សាលាដំបូងរាជធានីភ្នំពេញ ប្រកាសសាលក្រមផ្ដន្ទាទោសលើអតីតថ្នាក់ដឹកនាំ និងសកម្មជនគណបក្សសង្គ្រោះជាតិសរុប ៣៦នាក់នៅថ្ងៃទី២២ ធ្នូ នេះ ចាប់ពី ៥ឆ្នាំរហូតដល់ ៧ឆ្នាំ និងដកហូតសិទ្ធិបោះឆ្នោត និងសិទ្ធិឈរឈ្មោះបោះឆ្នោតលើសំណុំរឿងរួមគំនិតក្បត់ ដែលពាក់ព័ន្ធនឹងដំណើរមាតុភូមិនិវត្តន៍របស់អនុប្រធានអតីតគណបក្សសង្គ្រោះជាតិ អ្នកស្រី មូរ សុខហួរ កាលពីចុងឆ្នាំ២០២០។
ប្រធានក្រុមប្រឹក្សាជំនុំជម្រះសាលាដំបូងរាជធានីភ្នំពេញ លោកស្រី អ៊ុក រ៉េតគន្ធា បានប្រកាសសាលក្រមនាថ្ងៃទី២២ ធ្នូ នេះ ដោយផ្ដន្ទាទោសអតីតមេដឹកនាំ ក្នុងនោះលោក សម រង្ស៊ី លោក អេង ឆៃអ៊ាង លោក ឡុង រី លោកស្រី មូរ សុខហួរ លោក ហូរ វ៉ាន់ អ្នកស្រី ជូ ឡុងសូម៉ូរ៉ា លោក នុត រំដួល លោក អ៊ូ ច័ន្ទរិទ្ធ និងមនុស្ស ៣នាក់ទៀតដាក់ពន្ធនាគារម្នាក់ៗ ៧ឆ្នាំ ដោយដកសិទ្ធិបោះឆ្នោត និងឈរឈ្មោះបោះឆ្នោត។
ចំណែកសកម្មជនចំនួន ២៥នាក់ទៀតផ្ដន្ទាទោសដាក់ពន្ធនាគារម្នាក់ៗ ៥ឆ្នាំ ក្នុងនោះមាន ៣នាក់កំពុងជាប់ពន្ធនាគារព្រៃស គឺមានលោក គង់ ម៉ាស់ លោក វឿង សំណាង និងលោក ខាន់ ប៊ុនផេង ខណៈឈ្មោះ ឈុន វុទ្ធី និងឈ្មោះ ងឹម ញ៉េញ ទោស ៥ឆ្នាំដែលតុលាការកាត់ថ្ងៃនេះត្រូវព្យួរទាំងអស់។
រីឯឈ្មោះ សេង សុខឡេង វិញ តុលាការសម្រេចឱ្យអនុវត្តទោសក្នុងពន្ធនាគារប្រហែល ១ខែ ដោយទោសនៅសល់ត្រូវព្យួរទាំងអស់ដែរ ខណៈឈ្មោះ ម៉ាត់ វណ្ណី ត្រូវបានតុលាការសម្រេចឱ្យរួចផុតពីបទចោទប្រកាន់។
លើសពីនេះ លោកស្រី អ៊ុក រ៉េតគន្ធា ប្រកាសចេញដីកាឱ្យចាប់ខ្លួនចំនួន ២០នាក់ និងលោកស្រីបង្គាប់ឱ្យបញ្ឈប់ការចេញដីកាចាប់ខ្លួន។ មនុស្ស ៣នាក់ដែលប្រធានក្រុមប្រឹក្សាជំនុំជម្រះរូបនេះប្រកាសបញ្ឈប់ដីកាចាប់ខ្លួន ក្នុងនោះឈ្មោះ ម៉ាត់ វណ្ណី ឈ្មោះ ឈុន សិទ្ធី និងឈ្មោះ ងឹម ញ៉េញ។
កាលពីថ្ងៃទី០១ ខែធ្នូ ឆ្នាំ២០២០ អតីតមេដឹកនាំបក្សប្រឆាំង លោក សម រង្ស៊ី បានចេញសេចក្តីប្រកាសព័ត៌មានថា អនុប្រធានអតីតគណបក្សសង្គ្រោះជាតិ អ្នកស្រី មូរ សុខហួរ នឹងធ្វើមាតុភូមិនិវត្តន៍នៅថ្ងៃទី០៤ ខែមករា ឆ្នាំ២០២១ ដោយមានការចូលរួមពីសកម្មជនរបស់ខ្លួនផងដែរ ប៉ុន្តែសកម្មភាពគាំទ្រមាតុភូមិនិវត្តន៍របស់សកម្មជនទាំងនោះ ត្រូវបានតុលាការចោទប្រកាន់ពីបទ រួមគំនិតក្បត់ ដោយផ្អែកលើការបង្ហោះសារនៅលើហ្វេសប៊ុក និងការថតសំឡេងសន្ទនាតាមទូរស័ព្ទជាលក្ខណៈឯកជនរបស់ពួកគេ ជាដើម។
ក្រោយចប់សវនាការ ក្រុមគ្រួសាររបស់លោក ខាន់ ប៊ុនផេង លោក គង់ ម៉ាស់ និងលោក វឿង សំណាង ដែលត្រូវតុលាការកាត់ទោសឱ្យជាប់ពន្ធនាគាររយៈពេល ៥ឆ្នាំដោយគ្មានការព្យួរទោស បានស្រែកយំនៅមុខសាលាដំបូងរាជធានីភ្នំពេញ ដោយអះអាងថា ការប្រកាសសាលក្រមរបស់តុលាការនេះធ្វើឡើងយ៉ាងអយុត្តិធម៌ ខណៈប្តីរបស់ពួកគេមិនបានប្រព្រឹត្តដូចការចោទប្រកាន់នោះឡើយ។
ក្រុមគ្រួសារជនជាប់ចោទទាំងនោះត្អូញត្អែរថា ពួកគេមិនមានជំនឿដើម្បីប្តឹងទៅសាលាឧទ្ធរណ៍បន្តទៀតនោះទេ ព្រោះតុលាការនៅកម្ពុជាលម្អៀងទៅរកបក្សកាន់អំណាច ជាជាងការពារយុត្តិធម៌ជូនប្រជាពលរដ្ឋស្លូតត្រង់ដែលបានធ្វើកិច្ចការដើម្បីសង្គមជាតិ។
ស្ថាបនិកអង្គការអភិវឌ្ឍន៍ផ្នត់គំនិត លោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី២២ ធ្នូ នេះថា សាលក្រមរបស់តុលាការលើអតីតមន្ត្រី និងសកម្មជនបក្សប្រឆាំងទាំងនេះស្ថិតក្នុងរបៀបវារៈនយោបាយប៉ុណ្ណោះ ដែលគេអាចមើលឃើញថា មិនមែនជាការអនុវត្តឱ្យបានត្រឹមត្រូវតាមប្រព័ន្ធយុត្តិធម៌ដែលបានចែងក្នុងច្បាប់នោះទេ។
ចំណែកអតីតមន្ត្រីជាន់ខ្ពស់បក្សប្រឆាំង លោក មាជ សុវណ្ណារ៉ា អះអាងថា សាលក្រមនេះគឺជារឿងនយោបាយសុទ្ធសាធ ខណៈតុលាការសព្វថ្ងៃនេះជាស្ថាប័នដែលស្ថិតក្រោមឥទ្ធិពលរបស់បក្សកាន់អំណាចទាំងស្រុង ត្បិតមន្ត្រីតុលាការទាំងនោះសុទ្ធសឹងតែជាសមាជិកបក្សកាន់អំណាចទាំងអស់។
ចាប់តាំងពីអំឡុងខែវិច្ឆិកា ឆ្នាំ២០២០ មក អតីតសកម្មជនគណបក្សសង្គ្រោះជាតិមានចំនួន ១៥៨នាក់ហើយដែលបានក្លាយជាជនជាប់ចោទពីបទផ្សេងៗគ្នា ដែលពួកគេត្រូវបានចោទពីបទញុះញង់បង្កឱ្យមានភាពវឹកវរដល់សន្តិសុខសង្គម បទរួមគំនិតក្បត់ និងបទប៉ុនប៉ងធ្វើឧបឃាត ឬផ្តួលរំលំរដ្ឋាភិបាលកម្ពុជា ជាដើម៕