 កំពុងពិចារណាថា គួរសម្រាកជីវិតនយោបាយធ្វើជាប្រជាពលរដ្ឋធម្មតាដោយមិនធ្វើអ្វីសោះ ឬក៏យកចំណេះជំនាញទៅបម្រើក្នុងរដ្ឋាភិបាល ដែលអាចរួមចំណែកធ្វើអ្វីដែលមានប្រយោជន៍ជូនប្រទេសជាតិ និងប្រជាជន។){kind=link}
បណ្ឌិត សាម អ៊ីន ដែលទើបទទួលតំណែងជាប្រធានគណៈកម្មាធិការនាយកនៃគណបក្សប្រជាធិបតេយ្យមូលដ្ឋាន (GDP) កំពុងពិចារណាថា គួរសម្រាកជីវិតនយោបាយធ្វើជាប្រជាពលរដ្ឋធម្មតាដោយមិនធ្វើអ្វីសោះ ឬក៏យកចំណេះជំនាញទៅបម្រើក្នុងរដ្ឋាភិបាល ដែលអាចរួមចំណែកធ្វើអ្វីដែលមានប្រយោជន៍ជូនប្រទេសជាតិ និងប្រជាជន។
តាមរយៈវីដេអូឃ្លីបរយៈពេល ៤៥នាទី ដែលបង្ហោះលើយូធូប (Youtube) នៅថ្ងៃទី៥ ខែធ្នូ ឆ្នាំ២០២២ លោក សាម អ៊ីន បាននិយាយពីអ្វីដែលមាននៅក្នុងចិត្តលោកថា លទ្ធផលបោះឆ្នោតជាតិឆ្នាំ២០១៨ និងលទ្ធផលបោះឆ្នោតឃុំ-សង្កាត់ឆ្នាំ២០២២ ធ្វើឲ្យលោកមានការពិចារណាយ៉ាងច្រើនថា លោកគួរបន្តធ្វើយ៉ាងម៉េចទៀត? គួរសម្រាកធ្វើជាប្រជាពលរដ្ឋធម្មតាដោយមិនធ្វើអ្វីសោះ ឬយកចំណេះជំនាញទៅបម្រើក្នុងរដ្ឋាភិបាល?
លោកបានថ្លែងទៀតថា លោកទទួលបានសំណួរពីប្រជាពលរដ្ឋមួយចំនួនសួរថា លោកអត់សម្រេចចិត្តទៅចូលរួមជាមួយរដ្ឋាភិបាលដូចបណ្ឌិត យ៉ង សាំងកុមារ ទេឬ? នេះជាសំណួរដែលលោកបានលើកយកមកប្រាប់ដល់សាធារណជនតាមរយៈវីដេអូឃ្លីបដែលលោកបង្ហោះក្នុងយូធូប ដោយឆ្លើយថា ឆ្លើយនឹងសំណួរនេះ [លោកពិចារណាដែរ បងប្អូន]។
លោក សាម អ៊ីន បានលើកឡើងទៀតថា បើលោកទៅចូលរួមជាមួយរដ្ឋាភិបាល ទាល់តែលោកមានភាពច្បាស់លាស់ដែរ ទាល់តែលោកមានការងារណាដែលអាចរួមចំណែកធ្វើអ្វីដែលមានប្រយោជន៍ជូនរាជរដ្ឋាភិបាល ជូនប្រទេសជាតិ ជូនប្រជាជន ទើបបានលោកទៅ។ បើគ្រាន់តែទៅយកតំណែងជាឯកឧត្តម លោកគិតថាវាដូចជាមិនមានអ្វីទាក់ទាញចំណាប់អារម្មណ៍នោះទេ។
គួរបញ្ជាក់ផងដែរថា ក្នុងការបោះឆ្នោតជាតិឆ្នាំ២០១៨ គណបក្សប្រជាធិបតេយ្យមូលដ្ឋាន ពុំទទួលបានអាសនៈរដ្ឋសភាឡើយ ឯនៅក្នុងការបោះឆ្នោតឃុំ-សង្កាត់ឆ្នាំ២០២២ គណបក្សនេះទទួលបានអាសនៈតែ ៦ ប៉ុណ្ណោះ។
លោក សាម អ៊ីន វាយតម្លៃថា លទ្ធផលបោះឆ្នោតទាំងពីរលើកនេះបង្ហាញឲ្យឃើញពីសញ្ញាដែលប្រជាពលរដ្ឋមិនស្វាគមន៍ មិនសាទរ និងមិនគាំទ្រគណបក្សប្រជាធិបតេយ្យមូលដ្ឋាន។ ក្រុមលោកថែមទាំងធ្លាប់រងការលាបពណ៌ទៀតផង។
លោកចោទសួរថា ក្រុមលោកគ្រាន់តែមានទឹកចិត្តចង់ជួយប្រទេសជាតិ ចង់លើកស្ទួយលទ្ធិប្រជាធិបតេយ្យ ប៉ុន្តែបើមិនទទួលបានការសាទរ និងការគាំទ្រ តើក្រុមលោកគួរបន្តលះបង់តាមផ្លូវនេះតទៅទៀតដែរឬទេ? លោកក៏សួរខ្លួនឯងដែរថា លោកគួរនៅបន្តជួយគណបក្សប្រជាធិបតេយ្យមូលដ្ឋានទៀតឬយ៉ាងណា?
បណ្ឌិត សាម អ៊ីន ថាតាមពិតលោកចង់ជួយទៀត ប៉ុន្តែលទ្ធផលឆ្នាំ២០២២ និងលទ្ធផលឆ្នាំ២០១៨ ធ្វើឲ្យមន្ត្រីបក្សខ្សោយកម្លាំងចិត្តមែនទែន ធ្វើឲ្យខ្សោយកម្លាំងចិត្ត ធ្វើឲ្យមន្ត្រីគិតទៅដល់ជម្រើសផ្សេងៗគ្នា។
លោក សាម អ៊ីន អះអាងថា លោកនៅតែចង់ជួយគណបក្សប្រជាធិបតេយ្យមូលដ្ឋានមួយរយៈទៀតសិន ដោយភ្ជាប់ជាមួយក្តីរំពឹងក្នុងចិត្តថា ក្រែងលោលោកអាចជួយរុញច្រានគណបក្សនេះឲ្យទៅមុខបាន។ លោកក៏រំពឹងទុកដែរថា សមាជិកសមាជិកាគណបក្សអាចនឹងមានភាពសកម្ម យុវជនជំនាន់ថ្មីអាចនឹងមានកម្លាំងខ្លាំង មានទេពកោសល្យជាងពួកលោកជាអ្នកជំនាន់មុខ ហើយពួកគេអាចនឹងជួយជ្រោងទង់គណបក្សឲ្យបានទៅមុខ។
កាលពីថ្ងៃទី២៧ ខែវិច្ឆិកា ឆ្នាំ២០២២ ប្រធានគណៈកម្មាធិការនាយកគណបក្សប្រជាធិបតេយ្យមូលដ្ឋាន បណ្ឌិត យ៉ង សាំងកុមារ បានដាក់លិខិតរួមជាមួយសហការីរបស់ខ្លួន ស្នើសុំចូលរួមជីវភាពនយោបាយជាមួយគណបក្សប្រជាជនកម្ពុជា ក្នុងគោលបំណងដើម្បីចូលរួមលើកស្ទួយវិស័យស្រូវអង្ករនៅកម្ពុជាឱ្យមានភាពប្រសើរឡើងជាងពេលបច្ចុប្បន្ន។
ក្រោយប្រកាសចូលរួមជីវភាពនយោបាយជាមួយបក្សកាន់អំណាចបានពីរថ្ងៃ នៅថ្ងៃទី២៩ ខែវិច្ឆិកា ឆ្នាំ២០២២ បណ្ឌិត យ៉ង សាំងកុមារ ត្រូវបានតែងតាំងជារដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ខណៈសហការីរបស់ខ្លួន ២នាក់ផ្សេងទៀតក៏ត្រូវបានតែងតាំងជាអនុរដ្ឋលេខាធិការក្រសួងកសិកម្មផងដែរ។
បណ្ឌិត យ៉ង សាំងកុមារ និងបណ្ឌិត សាម អ៊ីន សុទ្ធតែជាស្ថាបនិកដែលចូលរួមផ្តើមគំនិតបង្កើតគណបក្សប្រជាធិបតេយ្យមូលដ្ឋានឡើងក្នុងឆ្នាំ២០១៥៕