ក្រសួងវប្បធម៌ និងវិចិត្រសិល្បៈ សម្ដែងនូវមោទកភាពដែលក្បាច់គុនល្បុក្កតោរបស់ខ្មែរត្រូវបានចុះក្នុងបញ្ជីតំណាងបេតិកភណ្ឌវប្បធម៌អរូបីនៃមនុស្សជាតិរបស់អង្គការយូណេស្កូ (UNESCO) កាលពីថ្ងៃទី២៩ ខែវិច្ឆិកា ឆ្នាំ២០២២។
ក្រសួងវប្បធម៌ និងវិចិត្រសិល្បៈកម្ពុជា បានចេញសេចក្តីប្រកាសព័ត៌មានកាលពីថ្ងៃទី២៩ ខែវិច្ឆិកា ឆ្នាំ២០២២ នេះថា ក្នុងកិច្ចប្រជុំលើកទី១៧ នៃគណៈកម្មាធិការអន្តររដ្ឋាភិបាលដើម្បីការពារបេតិកភណ្ឌវប្បធម៌អរូបីរបស់អង្គការយូណេស្កូ ដែលបានប្រារព្ធនៅទីក្រុងរ៉ាបាត នៃប្រទេសម៉ារ៉ុក បានអនុម័តយល់ព្រមចុះគុនល្បុក្កតោក្នុងបញ្ជីតំណាងបេតិកភណ្ឌវប្បធម៌អរូបីនៃមនុស្សជាតិរបស់អង្គការយូណេស្កូហើយនៅពេលនេះ។
ប្រភពដដែលលើកឡើងថា បេតិកភណ្ឌវប្បធម៌ទាំងរូបី និងអរូបីរបស់ជាតិ មិនត្រឹមតែជាអត្តសញ្ញាណ និងជាព្រលឹងជាតិដែលបានលើកស្ទួយកេរ្តិ៍ឈ្មោះប្រទេសកម្ពុជាឱ្យល្បីរន្ទឺនៅលើឆាកជាតិ និងអន្តរជាតិប៉ុណ្ណោះទេ ថែមទាំងបានចូលរួមចំណែកមួយយ៉ាងសំខាន់ក្នុងការអភិវឌ្ឍសេដ្ឋកិច្ចសង្គមថែមទៀត។
ការអះអាងនេះ ធ្វើឡើងដើម្បីបង្ហាញពីមោទកភាពរបស់ប្រទេសកម្ពុជា ដែលបានដាក់សម្បត្តិវប្បធម៌ជាតិលើកទី៩ របស់ខ្លួនជាបេតិកភណ្ឌវប្បធម៌អរូបីនៃមនុស្សជាតិរបស់អង្គការយូណេស្កូចាប់តាំងពីឆ្នាំ១៩៩២ មក។
គុនល្បុក្កតោជាក្បាច់គុនបុរាណខ្មែរដែលមានប្រវត្តិយូរលង់ណាស់មកហើយ ដែលគេឃើញមានរូបចម្លាក់លើជញ្ជាំងប្រាសាទអង្គរវត្ត ហើយក្បាច់គុននេះបានចាក់ឫសយ៉ាងជ្រៅនៅក្នុងសង្គមខ្មែរជាច្រើនសតវត្សដែលមានការបង្ហាត់តៗគ្នាពីជំនាន់មួយទៅជំនាន់មួយ ដើម្បីពង្រឹងប្រាជ្ញាស្មារតី និងសមត្ថភាពការពារខ្លួនពីសត្វសាហាវ ព្រមទាំងសត្រូវនានា និងការពារសង្គមជាតិមាតុភូមិពីសត្រូវឈ្លានពានផងដែរ។
សម្បត្តិវប្បធម៌របស់កម្ពុជា ត្រូវអង្គការយូណេស្កូអនុញ្ញាតឱ្យដាក់បញ្ចូលទៅក្នុងបញ្ជីសម្បត្តិបេតិកភណ្ឌពិភពលោក បានចំនួន ៩មុខហើយ ក្នុងនោះរួមមាន តំបន់អង្គរ បានចុះបញ្ជីនៅពាក់កណ្តាលខែធ្នូ ឆ្នាំ១៩៩២ របាំព្រះរាជទ្រព្យ បានចុះបញ្ជីនៅដើមខែវិច្ឆិកា ឆ្នាំ២០០៣ ប្រាសាទព្រះវិហារ បានចុះបញ្ជីនៅដើមខែកក្កដា ឆ្នាំ២០០៧ និងល្ខោនស្រមោលស្បែកធំ បានចុះបញ្ជីនៅចុងខែវិច្ឆិកា ឆ្នាំ២០១៥។
ចំណែកល្បែងទាញព្រ័ត្របានចុះបញ្ជីនៅដើមខែធ្នូ ឆ្នាំ២០១៥ ចាប៉ីដងវែងបានចុះបញ្ជីនៅចុងខែវិច្ឆិកា ឆ្នាំ២០១៦ តំបន់ប្រាសាទសំបូរព្រៃគុក បានចុះបញ្ជីនៅដើមខែកក្កដា ឆ្នាំ២០១៧ និងល្ខោនខោលវត្តស្វាយអណ្ដែត បានចុះបញ្ជីនៅចុងខែវិច្ឆិកា ឆ្នាំ២០១៨ ខណៈគុនល្បុក្កតោ ទើបតែត្រូវបានចុះបញ្ជីកាលពីថ្ងៃទី២៩ ខែវិច្ឆិកា ឆ្នាំ២០២២ នេះ។
ស្ថាបនិកអង្គការអភិវឌ្ឍន៍ផ្នត់គំនិត លោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី៣០ វិច្ឆិកា នេះថា គឺជារឿងដែលគួរឱ្យអបអរសាទរ ព្រោះវានឹងជួយឱ្យកម្ពុជាកាន់តែល្បីល្បាញលើឆាកអន្តរជាតិ ដែលអាចឱ្យបរទេសនានាលើសកលលោកស្គាល់អំពីវប្បធម៌ និងអរិយធម៌របស់ខ្មែរកាន់តែច្បាស់។
លោក សេក សុជាតិ លើកឡើងថា ក្រៅពីមានភាពវិជ្ជមាននៃការដាក់សម្បត្តិវប្បធម៌របស់ខ្លួនទៅក្នុងបញ្ជីបេតិកភណ្ឌពិភពលោក កម្ពុជាក៏ត្រូវតែចេះទាញយកប្រយោជន៍ពីរឿងនេះមកវិញដែរ ដើម្បីជំរុញឱ្យសេដ្ឋកិច្ចជាតិរីកលូតលាស់ថែមទៀត ដូចជាការផ្សព្វផ្សាយដើម្បីទាក់ទាញភ្ញៀវទេសចរឱ្យចូលទៅទស្សនានូវសម្បត្តិវប្បធម៌របស់ខ្លួន ជាដើម៕