ចិននៅពេលនេះ កំពុងប្រយុទ្ធប្រឆាំងនឹងការរីករាលដាលនៃជំងឺឆ្លងផ្លូវដង្ហើមដ៏ធ្ងន់ធ្ងរជាថ្មីម្ដងទៀត ដែលប្រទេសនេះគឺជាប្រភពនៃការផ្ទុះមេរោគជំងឺប្រភេទនេះមុនគេ។ នៅពេលពិភពលោកកំពុងចាប់ផ្ដើមស្ងប់ស្ងាត់ដោយពួកគេអាចទប់បានជំងឺឆ្លងដ៏កំណាចនេះ បែរជាចិនជាប្រទេសសេដ្ឋកិច្ចជឿនលឿនលំដាប់ទី២ លើពិភពលោក ចាប់ផ្តើមផ្ទុះជំងឺនេះជាថ្មីម្ដងទៀត។
បើតាមទីភ្នាក់ងារសារព័ត៌មានបារាំង AFP ឲ្យដឹងថា មនុស្សដែលផ្ទុកមេរោគនេះក្នុងខ្លួន ហើយកំពុងតែឆ្លងជាក្រុមមានអាយុពី ៦០ឆ្នាំឡើងទៅ។ នៅតាមបណ្ដាខេត្ត ក្រុង ជាពិសេសនៅក្រុងប៉េកាំង ដែលមានប្រជាជនជិត ២១លាននាក់ កំពុងឆ្លងរាលដាលនៃជំងឺនេះយ៉ាងខ្លាំង។
នៅមន្ទីរពេទ្យជាច្រើនរបស់រដ្ឋធានីមួយនេះ ពោរពេញដោយអ្នកជំងឺដែលភាគច្រើនសុទ្ធសឹងតែជាមនុស្សចាស់។ អ្នកខ្លះបានចាក់វ៉ាក់សាំង ខ្លះទៀតថាពួកគេមិនបានចាក់ទាល់តែសោះសូម្បីម្ដងក៏ដោយ។
នៅពេលដែលពិភពលោកសម្រុកចាក់វ៉ាក់សាំង រដ្ឋាភិបាលកុម្មុយនីស្តចិន សម្រុកចាក់តែនៅលើមនុស្សដែលមានវ័យកំពុងបំពេញការងារ និងក្រោមអាយុ ៦០ឆ្នាំ។ ចំណែកមនុស្សចាប់ពី ៦៥ឆ្នាំឡើងទៅ រដ្ឋាភិបាលចាត់ទុកជាជំហានក្រោយ។ អ្នកឆ្លងជំងឺនេះគឺជាមនុស្សចាស់វ័យជាង ៧០ឆ្នាំមានភាគរយខ្ពស់បំផុត។
លោក Yanzhong Huang អ្នកជំនាញម្នាក់នៅក្រុមប្រឹក្សាទំនាក់ទំនងអន្តរជាតិ បានលើកឡើងថា គោលនយោបាយកូវីដសូន្យដែលចិនបានអនុវត្តកន្លងមក ៣ឆ្នាំនេះ បានធ្វើឲ្យប្រជាជនមិនចាប់អារម្មណ៍រឿងចាក់វ៉ាក់សាំងបង្ការអ្វីនោះទេ។
ចំណុចគុណវិបត្តិ គឺវ៉ាក់សាំងចិន មានប្រសិទ្ធភាពទាបបំផុត បើធៀបនឹងវ៉ាក់សាំងរបស់អាមេរិក និងអឺរ៉ុប។
ជាការពិតណាស់ ទំនុកចិត្តរបស់ប្រជាពលរដ្ឋចិនទៅលើវ៉ាក់សាំងផលិតដោយមន្ទីរពិសោធន៍ចិន គឺជាបញ្ហាដែលនាំឱ្យការចង់ចាក់វ៉ាក់សាំងមានកម្រិតទាបជាងបណ្ដាប្រទេសមួយចំនួន ជាពិសេសប្រទេសនៅទ្វីបអឺរ៉ុប និងអាមេរិក។
តាមការសិក្សាមួយរបស់សាកលវិទ្យាល័យហុងកុង បង្ហាញថា វ៉ាក់សាំងរបស់ចិន ប្រសិនបើចាក់ឲ្យបានគ្រប់ចាប់ពី ៤ដូសឡើងទៅ គឺអាចទប់ទល់មិនឲ្យអ្នកជំងឺឈឺធ្ងន់បាន សម្រាប់អ្នកជំងឺអាយុចាប់ពី ៦០ឆ្នាំចុះក្រោម។
ប៉ុន្តែលោក Xi Chen សាស្ត្រាចារ្យជំនាញនៅសាកលវិទ្យាល័យ Yale យល់ថា ការចាក់វ៉ាក់សាំងចិន ៣ដូសអាចកាត់បន្ថយករណីស្លាប់មិនឲ្យមានច្រើនពិតមែន តែចិនគួរណាស់ចាប់ផ្តើមពិចារណាចាក់វ៉ាក់សាំងប្រភេទ ARN របស់អាមេរិក និងអឺរ៉ុប ដើម្បីឲ្យប្រជាជនរបស់ខ្លួនមានប្រព័ន្ធការពារខ្លួនរឹងមាំ និងយូរអង្វែងទប់ទល់កូវីដ-១៩។
យ៉ាងណា ប្រទេសដែលមានប្រជាជនជាង ១៤០០លាននាក់នេះ បានចាក់វ៉ាក់សាំងតែជាង ១០% ប៉ុណ្ណោះ។
យោងតាមតួលេខផ្លូវការរបស់រដ្ឋចិន ចំនួនអ្នកចាក់វ៉ាក់សាំងបង្ការកូវីដមានត្រឹមជាង ១០% បន្តិចប៉ុណ្ណោះនៃចំនួនប្រជាជនចិន។ តែចំពោះមនុស្សចាស់អាយុចាប់ពី ៨០ឆ្នាំឡើងទៅ រដ្ឋអំណាចចិនសឹងមិនឱ្យពួកគាត់ទទួលបានវ៉ាក់សាំងនោះទេ គឺត្រឹមតែ ១ភាគ៣ ប៉ុណ្ណោះ។
កាលពីថ្ងៃទី២២ ធ្នូ អ្នកសារព័ត៌មាន AFP បានចុះទៅមន្ទីរពេទ្យមួយនៅភាគខាងត្បូងក្រុងប៉េកាំង ដែលនៅពេលនោះគេឃើញសាកសពរបស់មនុស្សចំនួន ៤០នាក់ ត្រូវពេទ្យរុំថង់ប្លាស្ទិក ហើយចំនួនអ្នកដែលស្លាប់ គឺក្នុងរយៈពេលតែ ២ម៉ោងប៉ុណ្ណោះ។ តាមប្រភពដដែលឲ្យដឹងថា សាកសពទាំងនោះសុទ្ធសឹងតែជាមនុស្សចាស់អាយុលើសពី ៧០ឆ្នាំឡើងទៅ ដែលបានស្លាប់ដោយជំងឺកូវីដ-១៩។
តាមដំណឹងចុងក្រោយនេះ អាជ្ញាធរចិន កំពុងកំពុងមមាញឹកក្នុងការដំឡើងគ្រែបន្ថែមទៀតនៅតាមមន្ទីរពេទ្យនានា និងបង្កើតមណ្ឌលគ្លីនិកពិនិត្យជំងឺគ្រុនក្តៅ ហើយការព្រួយបារម្ភជាអន្តរជាតិកំពុងកើនឡើងទៅលើការសម្រេចចិត្តដ៏ភ្ញាក់ផ្អើល ដោយសាររដ្ឋាភិបាលក្រុងប៉េកាំងទម្លាក់ចោលការរឹតបន្តឹង និងការរាំងខ្ទប់។
ប្រទេសចិននៅខែនេះបានចាប់ផ្តើមបន្ធូរបន្ថយជាខ្លាំងនូវគោលការណ៍គ្មានជំងឺកូវីដ-១៩ ដែលគេហៅថាសូន្យកូវីដ ក្រោយពីមានបាតុកម្មផ្ទុះទូទាំងប្រទេសប្រឆាំងរដ្ឋអំណាចបន្ទាប់ពីមនុស្ស ១០នាក់បានស្លាប់ដោយអគ្គិភ័យ ព្រោះពួកគេមិនអាចរត់ចេញពីផ្ទះបានដោយសារអាជ្ញាធរចាក់សោផ្ទះរបស់ពួកគេករណីរាំងខ្ទប់។ ករណីនេះ កើតឡើងនៅក្នុងខេត្តស៊ីនជាំង កាលពីចុងខែវិច្ឆិកា។
វិធានការតឹងតែងប្រឆាំងជំងឺកូវីដ-១៩ នេះ បានរក្សាការរាតត្បាតមិនឱ្យកើនខ្លាំងក្នុងរយៈពេល ៣ឆ្នាំមកនេះ ប៉ុន្តែការធ្វើដូចនេះបានធ្វើឱ្យប៉ះពាល់ជាខ្លាំងទៅលើសង្គម និងសេដ្ឋកិច្ចរបស់ខ្លួនដែលជាប្រទេសមានសេដ្ឋកិច្ចធំបំផុតលំដាប់ទី២ របស់ពិភពលោក បន្ទាប់ពីសហរដ្ឋអាមេរិកនោះ។
ក្រុមអ្នកជំនាញសុខភាពជាច្រើនប៉ាន់ប្រមាណថា ពលរដ្ឋចិនប្រមាណជា ៦០% ឬស្មើនឹង ១០% នៃចំនួនប្រជាជននៅទូទាំងពិភពលោក អាចឆ្លងជំងឺកូវីដ-១៩ ក្នុងពេលប៉ុន្មានខែខាងមុខនេះ ហើយប្រជាជនចិនប្រមាណ ២លាននាក់អាចស្លាប់ដោយសារជំងឺនេះ។
អ្នកនាំពាក្យក្រសួងការបរទេសសហរដ្ឋអាមេរិក លោក Ned Price និយាយថា លទ្ធភាពនៃការបំប្លែងខ្លួននៃវីរុសជំងឺកូវីដនៅពេលវាឆ្លងរាតត្បាតនៅទូទាំងប្រទេសចិននោះ អាចជាការគំរាមកំហែងមួយសម្រាប់ប្រជាជននៅគ្រប់ទីកន្លែងទាំងអស់។
រហូតមកទល់ពេលនេះ រដ្ឋាភិបាលចិនមិនទាន់ប្រកាសជាផ្លូវការថានឹងសុំទិញវ៉ាក់សាំងពីអាមេរិក និងអឺរ៉ុបនៅឡើយទេ ប៉ុន្តែក្រុងប៉េកាំង បានបើកផ្លូវឱ្យស្ថានទូតបរទេសទាំងអស់របស់ពួកអឺរ៉ុប និងប្រទេសផ្សេងៗទៀតអាចនាំវ៉ាក់សាំងរបស់អាមេរិក អង់គ្លេស និងអាល្លឺម៉ង់ មកចាក់ឱ្យបុគ្គលិកស្ថានទូតរបស់ពួកគេបានតាមដែលអាចធ្វើទៅបាន៕