មន្ត្រីអង្គការក្រៅរដ្ឋាភិបាល ថាការរិះគន់នានាលើកម្ពុជាជុំវិញការរឹតត្បិតសេរីភាពបញ្ចេញមតិ គឺដោយសារតែកម្ពុជាបានអនុវត្តច្បាប់ដោយបំពានជុំវិញការចាប់ខ្លួនសកម្មជនសង្គមនានា និងសកម្មជននយោបាយដោយប្រើក្រមព្រហ្មទណ្ឌដែលផ្ទុយពីខ្លឹមសាររបស់រដ្ឋធម្មនុញ្ញ។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា ប្រាប់សារព័ត៌មាន The Cambodia Daily នៅថ្ងៃទី៦ ធ្នូ នេះថា ដើម្បីធានានូវយុត្តិធម៌ និងសេរីភាពនៃការបញ្ចេញមតិរបស់ប្រជាពលរដ្ឋ និងសុវត្ថិភាពរបស់អ្នកសារព័ត៌មានឱ្យមានភាពល្អប្រសើរ រដ្ឋាភិបាលកម្ពុជាគួរតែបើកទូលាយដល់សកម្មជនសង្គម អ្នកនយោបាយ និងអ្នកសារព័ត៌មានក្នុងការបញ្ចេញមតិការពារផលប្រយោជន៍សាធារណៈ ដើម្បីរួមគ្នាកែលំអ និងកសាងសង្គមជាតិទាំងមូលដោយមិនប្រកាន់និន្នាការនយោបាយណាមួយដូចពេលកន្លងមក។
លោក ស៊ឹង សែនករុណា អំពាវនាវឱ្យរដ្ឋាភិបាលកម្ពុជាទម្លាក់ចោលបទចោទពីអ្នកដែលអាជ្ញាធរចាប់ឃុំខ្លួនកាលពីពេលកន្លងទៅ ដូចជាសកម្មជនបរិស្ថាន សកម្មជនសិទ្ធិមនុស្ស សកម្មជនដីធ្លី សកម្មជននយោបាយ និងអ្នកចម្រៀងដែលច្រៀងរៀបរាប់ពីទុក្ខលំបាករបស់ប្រជាពលរដ្ឋក្នុងសង្គម ជាដើម ដើម្បីឱ្យពួកគេអាចបន្តឆន្ទៈក្នុងការចូលរួមកសាងសង្គមជាតិបន្តទៀត ហើយរដ្ឋាភិបាលក៏ចៀសផុតពីការរិះគន់នានាផងដែរ។
អ្នកវិភាគនយោបាយ និងសង្គម បណ្ឌិត ឡៅ ម៉ុងហៃ បានអះអាងកាលពីពេលថ្មីៗនេះថា មាត្រា៤៩៤ និងមាត្រា៤៩៥ នៃក្រមព្រហ្មទណ្ឌ បានបង្ហាញឱ្យឃើញនូវការកំណត់ព្រំដែនក្នុងការចាត់វិធានការលើការរឹតត្បិតសេរីភាព ការហាមឃាត់នូវការប្រើប្រាស់សិទ្ធិ និងការបង្ក្រាបដោយការដាក់ទោសទណ្ឌដែលប្រាសចាកពីការធានានូវសិទ្ធិសេរីភាពក្នុងការបញ្ចេញមតិ និងសិទ្ធិដទៃទៀតរបស់ពលរដ្ឋដែលមានចែងក្នុងរដ្ឋធម្មនុញ្ញទាំងស្រុង។
បណ្ឌិត ឡៅ ម៉ុងហៃ អះអាងថា បទល្មើសនៃក្រមព្រហ្មទណ្ឌមាត្រា ៤៩៤ និងមាត្រា ៤៩៥ នេះ ត្រូវបានរដ្ឋាភិបាលកម្ពុជាប្រើប្រាស់យ៉ាងពេញនិយម ដើម្បីដាក់ទោសទណ្ឌលើអ្នកអនុវត្តសិទ្ធិសេរីភាពក្នុងការបញ្ចេញមតិ និងលើអ្នកនយោបាយប្រឆាំងដូចជាការចោទថា ពួកគេមានផែនការធ្វើបដិវត្តន៍ពណ៌ដើម្បីផ្តួលរំលំរដ្ឋាភិបាល ជាដើម នៅពេលដែលអ្នកទាំងនោះប្រឆាំងទាមទាររកយុត្តិធម៌ពីការគាបសង្កត់របស់រដ្ឋាភិបាលកម្ពុជាកន្លងមក។
អនុប្រធានគណៈកម្មាធិការសិទ្ធិមនុស្សកម្ពុជា លោក ជិន ម៉ាលីន បានលើកឡើងក្នុងកិច្ចប្រជុំស្ដីពីផែនការសកម្មភាពរបស់អង្គការសហប្រជាជាតិស្ដីពីសុវត្ថិភាពអ្នកសារព័ត៌មាន និងបញ្ហាប្រឈមកាលពីថ្ងៃទី៥ ខែធ្នូ ឆ្នាំ២០២២ នេះថា ក្នុងនាមកម្ពុជាជាទីភ្នាក់ងាររបស់អង្គការសហប្រជាជាតិ ដែលមានភារកិច្ចការពារសេរីភាពបញ្ចេញមតិ និងសេរីភាពសារព័ត៌មាន គឺត្រូវចូលរួមលើកកម្ពស់ការយល់ដឹង ការតាមដាន និងការរាយការណ៍ ការសិក្សាស្រាវជ្រាវ ដើម្បីធ្វើឱ្យតួនាទីនៃការបញ្ចេញមតិដោយសេរី និងកត្តាដែលមានលក្ខណៈអំណោយផលសម្រាប់ការអភិវឌ្ឍ និងការគោរពសិទ្ធិមនុស្សទាំងអស់នៅកម្ពុជា។
ទាក់ទិននឹងបញ្ហានេះ ក្នុងជំនួបជាមួយមេដឹកនាំកម្ពុជា លោក ហ៊ុន សែន ក្នុងកិច្ចប្រជុំកំពូលអាស៊ាន កាលពីថ្ងៃទី១២ ខែវិច្ឆិកា ឆ្នាំ២០២២ ប្រធានាធិបតីសហរដ្ឋអាមេរិក លោក ចូ បៃដិន បានជំរុញឲ្យលោក ហ៊ុន សែន បើកលំហសិទ្ធិនយោបាយសម្រាប់ពលរដ្ឋខ្មែរឡើងវិញមុនការបោះឆ្នោតឆ្នាំ២០២៣ ខាងមុខនេះ និងអំពាវនាវឲ្យមានការដោះលែងសកម្មជនដែលត្រូវបានឃុំខ្លួនពីបទចោទប្រកាន់ពាក់ព័ន្ធនឹងរឿងនយោបាយផងដែរ៕