បុរសខ្លាំងក្រាញអំណាចផ្ដាច់មុខនៅកម្ពុជា លោក ហ៊ុន សែន ព្រមានថាអ្នកដែលចង់ជីករំលើងឫសគល់ត្រកូល ហ៊ុន ទាល់តែពួកគេយកឈ្នះគណបក្សប្រជាជនកម្ពុជាជាមុនសិន ខណៈមន្ត្រីជាន់ខ្ពស់បក្សកាន់អំណាចក៏គ្មាននរណាម្នាក់ហ៊ានជីករំលើងឫសគល់ត្រកូល ហ៊ុន ដែរ។
មេដឹកនាំខ្មែរដែលប្ដេជ្ញាក្រាញអំណាចតត្រកូល លោក ហ៊ុន សែន បានលើកឡើងក្នុងពិធីជួបជាមួយនឹងប្រជាពលរដ្ឋខ្មែរនៅទ្វីបអឺរ៉ុប ក្នុងទីក្រុងប្រ៊ុចសែល ប្រទេសបែលហ្សិក កាលពីថ្ងៃទី១២ ខែធ្នូ ឆ្នាំ២០២២ នេះថា អ្នកដែលដាក់ផែនការកម្ទេចត្រកូល ហ៊ុន គឺជាកំហុសផ្នែកយុទ្ធសាស្ត្រនយោបាយមួយយ៉ាងធំសម្រាប់ពួកគេ ព្រោះថាត្រកូល ហ៊ុន បានចាក់ឫសយ៉ាងជ្រៅក្នុងគណបក្សប្រជាជនកម្ពុជា ដូច្នេះបើពួកគេចង់ផ្តួលត្រកូល ហ៊ុន ទាល់តែពួកគេយកឈ្នះបក្សកាន់អំណាចជាមុនសិន។
មេដឹកនាំនយោបាយប្រជាភិថុតិផ្ដាច់មុខនៅកម្ពុជា លោក ហ៊ុន សែន បញ្ជាក់ថា មន្ត្រីជាន់ខ្ពស់ក្នុងគណបក្សប្រជាជនកម្ពុជាមិនគិតខ្លីរហូតដល់ថ្នាក់ចង់កម្ទេចជីវិតនយោបាយខ្លួនឯង ដោយការដាក់ផែនការកម្ទេចត្រកូល ហ៊ុន នោះឡើយ សូម្បីអនុប្រធានបក្សកាន់អំណាច លោក ស ខេង ក៏មិនមានបំណងដណ្តើមអំណាចពីត្រកូល ហ៊ុន ដែរ។
មេដឹកនាំបក្សកាន់អំណាចដែលឧស្សាហ៍គំរាមសម្លាប់ពលរដ្ឋខ្មែរ លោក ហ៊ុន សែន សង្កត់ធ្ងន់ថា កម្ពុជាដែលក្រោមការដឹកនាំរបស់គណបក្សប្រជាជនកម្ពុជាដែលមានត្រកូល ហ៊ុន ជាអ្នកដឹកនាំ ខ្លួននឹងមិនយកអធិបតេយ្យជាតិទៅដោះដូរនឹងផលអនុគ្រោះពន្ធ EBA របស់សហភាពអឺរ៉ុបឡើយ ព្រោះថាកម្ពុជាគឺជារដ្ឋឯករាជ្យមិនត្រូវការការត្រួតណាមួយពីបរទេសនោះទេ។
អនុប្រធានវេទិកាពលរដ្ឋ លោក ម៉ែន ណាត ប្រាប់សារព័ត៌មាន The Cambodia Daily នៅថ្ងៃទី១៣ ធ្នូ នេះថា ការព្រមានរបស់លោក ហ៊ុន សែន បែបនេះ គឺជាការព្រមានមេដឹកនាំផ្ទៃក្នុងរបស់គណបក្សប្រជាជនកម្ពុជាប៉ុណ្ណោះ ព្រោះអ្នកដែលអាចប្រជែងអំណាចជាមួយត្រកូល ហ៊ុន ពិតប្រាកដ គឺមានតែផ្ទៃក្នុងបក្សកាន់អំណាចខ្លួនឯងទេ។
លោកបន្ថែមថា ក្រុមប្រឆាំង ឬអ្នកវិភាគគ្មានកម្លាំងច្រើននៅក្នុងស្រុកដូចមន្ត្រីជាន់ខ្ពស់របស់បក្សនេះ ដែលកំពុងសម្ងំនៅផ្ទៃក្នុងបក្សរបស់ពួកគេនោះឡើយ។
លោក ម៉ែន ណាត លើកឡើងថា ដំណើរទស្សនកិច្ចរបស់លោក ហ៊ុន សែន ទៅសហគមន៍អឺរ៉ុប នៅពេលនេះ គ្មានផលចំណេញសម្រាប់ជាតិទេ គឺមានតែបំផ្លាញប៉ុណ្ណោះ ព្រោះថាការបដិសេធទទួលយកប្រព័ន្ធអនុគ្រោះពន្ធ EBA របស់សហភាពអឺរ៉ុប ដោយប្រើលេសថាដើម្បីការពារអធិបតេយ្យភាពកម្ពុជា គ្រាន់តែជាការបិទបាំងដើម្បីការពារអំណាចរបស់គាត់សម្រាប់បន្តក្នុងវង្សត្រកូលខ្លួនឯងតែប៉ុណ្ណោះ។
អនុប្រធានវេទិកាពលរដ្ឋរូបនេះបញ្ជាក់ថា ដើម្បីបន្តផែនការផ្ទេរអំណាចឱ្យបានសម្រេច លោក ហ៊ុន សែន គ្មានការស្ទាក់ស្ទើរក្នុងការប្រើអំណាចគំរាមអ្នកដែលប្រឆាំងនឹងគាត់ឡើយ ហើយទង្វើបែបនេះ គឺផ្ទុយស្រឡះពីការចង់បានរបស់សហគមន៍អឺរ៉ុប ដែលគេតែងទាមទារឱ្យមានការគោរពសិទ្ធិមនុស្ស និងលើកស្ទួយលទ្ធិប្រជាធិបតេយ្យ ដើម្បីទទួលបានប្រព័ន្ធអនុគ្រោះពន្ធឡើងវិញ ប៉ុន្តែបើធ្វើតាមការទាមទាររបស់សហគមន៍អឺរ៉ុប ផែនការផ្ទេរអំណាចរបស់ត្រកូល ហ៊ុន នឹងត្រូវបរាជ័យ ដូច្នេះគាត់មានតែលះបង់ប្រព័ន្ធអនុគ្រោះពន្ធដែលជាផលប្រយោជន៍របស់កម្ពុជាប៉ុណ្ណោះ។
ទាក់ទិននឹងបញ្ហានេះ អ្នកវិភាគនយោបាយ និងសង្គម បណ្ឌិត ឡៅ ម៉ុងហៃ អះអាងកាលពីពេលថ្មីៗនេះថា បក្សកាន់អំណាចនៅកម្ពុជាបច្ចុប្បន្ននេះបានក្តោបក្តាប់ស្ថាប័នរដ្ឋ និងដំណើរការប្រព្រឹត្តទៅជាក់ស្តែងនៃស្ថាប័នទាំងនេះយ៉ាងណែន ដើម្បីបង្កើតរបបយោធាតត្រកូលរបស់ខ្លួន ជាជាងបង្កើតរបបប្រជាធិបតេយ្យសេរីពហុបក្ស។
បណ្ឌិត ឡៅ ម៉ុងហៃ លើកឡើងថា របបប្រជាធិបតេយ្យសេរីពហុបក្សដែលបានកំណត់ក្នុងរដ្ឋធម្មនុញ្ញ នឹងក្លាយឲ្យទៅជារបបយោធាតវង្សត្រកូលមិនអាចប្រកែកបាន ក្រោយពេលលោក ហ៊ុន សែន សម្រេចតែងតាំងកូនខ្លួនឯងជាបេក្ខជននាយករដ្ឋមន្ត្រីដើម្បីស្នងអំណាចពីខ្លួនទៅថ្ងៃមុខ៕