ស្ត្រីរងគ្រោះក្នុងករណីគ្រោះថ្នាក់ចរាចរណ៍នៅលើស្ពានជ្រោយចង្វារ ទាមទារឱ្យសមត្ថកិច្ចអនុវត្តនីតិវិធីចំពោះជនបង្កទៅតាមផ្លូវច្បាប់ ព្រោះខ្លួនមិនបានផ្ដិតមេដៃទទួលយកសំណង ២៥០០ដុល្លារដើម្បីបញ្ចប់រឿងនោះទេ ព្រោះមានគេកាន់ដៃយកទៅផ្ដិតមេដៃលើលិខិតទទួលយកសំណង ខណៈខ្លួនកំពុងសន្លប់បាត់បង់ស្មារតី។
ស្ត្រីដែលអះអាងថាជាជនរងគ្រោះក្នុងករណីគ្រោះថ្នាក់ចរាចរណ៍កាលពីថ្ងៃទី៥ ខែធ្នូ អ្នកស្រី មុច ស្រីល័ក្ខ បានថ្លែងឲ្យដឹងថា ពេលនេះទារករងគ្រោះកំពុងសម្រាកព្យាបាលនៅមន្ទីរពេទ្យ។ គាត់ និងទារកនៅតែមានអាការៈធ្ងន់ធ្ងរ។
អ្នកស្រីបន្តថា អ្នកស្រីទាមទារឱ្យសមត្ថកិច្ចអនុវត្តនីតិវិធីចំពោះជនបង្កទៅតាមផ្លូវច្បាប់ ព្រោះគាត់ពិតជាមិនបានផ្តិតមេដៃទទួលយកសំណង ២៥០០ដុល្លារ ដើម្បីបញ្ចប់រឿងដូចការផ្សាយរបស់ស្នងការដ្ឋាននគរបាលរាជធានីភ្នំពេញទេ។ អ្នកស្រីថាមានគេកាន់ដៃគាត់ឱ្យផ្ដិតមេដៃលើលិខិតកិច្ចព្រមព្រៀងទាំងមិនដឹងខ្លួន។
ស្នងការដ្ឋាននគរបាលរាជធានីភ្នំពេញ កាលពីយប់ថ្ងៃទី៦ ខែធ្នូ បានបំភ្លឺថា កាលពីថ្ងៃទី៥ ខែធ្នូ មានករណីគ្រោះថ្នាក់ចរាចរណ៍រវាងរថយន្ត និងម៉ូតូ កើតឡើងនៅចំណុចមួយលើស្ពានជ្រោយចង្វារចាស់ ឬស្ពានមិត្តភាពកម្ពុជា-ជប៉ុន សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។ បើតាមសមត្ថកិច្ច មូលហេតុបណ្ដាលឱ្យមានគ្រោះថ្នាក់ គឺអ្នកបើកបររថយន្តបើកបរលឿន ខ្វះការប្រុងប្រយ័ត្ន និងបើកបរស្ថិតក្នុងស្ថានភាពស្រវឹង។ លើសពីនេះ ជនបង្កត្រូវបានផាកពិន័យចំនួន ២លានរៀលតាមមាត្រា១០ថ្មី នៃអនុក្រឹត្យចុះថ្ងៃទី១៧ ខែមីនា ឆ្នាំ២០២០។
ស្នងការដ្ឋាននគរបាលរាជធានីភ្នំពេញ បានភ្ជាប់នូវកិច្ចព្រមព្រៀងបញ្ចប់សំណង និងលិខិតដកពាក្យបណ្តឹងរបស់ម្តាយជនរងគ្រោះ ដោយថាភាគីពាក់ព័ន្ធបានឯកភាពគ្នាលើសំណងចំនួន ២៥០០ដុល្លារដើម្បីបញ្ចប់រឿង។
ស្នងការដ្ឋាននគរបាលរាជធានីភ្នំពេញបញ្ជាក់ថា ទោះបីជាមានការបញ្ចប់សំណងរដ្ឋប្បវេណីយ៉ាងណាក៏ដោយ ប៉ុន្តែករណីគ្រោះថ្នាក់នេះនៅជាប់បណ្ដឹងអាជ្ញា ហើយកម្លាំងជំនាញកំពុងកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការបន្តតាមនីតិវិធីច្បាប់។
រដ្ឋមន្ត្រីក្រសួងមហាផ្ទៃ លោក ស ខេង ថ្លែងប្រាប់អ្នកសារព័ត៌មាននៅថ្ងៃទី៧ ខែធ្នូ ក្រោយបញ្ចប់ការប្រារព្ធទិវាអន្តរជាតិរម្លឹកដល់ជនរងគ្រោះដោយគ្រោះថ្នាក់ចរាចរណ៍ផ្លូវគោកលើកទី១៧ ថា លោកមិនគាំទ្រចំពោះអ្នកបើកបរដែលបង្កគ្រោះថ្នាក់ដល់អាយុជីវិតអ្នកដទៃ ហើយបែរជាប្រើលុយដោះស្រាយបញ្ចប់រឿងដើម្បីរួចខ្លួនទេ។ លោកថាកំពុងតាមដានព័ត៌មានជាក់លាក់នៃគ្រោះថ្នាក់ចរាចរណ៍ទៅលើពលរដ្ឋមួយគ្រួសារ ដើម្បីចាត់វិធានការឱ្យបានសមស្រប។
មន្ត្រីស៊ើបអង្កេតជាន់ខ្ពស់នៅសមាគមការពារសិទ្ធិមនុស្សអាដហុក លោក ស៊ឹង សែនករុណា ថ្លែងថា លោកចាត់ទុកការលើកឡើងរបស់រដ្ឋមន្ត្រីក្រសួងមហាផ្ទៃ លោក ស ខេង ថាជារឿងត្រឹមត្រូវ។ លោកថា គួរតែមានចំណាត់ការលើមន្ត្រីពាក់ព័ន្ធឱ្យបានម៉ឺងម៉ាត់លើករណីនេះ។
លោកថា ករណីនេះទាមទារឱ្យមន្ត្រីដែលប្រតិបត្តិច្បាប់ប្រមូលភស្តុតាងតាមនីតិវិធី ហើយបើទោះមានការសម្របសម្រួលសងសំណងដល់ជនរងគ្រោះ ក៏មិនអាចរំលត់បណ្ដឹងអាជ្ញាបានដែរ។ ព្រះរាជអាជ្ញាត្រូវតែដំណើរការរឿងហ្នឹងតទៅទៀត គឺចោទប្រកាន់ទៅតុលាការ វាមិនមែនជាការសម្របសម្រួលក្រៅប្រព័ន្ធច្បាប់ទេ។
តាមមាត្រា៨៥ នៃច្បាប់ចរាចរណ៍ផ្លូវគោក ចែងថា ជនណាដែលបើកបរដោយធ្វេសប្រហែស ខ្ជីខ្ជា មិនប្រុងប្រយ័ត្ន ឬមិនគោរពកាតព្វកិច្ចដែលបទប្បញ្ញត្តិស្ដីពីចរាចរណ៍ផ្លូវគោកតម្រូវ បណ្ដាលឱ្យស្លាប់អ្នកដទៃ ត្រូវផ្ដន្ទាទោសដាក់ពន្ធនាគារពី ១ឆ្នាំទៅ ៣ឆ្នាំ ពិន័យជាប្រាក់ពី ៤០០០០០០ (បួនលាន) រៀលទៅ ១៥០០០០០០ (ដប់ប្រាំលាន) រៀល និងអាចត្រូវផ្ដន្ទាទោសដោយទោសបន្ថែមមួយ ឬច្រើនដូចមានចែងក្នុងមាត្រា៥៣ (ប្រភេទទោសបន្ថែម) នៃក្រមព្រហ្មទណ្ឌ។
នៅក្នុងមាត្រា៨៥ ដដែល ក៏បានចែងថា អ្នកបើកបរដោយស្ថិតក្នុងស្ថានភាពស្រវឹង បណ្ដាលឱ្យមនុស្សស្លាប់ រត់គេចពីកន្លែងកើតហេតុជាដើម ដើម្បីគេចពីការទទួលខុសត្រូវជាដើម គឺត្រូវជាប់ពន្ធនាគារពី ២ឆ្នាំទៅ ៥ឆ្នាំ និងពិន័យជាប្រាក់ពី ១០លានទៅ ២៥លានរៀល៕