អតីតប្រធានគណបក្សសង្គ្រោះជាតិ លោក សម រង្ស៊ី និងក្រុមអ្នកឃ្លាំមើលសង្គម អំពាវនាវឱ្យពលរដ្ឋខ្មែររស់នៅសហគមន៍អឺរ៉ុបនាំគ្នាចូលរួមធ្វើបាតុកម្មនៅទីក្រុងប្រ៊ុចសែល ប្រទេសបែលហ្ស៊ិក ប្រឆាំងនឹងដំណើរទស្សនកិច្ចរបស់មេដឹកនាំកម្ពុជា លោក ហ៊ុន សែន ដើម្បីទាមទារឱ្យមានការដោះលែងសកម្មជននានា និងអ្នកទោសមនសិការទាំងអស់ដែលកំពុងត្រូវបានឃុំខ្លួនទាំងអយុត្តិធម៌ក្នុងពន្ធនាគារ។
លោក សម រង្ស៊ី បានបង្ហោះសារកាលពីថ្ងៃទី១០ ខែធ្នូ អំពាវនាវឲ្យពលរដ្ឋខ្មែរនៅអឺរ៉ុប ចូលរួមធ្វើបាតុកម្មប្រឆាំងនឹងលោក ហ៊ុន សែន ដែលនឹងទៅចូលរួមកិច្ចប្រជុំអាស៊ាន-សហភាពអឺរ៉ុប ក្នុងនាមជាប្រធានអាស៊ានឆ្នាំ២០២២ នៅទីក្រុងប្រ៊ុចសែល (Bruxelles) ប្រទេសបែលហ្សិក (Belgique) ឱ្យបានកុះករនៅថ្ងៃពុធ ទី១៤ ខែធ្នូ ឆ្នាំ២០២២ ខាងមុខនេះ។
លោកថា ទស្សនកិច្ចរបស់លោកនាយករដ្ឋមន្ត្រី ហ៊ុន សែន នៅទ្វីបអឺរ៉ុប គឺជាទស្សនកិច្ចចុងក្រោយនៅក្នុងនាមជានាយករដ្ឋមន្ត្រីកម្ពុជា ដោយលោកថា លោក ហ៊ុន សែន នឹងចុះចេញពីតំណែងកំពូលមួយនេះនៅឆ្នាំ២០២៣ ខាងមុខ។
លោក សម រង្ស៊ី អះអាងថា ក្រោយពេលលោក ហ៊ុន សែន ចុះចេញពីតំណែងនៅឆ្នាំ២០២៣ គឺលោក ហ៊ុន សែន នឹងត្រូវប៉ូលិសអន្តរជាតិចាប់ខ្លួនពីបទឧក្រិដ្ឋ និងអំពើឃាតកម្មជាច្រើននៅកម្ពុជា។
ចំណែកអនុប្រធានវេទិកាពលរដ្ឋ លោក ម៉ែន ណាត បានប្រាប់សារព័ត៌មាន The Cambodia Daily នៅថ្ងៃទី១២ ធ្នូ នេះថា ដើម្បីស្ដារសិទ្ធិមនុស្ស និងលទ្ធិប្រជាធិបតេយ្យឡើងវិញ រួមទាំងជំរុញឱ្យមានការដោះលែងតំណាងកម្មករ កញ្ញា ឈឹម ស៊ីថរ សកម្មជននយោបាយ និងសកម្មជនសង្គមនានា មានតែការរួបរួមកម្លាំងរបស់អ្នកស្នេហាប្រជាធិបតេយ្យនៅក្រៅស្រុកឱ្យកាន់តែខ្លាំងប៉ុណ្ណោះ ដើម្បីដាក់សម្ពាធលើរដ្ឋាភិបាលលោក ហ៊ុន សែន ដែលកំពុងធ្វើទុក្ខបុកម្នេញលើពលរដ្ឋនៅក្នុងស្រុកនៅពេលនេះ។
លោក ម៉ែន ណាត ត្អូញត្អែរថា ការដែលកម្លាំងអ្នកប្រជាធិបតេយ្យចេះតែសម្ងំ និងបែងចែកនិន្នាការមិនអាចរួបរួមកម្លាំងគ្នាបាននេះ គឺជាការលើកទឹកចិត្តមួយយ៉ាងធំដែលកាន់តែជំរុញឱ្យអំណាចដឹកនាំផ្ដាច់ការរបស់លោក ហ៊ុន សែន រីកធំឡើងៗរហូតមានអ្នកដែលលោភលន់នឹងកិត្តិយសខ្លះ សុខចិត្តទៅចុះចូលជាមួយរដ្ឋាភិបាលដែលធ្លាប់ធ្វើបាបខ្លួនកន្លងមក បើទោះបីជាគេដឹងថារដ្ឋាភិបាលនេះកំពុងដឹកនាំតាមរបៀបសាហាវឃោរឃៅក៏ដោយ។
អនុប្រធានវេទិកាពលរដ្ឋរូបនេះបញ្ជាក់ថា ដើម្បីឱ្យចលនាអ្នកប្រជាធិបតេយ្យអាចងើបឡើងប្រឆាំងតវ៉ានឹងអំណាចផ្ដាច់ការរបស់លោក ហ៊ុន សែន វិញបាន គឺមានតែមេដឹកនាំក្រុមប្រឆាំងស្វែងរកការរួបរួមប៉ុណ្ណោះ ទើបក្រុមអ្នកប្រជាធិបតេយ្យមានសង្ឃឹមបន្តឆន្ទៈក្នុងការតស៊ូប្រឆាំងនឹងការដឹកនាំដែលពោរពេញដោយការគំរាមកំហែង បំភិតបំភ័យពីរដ្ឋាភិបាលឯកបក្សរបស់លោក ហ៊ុន សែន នេះឡើងវិញ បើមិនដូច្នោះទេ អ្នកដែលបរាជ័យគឺក្រុមអ្នកប្រជាធិបតេយ្យ ហើយអ្នកដែលរងទុក្ខពិតប្រាកដ គឺពលរដ្ឋខ្មែរទាំងមូល។
កាលពីថ្ងៃទី១១ ខែធ្នូ ឆ្នាំ២០២២ មេដឹកនាំកម្ពុជា លោក ហ៊ុន សែន បានធ្វើដំណើរទៅចូលរួមកិច្ចប្រជុំរំឭកខួបអនុស្សាវរីយ៍អាស៊ាន-សហភាពអឺរ៉ុប និងដើម្បីអបអរសាទរខួប ៥៤ឆ្នាំនៃទំនាក់ទំនងដៃគូសន្ទនាអាស៊ាន-សហភាពអឺរ៉ុប ដែលនឹងប្រព្រឹត្តទៅនៅថ្ងៃទី១៤ ខែធ្នូ ឆ្នាំ២០២២ នៅទីក្រុងប្រ៊ុចសែល ប្រទេសបែលហ្ស៊ិក។
មេដឹកនាំបក្សកាន់អំណាច លោក ហ៊ុន សែន បានអះអាងកាលពីថ្ងៃអាទិត្យ ទី១១ ធ្នូ ថា អំឡុងពេលស្នាក់នៅទីក្រុងប្រ៊ុចសែល លោកនឹងមានជំនួបពិភាក្សាទ្វេភាគីជាមួយថ្នាក់ដឹកនាំអឺរ៉ុបមួយចំនួន ក្រៅពីនេះក៏មានជំនួបជាមួយនាយករដ្ឋមន្ត្រីនៃសាធារណរដ្ឋសង្គមនិយមវៀតណាម លោក ផាម មិញជិញ និងមានកម្មវិធីជួបជាមួយពលរដ្ឋខ្មែរដែលកំពុងរស់នៅអឺរ៉ុបផងដែរ៕