 រៀបចំទិវាសិទ្ធិមនុស្សអន្តរជាតិខួប ៧៤ឆ្នាំរយៈពេល ៤ថ្ងៃ ចាប់ពីថ្ងៃទី០៦ ខែធ្នូ ឆ្នាំ២០២២ ដល់ថ្ងៃទី១០ ខែធ្នូ ឆ្នាំ២០២២ ដែលមានអ្នកចូលរួមជាង ៦ពាន់នាក់មកពីបណ្ដាខេត្តផ្សេងៗគ្នា ដើម្បីឲ្យប្រជាពលរដ្ឋបង្ហាញក្ដីកង្វល់ និងតម្រូវការរបស់ពួកគេពាក់ព័ន្ធបញ្ហាសិទ្ធិមនុស្ស ភាពអយុត្តិធម៌សង្គម និងគោលនយោបាយនានាពាក់ព័ន្ធកិច្ចគាំពារសង្គម។){kind=link}
សមាគមសម្ព័ន្ធសហគមន៍កសិករកម្ពុជា (CCFC) រៀបចំទិវាសិទ្ធិមនុស្សអន្តរជាតិខួប ៧៤ឆ្នាំរយៈពេល ៤ថ្ងៃ ចាប់ពីថ្ងៃទី០៦ ខែធ្នូ ឆ្នាំ២០២២ ដល់ថ្ងៃទី១០ ខែធ្នូ ឆ្នាំ២០២២ ដែលមានអ្នកចូលរួមជាង ៦ពាន់នាក់មកពីបណ្ដាខេត្តផ្សេងៗគ្នា ដើម្បីឲ្យប្រជាពលរដ្ឋបង្ហាញក្ដីកង្វល់ និងតម្រូវការរបស់ពួកគេពាក់ព័ន្ធបញ្ហាសិទ្ធិមនុស្ស ភាពអយុត្តិធម៌សង្គម និងគោលនយោបាយនានាពាក់ព័ន្ធកិច្ចគាំពារសង្គម។
ក្នុងសេចក្ដីប្រកាសព័ត៌មានកាលពីថ្ងៃទី៥ ខែធ្នូ ឆ្នាំ២០២២ ស្ដីពីការរៀបចំទិវាសិទ្ធិមនុស្សអន្តរជាតិខួប៧៤ ឆ្នាំ២០២២ ប្រធានបទ «សាមគ្គីភាពប្រជាពលរដ្ឋដើម្បីយុត្តិធម៌ សិទ្ធិមនុស្ស និងកិច្ចគាំពារសង្គម» របស់សមាគមសម្ព័ន្ធសហគមន៍កសិករកម្ពុជា (CCFC) ឲ្យដឹងថា ការរៀបចំទិវាសិទ្ធិមនុស្សអន្តរជាតិ នឹងចាប់ពីថ្ងៃទី០៦ ខែធ្នូ ឆ្នាំ២០២២ ដល់ថ្ងៃទី១០ ខែធ្នូ ឆ្នាំ២០២២ ដែលមានអ្នកចូលរួមជាង ៦ពាន់នាក់មកពីបណ្ដាខេត្តផ្សេងៗគ្នា ក្នុងនោះមានខេត្តកោះកុង ក្រចេះ ស្វាយរៀង ព្រៃវែង កណ្ដាល កំពត ព្រះវិហារ តាកែវ ព្រះសីហនុ ត្បូងឃ្មុំ កំពង់ស្ពឺ កំពង់ចាម សៀមរាប និងខេត្តកំពង់ធំ។
CCFC បញ្ជាក់ថា ការរៀបចំពិធីនេះ ដើម្បីចូលរួមអបអរសាទរទិវាសិទ្ធិមនុស្សអន្តរជាតិខួប៧៤ ឆ្នាំ២០២២ និងផ្តល់ឱកាសដល់កម្មករ យុវជន សហជីពកសិករ/សហគមន៍/បណ្ដាញ និងសមាគមដែលចង់ធ្វើការលើកឡើងអំពីបញ្ហា ក្ដីកង្វល់ តម្រូវការ ដែលប៉ះពាល់យ៉ាងធ្ងន់ធ្ងរដល់សិទ្ធិ យុត្តិធម៌សង្គម កិច្ចគាំពារសង្គម និងជីវភាពរស់នៅតាមតំបន់គោលដៅ។
លើសពីនេះ ក៏ដើម្បីបង្កើតបរិយាកាសវេទិកាពិភាក្សារវាងអាជ្ញាធរមូលដ្ឋាន អ្នកពាក់ព័ន្ធ កម្មករ រួមគ្នាដោះស្រាយបញ្ហា ក្ដីកង្វល់ និងតម្រូវការរបស់កសិករកម្មករនៅតាមសហគមន៍ដែលពាក់ព័ន្ធភាពអយុត្តិធម៌សង្គម សិទ្ធិមនុស្ស និងគោលនយោបាយនានាពាក់ព័ន្ធកិច្ចគាំពារសង្គម ឬសេវាសង្គម។
ថ្វីត្បិតទិវាសិទ្ធិមនុស្សអន្តរជាតិ ១០ ធ្នូ ត្រូវរដ្ឋាភិបាលកម្ពុជាដែលដឹកនាំដោយលោក ហ៊ុន សែន បានលុបចេញថ្ងៃសម្រាកចេញពីប្រតិទិននៃបុណ្យជាតិក្ដី ប៉ុន្តែក្រុមអង្គការសង្គមស៊ីវិលដែលធ្វើការលើកកម្ពស់សិទ្ធិមនុស្ស និងអង្គការពាក់ព័ន្ធផ្សេងៗទៀត នៅតែបន្តប្រារព្ធពិធីនេះជារៀងរាល់ឆ្នាំ៕