ក្រុមមន្ត្រីអង្គការក្រៅរដ្ឋាភិបាលដែលធ្វើការលើវិស័យសិទ្ធិមនុស្ស អះអាងថា ការប្រកាសធ្វើយុទ្ធនាការរបស់អង្គការសមាគមដែលទាមទារឱ្យដោះលែងកញ្ញា ឈឹម ស៊ីថរ រាល់សប្តាហ៍ គឺដើម្បីជំរុញឱ្យតុលាការអនុវត្តនូវប្រព័ន្ធយុត្តិធម៌របស់ខ្លួនឱ្យមានអព្យាក្រឹតភាព។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា ប្រាប់សារព័ត៌មាន The Cambodia Daily នៅថ្ងៃទី២០ ធ្នូ នេះថា ការចាប់ខ្លួនកញ្ញា ឈឹម ស៊ីថរ ចំពោះការខកខានក្នុងការអនុវត្តនូវលក្ខខណ្ឌដែលតុលាការមិនបានប្រាប់សាមីខ្លួន និងមេធាវីឲ្យដឹងមុន គឺជាភាពអយុត្តិធម៌ធ្ងន់ធ្ងរបំផុតសម្រាប់តំណាងកម្មកររូបនេះ។
លោកបន្ថែមថា ការចាប់ខ្លួនមេដឹកនាំសហជីព កញ្ញា ឈឹម ស៊ីថរ នេះ មិនមែនជាដំណោះស្រាយនោះទេ ប៉ុន្តែគឺជាការបន្ថែមបញ្ហាឱ្យកាន់តែច្រើនឡើងសម្រាប់កម្ពុជាទៅវិញ ព្រោះថាវិវាទក្រុមកូដករនៃក្រុមហ៊ុនណាហ្គាវើលដ៍នៅពេលនេះ បានក្លាយជាបញ្ហារ៉ាំរ៉ៃជាប់គាំងដោះស្រាយមិនចេញទៅហើយ។
លោក ស៊ឹង សែនករុណា លើកឡើងថា ក្រុមអង្គការសង្គមស៊ីវិលមានការព្រួយបារម្ភជាខ្លាំងក្រោយពេលសង្កេតឃើញថា តុលាការបានប្រើប្រាស់ប្រព័ន្ធយុត្តិធម៌របស់ខ្លួនដើម្បីដាក់សម្ពាធលើក្រុមកូដករ និងមេដឹកនាំសហជីព ជាជាងការធានាឱ្យបាននូវអព្យាក្រឹតភាពរបស់ខ្លួន ស្របពេលដែលមតិជាតិ និងអន្តរជាតិមើលឃើញថា ការអនុវត្តរបស់តុលាការបានលម្អៀងទៅរកនិន្នាការនយោបាយរបស់បក្សកាន់អំណាច និងភាគីខាងក្រុមហ៊ុនរហូតមក។
មន្ត្រីសង្គមស៊ីវិលរូបនេះអំពាវនាវឱ្យតុលាការ ទម្លាក់ចោលបទចោទលើកញ្ញា ឈឹម ស៊ីថ ដើម្បីឱ្យកញ្ញាទទួលបាននូវសិទ្ធិសេរីភាពពេញលេញឡើងវិញ និងឈានទៅរកការចរចាដោយសន្តិវិធីជាមួយក្រុមហ៊ុនដើម្បីបញ្ចប់វិវាទ ដែលបានអូសបន្លាយអស់រយៈពេលជាង ១ឆ្នាំដែលជាប់គាំងគ្មានដំណោះស្រាយកន្លងមកនេះ។
កាលពីថ្ងៃទី១៩ ខែធ្នូ សមាគមការពារសិទ្ធិមនុស្ស និងការអភិវឌ្ឍន៍នៅកម្ពុជា (ADHOC) មជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (CENTRAL) មជ្ឈមណ្ឌលសិទ្ធិមនុស្សកម្ពុជា (CCHR) និងអង្គការស្ថាប័នជាច្រើនផ្សេងទៀត បាននាំគ្នាធ្វើយុទ្ធនាការលើបណ្ដាញសង្គមហ្វេសប៊ុកអំឡុងពេលដែលកញ្ញា ឈឹម ស៊ីថរ ត្រូវបានឃុំខ្លួនក្នុងពន្ធនាគារអស់រយៈពេល ៣សប្តាហ៍ ដោយទាមទារឱ្យរដ្ឋាភិបាលកម្ពុជាដោះលែងកញ្ញា ឈឹម ស៊ីថរ ជាបន្ទាន់ និងដោយឥតលក្ខខណ្ឌ។
ក្រុមអង្គការក្រៅរដ្ឋាភិបាលទាំងនេះអះអាងថា ការចាប់ខ្លួនកញ្ញា ឈឹម ស៊ីថរ ដោយលើកយកមូលហេតុថាកញ្ញាមិនបានគោរពតាមលក្ខខណ្ឌនៃការដាក់ឱ្យនៅក្រោមការត្រួតពិនិត្យតាមផ្លូវតុលាការ នៅពេលដែលកញ្ញាមិនដែលទទួលបានការជូនដំណឹងពីអាជ្ញាធរតុលាការអំពីលក្ខខណ្ឌទាំងនោះ គឺជាការរំលោភសិទ្ធិមនុស្សយ៉ាងធ្ងន់ធ្ងរបំផុត។
ទាក់ទិននឹងបញ្ហានេះ អ្នកនាំពាក្យសាលាដំបូងរាជធានីភ្នំពេញ បានចេញសេចក្តីបំភ្លឺកាលពីថ្ងៃទី២៩ ខែវិច្ឆិកា ឆ្នាំ២០២២ ថា ការចាប់ឃុំខ្លួនកញ្ញា ឈឹម ស៊ីថរ កាលពីថ្ងៃទី២៦ ខែវិច្ឆិកា ឆ្នាំ២០២២ កន្លងទៅ គឺដោយសារតែជនត្រូវចោទបានចាកចេញពីដែនដីនៃព្រះរាជាណាចក្រកម្ពុជា ដោយគ្មានការអនុញ្ញាតពីចៅក្រមស៊ើបសួរ ដែលអំពើនេះគឺបានបំពានលើកាតព្វកិច្ចនៃការត្រួតពិនិត្យតាមផ្លូវតុលាការយ៉ាងធ្ងន់ធ្ងរ។
យ៉ាងណាក៏ដោយ អតីតតំណាងរាស្ត្រដើមកំណើតខ្មែរប្រចាំរដ្ឋវិចតូរៀ លោក ហុង លីម និងសមាជិកសភាអូស្ត្រាលីដើមកំណើតខ្មែរប្រចាំរដ្ឋវិចតូរៀ លោក តាក ម៉េងហ៊ាង បានលើកឡើងក្នុងព្រឹត្តិការណ៍សិទ្ធិមនុស្សក្នុងប្រទេសអូស្ត្រាលី កាលពីពេលថ្មីៗនេះថា ការចាប់ខ្លួនកញ្ញា ឈឹម ស៊ីថរ ជារឿងមិនសមហេតុផល ព្រោះគេនៅមិនទាន់ឃើញស្នាមផ្ដិតមេដៃរបស់កញ្ញា ឈឹម ស៊ីថរ លើលិខិតដែលដាក់ឱ្យស្ថិតនៅក្រោមការត្រួតពិនិត្យរបស់តុលាការនៅឡើយទេរហូតដល់ពេលនេះ។ ដូច្នេះ ការចោទថាកញ្ញាបានបំពានបម្រាមតុលាការ គ្រាន់តែជាការលើកឡើងរបស់ភាគីម្ខាងតែប៉ុណ្ណោះ៕