 ស្នើរដ្ឋាភិបាលកម្ពុជាជាថ្មីម្តងទៀតឲ្យបិទមណ្ឌលព្រៃស្ពឺ ដើម្បីបញ្ចប់ស្ថានភាពអាក្រក់ដែលប្រឈម ក្រោយរកឃើញថាអ្នកជាប់ឃុំជាង ១០នាក់បានស្លាប់ក្នុងចំណោមអ្នកជាប់ឃុំទាំងអស់នៅក្នុងមណ្ឌលនៅចន្លោះខែកក្កដា និងខែសីហា ឆ្នាំ២០២២។){kind=link}
អង្គការលីកាដូ (LICADHO) ស្នើរដ្ឋាភិបាលកម្ពុជាជាថ្មីម្តងទៀតឲ្យបិទមណ្ឌលព្រៃស្ពឺ ដើម្បីបញ្ចប់ស្ថានភាពអាក្រក់ដែលប្រឈម ក្រោយរកឃើញថាអ្នកជាប់ឃុំជាង ១០នាក់បានស្លាប់ក្នុងចំណោមអ្នកជាប់ឃុំទាំងអស់នៅក្នុងមណ្ឌលនៅចន្លោះខែកក្កដា និងខែសីហា ឆ្នាំ២០២២។
ការស្នើនេះ អង្គការលីកាដូ អង្គការឃ្លាំមើលសិទ្ធិមនុស្ស អង្គការលើកលែងទោសអន្តរជាតិ និងការិយាល័យសិទ្ធិមនុស្សនៃអង្គការសហប្រជាជាតិ បានលើកឡើងអំពីកង្វល់ជុំវិញការរំលោភបំពាន និងការស្លាប់ដែលគួរតែអាចការពារបាននៅក្នុងមណ្ឌលព្រៃស្ពឺជាច្រើនដងទៅកាន់រដ្ឋាភិបាល។
ក្នុងសេចក្តីថ្លែងការណ៍ចេញផ្សាយនៅថ្ងៃទី៧ ខែធ្នូ ឆ្នាំ២០២២ បានឱ្យដឹងថា បើតាមសាក្សីដែលបានឃើញស្ត្រីម្នាក់ និងបុរសម្នាក់ស្លាប់ កើតឡើងក្រោយពីអ្នកជាប់ឃុំឈឺនៅក្នុងមណ្ឌល ហើយមិនត្រូវបានផ្ដល់ការព្យាបាលឱ្យបានគ្រប់គ្រាន់។
អង្គការលីកាដូថាសាក្សីបានរៀបរាប់ប្រាប់ពីស្ថានភាពអ្នកជាប់ឃុំដែលមានជំងឺធ្ងន់ធ្ងរនៅក្នុងមណ្ឌលព្រៃស្ពឺ ត្រូវបានទុកចោលនៅលើឥដ្ឋនៅក្នុងបន្ទប់ឃុំឃាំងជាកន្លែងដែលពួកគេបានស្លាប់នៅចំពោះមុខអ្នកជាប់ឃុំផ្សេងទៀត។
សេចក្ដីថ្លែងការណ៍បញ្ជាក់ថា សាក្សីនៅក្នុងវត្តមួយដែលទទួលខុសត្រូវក្នុងការបូជាសាកសពមកពីមណ្ឌលព្រៃស្ពឺ បានបញ្ជាក់ពីការកើនឡើងនៃចំនួនសាកសពដែលមណ្ឌលព្រៃស្ពឺបញ្ជូនមក ដើម្បីធ្វើការបូជាកាលពីអំឡុងខែសីហា ឆ្នាំ២០២២។ បើតាមភស្តុតាងបានចង្អុលបង្ហាញថា មានការស្លាប់នៃអ្នកជាប់ឃុំជាង ១០នាក់នៅចន្លោះខែកក្កដា និងខែសីហា ឆ្នាំ២០២២ ប៉ុន្តែការរឹតត្បិតក្នុងការចូលទៅកាន់មណ្ឌល ធ្វើឱ្យមានភាពលំបាកដើម្បីបញ្ជាក់ពីការរាយការណ៍ទាំងនេះ។
អង្គការលីកាដូថា ទោះបីជាមណ្ឌលព្រៃស្ពឺបានអះអាងជាមណ្ឌលបណ្ដុះបណ្ដាលវិជ្ជាជីវៈ និងត្រូវបានគ្រប់គ្រងដោយក្រសួងសង្គមកិច្ច អតីតយុទ្ធជន និងយុវនីតិសម្បទា ប៉ុន្តែមណ្ឌលនេះដំណើរការជាមណ្ឌលឃុំខ្លួនដោយមិនត្រឹមត្រូវ ដើម្បីលាក់បាំងរូបភាពពីប្រជាពលរដ្ឋដែលមិនត្រូវបានគេអើពើ និងអ្នកដែលប្រឈមនឹងហានិភ័យនៅរាជធានីភ្នំពេញ។
នាយិកាទទួលបន្ទុកកិច្ចការក្រៅតំបន់នៃអង្គការលីកាដូ អ្នកនាង ណាលី ពីឡូក បានលើកឡើងក្នុងសេចក្ដីថ្លែងការណ៍ថា ការស្លាប់របស់មនុស្សពីរនាក់នេះជាបញ្ហាបន្ថែមលើការរំលោភបំពាន ការធ្វើទារុណកម្ម និងការបាត់បង់ជីវិតដែលមិនគួរកើតមានអស់រយៈពេលជិតពីរទសវត្សរ៍មកនេះនៅក្នុងមណ្ឌលព្រៃស្ពឺ។
អ្នកនាងបានបន្ថែមថា ជារៀងរាល់ថ្ងៃ មណ្ឌលព្រៃស្ពឺនៅតែបើកដំណើរការបង្កឱ្យមានការរំលោភបំពានបន្ថែមទៀត និងហានិភ័យនៃការស្លាប់ជាច្រើនទៀត។ ហេតុដូច្នេះ រាជរដ្ឋាភិបាលគួរតែបិទមណ្ឌលនេះតែម្ដង ហើយបញ្ចប់ភាពរងគ្រោះយ៉ាងអាក្រក់ដែលមិនគួរកើតមាននេះ។
ជាក់ស្ដែង ការស្លាប់ចុងក្រោយនេះ លីកាដូថាបានកើតឡើងអំឡុងពេលមានការកើនឡើងអ្នកជាប់ឃុំនៅក្នុងមណ្ឌលឃុំខ្លួនដោយមិនត្រឹមត្រូវនេះទៅលើបុរស និងស្ត្រីដែលមិនត្រូវបានគេអើពើនៅក្នុងមណ្ឌលមួយដែលមនុស្សជាង ៤០០នាក់ ត្រូវបានឃុំខ្លួន គិតត្រឹមខែសីហា ឆ្នាំ២០២២។ ក្នុងនោះ សាក្សីមួយចំនួនបានរៀបរាប់ពីស្ថានភាពដូចនរក រួមមានបន្ទប់ឃុំឃាំងដែលចង្អៀតណែនខ្លាំង កង្វះចំណីអាហារ ការវាយដំដោយសារមិនស្ដាប់តាមការណែនាំ ខណៈដែលការថែទាំសុខភាព គឺទទួលបានតែថ្នាំប៉ារ៉ាសេតាម៉ុលតែប៉ុណ្ណោះ ទោះបីមានជំងឺធ្ងន់ធ្ងរក៏ដោយ។
អ្នកនាងបញ្ជាក់ថា ក្រោយពីទទួលបានព័ត៌មាននេះ អង្គការលីកាដូបានដាក់លិខិតស្នើសុំការអនុញ្ញាតនៅចុងខែតុលា ឆ្នាំ២០២២ ដើម្បីបញ្ជូនក្រុមគ្រូពេទ្យ រួមមានវេជ្ជបណ្ឌិត ដើម្បីវាយតម្លៃ និងព្យាបាលអ្នកជាប់ឃុំនៅក្នុងមណ្ឌល ប៉ុន្តែលិខិតស្នើសុំដែលបានដាក់ទៅមន្ទីរសង្គមកិច្ច អតីតយុទ្ធជន និងយុវនីតិសម្បទានៅក្នុងរាជធានីភ្នំពេញ នៅតែគ្មានការឆ្លើយតប ហើយនៅតែមានការរឹតត្បិតក្នុងការចូលទៅកាន់មណ្ឌលព្រៃស្ពឺនៅឡើយ។
មណ្ឌលព្រៃស្ពឺ បានចាប់បើកដំណើរការក្នុងឆ្នាំ២០០៤ ក្រោមការណែនាំរបស់មណ្ឌលបណ្ដុះបណ្ដាលវិជ្ជាជីវៈ ប៉ុន្តែតែងតែត្រូវបានប្រើប្រាស់ក្នុងរូបភាពជាទីតាំងឃុំខ្លួនដោយមិនត្រឹមត្រូវ សម្រាប់មនុស្សដែលមិនត្រូវបានគេអើពើ យកមកពីតាមដងផ្លូវនានាក្នុងរាជធានីភ្នំពេញ។
ក្នុងឆ្នាំ២០២០ អង្គការលើកលែងទោសអន្តរជាតិ បានចេញរបាយការណ៍មួយដោយបានចងក្រងការរំលោភបំពានជាច្រើននៅក្នុងមណ្ឌលព្រៃស្ពឺ រួមមានការវាយដំ ការស្លាប់ ការធ្វើអត្តឃាត ភាពចង្អៀតណែនខ្លាំង កង្វះអាហារគ្រប់គ្រាន់ ក៏ដូចជាការព្យាយាមរត់ចេញរបស់អ្នកជាប់ឃុំ ជាដើម៕