អតីតអ្នកទោសនយោបាយ លោក មាជ សុវណ្ណារ៉ា អះអាងថា ជំនួបរវាងប្រធានគណបក្សសង្គ្រោះជាតិជាមួយឯកអគ្គរាជទូតនៃប្រទេសជប៉ុនប្រចាំនៅកម្ពុជា លោក Masahiro Mikami បង្ហាញថា រដ្ឋាភិបាលជប៉ុននៅតែចាត់ទុកលោក កឹម សុខា ជាមេដឹកនាំប្រឆាំងដែលគ្មានទោសដូចការចោទប្រកាន់របស់រដ្ឋាភិបាលកម្ពុជាឡើយ។
អតីតអ្នកទោសនយោបាយ លោក មាជ សុវណ្ណារ៉ា ប្រាប់សារព័ត៌មាន The Cambodia Daily នៅថ្ងៃទី១២ ធ្នូ នេះថា ជំនួបរវាងមេដឹកនាំបក្សប្រឆាំង លោក កឹម សុខា ជាមួយបណ្តាអង្គទូតនៃប្រទេសនានារហូតមកមានបំណងតែមួយគត់ គឺជំរុញឱ្យរដ្ឋាភិបាលកម្ពុជាបើកសេរីភាពឱ្យលោក កឹម សុខា ឡើងវិញ ដើម្បីឱ្យគាត់អាចចូលរួមសកម្មភាពនយោបាយ ជាពិសេសគឺការចូលរួមការបោះឆ្នោតជាតិអាណត្តិទី៧ ក្នុងឆ្នាំ២០២៣ ខាងមុខនេះ។
លោក មាជ សុវណ្ណារ៉ា លើកឡើងថា មូលហេតុដែលបណ្តាអង្គទូតនៃប្រទេសដែលប្រកាន់យករបបលទ្ធិប្រជាធិបតេយ្យនៅតែបន្តឱ្យតម្លៃលើលោក កឹម សុខា គឺដោយសារតែគេដឹងយ៉ាងច្បាស់ថា សំណុំរឿងដែលរដ្ឋាភិបាលបានចោទគាត់អស់រយៈពេលជាង ៥ឆ្នាំមកនេះ គឺជារឿងនយោបាយ មិនមែនជារឿងស្វែងរកយុត្តិធម៌ និងជាផែនការដើម្បីផ្តួលរំលំរដ្ឋាភិបាលដូចការចោទប្រកាន់នោះឡើយ។
លោកបន្តថា ការអូសបន្លាយសវនាការលើសំណុំរឿងរបស់លោក កឹម សុខា ល្មមគ្រប់គ្រាន់ជាភស្តុតាងដែលបញ្ជាក់យ៉ាងច្បាស់ពីចេតនានយោបាយរបស់អ្នកចោទប្រកាន់ ខណៈតុលាការកម្ពុជាត្រូវគេរិះគន់ថាជាស្ថាប័នដែលលម្អៀង និងបម្រើផលប្រយោជន៍ឱ្យបក្សកាន់អំណាចរហូតមក។
នៅថ្ងៃទី១២ ខែធ្នូ ឆ្នាំ២០២២ នេះ ប្រធានគណបក្សសង្គ្រោះជាតិដែលកំពុងរងនូវការរឹតត្បិតសេរីភាព លោក កឹម សុខា បានសរសេរលើទំព័រហ្វេសប៊ុករបស់ខ្លួនថា លោកបានជួបពិភាក្សាការងារមួយចំនួនជាមួយឯកអគ្គរាជទូតនៃប្រទេសជប៉ុនប្រចាំនៅកម្ពុជា លោក Masahiro Mikami និងពិភាក្សាអំពីគោលជំហរនយោបាយរបស់លោកទៅថ្ងៃមុខ។
លោក កឹម សុខា លើកឡើងថា ទាំងមេដឹកនាំរដ្ឋបរទេស និងមេដឹកនាំខ្មែរ ប្រាកដជាយល់ និងស្គាល់នូវចេតនា អាកប្បកិរិយា និងសកម្មភាពរបស់លោកដែលប្រកាន់នូវគោលការណ៍អហិង្សា មិនយកខ្មែរណាជាសត្រូវ មិនប្រទូសរ៉ាយដល់សង្គមជាតិ ឬមនុស្សជាតិ ជាពិសេសមិនបង្កការឈឺចាប់ដល់ពលរដ្ឋខ្មែរ និងមាតុភូមិកម្ពុជា សូម្បីតែការបង្កជម្លោះបុគ្គល និងគ្រួសារក៏លោកមិនដែលធ្វើដែរ។
លោក កឹម សុខា ត្រូវសមត្ថកិច្ចចាប់ខ្លួនកាលពីដើមខែកញ្ញា ឆ្នាំ២០១៧ ពីបទត្រូវរ៉ូវគ្នាជាមួយសហរដ្ឋអាមេរិក ដើម្បីផ្ដួលរំលំរដ្ឋាភិបាលកម្ពុជា ប៉ុន្តែអស់រយៈពេលជាង ៥ឆ្នាំមកនេះ តុលាការមិនបានកាត់ទោសលោកពីបទល្មើសណាមួយនៅឡើយទេ។
យ៉ាងណាក៏ដោយ តុលាការបានបិទការសាកសួរដេញដោលលើអង្គហេតុទាំងអស់កាលពីពាក់កណ្តាលខែតុលា ឆ្នាំ២០២២ កន្លងទៅ ដើម្បីទុកឱកាសឱ្យមេធាវីការពារក្តីធ្វើសេចក្តីសន្និដ្ឋានចុងក្រោយជុំវិញសំណុំរឿងរបស់លោក ដែលនឹងត្រូវបើកសវនាការម្តងទៀតនៅថ្ងៃទី២១ ខែធ្នូ ឆ្នាំ២០២២ ខាងមុខនេះ៕