បុរសខ្លាំងកម្ពុជាដែលឧស្សាហ៍ព្រមានកម្ទេចក្រុមប្រឆាំង លោក ហ៊ុន សែន អះអាងថាគណបក្សដែលអាចថែរក្សាសន្តិភាពជូនប្រទេសកម្ពុជា និងប្រជាពលរដ្ឋខ្មែរ គឺមានតែគណបក្សប្រជាជនកម្ពុជាតែមួយគត់។
ប្រធានគណបក្សកាន់អំណាច លោក ហ៊ុន សែន លើកឡើងក្នុងពិធីបើកការដ្ឋានស្ដារផ្លូវជាតិក្នុងភូមិសាស្ត្រខេត្តកំពត នៅថ្ងៃទី៣០ ខែធ្នូ ឆ្នាំ២០២២ ថា បើគ្មានសន្តិភាព កុំស្រមៃដល់ការអភិវឌ្ឍឱ្យប្រទេសជាតិរីកចម្រើន ដូច្នេះគណបក្សប្រជាជនកម្ពុជានៅតែប្ដេជ្ញាការពារសន្តិភាពជូនប្រជាជន និងប្រទេសជាតិឱ្យបានដាច់ខាតទៅថ្ងៃអនាគត។
បុរសខ្លាំងកម្ពុជា លោក ហ៊ុន សែន អះអាងថា ទោះបីជារដ្ឋាភិបាលជំនាន់បារាំងគ្រប់គ្រងកម្ពុជា ឬសម័យសង្គមរាស្ត្រនិយមដែលដឹកនាំដោយសម្តេចព្រះ នរោត្តម សីហនុ និងសម័យខ្មែរក្រហមដែលដឹកនាំដោយ ប៉ុល ពត ក៏មិនអាចគ្រប់គ្រងទឹកដីបានទាំងមូលដែរ ប៉ុន្តែសម្រាប់កម្ពុជាដែលដឹកនាំដោយរូបលោក គឺអាចគ្រប់គ្រង និងបង្រួបបង្រួមទឹកដីបានទាំងមូលដែលគ្មានកម្លាំងប្រដាប់អាវុធណាមួយត្រូវបានបំបែកខ្លួន ដើម្បីធ្វើឱ្យមានសង្គ្រាមលើទឹកដីកម្ពុជានោះឡើយ។
មេដឹកនាំខ្មែរក្រាញអំណាចជាង ៤ទសវត្ស លោក ហ៊ុន សែន បញ្ជាក់ថា ជាក់ស្តែងនៅពេលនេះ សមាសភាពអ្នកដែលធ្លាប់តែកាន់កាំភ្លើងប្រឆាំងនឹងរដ្ឋាភិបាលរបស់លោក គឺបានមករួបរួមជាមួយគណបក្សប្រជាជនកម្ពុជាទាំងអស់ ដូចជាសមាសភាពមកពីគណបក្សហ៊្វុនស៊ិនប៉ិច សមាសភាពមកពីរណសិរ្សរំដោះប្រជាពលរដ្ឋខ្មែរ និងសមាសភាពរបស់ក្រុមខ្មែរក្រហម ជាដើម ដែលនេះគឺជាសមិទ្ធផលដ៏ធំធេងនៃការរក្សាសន្តិភាពរបស់គណបក្សប្រជាជនកម្ពុជា។
ស្ថាបនិកអង្គការអភិវឌ្ឍន៍ផ្នត់គំនិត លោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី៣០ ធ្នូ នេះថា ការអះអាងរបស់ប្រមុខរាជរដ្ឋាភិបាលកម្ពុជា លោក ហ៊ុន សែន គឺជារឿងមិនពិត ហើយក៏ជាសារនយោបាយប្រជាភិថុតិដែរ។
លោកបន្ថែមថា សន្តិភាពនៅកម្ពុជាគឺចាប់ផ្តើមកើតមាននៅពេលដែលគ្រប់ភាគីទាំងអស់នៅកម្ពុជាព្រមចូលតុចរចានៅទីក្រុងប៉ារីស ប្រទេសបារាំង ឆ្នាំ១៩៩១ ដែលបង្កើតបានជាកិច្ចព្រមព្រៀងអន្តរជាតិមួយដែលមានការឯកភាពគ្នារវាងភាគីខ្មែរ និងខ្មែរ និងហត្ថលេខីទាំង ១៨ប្រទេសផ្សេងទៀត។
លោក សេក សុជាតិ លើកឡើងថា ដោយសារតែមានកិច្ចព្រមព្រៀងនេះ ទើបភាគីខ្មែរទាំង ៤ ដូចជាភាគីរដ្ឋកម្ពុជាដឹកនាំដោយលោក ហ៊ុន សែន ភាគីហ៊្វុនស៊ិនប៉ិចដឹកនាំដោយសម្តេចក្រុមព្រះ ភាគីរណសិរ្សជាតិរំដោះប្រជាពលរដ្ឋខ្មែររបស់លោកតា សឺន សាន និងភាគីខ្មែរក្រហមដែលដឹកនាំដោយ ប៉ុល ពត បានយល់ព្រមទម្លាក់អាវុធចរចាគ្នាដើម្បីរកសន្តិភាព ដូច្នេះបើគ្មានកិច្ចព្រមព្រៀងនេះទេ ភាគីខ្មែរទាំង៤ ច្បាស់ជាច្បាំងគ្នាមិនដឹងថ្ងៃណាចប់នោះឡើយ។
ស្ថាបនិកអង្គការអភិវឌ្ឍន៍ផ្នត់គំនិតរូបនេះបញ្ជាក់ថា សន្តិភាពនៅកម្ពុជាមិនមែនកើតឡើងដោយបុគ្គលណា ឬបក្សណាទេ ប៉ុន្តែគឺកើតឡើងដោយសារកិច្ចព្រមព្រៀងសន្តិភាពទីក្រុងប៉ារីសប៉ុណ្ណោះ ព្រោះថាដោយសារតែកិច្ចព្រមព្រៀងនេះហើយទើបកម្លាំងកងទ័ពពីគ្រប់ភាគីត្រូវបានកាត់បន្ថយ រួមទាំងគ្រឿងសព្វាវុធត្រូវបានទម្លាក់ចុះជាបណ្តើរចាប់ពីពេលនោះមក។
បែបនេះក្តី កាលពីថ្ងៃទី១៣ ខែកុម្ភៈ ឆ្នាំ២០២២ លោក ហ៊ុន សែន បានទទួលពានរង្វាន់សន្តិភាពស៊ុនហាក់ សម្រាប់ឆ្នាំ២០២២ ពីអង្គការអាជីវកម្មសាសនាមួយនៅប្រទេសកូរ៉េខាងត្បូង។ ក្នុងនោះ លោក ហ៊ុន សែន អះអាងថា ពានរង្វាន់ដែលលោកទទួលបាន គឺជាការបង្ហាញឱ្យឃើញនូវការដឹកនាំប្រកបដោយសន្តិភាពរបស់លោកអស់រយៈពេលជាង ៤០ឆ្នាំមកនេះ។
យ៉ាងណាក៏ដោយ ក្រុមអ្នកសង្កេតការណ៍រិះគន់ថា ទាល់តែពិភពលោកនេះដូរការគិតឲ្យតម្លៃលើអំពើផ្ដាច់ការ អំពើឧក្រិដ្ឋកម្ម អំពើអយុត្តិធម៌ ការបង្ហូរឈាមមនុស្សតាមទំនើងចិត្ត ការធ្វើឲ្យប្រជាពលរដ្ឋស្លូតត្រង់ឈឺចាប់ហូរទឹកភ្នែក និងអំពើលក់ជាតិឯង ជាដើម ទើបពាក្យសន្តិភាពរបស់លោក ហ៊ុន សែន មានតម្លៃ។
ទាក់ទិននឹងការដឹកនាំរបស់លោក ហ៊ុន សែន ជាង ៤០ឆ្នាំមកនេះ អង្គការ Freedom House បានចេញរបាយការណ៍របស់ខ្លួននៅឆ្នាំ២០២២ នេះថា ប្រព័ន្ធនយោបាយរបស់ប្រទេសកម្ពុជាត្រូវបានលោកនាយករដ្ឋមន្ត្រី ហ៊ុន សែន គ្រប់គ្រងផ្ដាច់មុខទាំងស្រុង ក្នុងនោះគណបក្សប្រឆាំង បណ្ដាញសារព័ត៌មានឯករាជ្យ អ្នកតវ៉ាទាមទារសិទ្ធិសេរីភាព និងប្រជាពលរដ្ឋខ្មែររស់នៅក្នុងភាពភ័យខ្លាចគ្រប់ៗគ្នា៕