អតីតមន្ត្រីជាន់ខ្ពស់គណបក្សសង្គ្រោះជាតិនៅក្រៅប្រទេស លើកឡើងថា គណបក្សប្រជាជនកម្ពុជាព្យាយាមប្រែខ្លួនពីកងឈ្លបដែលដឹកនាំដោយមេដឹកនាំសល់ពីរបបខ្មៅងងឹត ប្រឹងប្រមូលយកនិស្សិត និងបញ្ញវន្តខ្មែរគ្រប់ទិសទីឱ្យគាំទ្រពួកគេ ខណៈក្រុមអ្នកប្រជាធិបតេយ្យធ្វើឱ្យបាត់បង់កម្លាំងបញ្ញវន្តកាន់តែច្រើនឡើងៗ។
អតីតអគ្គលេខាធិការគណបក្សសង្គ្រោះជាតិនៅក្រៅប្រទេស (CNRP-O) លោក ប៉ុន សៅរី បានសរសេរលើគណនីហ្វេសប៊ុករបស់លោកកាលពីថ្ងៃទី២៥ ធ្នូ ថា គណបក្សប្រជាជនកម្ពុជាដែលមានប្រវត្តិពីអតីតកាលដឹកនាំដោយមេដឹកនាំអវិជ្ជា និងខ្លះទៀតធ្លាប់តែជាកងឈ្លប ឬកម្មាភិបាលរបស់ខ្មែរក្រហម បានចំណាយពេលរាប់ឆ្នាំដើម្បីបណ្តុះបណ្តាលធនធានមនុស្សរបស់ពួកគេឱ្យក្លាយជាបញ្ញវន្តដែលមានជំនាញពេញលេញគ្រប់ៗគ្នានៅពេលនេះ។
លោក ប៉ុន សៅរី លើកឡើងថា ដោយឡែកក្រុមអ្នកប្រជាធិបតេយ្យដែលធ្លាប់តែមាននិស្សិត បញ្ញវន្ត សាស្ត្រាចារ្យ អ្នកស្រាវជ្រាវ អ្នកជំនាញបច្ចេកទេស ឬអ្នកការទូតចូលរួមគួរឲ្យស្ញប់ស្ញែងកាលពីមុន ប្រែជាបាត់បង់ធនធានមនុស្សទាំងនោះអស់ស្ទើរគ្មានសល់នៅក្នុងចលនារបស់ពួកគេនីមួយៗ ខណៈផ្ទៃក្នុងនៃការដឹកនាំរបស់ពួកគេពោរពេញទៅដោយរឿងអយុត្តិធម៌ថែមទៀត។
អតីតមន្ត្រីជាន់ខ្ពស់គណបក្សសង្គ្រោះជាតិរូបនេះបញ្ជាក់ថា ការប្រកួតប្រជែងលើឆាកនយោបាយនៅលើពិភពលោកសព្វថ្ងៃនេះ មិនថាក្នុងបរិបទនៃប្រទេសណាមួយនោះទេ ធនធានមនុស្សដែលមានចំណេះដឹងជ្រៅជ្រះ ដូចជានិស្សិត បញ្ញវន្ត សាស្ត្រាចារ្យ អ្នកស្រាវជ្រាវ អ្នកជំនាញសេដ្ឋកិច្ច ពាណិជ្ជកម្ម អ្នកជំនាញបច្ចេកទេសគ្រប់វិស័យ ឬអ្នកការទូត ជាដើម គឺមានសារសំខាន់ខ្លាំងណាស់ដើម្បីជំរុញចលនានៃគណបក្សនយោបាយនីមួយៗឱ្យរីកចម្រើនទៅមុខ។
លោក ប៉ុន សៅរី គូសបញ្ជាក់ថា បើទោះបីជាបក្សប្រឆាំងធ្លាក់ចុះខ្សោយក៏ដោយ ក៏មិនទាន់ហួសពេលដែរ ឱ្យតែពួកគេអាចដឹកនាំនយោបាយរកការរួបរួមជាមួយអ្នកប្រជាធិបតេយ្យដូចគ្នាឡើងវិញនោះ កម្លាំងអ្នកស្នេហាជាតិនៅតែអាចងើបឡើងគ្រប់ពេល ខណៈពលរដ្ឋក៏ទន្ទឹងរង់ចាំកម្លាំងរបស់ក្រុមប្រឆាំងបែបនេះដែរ។
ការដឹកនាំគណបក្សនយោបាយនៅកម្ពុជា គឺមានតែប៉ូលពីរប៉ុណ្ណោះដែលប្រឈមមុខដាក់គ្នាខ្លាំងក្លា គឺការដឹកនាំតាមបែបប្រជាធិបតេយ្យដែលក្រុមបក្សប្រឆាំងប្រកាន់យក និងការដឹកនាំតាមបែបផ្ដាច់ការដែលគេមើលឃើញថាបក្សកាន់អំណាចរបស់លោក ហ៊ុន សែន កំពុងអនុវត្តសព្វថ្ងៃនេះ ប៉ុន្តែការដឹកនាំរបស់ក្រុមប្រឆាំងបានធ្លាក់ចុះខ្សោយទៅៗដែលបណ្តាលមកពីការបែកបាក់ផ្ទៃក្នុង រហូតធ្វើឱ្យបាត់បង់ធនធានមនុស្សដែលជាបញ្ញវន្តមានចំណេះដឹងជ្រៅជ្រះជាបន្តបន្ទាប់។
ក្រុមអ្នកសង្កេតការណ៍លើកឡើងថា ភាពជោគជ័យរបស់បក្សកាន់អំណាចសព្វថ្ងៃនេះ មិនមែនដោយសារតែពួកគេដឹកនាំប្រទេសបានល្អនោះទេ ប៉ុន្តែដោយសារតែការដឹកនាំរបស់គណបក្សប្រឆាំងខ្សោយពេក ដែលជាមូលហេតុធ្វើឱ្យគណបក្សប្រជាជនកម្ពុជារបស់លោក ហ៊ុន សែន យកឈ្នះលើការដឹកនាំរបស់ពួកគេរហូតមក។
អ្នកតាមដានស្ថានការណ៍កម្ពុជា លោក សុខ សុគន្ធ បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីពេលថ្មីៗនេះថា ការដឹកនាំរបស់បក្សកាន់អំណាចពិតមែនតែមានបញ្ញវន្តចូលរួមគាំទ្រ ប៉ុន្តែរចនាសម្ព័ន្ធរបស់ពួកគេ គឺដើម្បីគ្រួសារនិយមប៉ុណ្ណោះ។ ដូច្នេះ ពួកគេគ្មានមូលដ្ឋានរឹងមាំទេ។
លោកបន្ថែមថា បើទោះបីជាមូលដ្ឋានរបស់ពួកគេមិនរឹងមាំក៏ដោយ ប៉ុន្តែក្រុមប្រឆាំងត្រូវតែធ្វើការអភិវឌ្ឍនូវការដឹកនាំរបស់ខ្លួនបានល្អជាងពេលកន្លងមក នោះទើបអាចទាក់ទាញការចូលរួមពីបញ្ញវន្តខ្មែរបានទៅថ្ងៃមុខ។
លោក សុខ សុគន្ធ បញ្ជាក់ថា ក្រុមប្រឆាំងមិនអាចដឹកនាំតាមបែបបក្ខពួក ឬគ្រួសារនិយមដូចបក្សកាន់អំណាចដាច់ខាត ប៉ុន្តែពួកគេត្រូវបង្រួបបង្រួមគ្នាជាលក្ខណៈជាតិនិយម នោះទើបអាចចងបាច់អ្នកស្នេហាជាតិជាកម្លាំងរឹងមាំ ឆ្ពោះទៅការផ្លាស់ប្ដូរតាមរយៈនៃការបោះឆ្នោតបាន បើមិនធ្វើដូច្នោះទេ ក្រុមប្រឆាំងនឹងទ្រុឌទ្រោមរហូតរលាយខ្លួនថែមទៀតនាពេលអនាគត៕