ក្រសួងវប្បធម៌ និងវិចិត្រសិល្បៈ នឹងបើកការស៊ើបអង្កេតរកមូលហេតុពិតប្រាកដនៃការបំផ្លិចបំផ្លាញកុដិបុរាណចំនួន៣ ក្នុងបរិវេណវត្តឧណ្ណាលោម ដើម្បីដោះស្រាយតាមនីតិវិធីច្បាប់ និងរក្សាទុកកុដិដែលបានវាយកម្ទេចទាំងនោះមិនឱ្យមានការសាងសង់សំណង់ថ្មីរហូតមានដំណោះស្រាយសមស្រប។
ក្រសួងវប្បធម៌ និងវិចិត្រសិល្បៈ បានចេញសេចក្តីជូនដំណឹងស្ដីពីករណីនៃការវាយកម្ទេចកុដិបុរាណចំនួន៣ ក្នុងបរិវេណវត្តឧណ្ណាលោម នៅថ្ងៃទី២១ ខែធ្នូ ឆ្នាំ២០២២ នេះថា ក្រសួងនឹងសហការជាមួយអាជ្ញាធរដែនដី ព្រមទាំងស្ថាប័នពាក់ព័ន្ធ ដើម្បីស៊ើបអង្កេតរកមូលហេតុពិតនៃការវាយកម្ទេចកុដិបុរាណទាំងនេះ ដើម្បីដោះស្រាយតាមវិធានការច្បាប់ជាធរមាន។
ការចេញសេចក្តីជូនដំណឹងនេះ ធ្វើឡើងបន្ទាប់ពីកុដិបុរាណចំនួន៣ ដែលបានសាងសង់ឡើងក្នុងអំឡុងទសវត្សឆ្នាំ១៩៣០ ក្នុងបរិវេណវត្តឧណ្ណាលោម ត្រូវបានវាយកម្ទេចទាំងស្រុងដោយមិនដឹងមូលហេតុកាលពីពេលថ្មីៗនេះ។
កាលពីថ្ងៃទី៧ ខែធ្នូ ឆ្នាំ២០២២ កន្លងទៅ សម្ដេចព្រះសង្ឃរាជ ទេព វង្ស បានបញ្ជាឱ្យគេវាយកម្ទេចកុដិបុរាណចំនួន ៣ខ្នង រួមមានកុដិលេខ៤៣ លេខ៤៤ និង៤៥ ដែលមានទីតាំងនៅប៉ែកខាងកើតវត្តឧណ្ណាលោម ដែលត្រូវបានកសាងឡើងតាំងពីឆ្នាំ១៩៣០ រាបដល់ដី ដើម្បីយកទីធ្លាកសាងចេតិយថ្មីជំនួសវិញ។ កុដិបុរាណទាំងបីនេះ ត្រូវបានចុះបញ្ជីជាសម្បត្តិបេតិកភណ្ឌជាតិដែលត្រូវការពារ និងអភិរក្សកាលពីឆ្នាំ២០១៧ និងដាក់ឱ្យស្ថិតក្រោមការគ្រប់គ្រងរបស់ក្រសួងវប្បធម៌ និងវិចិត្រសិល្បៈ ហើយ។
ជុំវិញបញ្ហានេះ ក្រសួងវប្បធម៌ និងវិចិត្រសិល្បៈ បានចេញសេចក្ដីប្រកាសព័ត៌មានកាលពីថ្ងៃទី៨ ខែធ្នូ ឆ្នាំ២០២២ កន្លងទៅថា ក្រោយទទួលដំណឹងពីករណីនៃការវាយកម្ទេចកុដិបុរាណទាំង៣ នេះ រដ្ឋមន្ត្រីក្រសួងវប្បធម៌ និងវិចិត្រសិល្បៈ អ្នកស្រី ភឿង សកុណា បានធ្វើលិខិតទៅកាន់សម្ដេចព្រះសង្ឃរាជ ទេព វង្ស ឱ្យបញ្ឈប់ការវាយកម្ទេចអគារបុរាណទាំងនោះភ្លាមៗ។
ក្នុងសេចក្តីប្រកាសព័ត៌មានខាងលើបញ្ជាក់ថា សកម្មភាពនៃការវាយកម្ទេចកុដិចាស់ដោយពុំបានសិក្សាពិគ្រោះ និងការអនុញ្ញាតពីក្រសួងវប្បធម៌ និងវិចិត្រសិល្បៈនេះ គឺជាទង្វើដែលផ្ទុយនឹងច្បាប់ទាំងស្រុង។
លិខិតដដែលបញ្ជាក់ថា រាល់ការជួសជុលព្រះវិហារ ឬសំណង់អគារបេតិកភណ្ឌនានា ត្រូវស្នើសុំការអនុញ្ញាតពីក្រសួងវប្បធម៌ និងវិចិត្រសិល្បៈដែលជាក្រសួងជំនាញជាដាច់ខាត។
ទាក់ទិននឹងបញ្ហានេះ កាលពីខែតុលា ឆ្នាំ២០២១ ប្រមុខរដ្ឋាភិបាលកម្ពុជា លោក ហ៊ុន សែន បានចេញសារាចរស្ដីពីការទប់ស្កាត់ការវាយកម្ទេច និងបំផ្លិចបំផ្លាញសំណង់អគារបេតិកភណ្ឌ និងកំណត់ឱ្យសុំការអនុញ្ញាតពីក្រសួងវប្បធម៌ និងវិចិត្រសិល្បៈ មុននឹងកែប្រែ ជួសជុល ឬវាយកម្ទេចចោលនូវអគារណាមួយនោះ។
ក្រមព្រហ្មទណ្ឌមាត្រា៥១០ ចែងថា អំពើដែលធ្វើឡើងដោយចេតនាក្នុងការបំផ្លាញបណ្ដាលឱ្យទ្រុឌទ្រោម និងខូចខាតដល់បូជនីយដ្ឋានបូជាចំពោះព្រះពុទ្ធសាសនា ឬបូជនីយវត្ថុក្នុងសាសនានេះ ត្រូវផ្ដន្ទាទោសដាក់ពន្ធនាគារពី ២ឆ្នាំទៅ ៥ឆ្នាំ និងពិន័យជាប្រាក់ពី ៤លានរៀលដល់ ១០លានរៀល។
ចំណែកមាត្រា៦២ នៃច្បាប់ស្ដីពីកិច្ចការពារបេតិកភណ្ឌវប្បធម៌ ចែងថា ជនណាដែលប្ដូរទីតាំង បំផ្លាញចោល ឬជួសជុលដោយគ្មានការអនុញ្ញាតនូវសម្បត្តិវប្បធម៌ ដែលបានស្នើឱ្យចាត់ថ្នាក់ ឬចាត់ថ្នាក់រួចហើយ ត្រូវផ្ដន្ទាទោសពី ៦ខែដល់ ៥ឆ្នាំ និងពិន័យជាទឹកប្រាក់តាមតម្លៃជាក់ស្តែង៕