សមាជិកសភាអូស្ត្រាលី ចាត់ទុករដ្ឋាភិបាលក្រោមអំណាចរបស់លោកនាយករដ្ឋមន្ត្រី ហ៊ុន សែន ថាជារបបក្មេងទំនើង បន្ទាប់ពីប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ (NAGA World) កញ្ញា ឈឹម ស៊ីថរ ត្រូវបានចាប់ខ្លួនដាក់ពន្ធនាគារក្រោយត្រឡប់មកពីមហាសន្និបាតអន្តរជាតិនៅប្រទេសអូស្ត្រាលី។
សមាជិកសភាអូស្ត្រាលី លោក ជូលៀន ហ៊ីល (Julian Hill) ត្រូវបានសារព័ត៌មានអូស្ត្រាលី ABC ស្រង់សម្ដីចុះផ្សាយនៅថ្ងៃទី៨ ខែធ្នូ ឆ្នាំ២០២២ នេះថា ការតស៊ូរបស់កញ្ញា ឈឹម ស៊ីថរ ក្នុងការស្វែងរកយុត្តិធម៌ និងការការពារកម្មករពីការរំលោភសិទ្ធិការងារកន្លងមក មិនមែនជាសកម្មភាពបង្ហាញពីការព្យាយាមធ្វើឱ្យខូចឈ្មោះរបស់រដ្ឋាភិបាលកម្ពុជានោះទេ ប៉ុន្តែជាសកម្មភាពដែលបង្ហាញពីភាពក្លាហានរបស់តំណាងកម្មកររូបនេះដែលកំពុងក្រោកឈរឡើងជួយកម្មករនិយោជិតពីការរំលោភបំពានលើសិទ្ធិការងារទៅវិញប៉ុណ្ណោះ។
សមាជិកសភាអូស្ត្រាលីរូបនេះលើកឡើងថា ការចាប់ខ្លួនប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ បន្ទាប់ពីកញ្ញាបានចូលរួមមហាសន្និបាតអន្តរជាតិនៅប្រទេសអូស្ត្រាលីនេះ គឺបង្ហាញយ៉ាងច្បាស់ពីការដឹកនាំរបស់រដ្ឋាភិបាលកម្ពុជាដែលកំពុងអនុវត្តតាមបែបផ្ដាច់ការ។
តំណាងកម្មករខ្មែរនៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ ត្រូវបានសមត្ថកិច្ចក្រុងភ្នំពេញចាប់ខ្លួនជាលើកទី២ នៅអាកាសយានដ្ឋានអន្តរជាតិភ្នំពេញ កាលពីថ្ងៃទី២៦ ខែវិច្ឆិកា ឆ្នាំ២០២២ ក្រោមហេតុផលថាបានចាកចេញពីប្រទេសកម្ពុជាដោយគ្មានការអនុញ្ញាតពីចៅក្រមស៊ើបសួរ ក្នុងពេលដែលរូបគេកំពុងដាក់ឱ្យនៅក្រៅឃុំដែលត្រូវស្ថិតក្រោមការត្រួតពិនិត្យរបស់តុលាការនៅឡើយ។ទាក់ទិននឹងបញ្ហានេះ នាយករងអាស៊ីនៃអង្គការឃ្លាំមើលសិទ្ធិមនុស្ស លោក Phil Robertson បានលើកឡើងកាលពីពេលថ្មីៗនេះថា រដ្ឋាភិបាលកម្ពុជា និងនិយោជកដែលគ្មានក្រមសីលធម៌បានប្រើប្រាស់ជំងឺរាតត្បាត Covid-19 ជាលេសដើម្បីរឹតត្បិតដល់សហជីពឯករាជ្យជំនួសឱ្យការការពារសុខុមាលភាព និងសិទ្ធិរបស់កម្មករសព្វថ្ងៃនេះ។
កាលពីថ្ងៃទី២០ ខែវិច្ឆិកា ឆ្នាំ២០២២ អង្គការឃ្លាំមើលសិទ្ធិមនុស្សអន្តរជាតិ Human Rights Watch បានចេញរបាយការណ៍របស់ខ្លួនថា កម្មករនិយោជិតក្នុងវិស័យកាត់ដេរ និងវិស័យទេសចរណ៍ បានរងនូវការបណ្តេញចេញពីការងារដោយអយុត្តិធម៌ និងការបញ្ឈប់ពីការងារទ្រង់ទ្រាយធំ ដែលផ្ដោតលើមេដឹកនាំសហជីព និងសមាជិកសកម្មជនដែលតែងការពារសិទ្ធិកម្មកររហូតមក។
ជុំវិញបញ្ហានេះ អង្គការសង្គមស៊ីវិលចំនួន ៦៩ស្ថាប័ន សហព័ន្ធសហភាពអន្តរជាតិ ITUC ក្រុមប្រឹក្សាសហជីពអាស៊ាន ACTU សហរដ្ឋអាមេរិក និងអូស្ត្រាលី បានចេញសេចក្តីថ្លែងការណ៍ជាបន្តបន្ទាប់ថា ការចោទប្រកាន់ពីបទព្រហ្មទណ្ឌលើកញ្ញា ឈឹម ស៊ីថរ ពីការអនុវត្តសិទ្ធិសហជីព និងការចោទប្រកាន់ថាបានរំលោភលើលក្ខខណ្ឌនៃការដាក់ឱ្យនៅក្រៅឃុំសម្រាប់ការចូលរួមកិច្ចប្រជុំសហជីព គឺមិនមានភាពស្របគ្នាជាមួយនឹងគោលការណ៍ច្បាប់ជាមូលដ្ឋានរបស់អង្គការពលកម្មអន្តរជាតិ ILO ដែលរដ្ឋាភិបាលកម្ពុជាបានផ្តល់សច្ចាប័ន កាលពីថ្ងៃទី២៣ ខែសីហា ឆ្នាំ១៩៩៩ និងរដ្ឋធម្មនុញ្ញរបស់ខ្លួននោះឡើយ៕