28 C
Phnom Penh

លោក ប៉ុន សៅរី៖ CNRP នៅតែ​ជា​បក្ស​ស្រប​ច្បាប់​ដរាបណា​តុលាការ​មិន​ទាន់​កាត់ទោស​លោក កឹម សុខា

ដោយ ឌឹ ខេមបូឌា ដេលី

បទវិភាគ

អតីត​អគ្គលេខាធិការ​គណបក្ស​សង្គ្រោះ​ជាតិ​នៅ​ក្រៅ​ប្រទេស ថា​ដរាបណា​តុលាការ​មិន​ទាន់​ចេញ​សាលដីកា​សម្រេច​ថា​មេដឹកនាំ​បក្ស​ប្រឆាំង លោក កឹម សុខា មាន​ទោស នោះ​គណបក្ស​សង្គ្រោះ​ជាតិ​នៅតែ​ជា​គណបក្ស​ស្រប​ច្បាប់​ដដែល។

អតីត​អគ្គលេខាធិការ​គណបក្ស​សង្គ្រោះ​ជាតិ​ប្រចាំ​ទ្វីប​អឺរ៉ុប ឬ CNRP-O លោក ប៉ុន សៅរី បាន​សរសេរ​លើ​គណនី​ហ្វេសប៊ុក​របស់​លោក​កាលពី​ថ្ងៃទី​៨ ខែ​ធ្នូ ឆ្នាំ​២០២២ ថា ផ្អែក​តាម​ច្បាប់​បោះឆ្នោត​របស់​ប្រទេស​កម្ពុជា​ដែល​កំពុង​ដឹកនាំ​ដោយ​រដ្ឋាភិបាល​ក្រុង​ភ្នំពេញ​សព្វថ្ងៃ​នេះ បាន​កំណត់​យ៉ាង​ច្បាស់​ថា បើ​មេ​បក្ស​នៃ​គណបក្ស​នយោបាយ​ណា​មួយ​មាន​ទោស នោះ​គណបក្ស​របស់​គេ​នឹង​ត្រូវ​រំលាយ ប៉ុន្តែ​ការ​អនុវត្ត​ជាក់ស្តែង គឺ​បញ្ច្រាស​គ្នា​ពី​ខ្លឹមសារ​នៃ​ច្បាប់​ដែល​មាន​ចែង​ជា​ធរមាន​ទៅវិញ។

លោក ប៉ុន សៅរី លើកឡើង​ថា បើ​យោង​តាម​ច្បាប់​របស់​ប្រទេស​កម្ពុជា ជន​ទាំងឡាយ​ណា​ដែល​មិន​ទាន់​ត្រូវ​បាន​តុលាការ​សម្រេច​ឱ្យ​មាន​ទោស ជន​នោះ​នឹង​ត្រូវ​ចាត់ទុក​ថា​ជា​ជន​ស្អាតស្អំ។ ដូច្នេះ ប្រធាន​គណបក្ស​សង្គ្រោះ​ជាតិ លោក កឹម សុខា នៅ​មិន​ទាន់​ត្រូវ​បាន​តុលាការ​សម្រេច​ឱ្យ​មាន​ទោស​នៅឡើយ​ទេ​រហូត​មក​ដល់​ពេលនេះ នោះ​គឺ​មាន​ន័យ​ថា ការ​រំលាយ​គណបក្ស​សង្គ្រោះ​ជាតិ គឺជា​អំពើ​ខុស​ច្បាប់​ទាំងស្រុង។

អតីត​មន្ត្រី​ជាន់ខ្ពស់​បក្ស​ប្រឆាំង​រូប​នេះ​បញ្ជាក់​ថា នៅ​ពេល​ដែល​គណបក្ស​សង្គ្រោះ​ជាតិ​នៅ​មាន​សុពលភាព​ស្រប​ច្បាប់​នៅឡើយ ហើយ​មេដឹកនាំ​មួយ​ចំនួន​របស់​បក្ស​នេះ​នាំគ្នា​ទៅ​បង្កើត​គណបក្ស​ថ្មី ឬ​ទៅ​ចូលរួម​ជាមួយ​គណបក្ស​ផ្សេង​ទៀត​នោះ គឺ​មាន​ន័យ​ថា​ពួកគេ​កំពុង​ចូលរួម​រំលាយ​គណបក្ស​សង្គ្រោះ​ជាតិ​ជាមួយ​លោក ហ៊ុន សែន យ៉ាង​ពិតប្រាកដ។

បើ​តាម​ផ្លូវ​ច្បាប់ អ្នក​ទាំងនោះ​ត្រូវ​បាន​បាត់បង់​សមាជិកភាព​ពី​គណបក្ស​សង្គ្រោះ​ជាតិ​ដោយ​ស្វ័យប្រវត្តិ។

កាលពី​ដើម​ខែ​កញ្ញា ឆ្នាំ​២០១៧ អាជ្ញាធរ​នៃ​រដ្ឋាភិបាល​លោក ហ៊ុន សែន បាន​សម្រុក​ចូល​ចាប់​ខ្លួន​លោក កឹម សុខា ទាំង​កណ្ដាល​អាធ្រាត្រ​ដល់​គេហដ្ឋាន​របស់​លោក​ក្នុង​ពេល​ដែល​លោក​កំពុង​មាន​អភ័យ​ឯកសិទ្ធិ​សភា​នៅឡើយ ក្រោម​បទ​ចោទប្រកាន់​ថា លោក​ត្រូវរ៉ូវ​គ្នា​ជាមួយ​សហរដ្ឋ​អាមេរិក ដើម្បី​ផ្ដួល​រំលំ​រដ្ឋាភិបាល​កម្ពុជា ប៉ុន្តែ​អស់​រយៈពេល​ជាង ៥​ឆ្នាំ​មក​នេះ តុលាការ​មិន​បាន​បង្ហាញ​ភស្តុតាង​ស្រប​ច្បាប់​ជាក់លាក់​ណា​មួយ​ថា លោក កឹម សុខា ពិតជា​បាន​ឃុបឃិត​ជាមួយ​រដ្ឋ​បរទេស​ដូច​ការ​ចោទប្រកាន់​របស់​ខ្លួន​នោះ​ឡើយ។

ក្រោយ​ការ​ចាប់​ខ្លួន​លោក កឹម សុខា បាន​ត្រឹមតែ ៧៣​ថ្ងៃ​ប៉ុណ្ណោះ គឺ​នៅ​ថ្ងៃទី​១៦ ខែ​វិច្ឆិកា ឆ្នាំ​២០១៧ តុលាការ​ក្រុង​ភ្នំពេញ​បាន​ប្រកាស​រំលាយ​គណបក្ស​សង្គ្រោះ​ជាតិ និង​ដកហូត​យក​កៅអី​តំណាងរាស្ត្រ​របស់​បក្ស​នេះ​ទាំងអស់ ព្រមទាំង​យក​កៅអី​សមាជិក​ក្រុមប្រឹក្សា​ឃុំ-សង្កាត់​ទាំង​ជាង ៥​ពាន់​នាក់​ទៅ​បែងចែក​ឱ្យ​គណបក្ស​ផ្សេង​ថែម​ទៀត ទាំង​ដែល​ខ្លួន​មិន​ទាន់​បាន​កាត់ទោស​មេដឹកនាំ​របស់​ពួកគេ​ពី​បទល្មើស​ណា​មួយ​នៅឡើយ។

ជុំវិញ​បញ្ហា​នេះ កាលពី​ថ្ងៃទី​៦ ខែ​ធ្នូ ឆ្នាំ​២០២២ ប្រធាន​គណបក្ស​សង្គ្រោះ​ជាតិ លោក កឹម សុខា បាន​អះអាង​ថា មាតុភូមិ​កម្ពុជា​គឺជា​ផ្ទះ ជា​ជម្រក ជា​ដង្ហើម​នៃ​ជីវិត​របស់​លោក ដែល​លោក​ត្រូវ​មាន​កាតព្វកិច្ច​ថែរក្សា ការពារ​ឲ្យ​បាន​សុខដុមរមនា គង់វង្ស​មួយ​ជីវិត មិន​មាន​ហេតុផល​ណា​មួយ​ដែល​អាច​ឱ្យ​លោក​នាំ​ជាតិ​សាសន៍​ផ្សេង​មក​ត្រួតត្រា ឬ​បំផ្លិចបំផ្លាញ ឬ​ឈ្លានពាន​ប្រឆាំង​នឹង​ប្រទេស​កម្ពុជា​នោះ​ឡើយ។

ទាក់ទិន​នឹង​បញ្ហា​នេះ ក្រុម​អ្នក​សង្កេតការណ៍​ជាតិ និង​អន្តរជាតិ​រិះគន់​ថា ទង្វើ​របស់​រដ្ឋាភិបាល​លោក ហ៊ុន សែន ដែល​បាន​ប្រព្រឹត្ត​លើ​គណបក្ស​សង្គ្រោះ​ជាតិ​បែប​នេះ គឺជា​ទង្វើ​ដ៏​អយុត្តិធម៌​ជាទីបំផុត​សម្រាប់​ប្រជាពលរដ្ឋ​ខ្មែរ សម្រាប់​គណបក្ស​ប្រឆាំង និង​សម្រាប់​លោក កឹម សុខា ក្នុង​នាម​ជា​ប្រធាន​គណបក្ស​សង្គ្រោះ​ជាតិ​ដ៏​មាន​ឥទ្ធិពល​មួយ​រូប​ដែល​មាន​ប្រជាពលរដ្ឋ​គាំទ្រ​ជិត​កន្លះ​ប្រទេស​កន្លង​មក​នេះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស