ក្រុមសហជីពដែលមាននិន្នាការគាំទ្របក្សកាន់អំណាចជាង ១៨០ស្ថាប័ន បានចោទបុគ្គលិកមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (CENTRAL) ថាកំពុងធ្វើសកម្មភាពបំបែកបំបាក់សាមគ្គីរបស់កម្មករនិយោជិតនៅកម្ពុជា។
ក្រុមសហជីពចំនួន ១៨២ស្ថាប័ន បានចេញលិខិតរួមគ្នាមួយដាក់ជូននាយកមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក មឿន តុលា កាលពីថ្ងៃទី២៨ វិច្ឆិកា ដែលត្រូវបានផ្សព្វផ្សាយនៅថ្ងៃទី៣០ វិច្ឆិកា នេះថា ពួកគេខកចិត្តជាខ្លាំងដែលមន្ត្រីរបស់អង្គការសង់ត្រាល់ ធ្វើចលនាលួចលាក់ក្នុងការញុះញង់អូសទាញតំណាងសហជីពមូលដ្ឋានដែលជាសមាជិករបស់ពួកគេ ឲ្យធ្វើការផ្តាច់ខ្លួនទៅបង្កើតសហជីពថ្មីតាមរយៈនៃការសន្យាផ្តល់ជំនួយទាំងផ្នែកបច្ចេកទេស និងហិរញ្ញវត្ថុ ជាដើម។
ពួកគេក៏បានព្រមានចាត់វិធានការម៉ឺងម៉ាត់ ដើម្បីបញ្ឈប់រាល់កិច្ចសហការ និងការចូលរួមក្នុងគម្រោងនានារបស់អង្គការសង់ត្រាល់ និងធ្វើការតវ៉ាទៅក្រសួងស្ថាប័នមានសមត្ថកិច្ច ឲ្យពិនិត្យអំពីភាពស្របច្បាប់ និងចាត់វិធានការចាំបាច់ផ្សេងៗដែលមានប្រសិទ្ធភាពក្នុងការទប់ស្កាត់ និងបញ្ឈប់សកម្មភាពដែលប៉ះពាល់ដល់ផលប្រយោជន៍រួមនៃចលនាកម្មករនិយោជិតនៅកម្ពុជាផងដែរ។
ការចោទប្រកាន់នេះ ធ្វើឡើងដោយសំអាងថា មន្ត្រីរបស់អង្គការសង់ត្រាល់បានធ្វើចលនាលួចលាក់ក្នុងការញុះញង់អូសទាញតំណាងសហជីពមូលដ្ឋានរបស់ពួកគេ ឱ្យទៅបង្កើតសហជីពថ្មី។
ទោះជាបែបនេះក្តី នាយកមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក មឿន តុលា បានប្រាប់សារព័ត៌មាន The Cambodia Daily នៅថ្ងៃទី៣០ វិច្ឆិកា នេះថា ជាគោលការណ៍ និងការងារជាក់ស្តែងរបស់អង្គការសង់ត្រាល់សព្វថ្ងៃនេះ គឺអនុវត្តការងារដើម្បីផ្តល់ឱកាសដល់កម្មករនិយោជិតឱ្យចេះកសាងអំណាចរបស់ខ្លួន ដោយការប្រើប្រាស់សិទ្ធិសហជីព និងសមាគម ដើម្បីមានតំណាងត្រឹមត្រូវសម្រាប់ចរចាជាមួយភាគីថៅកែរោងចក្រ ភាគីរដ្ឋាភិបាល និងភាគីពាក់ព័ន្ធដទៃទៀតក្នុងការការពារផលប្រយោជន៍របស់កម្មករដែលជាសមាជិករបស់ពួកគេ។
លោកបន្តទៀតថា ការចោទប្រកាន់ណាមួយថាសង់ត្រាល់ បានបំបែកបំបាក់សហជីពនានានោះ លុះត្រាតែក្រុមសហជីពទាំងនោះមិនមែនជាសហជីពដែលតំណាងឱ្យកម្មករដោយពិតប្រាកដ។
ចំណែកឯការលើកឡើងថា សង់ត្រាល់បានអូសទាញកម្មករដោយប្រការណាមួយនោះ គឺជាការលើកឡើងដោយគ្មានមូលដ្ឋានប៉ុណ្ណោះ ព្រោះកម្មករនិយោជិតមានសិទ្ធិពេញលេញក្នុងការចូលជាសមាជិកសហជីពណាមួយដែលពួកគេពេញចិត្ត និងលាឈប់ទៅវិញនៅពេលដែលពួកគេយល់ថាសហជីពនោះមិនបម្រើឱ្យផលប្រយោជន៍របស់ខ្លួន។
លោក មឿន តុលា លើកឡើងថា លោកមិនដឹងថាជាបុគ្គលណាទេដែលបានធ្វើសកម្មភាពដូចក្រុមសហជីពបានរៀបរាប់ខាងលើនោះ ខណៈក្រុមសហជីពទាំងនេះក៏មិនបានបង្ហាញឈ្មោះថាជាបុគ្គលណាដែរដែលបានធ្វើទង្វើបែបនេះនោះដែរ។ លោកបន្ថែមថា សង់ត្រាល់ធ្វើការតែជាមួយសហជីពដែលឯករាជ្យប៉ុណ្ណោះ ចំពោះសហជីពខាងលើនេះ សង់ត្រាល់មិនដែលធ្លាប់សហការជាមួយនោះទេក្នុងការការពារសិទ្ធិការងាររបស់កម្មករនិយោជិតកន្លងមក។
លោកបញ្ជាក់ថា មជ្ឈមណ្ឌលសម្ព័ន្ធភាពការងារ និងសិទ្ធិមនុស្ស បានចុះបញ្ជីនៅក្រសួងមហាផ្ទៃ ត្រឹមត្រូវស្របតាមច្បាប់ និងធ្វើការទៅតាមអាណត្តិរបស់ខ្លួនក្នុងការគាំពារដល់សិទ្ធិកម្មករ និងពលរដ្ឋ ដើម្បីទទួលបានការការពារស្របតាមច្បាប់ជាតិ និងច្បាប់អន្តរជាតិដែលប្រទេសកម្ពុជាបានផ្តល់សច្ចាប័ន។
លោក មឿន តុលា មានការសង្ស័យថា ការចេញលិខិតរួមគ្នារបស់ក្រុមសហជីពខាងលើ ទំនងគ្រាន់តែជាយុទ្ធសាស្ត្រមួយដើម្បីធ្វើឱ្យរាំងស្ទះដល់ការងារសង្គមស៊ីវិលនៅពេលបោះឆ្នោតជាតិខាងមុខនេះតែប៉ុណ្ណោះ។
ទាក់ទិននឹងបញ្ហានេះ ក្រុមអ្នកសង្កេតការណ៍លើកឡើងថា ក្រុមសហជីពទាំងជាង ១០០ស្ថាប័នខាងលើមិនដែលគិតគូរពីសុខទុក្ខរបស់កម្មករនោះឡើយ ជាក់ស្តែងជុំវិញការកំណត់ប្រាក់ឈ្នួលរបស់កម្មករសម្រាប់ឆ្នាំ២០២៣ កាលពីអំឡុងខែកញ្ញា កន្លងទៅ ពួកគេមិនបានគាំទ្រការសម្រេចរបស់កម្មករ ដែលកំណត់យកប្រាក់ឈ្នួលចំនួន ២១៣ដុល្លារអាមេរិកនោះទេ ប៉ុន្តែពួកគេបែរជានាំគ្នាគាំទ្រតាមការកំណត់របស់ភាគីនិយោជក និងភាគីខាងរដ្ឋាភិបាលដែលកំណត់យកត្រឹមតែ ១៩៨ដុល្លារអាមេរិកទៅវិញ ដែលជាហេតុធ្វើឱ្យកម្មករបាត់បង់ប្រាក់ឈ្នួលសម្រាប់ឆ្នាំ២០២៣ យ៉ាងច្រើន៕