ស្ថាបនិកជាន់ខ្ពស់នៃអង្គការក្រៅរដ្ឋាភិបាល ព្រមានថា ការរឹតត្បិតប្រព័ន្ធអប់រំដែលមិនអនុញ្ញាតឲ្យសិស្ស និងលោកគ្រូអ្នកគ្រូអាចនិយាយឲ្យបានទូលំទូលាយពីបញ្ហាក្នុងសង្គម ដើម្បីកែលំអ គឺជាកំហុសរបស់រដ្ឋាភិបាល។
ស្ថាបនិកអង្គការអភិវឌ្ឍន៍ផ្នត់គំនិត លោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី៦ ធ្នូ នេះថា ប្រព័ន្ធអប់រំនៅកម្ពុជាត្រូវកែប្រែនូវគុណវិបត្តិមួយចំនួន ដើម្បីជំរុញឲ្យវិស័យនេះមានភាពជឿនលឿនទៅមុខឡើងវិញ ដូចជាការកម្រិតឲ្យសិស្សអាចទទួលយកនូវអ្វីដែលក្រសួងអប់រំបានកំណត់ ជាជាងទទួលយកគំនិតត្រឹមត្រូវថ្មីដែលសិស្សស្រាវជ្រាវឃើញ។ ជាងនេះទៀត គម្លាតនៃការអប់រំនៅទីក្រុង គឺមានភាពខុសគ្នាឆ្ងាយណាស់ពីជនបទ ដែលធ្វើឲ្យសិស្សនៅជនបទមានចំណេះដឹងតិចតួច ខណៈសិស្សនៅទីក្រុងទទួលបានការអប់រំទូលំទូលាយជាង។
លោក សេក សុជាតិ លើកឡើងថា បច្ចុប្បន្ននេះ ពិតមែនតែសិស្សខ្លះមានសមត្ថភាពអាចប្រឡងយកអាហារូបករណ៍ទៅសិក្សានៅក្រៅប្រទេស ប៉ុន្តែនោះគឺជាសមត្ថភាពផ្ទាល់ខ្លួនរបស់ពួកគេដែលបានខិតខំប្រឹងប្រែងប៉ុណ្ណោះ។ សិស្សដែលមានកម្រិតខ្ពស់បែបនេះ ក៏មិនមានច្រើននោះដែរ ប៉ុន្តែបើរដ្ឋាភិបាលមានគោលនយោបាយលើកទឹកចិត្តសម្រាប់សិស្សឆ្នើមក្នុងវិស័យអប់រំរបស់ខ្លួនឲ្យកាន់តែទូលំទូលាយ នោះសិស្សកម្ពុជានឹងអាចបញ្ចេញសមត្ថភាពរបស់ពួកគេកាន់តែខ្ពស់ជាងពេលបច្ចុប្បន្ននេះ។
ស្ថាបនិកអង្គការអភិវឌ្ឍន៍ផ្នត់គំនិតរូបនេះបញ្ជាក់ថា ដើម្បីលើកស្ទួយវិស័យអប់រំរបស់កម្ពុជាឲ្យមានការអភិវឌ្ឍកាន់តែប្រសើរឡើង រដ្ឋាភិបាលត្រូវតែបើកទូលាយនូវការអប់រំរបស់ខ្លួន ដើម្បីឲ្យសិស្សនិស្សិតមានសេរីភាពពេញលេញក្នុងការគិត និងអនុវត្តលើមុខវិជ្ជានានាដែលពាក់ព័ន្ធនឹងសង្គមជាតិ ដូចជាមុខវិជ្ជាប្រវត្តិវិទ្យា ឬភូមិវិទ្យា ជាដើម ដែលមុខវិជ្ជាទាំងនេះតម្រូវឲ្យពួកគេឈ្វេងយល់ពីបញ្ហាប្រទេសជាតិជាក់ស្តែង ដើម្បីឈានទៅរកដំណោះស្រាយពិតប្រាកដមួយ ក្នុងនោះពួកគេនឹងក្លាយជាធនធានរឹងមាំសម្រាប់ជាតិមាតុភូមិរបស់ខ្លួនទៅថ្ងៃមុខផងដែរ។
កាលពីថ្ងៃទី៥ ខែធ្នូ ឆ្នាំ២០២២ ប្រធានសហភាពសហព័ន្ធយុវជនកម្ពុជា លោក ហ៊ុន ម៉ានី បានលើកឡើងក្នុងសន្និសីទកាសែតមួយនៅថ្ងៃដំបូងនៃការប្រឡងមធ្យមសិក្សាទុតិយភូមិថា ប្រព័ន្ធអប់រំរបស់កម្ពុជាមិនដែលមានបញ្ហានោះទេ។ លោកបន្ថែមថា ការលើកឡើងដែលថាសញ្ញាបត្ររបស់ប្រព័ន្ធអប់រំកម្ពុជាមិនមានតម្លៃដូចប្រទេសដទៃ គឺគ្រាន់តែជាការលើកឡើងដើម្បីបង្អាប់ប្រទេសជាតិខ្លួនឯងប៉ុណ្ណោះ។
លោក ហ៊ុន ម៉ានី អះអាងថា បើប្រព័ន្ធអប់រំកម្ពុជាមានបញ្ហា មិនមែនកម្ពុជាអាចបណ្តុះបណ្តាលធនធានមនុស្សរីកចម្រើនបានកម្រិតល្អដូចសព្វថ្ងៃនេះទេ។
ទាក់ទិននឹងបញ្ហានេះ ក្រសួងអប់រំ យុវជន និងកីឡា បានចេញសេចក្តីណែនាំស្ដីពីដំណើរការគ្រឹះស្ថានមធ្យមសិក្សាចំណេះទូទៅសាធារណៈក្នុងឆ្នាំសិក្សា២០២២-២០២៣ កាលពីថ្ងៃទី៥ ខែធ្នូ ឆ្នាំ២០២២ នេះថា ដំណើរការនៃការអប់រំមធ្យមសិក្សាចំណេះទូទៅសាធារណៈបានផ្ដោតយ៉ាងសំខាន់លើលទ្ធផលសិក្សារបស់សិស្ស ក្នុងគោលបំណងធានាឱ្យបាននូវការអប់រំដែលមានគុណភាពប្រកបដោយសមធម៌ និងលើកកម្ពស់ឱកាសសិក្សាពេញមួយជីវិតសម្រាប់ពលរដ្ឋគ្រប់រូប។
ក្រសួងអប់រំ យុវជន និងកីឡា បានបង្ហាញរបាយការណ៍របស់ខ្លួនថា ឆ្នាំសិក្សា២០២១-២០២២ កម្ពុជាមានគ្រឹះស្ថានមធ្យមសិក្សាសាធារណៈចំនួន ១៨១២កន្លែង ក្នុងនោះកម្រិតអនុវិទ្យាល័យមាន ១២៥៣កន្លែង ដែលទទួលបានសិស្សចំនួនជាង ៦៦ម៉ឺន ២ពាន់នាក់ និងកម្រិតវិទ្យាល័យមាន ៥៥៩កន្លែង ដែលទទួលបានសិស្សចំនួនជាង ៣៦ម៉ឺន ៦០០នាក់ផងដែរ។
ទាក់ទិននឹងបញ្ហានេះ ប្រធានវិទ្យាស្ថានប្រជាធិបតេយ្យកម្ពុជា លោក ប៉ា ចន្ទរឿន បានសរសេរលើគណនីហ្វេសប៊ុករបស់ខ្លួនកាលពីថ្ងៃទី៥ ខែធ្នូ ឆ្នាំ២០២២ នេះថា ការប្រឡងមធ្យមសិក្សាទុតិយភូមិ ឬប្រឡងបាក់ឌុបបានក្លាយជាពេលវេលាស្លាប់រស់កំណត់អនាគតរបស់យុវជនរាប់សែននាក់ ខណៈការប្រឡងនេះគ្រាន់តែជាចំណែកមួយនៃការវាស់វែងសមត្ថភាពរបស់សិស្សប៉ុណ្ណោះ ដូច្នេះក្រសួងអប់រំគួរតែបង្កបរិយាកាសឱ្យសិស្សានុសិស្សបានរៀនសូត្រឱ្យចេះដឹងពិតប្រាកដតាមកម្រិតនីមួយៗ ជាជាងការដាក់កម្រិតតឹងរ៉ឹងនៅថ្ងៃប្រឡង៕