ជនជាតិចិន និងខ្មែរចំនួន ១០នាក់ ពាក់ព័ន្ធនឹងករណីជួញដូរគ្រឿងញៀនជិត ១តោន ត្រូវបានសមត្ថកិច្ចបញ្ជូនទៅតុលាការខេត្តព្រះសីហនុ នាថ្ងៃទី២១ ធ្នូ នេះ ដើម្បីបន្តនីតិវិធីបន្ទាប់ពីសមត្ថកិច្ចបានបិទបញ្ចប់ការស្រាវជ្រាវករណីចុះបង្ក្រាបការជួញដូរគ្រឿងញៀនទ្រង់ទ្រាយធំជិត ៩០០គីឡូក្រាមកាលពីថ្ងៃទី១១ ខែធ្នូ ឆ្នាំ២០២២ នៅចំណុចឃ្លាំងជួលមួយកន្លែងស្ថិតនៅក្រុម៩ ភូមិ២ សង្កាត់លេខ១ ក្រុងព្រះសីហនុ។
ជនជាតិចិនចំនួន ៦នាក់ តៃវ៉ាន់ម្នាក់ និងខ្មែរ ៣នាក់ ក្នុងនោះមានឈ្មោះ ZHOU JING BIN ឈ្មោះ CAI JIAN FONG ឈ្មោះ YE LICHI ឈ្មោះ WANG JIAN ឈ្មោះ LI PENG FEI ឈ្មោះ LIU YANG និងឈ្មោះ ZHAO BING FEI។ ចំណែកជនជាតិខ្មែរមានឈ្មោះ ចាន់ រតនា ឈ្មោះ ព្រឹម រាជ និងឈ្មោះ ពោធិ បញ្ញា ហៅចៅ។
ពួកគេទាំង ១០នាក់ត្រូវបានសមត្ថកិច្ចខេត្តព្រះសីហនុ បញ្ជូនទៅតុលាការនាថ្ងៃទី២១ ខែធ្នូ ឆ្នាំ២០២២ រួមជាមួយនឹងវត្ថុតាងសារធាតុញៀន សារធាតុគីមី និងសារធាតុគីមីផ្សំ ព្រមទាំងម្សៅក្រាមសថ្លា ហើយម្សៅគ្រាប់ពណ៌ទឹកក្រូច (មេតំហ្វេតាមីន) ម្សៅពណ៌ស្វាយ ម៉ូតូចំនួន ២គ្រឿង និងរថយន្តចំនួន ០៨គ្រឿងផងដែរ។
ពាក់ព័ន្ធនឹងបញ្ហាគ្រឿងញៀននេះ កាលពីឆ្នាំ២០១៧ សមត្ថកិច្ចកម្ពុជាបានប្រកាសធ្វើយុទ្ធនាការបង្ក្រាប និងទប់ស្កាត់ ប៉ុន្តែក្រោយពីប្រយុទ្ធប្រឆាំងច្រើនឆ្នាំមកនេះ មិនទទួលបានជោគជ័យ។ នៅថ្ងៃទី៩ ខែកញ្ញា ឆ្នាំ២០២២ រដ្ឋាភិបាលបានដាក់ចេញបទបញ្ជាម៉ឺងម៉ាត់ជាថ្មីទៀតឲ្យស្ថាប័នពាក់ព័ន្ធបង្កើនប្រសិទ្ធភាពទប់ស្កាត់បទឧក្រិដ្ឋនេះបន្តទៀត។
ទន្ទឹមនឹងការប្រកាសរបស់រដ្ឋាភិបាលកម្ពុជានោះ អង្គការសហប្រជាជាតិស្ដីពីឧក្រិដ្ឋកម្ម និងគ្រឿងញៀន (UNODC) អំឡុងខែមិថុនា ឆ្នាំ២០២១ បានបង្ហាញរបាយការណ៍ថ្មីមួយរកឃើញថា ប្រទេសកម្ពុជាជាគោលដៅចម្បងនៃក្រុមឧក្រិដ្ឋជនគ្រឿងញៀនប្រើប្រាស់ជាទីតាំងសម្រាប់ការចរាចរគ្រឿងញៀន ផលិត កែច្នៃ និងចែកចាយបន្ត ដែលថាក្រុមឧក្រិដ្ឋជនគ្រឿងញៀនទាំងនោះភាគច្រើនជាជនជាតិចិន និងចិនតៃវ៉ាន់៕