នៅទីបំផុត លោក អាន់វ៉ា អ៊ីប្រាហ៊ីម ដែលជាមេដឹកនាំបក្សប្រឆាំងបានស្បថចូលកាន់តំណែងនាយករដ្ឋមន្ត្រីទី១០ នៃរាជាណាចក្រម៉ាឡេស៊ី ដែលជាការទម្លាយភាពទាល់ច្រកក្រោយពីការបោះឆ្នោតថ្ងៃទី១៩ ខែវិច្ឆិកា។
ការឡើងកាន់តំណែងជានាយករដ្ឋមន្ត្រីនៃអ្នកទោសនយោបាយរូបនេះ ធ្វើឡើងក្រោមអន្តរាគមន៍ពីព្រះមហាក្សត្រ Abdullah Ahmad Shah បន្ទាប់ពីព្រះអង្គបានសម្រេចកោះប្រជុំក្សត្រ sultan ប្រចាំរដ្ឋចំនួន៩ ឲ្យយាងមកប្រជុំក្នុងព្រះបរមរាជវាំងជាមួយនឹងព្រះអង្គ ដើម្បីសម្រេចអំពីបេក្ខជនរូបណាសមជានាយករដ្ឋមន្ត្រី។ ក្នុងជំនួបនេះ មហាក្សត្រ Abdullah Ahmad Shah បានសម្រេចដោយឈរលើអំណាចព្រះរាជាប្តូរវេន។
នៅថ្ងៃទី២៤ វិច្ឆិកា បណ្ដាញផ្សាយព័ត៌មាន Channel News Asia បានឲ្យដឹងថា ព្រះមហាក្សត្របានសម្រេចចាត់តាំងលោក អាន់វ៉ា អ៊ីប្រាហ៊ីម ជានាយករដ្ឋមន្ត្រីដោយតម្រូវឲ្យលោកដឹកនាំការបង្កើតរដ្ឋាភិបាលក្រុមណាមួយក៏ដោយដែលមានអាសនៈនៅក្នុងរដ្ឋសភា ហើយជាគណបក្សទទួលបានអាសនៈចេញពីការបោះឆ្នោតសភាកាលពីថ្ងៃសៅរ៍សប្ដាហ៍កន្លងមកនេះ។
សេចក្ដីថ្លែងការណ៍ពីព្រះបរមរាជវាំងបានបញ្ជាក់ថា ការពិតការបោះឆ្នោតនេះមានភាពសុក្រឹត ត្រឹមត្រូវ សេរីភាពនយោបាយគឺមានការបើកចំហ ហើយបើទោះជាភាពឈ្នះនៃបក្សនីមួយៗមិនលើសលប់ក៏ដោយ។
ព្រះអង្គមានបន្ទូលក្នុងព្រះរាជសារទៀតថា គេមិនត្រូវទាញប្រទេសឲ្យធ្លាក់ក្នុងភាពចលាចលនោះទេ ហើយការបង្កើតរដ្ឋាភិបាលឯកភាពមួយ គឺជាការចាំបាច់នៅពេលនេះ។ ព្រះរាជសាររបស់ព្រះអង្គបានបញ្ជាក់ទៀតថា អ្នកបោះឆ្នោតក៏គួរតែស្ថិតក្នុងភាពស្ងប់ស្ងាត់ ហើយត្រូវចេះស្រឡាញ់ជនរួមជាតិ និងជួយធ្វើឱ្យសង្គមមានសន្តិភាព និងការអភិវឌ្ឍ។
បើតាមសាររបស់ព្រះអង្គ រាជាណាចក្រម៉ាឡេស៊ី ហៅថាសហព័ន្ធម៉ាឡេស៊ី ត្រូវការរដ្ឋាភិបាលដែលមានស្ថិរភាពរឹងមាំ។ នៅពេលជួបមេដឹកនាំនយោបាយកាលថ្ងៃទី២១ វិច្ឆិកា ព្រះមហាក្សត្របានប្រាប់ទៅលោក អាន់វ៉ា និង មុយហ៊ីនឌីដ យ៉ាស៊ីន ដែលជាមេដឹកនាំបក្សបានឈ្នះអាសនៈច្រើនជាងគេ ត្រូវរួមបង្កើតរដ្ឋាភិបាលឯកភាពជាតិមួយរឹងមាំ តែលោក យ៉ាស៊ីន មិនយល់ស្របតាមការផ្ដល់ឱវាទព្រះអង្គនោះទេ។
តែនៅពេលនេះនៅពេលក្រុមប្រឹក្សារាជវាំងសម្រេចចាត់តាំងលោក អាន់វ៉ា ជានាយករដ្ឋមន្ត្រី ព្រោះតែបក្សរបស់លោក អាន់វ៉ា ជាបក្សឈ្នះឆ្នោតច្រើនជាងគេ បាននាំឲ្យលោក យ៉ាស៊ីន ស្ថិតក្នុងភាពទាល់ច្រក។ លោកបានថ្លែងទៅកាន់អ្នកសារព័ត៌មានថា លោកយល់ព្រមតាមព្រះរាជឱវាទរបស់ព្រះមហាក្សត្រ។
ការបោះឆ្នោតសភាអាណត្តិទី១៥ កាលពីថ្ងៃសៅរ៍សប្តាហ៍មុន មិនមានបក្ស ឬសម្ពន្ធភាពណាមួយទទួលសំឡេង ១១២អាសនៈនៃរដ្ឋសភាមានអាសនៈសរុប ២២២ ដើម្បីបង្កើតរដ្ឋាភិបាលនោះទេ។ ក្នុងចំណោមនោះ សម្ពន្ធភាពពីរទទួលបានអាសនៈច្រើនជាងគេ ក្នុងនោះសម្ពន្ធភាពដឹកនាំដោយមេបក្សប្រឆាំង លោក អាន់វ៉ា អ៊ីប្រាហ៊ីម ទទួលបានអាសនៈ៨២។ បក្សរបស់អតីតនាយករដ្ឋមន្ត្រី លោក យ៉ាស៊ីន ទទួលបាន ៧៣អាសនៈ ហើយសម្ពន្ធភាពដែលកំពុងដឹកនាំប្រទេស Barisan Nasional ទទួលបាន ៣០អាសនៈ។
ចំណែកបក្សចំនួន ៤ទៀតក៏ទទួលបានអាសនៈដែរ តែបានជាង ២០អាសនៈ និងបក្ស ៣ ទៀត បានតែបីបួន និងប្រាំមួយអាសនៈ។ តាមគោលការណ៍នៃការបង្កើតរដ្ឋសភា គឺតម្រូវ ១១២អាសនៈទើបអាចបង្កើតរដ្ឋាភិបាលបានដោយឯកឯង ដែលគេហៅថាទទួលបានអាសនៈ ៥០បូក១ ជាសំឡេងឆ្នោតដាច់ខាត ឬពហុភាព។
ទោះជាយ៉ាងណាក៏ដោយ ព្រះមហាក្សត្របានផ្ដល់ការយល់ព្រមឲ្យលោក អាន់វ៉ា អ៊ីប្រាហ៊ីម ស្បថចូលកាន់តំណែងនាយករដ្ឋមន្ត្រីទី១០ នៃរាជាណាចក្រមួយនេះនៅក្នុងសមាគមអាស៊ាន។
តើអ្នកនយោបាយ អាន់វ៉ា អ៊ីប្រាហ៊ីម មានប្រវត្តិដូចម្ដេច?
លោក អាន់វ៉ា សម្រេចគោលដៅរបស់ខ្លួនបន្ទាប់ពីចាប់ផ្តើមធ្វើនយោបាយអស់រយៈពេល ៣ទសវត្សមកហើយ គឺចាប់តាំងពីលោកដើរតាមអ្នកនយោបាយជើងចាស់ លោក មហាធា មហាម៉ាត់ រហូតដល់ក្លាយជាមេដឹកនាំចលនាបាតុកម្ម ជាអ្នកទោសនយោបាយ ជាមេបក្សប្រឆាំង និងចុងក្រោយនេះ ជានាយករដ្ឋមន្ត្រីទី១០ នៃរាជាណាចក្រម៉ាឡេស៊ី។
ទម្រាំក្លាយជាមេដឹកនាំរដ្ឋាភិបាល លោក អាន់វ៉ា វ័យ ៧៥ឆ្នាំទៅហើយ។ លោកធ្លាប់ជារដ្ឋមន្ត្រីសេដ្ឋកិច្ចផង និងឧបនាយករដ្ឋមន្ត្រីផងក្នុងអាណត្តិនាយករដ្ឋមន្ត្រី មហាធា និងជិតក្លាយបានជានាយករដ្ឋមន្ត្រីក្នុងការបោះឆ្នោតឆ្នាំ២០១៨ តែលោកមិនបានសម្រេច ព្រោះតែលោក ម៉ាហាធា ក្បត់លោកដោយមិនព្រមផ្ទេរតំណែងឱ្យលោកទៅតាមកិច្ចសន្យាក្នុងសម្ពន្ធភាពបក្សប្រឆាំងរួបរួម។
ក្រោយកិច្ចប្រជុំពិសេសក្នុងចំណោមមេដឹកនាំបក្សជាមួយព្រះមហាក្សត្រនៅព្រឹកថ្ងៃទី២៤ ខែវិច្ឆិកា ព្រះបរមរាជវាំងក៏ចេញសេចក្តីថ្លែងការណ៍ប្រកាសថា លោក អាន់វ៉ា អ៊ីប្រាហ៊ីម ជានាយករដ្ឋមន្ត្រីថ្មី។
សេចក្ដីថ្លែងការណ៍ដែលស្រង់ព្រះរាជបន្ទូលព្រះមហាក្សត្រ គឺព្រះអង្គសម្រេចតាមឆន្ទៈរបស់ម្ចាស់ឆ្នោត។
អន្តរាគមន៍ពីព្រះរាជាប្រទេសម៉ាឡេស៊ី Sultan Ahmad Shah ដែលស្ដេចកំពុងគ្រងរាជ្យនៅពេលនេះ បានធ្វើឲ្យអ្នកវិភាគ និងអ្នកសង្កេតការណ៍ក្នុងតំបន់ចាប់អារម្មណ៍យ៉ាងខ្លាំង ព្រោះបើស្ដេចផែនដីមួយនេះមិនចេញព្រះភ័ក្ត្រធ្វើអន្តរាគមន៍នោះទេ គឺវិបត្តិនយោបាយនឹងចាប់ផ្ដើមផ្ទុះឡើងធ្ងន់ធ្ងរ។
ក្រុមអ្នកសង្កេតការណ៍ជាតិ និងអន្តរជាតិ មិនត្រឹមតែស្ញប់ស្ញែងភាពក្លាហានរបស់ព្រះមហាក្សត្រ Sultan Ahmad Shah នោះទេ តែពួកគេកោតសរសើរជាខ្លាំងចំពោះស្ថាប័នរៀបចំការបោះឆ្នោតនៃប្រទេសនេះ ដែលដើរតាមអំណាចរដ្ឋធម្មនុញ្ញ គឺមិនលម្អៀង និងមិនក្លាយជាឧបករណ៍បក្សនយោបាយណាមួយឡើយ។
ចំណែកឯបក្សកាន់អំណាចក៏មិនលូកដៃចូលកិច្ចការផ្ទៃក្នុងស្ថាប័នបោះឆ្នោតនេះដែរ ហើយជាមួយគ្នានេះ ស្ថាប័នកងកម្លាំងប្រដាប់អាវុធគ្រប់អង្គភាព ដូចជាកងទ័ព និងប៉ូលិសជាតិ ជាដើម ប្រកាន់ជំហរអព្យាក្រឹតយ៉ាងម៉ឺងម៉ាត់ មិនប្រឡូកប្រឡាក់នឹងរឿងនយោបាយឡើយ៕