អង្គការសង្គមស៊ីវិលដែលធ្វើការលើវិស័យសិទ្ធិមនុស្ស អំពាវនាវឱ្យរាជរដ្ឋាភិបាលកម្ពុជាលើកកម្ពស់ និងធានាធ្វើយ៉ាងណាឱ្យប្រជាពលរដ្ឋទូទាំងប្រទេសទទួលបាននូវសិទ្ធីសេរីភាពពេញលេញ និងគ្រប់ៗគ្នា ដោយគ្មានការរើសអើងដូចមានចែងក្នុងរដ្ឋធម្មនុញ្ញ។
ប្រធានសមាគមការពារសិទ្ធិមនុស្ស និងការអភិវឌ្ឍន៍នៅកម្ពុជា ដែលហៅកាត់ថាអាដហុក (ADHOC) លោក នី សុខា បានលើកឡើងក្នុងកម្មវិធីអបអរសាទរទិវាសិទ្ធិមនុស្សអន្តរជាតិ ១០ធ្នូ កាលពីថ្ងៃព្រហស្បតិ៍ ទី៨ ធ្នូ ថា ទិវាសិទ្ធិមនុស្សតែងតែប្រារព្វនៅថ្ងៃទី១០ ខែធ្នូ ជារៀងរាល់ឆ្នាំក៏ពិតមែន ប៉ុន្តែពលរដ្ឋខ្មែរគ្រប់រូបមិនមែនមានសិទ្ធិតែមួយថ្ងៃនេះទេ គឺមានសិទ្ធិគ្រប់ពេល គ្រប់វេលាទាំងអស់ ដែលត្រូវបានធានាដោយច្បាប់កំពូលរបស់ប្រទេសកម្ពុជា។
ប្រធានសមាគមការពារសិទ្ធិមនុស្សអាដហុករូបនេះលើកឡើងថា ដើម្បីធានាឱ្យបានពីការគោរពសិទ្ធិមនុស្ស មិនមែនពលរដ្ឋគ្រប់រូបគ្រាន់តែមកចូលរួមកម្មវិធីអបអរសាទរទិវាសិទ្ធិមនុស្សអន្តរជាតិ ហើយទទួលបានសិទ្ធិនោះទេ ប៉ុន្តែពួកគេត្រូវតែភ្ញាក់រឭក សាមគ្គី និងក្រោកឈរឡើងដើម្បីយុត្តិធម៌សង្គម និងការគោរពសិទ្ធិមនុស្សទាំងអស់គ្នា ទោះបីមានកិច្ចការរវល់យ៉ាងណាក៏ដោយ ព្រោះថាការចូលរួមរបស់ពលរដ្ឋគ្រប់រូប នឹងអាចប្រែក្លាយសង្គមជាតិរបស់ខ្លួនទៅជាសង្គមមួយដែលទទួលបាននូវការការពារសិទ្ធិជាមូលដ្ឋានសម្រាប់ពលរដ្ឋគ្រប់រូបយ៉ាងពិតប្រាកដ។
ការអះអាងនេះ ធ្វើឡើងដើម្បីចូលរួមអបអរសាទរទិវាសិទ្ធិមនុស្សអន្តរជាតិ ១០ធ្នូ ដែលត្រូវប្រារព្ធជារៀងរាល់ឆ្នាំនៅថ្ងៃទី១០ ខែធ្នូ ដើម្បីលើកកម្ពស់ការគោរពសិទ្ធិរបស់ពលរដ្ឋគ្រប់រូបនៅទូទាំងពិភពលោក។
អង្គការក្រៅរដ្ឋាភិបាល និងសមាគមជាច្រើនដែលធ្វើការលើវិស័យសិទ្ធិមនុស្ស ដូចជាសមាគមការពារសិទ្ធិមនុស្ស និងអភិវឌ្ឍន៍នៅកម្ពុជា អាដហុក (ADHOC) សមាគមសម្ព័ន្ធកសិករកម្ពុជា (CCFC) និងអង្គការសម្ព័ន្ធខ្មែរជំរឿន និងការពារសិទ្ធិមនុស្សលីកាដូ (LICADHO) ជាដើម បានប្រារព្ធកម្មវិធីអបអរសាទរទិវាសិទ្ធិមនុស្សអន្តរជាតិ ១០ធ្នូ ក្រោមប្រធានបទ «សាមគ្គីប្រជាពលរដ្ឋ ដើម្បីយុត្តិធម៌សង្គម សិទ្ធិមនុស្ស និងកិច្ចគាំពារសង្គម» ក្នុងភូមិជ្រៃឡើង ឃុំជាំក្រវៀន ស្រុកមេមត់ ខេត្តត្បូងឃ្មុំ កាលពីថ្ងៃទី៨ ខែធ្នូ ឆ្នាំ២០២២។
កាលពីថ្ងៃព្រហស្បតិ៍ ទី៨ ធ្នូ គណៈកម្មាធិការសិទ្ធិមនុស្សកម្ពុជាក៏បានប្រារព្ធពិធីអបអរសាទរទិវាសិទ្ធិមនុស្សអន្តរជាតិ ១០ធ្នូ ផងដែរ ក្រោមប្រធានបទ «ខួបលើកទី៧៥ នៃសេចក្តីប្រកាសជាសាកលស្ដីពីសិទ្ធិមនុស្ស» ដោយដាក់ពាក្យស្លោកមួយចំនួន ដូចជា៖
- ពលរដ្ឋគ្រប់រូបមានសិទ្ធិស្មើគ្នាចំពោះមុខច្បាប់
- មនុស្សគ្រប់រូបមានសិទ្ធិរស់រានមានជីវិត សិទ្ធិនេះមិនអាចត្រូវបានគេដកហូតឡើយ
- សន្តិភាព គឺជាមូលដ្ឋានគ្រឹះនៃសិទ្ធិ និងការអភិវឌ្ឍ
- ការប្រើប្រាស់សិទ្ធិសេរីភាពរបស់បុគ្គលម្នាក់ៗត្រូវគោរពច្បាប់ និងសិទ្ធិសេរីភាពអ្នកដទៃ ជាដើម។
រដ្ឋធម្មនុញ្ញនៃព្រះរាជាណាចក្រកម្ពុជា មាត្រា៣១ ចែងថា ព្រះរាជាណាចក្រកម្ពុជាទទួលស្គាល់ និងគោរពសិទ្ធិមនុស្សដូចដែលមានចែងក្នុងធម្មនុញ្ញអង្គការសហប្រជាជាតិ សេចក្តីប្រកាសជាសកលស្ដីពីសិទ្ធិមនុស្ស និងកតិកាសញ្ញា ព្រមទាំងអនុសញ្ញាទាំងឡាយទាក់ទងនឹងសិទ្ធិមនុស្ស សិទ្ធិនារី និងសិទ្ធិកុមារ ដែលបានបង្កើតឡើងតាំងពីឆ្នាំ១៩៤៨ មក។
យ៉ាងណាក៏ដោយ កាលពីថ្ងៃទី១ ខែធ្នូ ឆ្នាំ២០២២ មេដឹកនាំខ្មែរដែលចូលចិត្តរំលោភច្បាប់នៅកម្ពុជា លោក ហ៊ុន សែន បានលើកឡើងក្នុងពិធីខួប ១១ឆ្នាំនៃក្រុមហ៊ុន មីនីបៀ ថា សិទ្ធិនានា ដូចជាសិទ្ធិរស់រានមានជីវិត សិទ្ធិទទួលបានការអប់រំ សិទ្ធិនយោបាយ រហូតដល់ការអនុវត្តប្រជាធិបតេយ្យ ជាដើម គឺមិនអាចអនុវត្តក្រោមគ្រាប់កាំភ្លើងបានទេ ដូច្នេះការថែរក្សាសន្តិភាពសម្រាប់កម្ពុជា គឺជាកត្តាសំខាន់ និងចម្បងបំផុត។
ចំណែកឯប្រធានគណបក្សសង្គ្រោះជាតិដែលកំពុងរងការរឹតត្បិតសេរីភាព លោក កឹម សុខា បានលើកឡើងកាលពីពេលកន្លងទៅថា ការមិនឲ្យតម្លៃសិទ្ធិមនុស្ស ការមិនគោរពសិទ្ធិគ្នាទៅវិញទៅមក ជាពិសេសការរំលោភសិទ្ធិមនុស្ស គឺជាដើមចមនៃជម្លោះដែលអាចរីករាលដាលរហូតដល់មានសង្គ្រាម នាំឲ្យប្រជាជនទទួលរងនូវការឈឺចាប់ វិនាសកម្ម និងឈានទៅរកការបំផ្លាញសន្តិភាពរបស់ប្រទេសជាតិថែមទៀត៕