29 C
Phnom Penh

តុលាការ​នឹង​ប្រកាស​សាលក្រម​សំណុំរឿង​លោក គឹម សុខ នៅ​ខែ​មករា​ឆ្នាំ​២០២៣

ដោយ ឌឹ ខេមបូឌា ដេលី

បទវិភាគ

ចៅក្រម​សាលាដំបូង​រាជធានី​ភ្នំពេញ នឹង​ប្រកាស​សាលក្រម​ក្នុង​សំណុំរឿង​លោក គឹម សុខ អ្នកវិភាគ​នយោបាយ និង​អតីត​អ្នកគាំទ្រ​គណបក្ស​សង្គ្រោះ​ជាតិ​នៅ​ថ្ងៃទី​១៨ ខែ​មករា ឆ្នាំ​២០២៣ ខាងមុខ ខណៈ​សវនាការ​ជំនុំជម្រះ​សំណុំរឿង​ព្រហ្មទណ្ឌ​នេះ​មិន​មាន​វត្តមាន​ជន​ជាប់ចោទ​ឡើយ។

ការ​សម្រេច​នេះ បន្ទាប់ពី​ចៅក្រម​សាលាដំបូង​រាជធានី​ភ្នំពេញ លោក សេក សុជាតិ បាន​បើក​សវនាការ​ជំនុំជម្រះ​សំណុំរឿង «អំពើ​ញុះញង់​ឱ្យ​ប្រព្រឹត្ត​អំពើ​បង្ក​ឱ្យ​មាន​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម» នៅ​ថ្ងៃទី​៨ ខែ​ធ្នូ ឆ្នាំ​២០២២ ដោយ​មិន​មាន​វត្តមាន​ជន​ជាប់ចោទ​ទាំង ៣​នាក់។

ជន​ជាប់ចោទ​ទាំង ៣​នាក់​ក្នុង​នោះ​មាន​លោក គឹម សុខ អ្នកវិភាគ​នយោបាយ និង​កញ្ញា មាស លក្ខិណា អតីត​អ្នកគាំទ្រ​គណបក្ស​ប្រឆាំង និង​លោក ហ៊ុយ សុខគ្រៀល។

សំណុំរឿង «អំពើ​ញុះញង់​ឱ្យ​ប្រព្រឹត្ត​អំពើ​បង្ក​ឱ្យ​មាន​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម» ប្ដឹង​ដោយ​នាយកដ្ឋាន​ប្រឆាំង​ភេរវកម្ម និង​ឧក្រិដ្ឋកម្ម​ឆ្លងដែន​នៃ​ក្រសួង​មហាផ្ទៃ។

ជុំវិញ​ការ​បំភ្លឺ​នៅ​ក្នុង​បន្ទប់​ជំនុំជម្រះ​របស់​ប្រធាន​ការិយាល័យ​ប្រយុទ្ធ​ប្រឆាំង​ភេរវកម្ម និង​ឧក្រិដ្ឋកម្ម​ឆ្លងដែន​នៃ​ក្រសួង​មហាផ្ទៃ លោក ចាន់ ដារិទ្ធ នៅ​ថ្ងៃ​សវនាការ​បង្ហាញ​ថា អ្នក​ទាំង ៣​នាក់​ពិត​ជា​បាន​ប្រព្រឹត្ត​បទល្មើស និង​មាន​ភស្តុតាង​ជា​វីដេអូ​គ្រប់គ្រាន់ ដែល​ពួកគេ​បាន​បង្ហោះ​ការ​ជេរ​ប្រមាថ​ថ្នាក់​ដឹកនាំ​នៅ​លើ​បណ្ដាញ​សង្គម​ផ្ទាល់ខ្លួន ដែល​បាន​ប្រព្រឹត្ត​កាលពី​អំឡុង​ខែ​មិថុនា ដល់​ខែ​សីហា ឆ្នាំ​២០២០។

ជុំវិញ​ការ​បើក​សវនាការ​នៅ​ថ្ងៃ​ព្រហស្បតិ៍ ទី​៨ ធ្នូ នេះ លោក គឹម សុខ បាន​លើកឡើង​ក្នុង​ហ្វេសប៊ុក​ផេក​របស់​លោក​ថា លោក ហ៊ុន សែន លួច​ប្ដឹង​មួយ​ករណី​ទៀត និង​លួច​កាត់ទោស​ដោយ​ស្ងាត់ៗ​តែម្ដង។ លោក​បញ្ជាក់​ថា គិត​មក​ដល់​បច្ចុប្បន្ន​មាន​សំណុំរឿង​ចំនួន ៣ ហើយ ដោយ​លោក​ចាត់ទុក​ការ​បើក​សវនាការ​ជំនុំជម្រះ​នេះ​ថា​ជា​សវនាការ ប៉ុល ពត។

លោក គឹម សុខ ដែល​កំពុង​និរទេស​ខ្លួន​នៅ​ក្រៅ​ប្រទេស នៅតែ​បន្ត​រិះគន់​រដ្ឋាភិបាល​ដែល​ដឹកនាំ​ដោយ​គណបក្ស​ប្រជាជន​កម្ពុជា ទោះបីជា​លោក​ធ្លាប់​ត្រូវ​បាន​តុលាការ​កាត់ទោស​កាលពី​ថ្ងៃទី​១០ ខែ​សីហា ឆ្នាំ​២០១៧ កន្លងទៅ ដោយ​ដាក់​ពន្ធនាគារ​រយៈពេល ១៨​ខែ ពិន័យ ៨​លាន​រៀល​ចូល​ថវិកា​រដ្ឋ និង​សង​សំណង​ជំងឺចិត្ត​ដល់​ដើមបណ្ដឹង​ចំនួន ៨០០​លាន​រៀល ករណី​ចោទប្រកាន់​ថា​គណបក្ស​ប្រជាជន​កម្ពុជា​ជា​អ្នក​សម្លាប់​បណ្ឌិត កែម ឡី កាលពី​ថ្ងៃទី​១០ ខែ​កក្កដា ឆ្នាំ​២០១៦។

ក្រោយ​ពេល​អនុវត្ត​ទោស​ចប់​កាលពី​ឆ្នាំ​២០១៨ លោក គឹម សុខ បន្ត​រិះគន់​ការ​ដឹកនាំ​របស់​រាជរដ្ឋាភិបាល​ឥត​សំចៃ​មាត់​ដដែល ហើយ​ការ​វិភាគ​របស់​លោក​ក៏​ត្រូវ​ចំ​ទៅ​នឹង​យុទ្ធសាស្ត្រ​របស់​គណបក្ស​កាន់​អំណាច ជាពិសេស​យុទ្ធសាស្ត្រ​លោក ហ៊ុន សែន ផ្ទាល់​តែម្តង៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស