ក្រសួងការបរទេសកម្ពុជា អះអាងថា របបសឹកភូមាកំពុងខិតខំប្រឹងប្រែងក្នុងការអនុវត្តកិច្ចព្រមព្រៀងជាឯកច្ឆន្ទ ៥ចំណុចរបស់អាស៊ាន ដែលបានដាក់ឱ្យរបបសឹកនេះអនុវត្តកន្លងមក បន្ទាប់ពីមានកិច្ចប្រជុំក្រៅផ្លូវការនៅទីក្រុងបាងកក កាលពីថ្ងៃព្រហស្បតិ៍ ជាមួយរដ្ឋមន្ត្រីការបរទេសឡាវ វៀតណាម ថៃ និងភូមា។
ក្រសួងការបរទេសកម្ពុជា បានចេញសេចក្តីប្រកាសព័ត៌មាននៅថ្ងៃទី២៣ ធ្នូ នេះថា កិច្ចប្រជុំក្រៅផ្លូវការនៅប្រទេសថៃនេះ ធ្វើឡើងដើម្បីរកដំណោះស្រាយដោយសន្តិវិធី និងដើម្បីជួយឱ្យប្រទេសភូមាវិលត្រឡប់ទៅរកមាគ៌ាប្រជាធិបតេយ្យវិញ ដែលជាផលប្រយោជន៍របស់ប្រជាជនភូមា និងអាស៊ានទាំងមូល។
ប្រភពដដែលលើកឡើងថា កិច្ចពិគ្រោះយោបល់នេះធ្វើឡើងស្របទៅតាមចំណុចទី១៤ នៃការត្រួតពិនិត្យ និងសេចក្តីសម្រេចរបស់ថ្នាក់ដឹកនាំអាស៊ានលើការអនុវត្តកិច្ចព្រមព្រៀងជាឯកច្ឆន្ទប្រាំចំណុច ដោយគូសបញ្ជាក់ពីសារសំខាន់នៃការស្វែងរកវិធីសាស្ត្រនានា ដែលអាចគាំទ្រដល់កិច្ចខិតខំប្រឹងប្រែងរួមរបស់អាស៊ាន ក្នុងការជួយប្រទេសភូមាបញ្ចប់នូវវិបត្តិដែលកំពុងតែញាំញីសព្វថ្ងៃនេះ។
ការអះអាងនេះ ធ្វើឡើងបន្ទាប់ពីកម្ពុជាចូលរួមកិច្ចប្រជុំក្រៅផ្លូវការជាមួយប្រទេសឡាវ វៀតណាម ថៃ និងភូមា នៅទីក្រុងបាងកក ប្រទេសថៃ កាលពីថ្ងៃព្រហស្បតិ៍ ទី២២ ធ្នូ ស្របពេលកម្ពុជាជិតអស់តួនាទីជាប្រធានអាស៊ានទៅហើយនោះ។
អនុប្រធានវេទិកាពលរដ្ឋ លោក ម៉ែន ណាត ប្រាប់សារព័ត៌មាន The Cambodia Daily នៅថ្ងៃទី២៣ ធ្នូ នេះថា កិច្ចប្រជុំក្រៅផ្លូវការនេះគ្មានបានផលប្រយោជន៍អ្វីក្នុងការដោះស្រាយវិបត្តិនៅប្រទេសភូមា នោះទេ ត្បិតកិច្ចប្រជុំផ្លូវការរបស់អាស៊ានកន្លងមក កម្ពុជាមិនអាចសូម្បីតែរកច្រកសម្រាប់អ្នកតំណាងមិនមែននយោបាយរបស់ប្រទេសភូមា ឱ្យទៅចូលរួមកិច្ចប្រជុំរបស់ខ្លួនបានផងនោះ។
លោក ម៉ែន ណាត លើកឡើងថា ក្នុងនាមប្រធានអាស៊ានរបស់លោក ហ៊ុន សែន មិនត្រឹមតែមិនអាចដោះស្រាយវិបត្តិនៅប្រទេសភូមា តាមគោលការណ៍កុងសង់ស៊ីសរបស់អាស៊ានប៉ុណ្ណោះទេ ប៉ុន្តែបុរសខ្លាំងរូបនេះបានធ្វើឱ្យខូចគោលការណ៍នានា និងនយោបាយការទូតរបស់អាស៊ានថែមទៀត នៅពេលដែលគាត់បានសម្រេចចូលទៅជួបជាមួយមេដឹកនាំរបបសឹកភូមា លោក មីន អ៊ុងឡាំង ដោយអត្តនោម័តិ ហើយបានទាត់ចោលគោលជំហរជុំវិញគោលការណ៍ឯកច្ឆន្ទទាំង ៥ចំណុចរបស់អាស៊ាននៅពេលនោះ។
កាលពីថ្ងៃទី២១ ខែធ្នូ ឆ្នាំ២០២២ នេះ ក្រុមប្រឹក្សាសន្តិសុខអង្គការសហប្រជាជាតិ បានអនុម័តិលើដំណោះស្រាយជុំវិញបញ្ហានៅប្រទេសភូមា ដោយទាមទារឲ្យបញ្ចប់អំពើហិង្សា និងជំរុញឲ្យរបបសឹកភូមាដោះលែងអ្នកទោសនយោបាយទាំងអស់ រួមទាំងអតីតមេដឹកនាំ អ្នកស្រី អ៊ុងសាន ស៊ូជី (Aung San Suu Kyi) ផងដែរ។
ឯកអគ្គរដ្ឋទូតចក្រភពអង់គ្លេសប្រចាំក្រុមប្រឹក្សាសន្តិសុខអង្គការសហប្រជាជាតិ អ្នកស្រី បាបារ៉ា វូដវឺដ (Barbara Woodward) បានអះអាងថា ពួកគេនឹងដោះស្រាយបញ្ហានៅប្រទេសភូមា ឱ្យបានពេញលេញតាមសិទ្ធិ បំណងប្រាថ្នា និងផលប្រយោជន៍របស់ពលរដ្ឋភូមាទាំងអស់។
ទាក់ទិននឹងបញ្ហានេះ កាលពីថ្ងៃទី១១ ខែវិច្ឆិកា ឆ្នាំ២០២២ កន្លងទៅ មេដឹកនាំអាស៊ានបានដាក់លក្ខខណ្ឌរហូតដល់ ១៥ចំណុច ដើម្បីជំរុញឱ្យរបបសឹកភូមា អនុវត្តនូវកិច្ចព្រមព្រៀងជាឯកច្ឆន្ទទាំង ៥ចំណុចឱ្យបាន ទោះត្រូវរកវិធីផ្សេងទៀតបែបណាក៏ដោយ បន្ទាប់ពីការដឹកនាំអាស៊ានរបស់កម្ពុជាអស់រយៈពេល ១ឆ្នាំ ដែលគេមើលឃើញថាស្ថានភាពនៅប្រទេសភូមានៅតែស្ថិតក្នុងស្ថានភាពធ្ងន់ធ្ងរ និងផុយស្រួយដដែលនោះ។
កាលពីអំឡុងខែធ្នូ ឆ្នាំ២០២១ មេដឹកនាំបក្សកាន់អំណាច លោក ហ៊ុន សែន អះអាងថា លោកនឹងធ្វើឱ្យពិភពលោកភ្ញាក់ផ្អើលអំពីយុទ្ធសាស្ត្ររបស់លោកក្នុងការដោះស្រាយវិបត្តិនៅភូមា នៅពេលដែលលោកឡើងធ្វើជាប្រធានអាស៊ានប្តូរវេនឆ្នាំ២០២២ នេះ ប៉ុន្តែចាប់ពីលោកធ្វើជាប្រធានអាស៊ានតាំងពីដើមខែមករា ឆ្នាំ២០២២ មក វិបត្តិភូមានៅតែបន្តកើតមាន ហើយកាន់តែធ្ងន់ធ្ងរជាងមុន និងជាប់គាំងរហូតដល់សព្វថ្ងៃនេះ៕