សហព័ន្ធសហភាពអន្តរជាតិ (ITUC) ជំរុញឱ្យរដ្ឋាភិបាលកម្ពុជាដោះលែងប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ ជាបន្ទាន់ដោយឥតលក្ខខណ្ឌ ដោយសំអាងថាមិនមានភាពស្របគ្នាជាមួយនឹងគោលការណ៍ច្បាប់ជាមូលដ្ឋានរបស់អង្គការពលកម្មអន្តរជាតិ (ILO) ដែលរដ្ឋាភិបាលកម្ពុជាបានផ្តល់សច្ចាប័ន។
សហព័ន្ធសហភាពអន្តរជាតិ (ITUC) តំណាងឱ្យសមាជិកជាង ១២០ប្រទេសទូទាំងពិភពលោក បានចេញសេចក្តីថ្លែងការណ៍កាលពីថ្ងៃទី២៩ វិច្ឆិកា ដែលត្រូវបានផ្សព្វផ្សាយនៅថ្ងៃទី១ ធ្នូ នេះថា ពួកគេមានការព្រួយបារម្ភយ៉ាងខ្លាំងជុំវិញការឃុំខ្លួនប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ បន្ទាប់ពីរូបគេវិលត្រឡប់ពីការចូលរួមមហាសន្និបាតពិភពលោកនៃសហភាពសហជីពអន្តរជាតិ (ITUC) នៅទីក្រុង Melbourne ប្រទេសអូស្ត្រាលី កាលពីថ្ងៃទី២៦ វិច្ឆិកា កន្លងទៅនេះ។
សហព័ន្ធសហភាពអន្តរជាតិខាងលើអះអាងថា ការចោទប្រកាន់ពីបទព្រហ្មទណ្ឌលើកញ្ញា ឈឹម ស៊ីថរ ពីការអនុវត្តសិទ្ធិសហជីព និងការចោទប្រកាន់ថាបានរំលោភលើលក្ខខណ្ឌនៃការនៅក្រៅឃុំសម្រាប់ការចូលរួមកិច្ចប្រជុំសហជីព គឺមិនមានភាពស្របគ្នាជាមួយនឹងគោលការណ៍ច្បាប់ជាមូលដ្ឋានរបស់អង្គការពលកម្មអន្តរជាតិ (ILO) ដែលរដ្ឋាភិបាលកម្ពុជាបានផ្តល់សច្ចាប័នដោយស្ម័គ្រចិត្តកាលពីថ្ងៃទី២៣ ខែសីហា ឆ្នាំ១៩៩៩ និងរដ្ឋធម្មនុញ្ញរបស់ខ្លួនឡើយ។
ប្រភពដដែលបញ្ជាក់ថា ខ្លួនមានការព្រួយបារម្ភយ៉ាងខ្លាំងចំពោះសកម្មភាពរបស់រដ្ឋាភិបាលកម្ពុជា ដែលកំពុងសងសឹកលើប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ ក្នុងភាពជាតំណាងរបស់កញ្ញាចំពោះផលប្រយោជន៍របស់កម្មករកម្ពុជា ដែលកំពុងរងនូវការធ្វើទុក្ខបុកម្នេញពីរដ្ឋាភិបាលកម្ពុជា និងក្រុមហ៊ុនណាហ្គាវើលដ៍សព្វថ្ងៃនេះ។
ការអះអាងនេះ ធ្វើឡើងបន្ទាប់ពីប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ ត្រូវបានសមត្ថកិច្ចក្រុងភ្នំពេញចាប់ខ្លួនក្រោយចូលរួមមហាសន្និបាតពិភពលោកនៃសហភាពសហជីពអន្តរជាតិ (ITUC) កាលពីពេលថ្មីៗនេះ។
កាលពីថ្ងៃទី២៦ ខែវិច្ឆិកា ឆ្នាំ២០២២ កន្លងទៅ ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ ត្រូវសមត្ថកិច្ចក្រុងភ្នំពេញចាប់ខ្លួននៅអាកាសយានដ្ឋានអន្តរជាតិភ្នំពេញ បន្ទាប់ពីកញ្ញាចូលរួមមហាសន្និបាតពិភពលោកនៃសហភាពសហជីពអន្តរជាតិ (ITUC) នៅទីក្រុង Melbourne ប្រទេសអូស្ត្រាលី កាលពីពេលកន្លងទៅនេះ។
ជុំវិញការចាប់ខ្លួនប្រធានសហជីពរូបនេះ ទាំងសហរដ្ឋអាមេរិក និងអូស្ត្រាលី បានចេញសេចក្តីថ្លែងការណ៍កាលពីពេលថ្មីៗនេះដូចគ្នា ដោយទាមទារឱ្យរដ្ឋាភិបាលកម្ពុជាដោះលែងកញ្ញា ឈឹម ស៊ីថរ ជុំវិញការប្រើសិទ្ធិសេរីភាពក្នុងការបង្កើតសមាគម និងការជួបប្រជុំដោយសន្តិវិធី ព្រមទាំងទម្លាក់ចោលការចោទប្រកាន់ទាំងអស់ដើម្បីឈានទៅរកការដោះស្រាយមួយដែលប្រកបដោយតម្លាភាព។
ក្រៅពីសហរដ្ឋអាមេរិក និងអូស្ត្រាលី អង្គការសង្គមស៊ីវិលចំនួន ៦៩ស្ថាប័ន រួមមានមជ្ឈមណ្ឌលសិទ្ធិមនុស្សកម្ពុជា (CCHR) អង្គការការពារសិទ្ធិមនុស្សលីកាដូ (LICADHO) សមាគមការពារសិទ្ធិមនុស្សអាដហុក (ADHOC) និងមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (CENTRAL) ជាដើម បានចេញសេចក្តីថ្លែងការណ៍រួមគ្នាទាមទារឱ្យរដ្ឋាភិបាលកម្ពុជាដោះលែងកញ្ញា ឈឹម ស៊ីថរ ចេញពីពន្ធនាគារជាបន្ទាន់ និងឥតលក្ខខណ្ឌ ដោយចាត់ទុកការដាក់ទោសលើកញ្ញាដោយសារខកខានក្នុងការអនុវត្តនូវលក្ខខណ្ឌដែលមិនបានប្រាប់ឲ្យដឹងមុន គឺជាភាពអយុត្តិធម៌ និងល្មើសទៅនឹងគោលការណ៍ជាមូលដ្ឋាននៃនីតិរដ្ឋធ្ងន់ធ្ងរបំផុត។
ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ ត្រូវបានសមត្ថកិច្ចចាប់ខ្លួនយ៉ាងហិង្សាកាលពីដើមខែមករា ឆ្នាំ២០២២ អំឡុងពេលកញ្ញាព្យាយាមចូលរួមធ្វើកូដកម្មជាមួយក្រុមកូដករផ្សេងទៀត និងត្រូវបានឃុំជាបណ្ដោះអាសន្នក្នុងពន្ធនាគារអស់រយៈពេល ២ខែ ប៉ុន្តែកញ្ញាត្រូវបានដោះលែងឱ្យនៅក្រៅឃុំវិញកាលពីខែមីនា ឆ្នាំ២០២២ កន្លងទៅនេះ៕