40.5 C
Phnom Penh

ក្រុម​អ្នក​ឃ្លាំមើល​សង្គម​ថា​លោក ហ៊ុន សែន បរាជ័យ​ទាំងស្រុង​ក្នុង​ការ​ដឹកនាំ​អាស៊ាន

ដោយ ឌឹ ខេមបូឌា ដេលី

បទវិភាគ

ក្រុម​អ្នក​តស៊ូ​មតិ​នៅ​ក្រៅ​ស្រុក រិះគន់​ថា អាស៊ាន​ក្រោម​ការ​ដឹកនាំ​របស់​លោក ហ៊ុន សែន ពេញ​មួយ​ឆ្នាំ​២០២២ នេះ ស្ទើរតែ​ធ្វើ​ឱ្យ​អាស៊ាន​ទាំងមូល​មាន​ការ​បែកបាក់​សាមគ្គី​អស់​ទៅ​ហើយ។

អ្នកវិភាគ​នយោបាយ និង​ជា​ប្រធាន​វេទិកា​ពលរដ្ឋ លោក គឹម សុខ អះអាង​ថា ការ​ទៅ​ចូលរួម​កិច្ចប្រជុំ​របស់​ក្រុម​មេដឹកនាំ​អាស៊ាន​នៅ​កម្ពុជា កាលពី​ពេល​កន្លងទៅ​នេះ មិន​មែន​ដើម្បី​អបអរ​សាទរ​ដោយសារ​លោក ហ៊ុន សែន ដឹកនាំ​អាស៊ាន​នោះ​ទេ។

ប្រតិកម្ម​របស់​អ្នកវិភាគ​រូប​នេះ ធ្វើឡើង​ក្រោយ​ពេល​មន្ត្រី​ជាន់ខ្ពស់​របស់​រដ្ឋាភិបាល​កម្ពុជា បាន​សរសើរ និង​បាន​អះអាង​អំពី​ភាព​ជោគជ័យ​របស់​លោក ហ៊ុន សែន បាន​ធ្វើជា​ប្រធាន​អាស៊ាន​ក្នុង​ឆ្នាំ​២០២២ នេះ។

ប្រធាន​រាជបណ្ឌិត្យសភា​កម្ពុជា បណ្ឌិត សុខ ទូច បាន​លើកឡើង​ក្នុង​ពិធី​បិទ​សន្និសីទ​អន្តរជាតិ​ប្រចាំ​ឆ្នាំ​លើក​ទី​១៧ ស្ដីពី «សណ្ដាប់ធ្នាប់​ពិភពលោក​ថ្មី ការ​ប្រជែង​សមាហរណកម្ម និង​ពហុ​ប៉ូល» កាលពី​ថ្ងៃទី​២០ ខែ​ធ្នូ ឆ្នាំ​២០២២ នេះ​ថា ក្នុង​នាម​ប្រធាន​អាស៊ាន​ឆ្នាំ​២០២២ នេះ លោក ហ៊ុន សែន បាន​ដឹកនាំ​អាស៊ាន​ទទួល​បាន​ជោគជ័យ​យ៉ាង​ធំធេង។

បណ្ឌិត សុខ ទូច បន្ត​ថា កម្ពុជា​អាច​ហៅ​ប្រទេស​មហាអំណាច​ឱ្យ​មក​ចូលរួម​ក្នុង​កិច្ចប្រជុំ​អាស៊ាន​នៅ​កម្ពុជា​បាន គឺជា​រឿង​មិន​ធម្មតា ខណៈ​កន្លងមក មហាអំណាច​ទាំងនោះ​ត្រឹមតែ​បញ្ជូន​ជំនួយការ ឬ​ទីប្រឹក្សា​ឱ្យ​មក​ចូលរួម​ប្រជុំ​តែប៉ុណ្ណោះ។ ជាង​នេះ​ទៀត ពិត​មែន​តែ​កម្ពុជា​ជា​ប្រទេស​តូច ប៉ុន្តែ​អាច​រក្សា​បាន​នូវ​សន្តិសុខ​បាន​ល្អ គ្មាន​បញ្ហា​ចៃដន្យ​កើតឡើង បើ​ទោះបីជា​ជំងឺ​កូវីដ-១៩ វាយលុក​ក៏ដោយ ក៏​កម្ពុជា​នៅតែ​អាច​ដឹកនាំ​កិច្ចប្រជុំ​កំពូល​អាស៊ាន​នេះ​បាន​ជោគជ័យ​ដដែល។

បណ្ឌិត សុខ ទូច បញ្ជាក់​ថា នៅ​ពេល​ដែល​ប្រមុខ​រដ្ឋាភិបាល​កម្ពុជា លោក ហ៊ុន សែន ធ្វើ​ដំណើរ​ទៅ​ចូលរួម​កិច្ចប្រជុំ​នៅ​ទ្វីប​អឺរ៉ុប ក្នុង​នាម​ជា​ប្រធាន​អាស៊ាន និង​ក្នុង​នាម​ជា​នាយករដ្ឋមន្ត្រី​របស់​កម្ពុជា ត្រូវ​បាន​ស្វាគមន៍​យ៉ាង​ពេញ​មុខ​ពេញ​មាត់​ពី​សំណាក់​ប្រធានាធិបតី​បារាំង លោក អេម៉ានុយអែល ម៉ាក្រុង ដើម្បី​ផល​ប្រយោជន៍​របស់​អាស៊ាន​ទៅ​ថ្ងៃ​មុខ។

ប៉ុន្តែ​លោក គឹម សុខ អះអាង​ថា លោក ហ៊ុន សែន បរាជ័យ​ក្នុង​ការ​ដឹកនាំ​អាស៊ាន ពីព្រោះ​លោក​មិន​អាច​ដោះស្រាយ​វិបត្តិ​នៅ​ភូមា​បាន​តាម​កិច្ចព្រមព្រៀង​ជា​ឯកច្ឆន្ទ​ទាំង ៥​ចំណុច​ដែល​អាស៊ាន​បាន​សម្រេច​កាលពី​ចុង​ឆ្នាំ​២០២១។

លោក​អះអាង​ថា លោក ហ៊ុន សែន មិន​អាច​ធ្វើ​ឱ្យ​បាន​សូម្បីតែ​មួយ​ចំណុច ខណៈ​ការ​ផ្តល់​ជំនួយ​មនុស្សធម៌​ដែល​លោក ប្រាក់ សុខុន បាន​លើកឡើង​កន្លងមក​ថា​ជា​ជោគជ័យ​នោះ គឺ​បាន​អនុវត្ត​ប្រាសចាក​ពី​គោលការណ៍​រួម​របស់​អាស៊ាន​ទាំងស្រុង។

អ្នកវិភាគ​រូប​នេះ​បញ្ជាក់​ថា ចំណែក​ករណី​ប្រធានាធិបតី​បារាំង​ទទួល​ជួប​លោក ហ៊ុន សែន ក៏​គ្រាន់តែ​ជា​ពិធីការ​ធម្មតា​ដែរ ត្បិត​លោក ហ៊ុន សែន គឺជា​ភ្ញៀវ ប៉ុន្តែ​អ្វី​ដែល​សំខាន់​នោះ គឺ​ប្រធានាធិបតី​បារាំង លោក អេម៉ានុយអែល ម៉ាក្រុង បាន​រំឭក​អំពី​កិច្ចព្រមព្រៀង​សន្តិភាព​ក្រុង​ប៉ារីស នៅ​ចំពោះ​មុខ​លោក ហ៊ុន សែន នៅ​ក្នុង​ជំនួប​នោះ​តែម្តង ស្រប​ពេល​រង​ការ​រិះគន់​ជុំ​ទិស​ថា​លោក ហ៊ុន សែន បាន​ដឹកនាំ​ប្រទេស​របស់​ខ្លួន​ឲ្យ​ឃ្លាត​ឆ្ងាយ​ពី​ខ្លឹមសារ​នៃ​កិច្ចព្រមព្រៀង​អន្តរជាតិ​មួយ​នេះ​អស់​រយៈពេល​ជាង ៣០​ឆ្នាំ​មក​ហើយ​នោះ។

រយៈពេល ១​ឆ្នាំ​ដែល​កម្ពុជា​ដឹកនាំ​អាស៊ាន​ក្នុង​ឆ្នាំ​២០២២ នេះ ត្រូវ​គេ​មើល​ឃើញ​ថា លោក ហ៊ុន សែន បាន​ធ្វើ​ឱ្យ​បរាជ័យ​ធ្ងន់ធ្ងរ​ក្នុង​តួនាទី​របស់​ខ្លួន ដូចជា​បរាជ័យ​ក្នុង​ការ​ដោះស្រាយ​វិបត្តិ​នៅ​ប្រទេស​ភូមា បរាជ័យ​ក្នុង​ការ​ប្រកាស​ចេញ​នូវ​ក្រម​ប្រតិបត្តិ​សមុទ្រ​ចិន​ខាងត្បូង (COC) និង​ធ្វើ​ឱ្យ​អាស៊ាន​បែកបាក់​ផ្ទៃក្នុង ដោយសារតែ​លោក ហ៊ុន សែន មិន​អនុវត្ត​ទៅ​តាម​កិច្ចព្រមព្រៀង​ឯកច្ឆន្ទ​ទាំង ៥​ចំណុច​របស់​អាស៊ាន​ជុំវិញ​ការ​ដោះស្រាយ​វិបត្តិ​នៅ​ភូមា ជាដើម។

អ្នក​តាមដាន​ស្ថានការណ៍​នយោបាយ​នៅ​កម្ពុជា លោក សុខ សុគន្ធ ធ្លាប់​បាន​លើកឡើង​ក្នុង​កម្មវិធី Idea Talk នៃ​សារព័ត៌មាន The Cambodia Daily កាល​ពី​ពេល​កន្លងទៅ​ថា ការ​ខិតខំ​របស់​លោក ហ៊ុន សែន ក្នុង​ការ​ជួយ​របប​សឹក​ភូមា​ឱ្យ​ក្លាយ​ជា​របប​ស្រប​ច្បាប់​ក្នុង​សមាគម​អាស៊ាន នៅ​ពេល​ដែល​គាត់​ចាប់ផ្តើម​ដឹកនាំ​អាស៊ាន​ក្នុង​ឆ្នាំ​២០២២ នេះ បាន​ធ្វើ​ឱ្យ​បែកបាក់​សាមគ្គីភាព​របស់​អាស៊ាន​យ៉ាង​ធ្ងន់ធ្ងរ ហើយ​ក៏​ជា​បរាជ័យ​ដ៏​ធំ​របស់​កម្ពុជា​ដែរ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស