ក្រុមយុវជនចំនួន ៣០នាក់នាំគ្នាធ្វើយុទ្ធនាការជិះកង់ពីខេត្តសៀមរាប ទៅកាន់ទីលានប្រជាធិបតេយ្យនៃរាជធានីភ្នំពេញ ដើម្បីអបអរទិវាសិទ្ធិមនុស្ស ១០ ធ្នូ និងជំរុញឲ្យរដ្ឋាភិបាលកម្ពុជាបើកលំហសិទ្ធិសេរីភាពបញ្ចេញមតិ និងត្រូវគោរពសិទ្ធិមនុស្សឲ្យពេញលេញ។
សេចក្ដីប្រកាសព័ត៌មានរបស់សមាគមបណ្ដាញយុវជនកម្ពុជា (CYN) ស្ដីពីការធ្វើយុទ្ធនាការជិះកង់ដើម្បីសិទ្ធិមនុស្ស ចុះថ្ងៃទី៦ ខែធ្នូ ឆ្នាំ២០២២ បានឲ្យដឹងថា ការធ្វើយុទ្ធនាការជិះកង់នេះចាប់ពីថ្ងៃទី៦ ដល់ថ្ងៃទី១០ ខែធ្នូ ឆ្នាំ២០២២ ដើម្បីចូលរួមអបអរសាទរទិវាសិទ្ធិមនុស្សអន្តរជាតិខួបទី៧៤ឆ្នាំ ដែលនឹងប្រារព្ធនៅថ្ងៃទី១០ ខែធ្នូ ឆ្នាំ២០២២។
ប្រភពដដែលថា យុទ្ធនាការជិះកង់ដើម្បីសិទ្ធិមនុស្ស រៀបចំឡើងក្នុងគោលបំណងជំរុញឲ្យរដ្ឋាភិបាលកម្ពុជាប្ដេជ្ញាពង្រឹងការគោរព ការផ្តល់លំហពេញលេញ និងការការពារសិទ្ធិមនុស្ស ជាពិសេសសិទ្ធិមនុស្សជាមូលដ្ឋានដែលបានកំណត់ដោយរដ្ឋធម្មនុញ្ញកម្ពុជា សេចក្តីប្រកាសជាសកលស្ដីពីសិទ្ធិមនុស្ស កតិកាសញ្ញាស្ដីពីសិទ្ធិពលរដ្ឋ និងនយោបាយ ព្រមទាំងកតិកាសញ្ញាស្ដីពីសិទ្ធិសេដ្ឋកិច្ច សង្គម និងវប្បធម៌។
លើសពីនេះ ក៏ជំរុញឲ្យរដ្ឋាភិបាលកម្ពុជាត្រូវផ្តល់លំហសិទ្ធិសេរីភាពពេញលេញដល់សហគមន៍មូលដ្ឋាន និងប្រជាពលរដ្ឋខ្មែរក្នុងការអនុវត្តសិទ្ធិសេរីភាពបញ្ចេញមតិ សិទ្ធិខាងសមាគម សិទ្ធិធ្វើបាតុកម្មដោយសន្តិវិធី សិទ្ធិជួបជុំ សិទ្ធិផ្នែកវិជ្ជាជីវៈការចូលរួមកិច្ចការការពារបរិស្ថាន និងធនធានធម្មជាតិ ព្រមទាំងការសម្រេចចិត្តក្នុងការចូលរួមការបោះឆ្នោតដោយពុំមានការបង្ខិតបង្ខំគ្រប់ទម្រង់។
មួយវិញទៀត រដ្ឋាភិបាលក៏ត្រូវផ្តល់លំហសេរីភាព និងលើកទឹកចិត្តដល់យុវជនក្នុងការចូលរួមសកម្មភាពស្ម័គ្រចិត្ត ជួយកិច្ចការសហគមន៍មូលដ្ឋាន សិទ្ធិសេរីភាពបញ្ចេញមតិ ការបង្កើតក្រុម ឬក្លឹបដើម្បីចូលរួមកិច្ចការងារសង្គម បើកចំហឲ្យមានការពិភាក្សា និងការជជែកដេញដោលពីបញ្ហានយោបាយសង្គម ដែលជាផ្នែកមួយយ៉ាងសំខាន់ក្នុងការពង្រីកវិសាលភាពការចូលរួមរបស់ពលរដ្ឋក្នុងកិច្ចការសង្គមឲ្យកាន់តែសកម្មលើគ្រប់វិស័យ។
បើតាម CYN ថាយុទ្ធនាការនេះនឹងធ្វើឡើងរយៈពេល ៥ថ្ងៃ ដោយក្រុមយុវជនទាំង ៣០នាក់នឹងជិះកង់ពីខេត្តសៀមរាប ទៅកាន់ទីលានប្រជាធិបតេយ្យនៃរាជធានីភ្នំពេញ ដើម្បីផ្សព្វផ្សាយពីសារសំខាន់នៃការគោរព ការពារ និងការលើកកម្ពស់សិទ្ធិមនុស្ស ព្រមទាំងចូលរួមអបអរសាទរទិវាសិទ្ធិមនុស្សអន្តរជាតិខួបទី៧៤ឆ្នាំ ដែលនឹងប្រារព្ធនៅថ្ងៃទី១០ ខែធ្នូ ឆ្នាំ២០២២ នេះ។
ក្រៅពីក្រុមយុវជនខាងលើនេះ សមាគមសម្ព័ន្ធសហគមន៍កសិករកម្ពុជា (CCFC) ក៏រៀបចំប្រារព្ធទិវាសិទ្ធិមនុស្សអន្តរជាតិ ដើម្បីផ្តល់ឱកាសដល់កម្មករ យុវជន សហជីពកសិករ សហគមន៍ បណ្ដាញ និងសមាគមដែលចង់ធ្វើការលើកឡើងអំពីបញ្ហា ក្ដីកង្វល់ តម្រូវការដែលប៉ះពាល់យ៉ាងធ្ងន់ធ្ងរដល់សិទ្ធិ យុត្តិធម៌សង្គម កិច្ចគាំពារសង្គម និងជីវភាពរស់នៅតាមតំបន់គោលដៅ។
ការប្រារព្ធទិវាសិទ្ធិមនុស្ស ធ្វើឡើងស្របពេលដែលលំហសេរីភាពបញ្ចេញមតិ សេរីភាពជួបជុំ និងសេរីភាពផ្នែកនយោបាយ ត្រូវបានគេមើលឃើញថាកំពុងរងការរឹតត្បិតពីសំណាក់រដ្ឋាភិបាលកម្ពុជា ចាប់តាំងពីឆ្នាំ២០១៧ រហូតដល់បច្ចុប្បន្ន៕