 ផ្ដល់កម្ចីជាទឹកប្រាក់ចំនួន ៥០លានដុល្លារ ដើម្បីគាំទ្រដល់រាជរដ្ឋាភិបាលកម្ពុជាក្នុងការធ្វើពិពិធកម្មសេដ្ឋកិច្ច សម្រាប់ជំរុញសមត្ថភាពប្រកួតប្រជែងបន្ថែមទៀត និងគាំទ្រដល់ការស្ដារសេដ្ឋកិច្ចក្រោយកូវីដ-១៩ ខណៈសង្គមស៊ីវិលលើកឡើងថា ប្រសិនបើមិនបានត្រួតពិនិត្យឲ្យបានច្បាស់លាស់ពីការប្រើប្រាស់ថវិកាទេ វាគឺជាការដាក់បន្ទុកបន្ថែមលើពលរដ្ឋខ្មែរក្នុងការសងបំណុលនេះ។){kind=link}
ធនាគារអភិវឌ្ឍន៍អាស៊ី (ADB) ផ្ដល់កម្ចីជាទឹកប្រាក់ចំនួន ៥០លានដុល្លារ ដើម្បីគាំទ្រដល់រាជរដ្ឋាភិបាលកម្ពុជាក្នុងការធ្វើពិពិធកម្មសេដ្ឋកិច្ច សម្រាប់ជំរុញសមត្ថភាពប្រកួតប្រជែងបន្ថែមទៀត និងគាំទ្រដល់ការស្ដារសេដ្ឋកិច្ចក្រោយកូវីដ-១៩ ខណៈសង្គមស៊ីវិលលើកឡើងថា ប្រសិនបើមិនបានត្រួតពិនិត្យឲ្យបានច្បាស់លាស់ពីការប្រើប្រាស់ថវិកាទេ វាគឺជាការដាក់បន្ទុកបន្ថែមលើពលរដ្ឋខ្មែរក្នុងការសងបំណុលនេះ។
ធនាគារអភិវឌ្ឍន៍អាស៊ី (ADB) បានចេញសេចក្តីប្រកាសព័ត៌មាន នៅថ្ងៃទី៦ ខែធ្នូ ឆ្នាំ២០២២ នេះថា កម្ចីជាទឹកប្រាក់ចំនួន ៥០លានដុល្លារអាមេរិកនេះ គឺដើម្បីស្ដារសេដ្ឋកិច្ចកម្ពុជាឡើងវិញ បន្ទាប់ពីវិស័យកាត់ដេរ ផលិតស្បែកជើង និងវាយនភណ្ឌ វិស័យទេសចរណ៍ និងវិស័យសំណង់ បានធ្លាក់ចុះក្រោយវិបត្តិកូវីដ-១៩។
ធនាគារអភិវឌ្ឍន៍អាស៊ី លើកឡើងថា គម្រោងនេះនឹងគាំទ្រដល់ការស្ដារសេដ្ឋកិច្ចរបស់កម្ពុជាឡើងវិញក្រោយកូវីដ-១៩ តាមរយៈនៃការជួយដល់ការធ្វើកំណែទម្រង់មួយចំនួន ដើម្បីបង្កើនការវិនិយោគ និងបរិយាកាសធុរកិច្ច ជំរុញកំណើនសហគ្រាសខ្នាតតូច និងមធ្យមនៅកម្ពុជាទៅថ្ងៃមុខ។
ADB បញ្ជាក់ថា កម្មវិធីនេះនឹងជួយដល់ការអភិវឌ្ឍនានា ព្រមទាំងធ្វើឱ្យប្រសើរឡើងនូវលទ្ធភាពទទួលបានហិរញ្ញវត្ថុ និងការបង្កើតទីផ្សារថ្មីៗដែលអាចត្រួសត្រាយផ្លូវសម្រាប់អាជីវកម្មរបស់កម្ពុជាកាន់តែរីកចម្រើន ដែលអាចសម្របខ្លួនទៅនឹងទិដ្ឋភាពពាណិជ្ជកម្មដែលកំពុងផ្លាស់ប្ដូរក្នុងពេលបច្ចុប្បន្ននេះ។
នាយកមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ដែលហៅកាត់ថា សង់ត្រាល់ លោក មឿន តុលា ប្រាប់សារព័ត៌មាន The Cambodia Daily នៅថ្ងៃទី៦ ធ្នូ នេះថា រូបលោកផ្ទាល់ក៏ចង់បាននូវប្រាក់កម្ចីពីធនាគារអភិវឌ្ឍន៍អាស៊ី ដើម្បីឲ្យរដ្ឋាភិបាលអភិវឌ្ឍប្រទេសជាតិដែរ ប៉ុន្តែក្នុងនាមជាប្រជាពលរដ្ឋមួយរូបដែលត្រូវភ្ជាប់កាតព្វកិច្ចបង់ពន្ធជូនរដ្ឋ ដើម្បីឲ្យរដ្ឋាភិបាលប្រមូលយកលុយយកទៅសងបំណុលបរទេសនានា ក៏ចង់ឃើញប្រាក់កម្ចីទាំងនោះអាចជួយលើកកម្ពស់ជីវភាពពលរដ្ឋ និងអាចស្ដារឡើងវិញនូវវិស័យសេដ្ឋកិច្ចរបស់កម្ពុជាឲ្យមានភាពរីកចម្រើនផងដែរ។
លោក មឿន តុលា ថាស្ថានភាពដែលរដ្ឋាភិបាលដឹកនាំដោយឯកបក្ស និងរដ្ឋសភាជាតិឯកបក្សដូចសព្វថ្ងៃនេះ គឺពិតជាពិបាកនឹងឲ្យប្រជាពលរដ្ឋទុកចិត្តនូវការប្រើប្រាស់ថវិកាជាតិប្រកបដោយតម្លាភាពខ្លាំងណាស់ ព្រោះរាល់ការចំណាយរបស់រដ្ឋាភិបាល គឺជារបាយការណ៍ដែលលើកឡើងតែមួយជ្រុងប៉ុណ្ណោះ គ្មានភាគីណាផ្សេង ដូចជាគណបក្សក្រៅរដ្ឋាភិបាលដែលមានសំឡេងក្នុងរដ្ឋសភា ជាដើម ជាអ្នកចូលរួមត្រួតពិនិត្យរាល់របាយការណ៍របស់រដ្ឋាភិបាលទាំងនោះជូនប្រជាពលរដ្ឋឡើយ។
នាយកមជ្ឈមណ្ឌលសម្ព័ន្ធភាពការងារ និងសិទ្ធិមនុស្សរូបនេះអំពាវនាវឲ្យធនាគារអភិវឌ្ឍន៍អាស៊ី តាមដានការអនុវត្តប្រើប្រាស់ប្រាក់កម្ចីរបស់រដ្ឋាភិបាលកម្ពុជាឲ្យមានតម្លាភាព ចៀសវាងនូវការប្រព្រឹត្តអំពើពុករលួយ ឬការរំលោភសិទ្ធិណាមួយ ដែលធ្វើឲ្យបន្ទុកនៃការសងបំណុលនេះធ្លាក់មកលើប្រជាពលរដ្ឋកាន់តែធ្ងន់ធ្ងរថែមទៀត។
កាលពីថ្ងៃទី២២ ខែកញ្ញា ឆ្នាំ២០២១ ធនាគារអភិវឌ្ឍន៍អាស៊ី (ADB) បានបង្ហាញរបាយការណ៍របស់ខ្លួនថា ការនាំចេញសម្លៀកបំពាក់ ទំនិញធ្វើដំណើរ និងស្បែកជើងនៅឆមាសទី១ ក្នុងឆ្នាំ២០២១ របស់កម្ពុជានៅមានកម្រិតទាបជាងពេលមុនផ្ទុះជំងឺរាតត្បាតកូវីដ-១៩ ខណៈកំណើនសេដ្ឋកិច្ចកម្ពុជានៅពេលនោះមានកម្រិតត្រឹមតែ ១,៩ភាគរយប៉ុណ្ណោះ។
ទាក់ទិននឹងបញ្ហានេះ កាលពីឆ្នាំ២០២០ ធនាគារអភិវឌ្ឍន៍អាស៊ី (ADB) បានផ្តល់ប្រាក់កម្ចី និងជំនួយឥតសំណងជាង ៤៧០០លានដុល្លារអាមេរិក និងបានផ្តល់ទឹកប្រាក់ជាង ២៨០០លានដុល្លារអាមេរិកបន្ថែមទៀត តាមរយៈសហហិរញ្ញប្បទាន។ បន្ថែមពីនេះ ADB ក៏មានទឹកប្រាក់បម្រុងសម្រាប់ការអភិវឌ្ឍសេដ្ឋកិច្ចកម្ពុជារយៈពេល ៤ឆ្នាំផងដែរ ចាប់ពីឆ្នាំ២០២១ ដល់ឆ្នាំ២០២៤ រួមទាំងប្រាក់កម្ចីសម្បទានផងនោះ គឺមានចំនួនដល់ទៅ ១,៤៩ពាន់លានដុល្លារអាមេរិកឯណោះ ព្រមទាំងជំនួយឥតសំណងសម្រាប់កម្ពុជាចំនួន ៣១,៨លានដុល្លារអាមេរិកថែមទៀត៕