ព្រះរាជអាជ្ញារងដែលជាតំណាងម្នាក់របស់អយ្យការ ស្នើទៅក្រុមប្រឹក្សាជំនុំជម្រះឲ្យចេញដីកាឃាត់ខ្លួនលោក កឹម សុខា អតីតប្រធានគណបក្សសង្គ្រោះជាតិឡើងវិញ ខណៈមេធាវីខាងរដ្ឋាភិបាលត្រៀមដាក់បណ្ដឹងដាច់ដោយឡែកមួយផ្សេងទៀត ដើម្បីប្តឹងទាមទារសំណងថ្លៃខូចខាត រួមទាំងការចំណាយកម្លាំងរៀបចំសណ្ដាប់ធ្នាប់ឡើងវិញ។
ថ្លែងនៅក្នុងសវនាការនៅថ្ងៃទី២១ ខែធ្នូ ឆ្នាំ២០២២ នេះ លោក ប្លង់ សុផល ដែលជាតំណាងម្នាក់របស់អយ្យការ ស្នើទៅក្រុមប្រឹក្សាជំនុំជម្រះឲ្យចេញដីកាឃាត់ខ្លួនលោក កឹម សុខា ប្រធានអតីតគណបក្សសង្គ្រោះជាតិឡើងវិញ។ លោកក៏ស្នើឲ្យក្រុមប្រឹក្សាជំនុំជម្រះដាក់ទោសបន្ថែមលើលោក កឹម សុខា ផងដែរ។
ចំណែកឯលោក គី តិច មេធាវីរបស់រដ្ឋាភិបាលលើកឡើងថា ក្រុមមេធាវីរដ្ឋាភិបាលនឹងធ្វើបណ្ដឹងដាច់ដោយឡែកទាមទារសំណងពីលោក កឹម សុខា ក្រោយពីមានសេចក្តីសម្រេចស្ថាពរពីតុលាការ។ លោកថា ការរៀបចំបណ្ដឹងទាមទារសំណងពីលោក កឹម សុខា គឺអនុលោមទៅតាមក្រមនីតិវិធីក្រមព្រហ្មទណ្ឌ។
តុលាការភ្នំពេញបានបើកអង្គសវនាការដើម្បីធ្វើសេចក្តីសន្និដ្ឋានលើសំណុំរឿងរបស់លោក កឹម សុខា។ មេធាវីរបស់ភាគីរដ្ឋាភិបាលសរសេរសេចក្តីសន្និដ្ឋានដល់ទៅជាង ៨០ទំព័រដាក់ជូនទៅក្រុមប្រឹក្សាជំនុំជម្រះ ចំណែកមេធាវីរបស់លោក កឹម សុខា សរសេរសេចក្តីសន្និដ្ឋានត្រឹមតែ ២ទំព័រប៉ុណ្ណោះ។
កាលពីខែតុលា ឆ្នាំ២០២២ តុលាការបានសម្រេចបិទបញ្ចប់នីតិវិធីនៃការសួរដេញដោលលើសំណុំរឿងរបស់លោក កឹម សុខា។ សវនាការលើសំណុំរឿងនេះ ត្រូវអូសបន្លាយពេលអស់ជាង ៥ឆ្នាំ ហើយបានឆ្លងកាត់ការបើកសវនាការអស់ជាង ៦០លើក។
បើតាមនីតិវិធី ក្រោយបញ្ចប់ការធ្វើសេចក្តីសន្និដ្ឋាន តុលាការនឹងប្រកាសសាលក្រមដែលបញ្ជាក់ថា ជនជាប់ចោទមានទោស ឬគ្មានទោស។ ចំពោះការធ្វើសេចក្តីសន្និដ្ឋានលើសំណុំរឿងរបស់មេដឹកនាំបក្សប្រឆាំងមួយនេះ គេមិនទាន់ទទួលព័ត៌មាននោះទេថានឹងត្រូវបញ្ចប់នៅក្នុងថ្ងៃនេះ ឬនឹងត្រូវបន្តទៅថ្ងៃក្រោយទៀតនោះ។
សហមេធាវីរបស់លោក កឹម សុខា នៅមិនទាន់អាចផ្តល់ការអត្ថាធិប្បាយអំពីរឿងនេះបាននៅឡើយទេ ដោយសារសវនាការរបស់លោក កឹម សុខា មិនទាន់បញ្ចប់រហូតមកទល់ម៉ោងផ្សាយនេះ។
មេដឹកនាំបក្សប្រឆាំង លោក កឹម សុខា ត្រូវអាជ្ញាធរក្រុងភ្នំពេញចូលចាប់ខ្លួនដល់គេហដ្ឋានដោយគ្មានដីកាតុលាការ កាលពីថ្ងៃទី៣ ខែកញ្ញា ឆ្នាំ២០១៧ កន្លងទៅ ពីបទក្បត់ជាតិ តាមមាត្រា៤៤៣ នៃក្រមព្រហ្មទណ្ឌ តាមប្រសាសន៍មេដឹកនាំបក្សកាន់អំណាចលោក ហ៊ុន សែន។
ចាប់តាំងពីតុលាការក្រុងភ្នំពេញសម្រេចឃុំខ្លួនមេដឹកនាំបក្សប្រឆាំងកាលពីឆ្នាំ២០១៧ មក សាលាដំបូងក្រុងភ្នំពេញបានបើកសវនាការលើសំណុំរឿងរបស់លោក កឹម សុខា ចំនួន ២៦លើក ប៉ុន្តែនៅខែមីនា ឆ្នាំ២០២០ តុលាការកម្ពុជាបានផ្អាកដំណើរការសវនាការនេះ ក្រោមហេតុផលជំងឺកូវីដ-១៩ រហូតដល់ថ្ងៃទី១៩ ខែមករា ឆ្នាំ២០២២ ទើបតុលាការសម្រេចដំណើរការសវនាការរបស់លោកសាជាថ្មីឡើងវិញរហូតដល់ពេលនេះ៕