តុលាការសហរដ្ឋអាមេរិកសម្រេចឱ្យមន្ត្រីក្រសួងកសិកម្ម រុក្ខាប្រមាញ់ និងនេសាទ ដែលពាក់ព័ន្ធនឹងការរត់ពន្ធសត្វស្វាព្រៃ ឬស្វាក្តាមខុសច្បាប់ នៅក្រៅឃុំជាបណ្ដោះអាសន្ន ប៉ុន្តែត្រូវតាមដានដោយប្រព័ន្ធ GPS ភ្ជាប់នឹងកជើង។
ក្រសួងកសិកម្ម រុក្ខាប្រមាញ់ និងនេសាទ បានសរសេរលើទំព័រហ្វេសប៊ុករបស់ខ្លួននៅថ្ងៃទី២៨ ខែធ្នូ ឆ្នាំ២០២២ ថា ការតស៊ូតាមផ្លូវច្បាប់ឱ្យមន្ត្រីពីប្រទេសកម្ពុជាទាំងអស់ រួមទាំងលោក គ្រី ម៉ះផល ឱ្យនៅក្រៅឃុំបណ្ដោះអាសន្ននៅពេលនេះ គឺជាជំហានដ៏វិជ្ជមានមួយក្រោមការជួយជ្រោមជ្រែងពីស្ថានទូតរាជាណាចក្រកម្ពុជាប្រចាំសហរដ្ឋអាមេរិក ក្រសួងការបរទេស និងសហប្រតិបត្តិការអន្តរជាតិ និងរាជរដ្ឋាភិបាលប្រទេសកម្ពុជា។
ប្រភពដដែលអះអាងថា ករណីលោក គ្រី ម៉ះផល នឹងត្រូវឆ្លងកាត់នីតិវិធីតាមផ្លូវតុលាការអាមេរិកាំងនៅពេលក្រោយទៀត ខណៈរាជរដ្ឋាភិបាលកម្ពុជានឹងបន្តផ្តល់ជំនួយផ្លូវច្បាប់គ្រប់បែបយ៉ាងរហូតសំណុំរឿងនេះឈានដល់ទីបញ្ចប់។
ប្រភពដដែលបញ្ជាក់ថា នេះជាកាតព្វកិច្ចរបស់រាជរដ្ឋាភិបាលកម្ពុជា ដើម្បីស្វែងរកយុត្តិធម៌ជូនមន្ត្រីរបស់ខ្លួន បន្ទាប់ពីលោក គ្រី ម៉ះផល ជួបបញ្ហាអំឡុងពេលបំពេញបេសកកម្មនៅបរទេស ដើម្បីរកផលប្រយោជន៍ជូនជាតិ។
កាលពីថ្ងៃទី២៧ ខែធ្នូ ឆ្នាំ២០២២ ប្រធាននាយកដ្ឋានសត្វព្រៃ និងជីវចម្រុះ លោក គ្រី ម៉ះផល បានចូលខ្លួនទៅតុលាការរដ្ឋផ្លរីដា ម្តងទៀតដើម្បីបំពាក់ប្រព័ន្ធតាមដាន GPS សាជាថ្មី បន្ទាប់ពីតុលាការបានសម្រេចឱ្យមន្ត្រីរូបនេះនៅក្រៅឃុំបណ្ដោះអាសន្នកាលពីថ្ងៃទី២២ ខែធ្នូ កន្លងទៅនេះ។
ប្រធាននាយកដ្ឋានសត្វព្រៃ និងជីវចម្រុះ លោក គ្រី ម៉ះផល ត្រូវបានសមត្ថកិច្ចអាមេរិកចាប់នៅអាកាសយានដ្ឋានអន្តរជាតិ ចនអេហ្វ កេណ្ណេឌី (John F. Kennedy) ក្នុងរដ្ឋញូវយ៉ក សហរដ្ឋអាមេរិក កាលពីថ្ងៃទី១៦ ខែវិច្ឆិកា ឆ្នាំ២០២២ កន្លងទៅ ពាក់ព័ន្ធនឹងការរត់ពន្ធសត្វស្វាព្រៃ ឬស្វាក្តាមខុសច្បាប់ ខណៈអគ្គនាយករដ្ឋបាលព្រៃឈើ លោក កែវ អូម៉ាលីស ក៏ត្រូវបានចោទប្រកាន់ក្នុងករណីដូចគ្នានេះដែរ ប៉ុន្តែអគ្គនាយករដ្ឋបាលព្រៃឈើរូបនេះកំពុងមានសេរីភាពនៅប្រទេសកម្ពុជានៅឡើយ។
ការចាប់ខ្លួននេះ ធ្វើឡើងអំឡុងពេលដែលមន្ត្រីកម្ពុជារូបនេះធ្វើដំណើរទៅចូលរួមកិច្ចប្រជុំលើកទី១៩ នៃអនុសញ្ញាអន្តរជាតិស្ដីពីការការពារសត្វ និងរុក្ខជាតិជិតផុតពូជ សាយតេស (CITES) ដែលធ្វើឡើងនៅប្រទេសប៉ាណាម៉ា ក្នុងនោះបុគ្គលិក ៦នាក់ផ្សេងទៀតរបស់ក្រុមហ៊ុន Vanny Bio Research ក៏ត្រូវបានចោទប្រកាន់ក្នុងករណីដូចគ្នានេះដែរ។
ជុំវិញការចាប់ខ្លួនប្រធាននាយកដ្ឋានសត្វព្រៃនេះ នៅថ្ងៃទី១៧ វិច្ឆិកា កន្លងទៅ ក្រសួងការបរទេសកម្ពុជា និងក្រសួងកសិកម្ម បានបង្ហាញការខកចិត្តយ៉ាងខ្លាំង និងជំរុញឱ្យរដ្ឋាភិបាលអាមេរិកដោះលែងលោក គ្រី ម៉ះផល ជាបន្ទាន់។ ជាងនេះទៀត ក្រសួងការបរទេសប្រទេសកម្ពុជាក៏បានប្ដេជ្ញាស្វែងរកយុត្តិធម៌ឱ្យមន្ត្រីទាំងពីររូបរបស់ខ្លួនផងដែរ។
ការិយាល័យមេធាវីសហរដ្ឋអាមេរិក កាលពីថ្ងៃទី១៦ ខែវិច្ឆិកា ឆ្នាំ២០២២ បានចេញសេចក្តីរាយការណ៍ថា ជនសង្ស័យទាំង ៨នាក់ត្រូវបានចោទប្រកាន់ថាពាក់ព័ន្ធនឹងការសមគំនិតក្នុងការរត់ពន្ធសត្វព្រៃ និងការនាំចូលដោយខុសច្បាប់ ដោយប្រតិបត្តិការហិរញ្ញវត្ថុ និងការដឹកជញ្ជូនសត្វស្វារាប់រយក្បាលក្រោមឯកសារក្លែងបន្លំទៅកាន់រដ្ឋផ្លរីដា (Florida) និងរដ្ឋតិចសាស់ (Texas) តាមរយៈក្រុមហ៊ុនស្រាវជ្រាវផ្នែកជីវសាស្ត្រឯកជនមួយឈ្មោះ វ៉ាន់នី បាយអូ រីស៊ើច (Vanny Bio Research) របស់ចិនពីហុងកុង (Hong kong) នៅក្នុងខេត្តពោធិ៍សាត់ នៃប្រទេសកម្ពុជា។
ប្រភពដដែលបញ្ជាក់ថា ចន្លោះពីខែមីនា ដល់ខែតុលា ឆ្នាំ២០២០ ក្រុមហ៊ុន វ៉ាន់នី បាយអូ រីស៊ើច (ខេមបូឌា) បានចំណាយប្រាក់ចំនួន ២,៥លានដុល្លារអាមេរិក ដើម្បីទិញសត្វស្វាព្រៃពីទីផ្សារងងឹតចំនួន ១ម៉ឺន ៤ពាន់ក្បាល ដែលជាមធ្យមគឺប្រហែល ៦០ ទៅ ៧០ក្បាលក្នុងមួយថ្ងៃៗ។
ទាក់ទិននឹងបញ្ហានេះ ក្រសួងកសិកម្ម រុក្ខាប្រមាញ់ និងនេសាទ បានបង្ហាញសេចក្តីរាយការណ៍របស់ខ្លួនកាលពីពេលកន្លងទៅថា ប្រទេសកម្ពុជាមានក្រុមហ៊ុនបង្កាត់ពូជស្វាក្ដាម ៦ទីតាំង គឺនៅរាជធានីភ្នំពេញ ខេត្តកំពង់ធំ សៀមរាប កំពង់ចាម កំពង់ស្ពឺ ពោធិ៍សាត់ និងខេត្តកំពង់ឆ្នាំង ដែលមានស្វាក្ដាមជាង ១៣ម៉ឺន ៩ពាន់ក្បាលក្នុងពេលបច្ចុប្បន្ននេះ៕