ​ដោះលែង​ឱ្យ​នៅ​ក្រៅ​ឃុំ​វិញ​កាលពី​ខែ​មីនា ឆ្នាំ​នេះ។

អង្គការ​ឃ្លាំមើល​សិទ្ធិមនុស្ស Human Rights Watch បាន​ចេញ​របាយការណ៍​មួយ​កាលពី​ថ្ងៃទី​២១ ខែ​វិច្ឆិកា ឆ្នាំ​២០២២ បាន​អះអាង​ថា នៅ​កម្ពុជា​មាន​តែ​សហជីព​ស្និទ្ធ​នឹង​ថៅកែ​ទេ​ដែល​អាច​បន្ត​រស់រាន​មាន​ជីវិត​បាន​ល្អ​ប្រសើរ ខណៈ​សហជីព​ឯករាជ្យ​ក្នុង​វិស័យ​កាត់ដេរ​សម្លៀកបំពាក់ និង​ទេសចរណ៍ រង​ការ​ធ្វើ​ទុក្ខបុកម្នេញ​ឥត​ស្រាកស្រាន្ត៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស