បុរសខ្លាំង លោក ហ៊ុន សែន ស្នើឱ្យតុលាការ និងនគរបាលយុត្តិធម៌ពិនិត្យមើលអង្គហេតុ និងកិច្ចការងារច្បាប់ឱ្យបានច្បាស់លាស់ មុនចេញដីកាបង្គាប់ឲ្យចុះទៅចាប់ខ្លួននរណាម្នាក់ក្នុងសំណុំរឿងរដ្ឋប្បវេណីដែលមានអ្នកឧកញ៉ាជាដើមបណ្ដឹង។
ថ្លែងក្នុងពិធីបិទសន្និបាតបូកសរុបលទ្ធផលការងារឆ្នាំ២០២២ និងលើកទិសដៅការងារឆ្នាំ២០២៣ របស់ក្រសួងរៀបចំដែនដី នគរូបនីយកម្ម និងសំណង់ នៅរសៀលថ្ងៃទី២៧ ខែធ្នូ នេះ លោក ហ៊ុន សែន រិះគន់តុលាការរបស់លោកថា តុលាការសព្វថ្ងៃរវល់តែរឿងចាប់ រឿងចងទាក់ទងនឹងទំនាស់នានាដែលមានជាប់ពាក់ព័ន្ធជាមួយឧកញ៉ា។
លោក ហ៊ុន សែន បានចោទជាសំណួរថា តើករណីរដ្ឋប្បវេណី តុលាការអាចត្រឹមធ្វើការកោះហៅសិនបានដែរឬទេ ដើម្បីពិភាក្សា និងពិនិត្យមើល? លោកបន្តថា មហាជនភាគច្រើនគេគិតថារូបលោកជាអ្នកបញ្ជាឲ្យចាប់ ទាំងលោកមិនដឹងខ្លួនផងនោះ។
មេដឹកនាំដែលក្រាញអំណាចដោយសារយូរតែងរងការរិះគន់ថា យកប្រព័ន្ធតុលាការធ្វើជាឧបករណ៍អំណាចរូបនេះ សំណូមពរដល់អ្នកដែលទទួលបន្ទុកជាមេបញ្ជាការនគរបាលយុត្តិធម៌ កុំចេះតែទៅចាប់ខ្លួនពលរដ្ឋទាំងងងឹតងងុល។
ការលើកឡើងនេះ បន្ទាប់ពីបុគ្គលិកបំពេញការងារនៅក្នុងទូរទស្សន៍បាយ័នម្នាក់ដែលត្រូវបានតុលាការចេញដីកាឱ្យចាប់ខ្លួន ដោយចោទប្រកាន់ថាបានគប់គិតជាមួយឈ្មួញលក់ដីខ្យល់។ បញ្ហានេះទំនងជាមានទំនាស់ជាមួយអ្នកឧកញ៉ាផងដែរ ទើបឈានទៅដល់ការចាប់ខ្លួនបុគ្គលិកទូរទស្សន៍បាយ័នបែបនេះ។
ទូរទស្សន៍បាយ័នត្រូវគេដឹងថាជាទូរទស្សន៍ក្នុងស្រុកមួយគ្រប់គ្រងដោយកូនស្រីរបស់លោក ហ៊ុន សែន គឺអ្នកស្រី ហ៊ុន ម៉ាណា។
លោក ហ៊ុន សែន អះអាងថា ក្រោយពីលោកក្ដាប់បានអង្គហេតុទាំងនេះ លោកបានបញ្ជូនមេធាវីរបស់លោកទៅការពារក្តីឱ្យបុគ្គលិកបាយ័ន ហើយបានធានាឱ្យរូបគេនៅក្រៅឃុំសិន។ លោកហាក់បង្ហាញអារម្មណ៍មិនជឿថា បុគ្គលិកទូរទស្សន៍បាយ័នបានប្រព្រឹត្តបទល្មើសឆបោកប្រាស់លើករណីដីធ្លីជាង ៣៦លានដុល្លារ តាមការចោទប្រកាន់ឡើយ ព្រោះលោកស្គាល់បុគ្គលនោះច្បាស់ថាមានជីវភាព «ក្ររកតែបាយហូបមិនចង់បានផងនោះ»។
លោក ហ៊ុន សែន អះអាងថា បុគ្គលិកបាយ័នត្រូវមេធាវីបង្គាប់ទាមទារលុយ ៥ពាន់ដុល្លារ។
ក្រុមអ្នកឃ្លាំមើលនិយាយថា ការខឹងសម្បារបស់លោក ហ៊ុន សែន ទៅលើមន្ត្រីតុលាការដោយសារមន្ត្រីរូបនោះបានចាប់ខ្លួនបុគ្គលិកទូរទស្សន៍របស់កូនស្រីលោក ដែលកំពុងគ្រប់គ្រងតែប៉ុណ្ណោះ ប៉ុន្តែលោក ហ៊ុន សែន អាចសាទរប្រសិនបើមន្ត្រីតុលាការរូបនោះចាប់ខ្លួនបុគ្គលិកទូរទស្សន៍ណាដែលមាននិន្នាការខាងប្រជាធិបតេយ្យ ឬបុគ្គលិកទូរទស្សន៍ដែលហ៊ានលាតត្រដាងពីអំពើពុករលួយនៃគ្រួសាររបស់លោក។
កាលពីចុងឆ្នាំ២០២១ ក្រុមអង្គការសង្គមស៊ីវិលក្នុងស្រុកបានចេញសេចក្ដីថ្លែងការណ៍រួមគ្នា ដោយអំពាវនាវដល់រដ្ឋាភិបាលលោក ហ៊ុន សែន ឱ្យបញ្ឈប់ការប្រើប្រាស់ប្រព័ន្ធតុលាការជាឧបករណ៍គាបសង្កត់សិទ្ធិសេរីភាពពលរដ្ឋ ដោយត្រូវពង្រឹងស្ថាប័ននេះឱ្យក្លាយជាស្ថាប័នឯករាជ្យស្របតាមរដ្ឋធម្មនុញ្ញវិញ។
ចំណែកអង្គការគម្រោងយុត្តិធម៌ពិភពលោក (World Justice Project) បានដាក់ប្រទេសកម្ពុជាក្នុងចំណាត់ថ្នាក់អន់បំផុតលំដាប់ទី២ ផ្នែកនីតិរដ្ឋ ក្នុងរបាយការណ៍ឆ្នាំ២០២១ ខណៈសន្ទស្សន៍ប្រចាំឆ្នាំរបស់អង្គការតម្លាភាពអន្តរជាតិវិញបង្ហាញថា ប្រព័ន្ធយុត្តិធម៌កម្ពុជាបន្តរួមរឹតដោយអំពើពុករលួយ៕