រដ្ឋាភិបាលកម្ពុជានឹងកសាងរូបសំណាកដ៏ធំដែលបង្ហាញពីសាមគ្គីភាពរវាងយុទ្ធជនបារាំង និងកម្ពុជា ដែលធ្លាប់រួមគ្នាប្រយុទ្ធនៅក្នុងសង្គ្រាមលោកលើកទី១ ដែលបានសាងសង់ក្នុងឆ្នាំ១៩២៥ ឡើងវិញបន្ទាប់ពីខ្មែរក្រហមបានវ៉ៃកម្ទេចចោលក្នុងឆ្នាំ១៩៧៧។
លោក ហ៊ុន សែន បានប្រកាសប្រាប់ប្រធានាធិបតីបារាំង លោក អេម៉ានុយអ៊ែល ម៉ាក្រុង នៅក្នុងទីក្រុងប៉ារីស នៅក្នុងជំនួបទ្វេភាគីនៅក្នុងវិមានរដ្ឋាភិបាលបារាំង អេលីហ្សេ កាលពីយប់ថ្ងៃទី១៣ ខែធ្នូ ថា លោកបានយល់ព្រមអនុញ្ញាតឱ្យមានការសាងសង់រូបសំណាកមិត្តភាពនេះឡើងវិញហើយ។ លោកថា រូបសំណាកដែលជានិមិត្តរូបនៃសាមគ្គីភាពរវាងបារាំង និងកម្ពុជា នឹងដាក់បញ្ឈរនៅទល់មុខស្ថានទូតបារាំងតែម្ដង។
លោកថា រូបសំណាកនេះគឺជារូបសំណាកតំណាងឱ្យមិត្តភាពកម្ពុជា-បារាំង ដែលបង្ហាញពីសាមគ្គីភាពរវាងយុទ្ធជនបារាំង និងកម្ពុជា ដែលធ្លាប់រួមគ្នាប្រយុទ្ធនៅក្នុងសង្គ្រាមលោកលើកទី១។ រូបសំណាកនេះត្រូវបានកសាងនៅក្នុងឆ្នាំ១៩២៥ ដើម្បីឧទ្ទិសដល់យុទ្ធជនពលីនៅក្នុងសង្គ្រាម ហើយដែលពលរដ្ឋខ្មែរហៅរូបសំណាកនេះថាជារូបសំណាក «រូបពីរ»។
លោក ហ៊ុន សែន អះអាងថា ៣ថ្ងៃមុនលោកមកដល់ទីនេះ កម្ពុជាបានរកឃើញរូបសំណាកមួយដែលត្រូវបានសាងសង់ក្នុងឆ្នាំ១៩២៥ ហើយត្រូវបានខ្មែរក្រហមវ៉ៃកម្ទេចចោលក្នុងឆ្នាំ១៩៧៧។ លោកថា លោកបានយល់ព្រមជាមួយរដ្ឋមន្ត្រីក្រសួងដែនដី នគរូបនីយកម្មរួចហើយថានឹងកសាងរូបសំណាកនេះឡើងវិញ ដែលជានិមិត្តរូបនៃសាមគ្គីភាពរវាងបារាំង និងកម្ពុជា ហើយដាក់នៅទល់មុខស្ថានទូតបារាំងតែម្ដង។
លោក សំបូរ ម៉ាណារ៉ា សាស្ត្រាចារ្យប្រវត្តិសាស្ត្រ បានប្រាប់សារព័ត៌មានក្នុងស្រុកថា ការកសាងស្តូបរូបពីរឡើងវិញ គឺបង្ហាញពីតម្លៃសាមគ្គីភាព តម្លៃកតញ្ញូជាតិខ្មែរតាមរយៈកម្ពុជាឱ្យតម្លៃបារាំង ហើយបារាំងឱ្យតម្លៃកម្ពុជា ព្រោះកម្ពុជា និងបារាំងមានអនុស្សាវរីយ៍ ក៏ដូចជាប្រវត្តិសាស្ត្រជាច្រើនជាមួយគ្នាជាយូរណាស់មកហើយ ប៉ុន្តែក្នុងពេលតឹកតាងប្រវត្តិសាស្ត្រនេះត្រូវបានបាត់បង់ក្នុងរបបកម្ពុជាប្រជាធិបតេយ្យដែលគួរឱ្យសោកស្ដាយ។
លោកថា ទោះបារាំងធ្លាប់មានបញ្ហាខ្លះៗជាមួយនឹងកម្ពុជា ប៉ុន្តែកម្ពុជាទទួលបានប្រយោជន៍ជាច្រើនពីការជួយដោយបារាំងដែរ ក្នុងនោះបារាំងបានរៀបចំប្រព័ន្ធរដ្ឋបាល ហេដ្ឋារចនាសម្ព័ន្ធ វិស័យអប់រំ វិស័យវប្បធម៌ និងវិស័យផ្សេងៗមួយចំនួនទៀត។
លោក ផៃ ស៊ីផាន អ្នកនាំពាក្យរដ្ឋាភិបាល បានឲ្យដឹងថា ស្តូបដែលនឹងគ្រោងកសាងឡើងវិញនេះជាស្តូបរូបពីរ ដែលមានក្បាលដំរីព័ទ្ធជុំវិញ មានរូបមនុស្សពីរនាក់ឈរពីលើ ដែលម្នាក់មានរាងធំខ្ពស់តំណាងជាទាហានបារាំង និងម្នាក់តូចជាងតំណាងជាទាហានខ្មែរ ដែលបានចូលរួមក្នុងសង្គ្រាមលោកលើកទី១ និងសង្គ្រាមលោកលើកទី២។
យ៉ាងណាចំពោះគម្រោងកសាងស្តូបរូបពីរនេះ លោកបញ្ជាក់ថា មិនអាចវាយតម្លៃថានឹងត្រូវចំណាយថវិកាអស់ប៉ុន្មាន និងត្រូវរៀបចំបើកការដ្ឋានសាងសង់នៅពេលណានៅឡើយទេ ព្រោះគម្រោងនេះរដ្ឋាភិបាលទើបតែលើកសំណើឡើង។
រូបសំណាក «រូបពីរ» ជាស្តូបមួយត្រូវបានកសាងឡើងក្នុងឆ្នាំ១៩២៥ ដែលមានទីតាំងជិតស្ថានទូតបារាំង នៅភ្នំពេញ ដើម្បីរំលឹកដល់យុទ្ធជនខ្មែរជាច្រើនដែលបានពលីជីវិតក្នុងសង្គ្រាមលោកលើកទី១ នៅប្រទេសបារាំង។ វាត្រូវបានគេហៅជាទូទៅថា “រូបពីរ” ឬជាភាសាបារាំងថា “Monument aux Morts”។
ជាអកុសល រូបសំណាកនេះត្រូវបានខូចខាតដោយសារការដាក់គ្រាប់បំផ្ទុះក្នុងរបបកម្ពុជាប្រជាធិបតេយ្យ ឬសម័យខ្មែរក្រហមក្នុងឆ្នាំ១៩៧៧ ហើយបំណែកមួយចំនួនដែលនៅសេសសល់ ត្រូវបានយកទៅតម្កល់ទុកនៅសារមន្ទីរជាតិ៕