មន្ត្រីជាន់ខ្ពស់រដ្ឋាភិបាលកម្ពុជា អះអាងថា ប្រទេសបារាំងអាចនឹងនិយាយថា ខ្លួនបានដើរតួសំខាន់ក្នុងការស្វែងរកសន្តិភាពឱ្យកម្ពុជា តែនឹងមិននិយាយបង្ខិតបង្ខំកម្ពុជាឱ្យធ្វើតាមការចង់បានរបស់ខ្លួនឡើយ ព្រោះថាវាផ្ទុយពីអធិបតេយ្យភាពរបស់ប្រទេសមួយ។
ប្រធានអង្គភាពអ្នកនាំពាក្យរាជរដ្ឋាភិបាល លោក ផៃ ស៊ីផាន ត្រូវបានស្រង់សម្ដីដោយសារព័ត៌មានវីអូឌី នៅថ្ងៃទី១៩ ខែធ្នូ នេះថា លោកមិនបានដឹងទេថា តើប្រធានាធិបតីបារាំងពិតជាបានសួរនាំរឿងនេះទៅកាន់លោកនាយករដ្ឋមន្ត្រី ហ៊ុន សែន មែនឬយ៉ាងណានោះ។
លោក ផៃ ស៊ីផាន បានអះអាងថា បារាំងអាចនឹងនិយាយថា ខ្លួនបានដើរតួសំខាន់ក្នុងការស្វែងរកសន្តិភាពឱ្យកម្ពុជា តែមេដឹកនាំប្រទេសនេះនឹងមិននិយាយបង្ខិតបង្ខំកម្ពុជាឱ្យធ្វើតាមការចង់បានឡើយ ព្រោះថាវាផ្ទុយពីអធិបតេយ្យភាពរបស់ប្រទេសមួយ។
លោកចាត់ទុកការដែលលើកឡើងថា មានការរម្លឹកពីកិច្ចព្រមព្រៀងសន្តិភាពទីក្រុងប៉ារីសក្នុងជំនួបនោះ គឺជារឿងមិនសម ព្រោះមិនអាចប្រទេសណាមួយមកបង្គាប់ឱ្យប្រទេសមួយទៀតធ្វើអ្វីតាមខ្លួននោះឡើយ។
ការអះអាងនេះ ធ្វើឡើងក្រោយមានព័ត៌មានផ្សព្វផ្សាយថា ប្រធានាធិបតីបារាំង លោក អេម៉ានុយអែល ម៉ាក្រុង បានរម្លឹកឡើងវិញអំពីការចុះហត្ថលេខាលើកិច្ចព្រមព្រៀងសន្តិភាពទីក្រុងប៉ារីស ឆ្នាំ១៩៩១ ស្ដីពីសន្តិភាពនៅកម្ពុជា ក្នុងអំឡុងជំនួបជាមួយលោកនាយករដ្ឋមន្ត្រី ហ៊ុន សែន។
លោកនាយករដ្ឋមន្ត្រី ហ៊ុន សែន បានបំពេញទស្សនកិច្ចការងារនៅសាធារណរដ្ឋបារាំង កាលពីថ្ងៃទី១៣ ខែធ្នូ ឆ្នាំ២០២២ មុនចូលរួមកិច្ចប្រជុំកំពូលរម្លឹកខួបលើកទី៤៥នៃទំនាក់ទំនងដៃគូសន្ទនាអាស៊ាន-សហភាពអឺរ៉ុបនៅទីក្រុងប្រ៊ុចសែល ប្រទេសបែលហ្ស៊ិក។
ចំណែកលេខាទី១ នៃស្ថានទូតបារាំងប្រចាំនៅកម្ពុជា លោកស្រី Noémie PINTA ប្រាប់សារព័ត៌មានវីអូឌី នៅថ្ងៃទី១៩ ខែធ្នូ នេះថា ប្រធានាធិបតីនៃសាធារណរដ្ឋបារាំង លោក អេម៉ានុយអែល ម៉ាក្រុង ពិតជាបាននិយាយសំដៅទៅលើកិច្ចព្រមព្រៀងសន្តិភាពទីក្រុងប៉ារីស ដោយសារតែកិច្ចព្រមព្រៀងនោះគឺជាមូលដ្ឋានគ្រឹះសំខាន់មួយដើម្បីនាំកម្ពុជាវិលទៅកាន់មាគ៌ាសន្តិភាព។
កិច្ចព្រមព្រៀងសន្តិភាពទីក្រុងប៉ារីស មានអាយុកាលជាង ៣១ឆ្នាំហើយគិតមកទល់ពេលនេះ។
ទោះជាយ៉ាងណាក៏ដោយ មានការរិះគន់ថា រដ្ឋាភិបាលកម្ពុជាមិនទាន់បានគោរពពេញលេញនូវគោលការណ៍សំខាន់ៗមួយចំនួនដែលមានចែងនៅក្នុងកិច្ចព្រមព្រៀងនេះនៅឡើយ ជាពិសេសទាក់ទងនឹងការគោរពសិទ្ធិមនុស្ស និងគោលការណ៍ប្រជាធិបតេយ្យ សេរី ពហុបក្ស៕